Read Yucateco 1 Reyes 11 Bible Online

1 Reyes 11 - Yucateco bible

1 Reyes 11

¹Ajaw Salomone' tu yaabiltaj u x ch'upul paal faraón, bey xan tu yaabiltaj u láak ya'abcach co'olelo'ob x táanxel lu'umilo'ob: x moabitaob, x amonitaob, x edomitaob, x sidomitaob yéetel x hititaob;

²u co'olelilo'ob le múuch' caajo'obo', u ya'almaj ca'ach Yuumtzile' ma' unaj u dzo'ocol u beel le j israelitaob x yéetelo'obi', tumen je'el u beetico'ob u kéechel u pucsi'ikalo'ob tu paach le beetbil kuobo'. Ba'ale' Salomone' tu yaabiltaj le co'olelo'obo' ca tu nupubáa tu yéetelo'ob.

³Yanji' setecientos u yatano'ob, x ch'upul paalal taalaja'ano'ob ti' u ki'ikel ajawo'ob, yéetel trecientos u x keecho'ob u yéet cajtalo'ob, lelo'oba' tu beetajo'ob u kéechel u pucsi'ikal Salomón.

⁴Le ca'aj nuxibchaj Salomone' beeta'ab u kéechel u pucsi'ikal tumen u yatano'ob u ti'al u bin tu paach beetbil kuob, tumen ma' jach u kububáa ca'ach ti' Yuumtzil u Ku, je'el bix tu kubilacubáa David u taatae'.

⁵Salomone' tu kultaj Astarté, u x ku le j sidoniobo', tu kultaj xan Milcom, jun túul j p'ecbe'en ku le j amonitaobo'.

⁶Bey túuno' le ba'alo'ob tu beetaj Salomono' kaas lúubic tu táan Yuumtzil tumen ma' j bin tu paach tu yéetel jaaj óolal, je'el bix David u taatae'.

⁷Ti' le kiino' Salomone' tu beetaj te j pu'uc yaan tu lakin Jerusaleno', jun p'éel kulnaj u ti'al Quemos u j p'ecbe'en ku le Moabitaob yéetel ti' Moloc, u j p'ecbe'en ku le j amonitaobo'.

⁸Bey tu beetilac u ti'al tuláacal u táanxel lu'um yatano'ob, leti'obe' cu kubico'ob poom yéetel quíimsbil ba'alche'ob ti' u kuob.

⁹Yuumtzil u Junab Ku Israele' p'u'uj tu yéetel Salomón tumen u pucsi'ikale' tu tzelaj ti' le máax chíicpaj ti' ca'a téene'

¹⁰Yuumtzile' u ya'almaj ca'ach ti' Salomón ma' u kultic u láak kuob, ba'ale' leti'e' ma' tu yu'ubaj le ba'ax a'ala'ab ti' tumen Yuumtzilo'.

¹¹Le t óolale' Yuumtzile' tu ya'alaj ti' Salomón: Tu yo'olal ta beetaj le ba'alo'ob beyo', ma' xan ta dzo'ocbesaj u ya'almaj t'aanilo'ob le nup t'aan tin wa'alaj ti' teche', bíin in ca'aj in lukes ti' teech le ajawila' u ti'al ca in dzáa ti' jun túul a palitzil.

¹²Ba'ale' tu yo'olal in yaabilaj ti' David a taatae', ma' bíin in beet ca'aliquil cuxa'anechi', ba'ale' yaan in lukesic ti' a paal.

¹³Quex ma' bíin in lukes tuláacal u ajawilil: tumen yaan in p'atic jun p'éel u múuch' u cajtalil u láaktzililo'ob, tu yo'olal in yaabilaj ti' a taata yéetel ti' Jerusalén, le caaj in yéeymajo'.

¹⁴Yuumtzil túune' tu beetaj u líikil jun túul aj p'eec u ti'al u ba'atelt Salomón; Hadad, jun túul edomil, cu taalbal ti' u ch'i'ibal u ajawil Edom.

¹⁵Le ca pa'ab u muuk u caajilo'ob Edom tumen Devide', Joab u náacom le u aj ba'atelo'ob, j bin u ti'al u muc le j quíimo'ob ich ba'atelo', tu quíimsaj tuláacal u j xiibilo'ob Edom;

¹⁶j p'áat buul seis winalo'ob tu lu'umil Edom tu yéetel tuláacal le j israelitaob, tac ca tu xu'ulsaj tuláacal u xiibilo'ob Edom.

¹⁷Ba'ale' Hadad, ca'aliquil chan paal ca'ache', j púudz Egipto tu yéetel dze'edzec u yéet lu'umilo'ob u palitzilo'ob ca'ach u taata.

¹⁸Jóoko'ob Madiane' ca j kucho'ob Parán, tu'ux tu ch'a'ajo'ob dze'edzec xiibo'ob u ti'al u meyajtico'ob. J kucho'ob Egiptoe' ca j bino'ob tu táan faraón u ajawil Egipto, faraone' tu dzaj naj ti'ob yéetel janal, ca tu síaj lu'umo'ob ti'ob.

¹⁹Hadade' j kuch u náajalt u yutzil faraón, ca j dza'ab ti' u ti'al u yatanint u quiic Tahpenes u yatan faraón.

²⁰U quiic Tahpenese' tu síijsaj ti' Hadad jun túul paal tu kaaba'intaj Genubat, ch'íijsa'ab tumen Tahpenes tu jalach naj faraón, pa'ate' yéetel u paalal.

²¹Ba'ale' le ca tu yojéeltaj Hadad tu caajil Egipto, dzo'oc u quíimil David, bey xan dzo'oc u quíimil Joab u náacom aj ba'atelo'obe', tu ya'alaj Hadad ti' faraón: Cha'a in suut tin lu'um.

²²Faraone' tu núucaj ti': ¿ba'ax téen a káat suut ta lu'um? ¿Yaan wa ba'ax cu bineltic ti' teech way tin wicnale'? Hadade' tu núucaj: Mix ba'al cu bineltic ti' teen, ba'ale' quin káat óoltic ti' teech ca cha'a' in suut.

²³Kue' tu beetaj xan u líikil Rezón u ba'atelt Salomón. Rezone' u paal ca'ach Eliada, le máax j púudz ca'ach ti' Hadad-ezer, u ajawil Soba,

²⁴Rezone' dzo'oc ca'ach u much'quintic wa jay túul j xiibo'ob, leti'e' u nojchil jun múuch' oocolo'ob. Le ca j quíimsa'ab u yéet j oocolo'ob tumen Davide', Rezone' j bin tu noj caajil Damascoe' ca tu beetajubáa ajaw.

²⁵U aj p'eec u caajil Israel ca'aliquil cuxa'an ca'ach Salomón, pa'ate' yéetel le kaas cu beetic ca'ach Hadade', tumen jach u p'ectmaj ca'ach Israel. Bey kuchic Rezón u beet u ajawil siriao'.

²⁶Bey xan Jeroboam, u paal Nabat, j líik u ba'atelt ajaw, Jeroboame' jun túul u nojoch aj meyaj ca'ach Salomón, ti' u taalbal ti' u caajil Sereda ti' u ch'i'ibalo'ob Efraín, u maamae' jun túul x quimen íicham cu kaaba'intic Zerúa.

²⁷Jeroboame' j líik u ba'atelt ajawe': tumen Salomone' iquil u táaxcuntic lu'ume', tu kalaj ca'ach u t'úut'ul bejil u caajal David u taata.

²⁸Jeroboame' jun túul j mu'uka'an j xiib u kubmaj ca'ach u yóol ti' ba'ax cu beetic, le ca tu yilaj Salomón jach t'a'aj meyaj le j xi'ipalo', tu dzaj u nojochil ti' tuláacal u baluba'ob u ch'i'ibalo'ob Jose'.

²⁹Jun p'éel kiine' jóok Jeroboam tu caajil Jerusalén, te j bejo' tu nuptáantajubáa yéetel aj bóobat Ahías j siloil, u tep'majubáa yéetel jun p'éel túumben teep'. Tu ca'a túulalo'ob chéen tu juunalo'ob yanilo'ob te j káaxo',

³⁰Ahiase' tu lukesaj le túumben teep' u dzaamaj ca'acho' ca tu jataj doce u xéexet'al

³¹ca tu ya'alaj ti' Jeroboam: Ch'a'a' a ti'alint diez u xéexet'alo'ob, tumen Yuumtzil, u Ku Israele' cu ya'alic ti' teech: Bíin in ca'aj in lukes le ajawil ti' Salomón, u ti'al ca in dzáa ti' teech diez u ch'i'ibalo'ob.

³²Ti' Salomone' bíin in p'at chéen jun p'éeli' tu yo'olal in yaacunaj ti' in palitzil David yéetel ti' Jerusalén, le caaj in yéeymaj ichil tuláacal u caajilo'ob u ch'i'ibalo'ob Israel.

³³Tumen Salomone' dzo'oc u cúulpachcuntiquen, tu yo'olal táan u kultic Astarté, u x ku le j sidoniobo'; táan u kultic Quemos u ku le j moabitaobo'. Yéetel táan u kultic Milcom, u ku le j amonitaobo' ma' utz tin wóol ba'axo'ob cu beetiqui', yéetel ma' tu dzo'ocbesaj in wa'almaj t'aano'ob yéetel in ca'ansajo'ob je'el bix tu beetaj David u taatae'.

³⁴Chéen ba'ale' ma' bíin in lukes ti' tuláacal le ajawilo', yaan in p'atic bey jalach ca'aliquil cuxa'ane', tu yo'olal in yaacunaj ti' in palitzil David máax tin yéeyaj, tumen leti'e' tu dzo'ocbesaj in nu'ucbe'en t'aano'ob yéetel in wa'almaj t'aano'ob.

³⁵Ba'ale' bíin in lukes le ajawil ti' u paal u ti'al ca in kub ti' teech; u káat ya'ale' diez u ch'i'ibalo'ob.

³⁶Chéen jun p'éel u ch'i'ibalo'ob bíin in p'at ti' u paal u ti'al ma' tu'upul u quib David in palitzil tin táan, ichil u caajil Jerusalén, le caaj tin yéeyaj u ti'al in kaaba'o'.

³⁷Tene' bíin in ch'a'ech u ti'al ca ajawnaquech yóokol tuláacal le ba'ax a káate' yéetel u ti'al u ajawil Israel.

³⁸Wa ca dzo'ocbesic tuláacal le ba'ax bíin in wa'al ti' teche', wa ca beetic ba'ax toj tu táan in wich, wa ca dzo'ocbesic in wa'almaj t'aano'ob yéetel in nu'ucbe'en t'aano'ob, je'el bix tu beetaj David in palitzile', tene' bíin yanaquen ta wéetel, yéetel yaan in p'atic utzil jedzecnac a ch'i'ibal, je'el bix tin beetilac yéetel u ch'i'ibal Davide'; yaan in kubic israel ti' teech.

³⁹Wa tu yo'olal u ch'i'ibal Davide', yaan in jadzic tu yo'olal lelo', ba'ale' ma' u ti'al ya'aabcach ja'abo'obi'.

⁴⁰Tu yo'olal lelo' Salomone' tu yóoltaj u quíims Jeroboam; Ba'ale' Jeroboame' j púudz Egipto, tu'ux ca'ach cu ajawil Sisac, j p'áat te'elo', tac ca j quíim Salomón.

⁴¹U yalab u tzicbalil u cuxtal Salomón, u na'at yéetel tuláacal ba'ax tu beetaje', dzíibta'an tu ju'unil u cuxtal Salomón.

⁴²Salomone' ajawnaj Jerusalén tu yóokol tuláacal Israel cuarenta ja'abo'ob,

⁴³le ca j quíime' j mu'uc tu caajal David u taata. Cu dzo'ocole' ajawnaj Roboam u paal.