Read Yucateco 1 Reyes 12 Bible Online

1 Reyes 12 - Yucateco bible

1 Reyes 12

¹Roboame' j bin Siqueme', tumen tuláacal Israel j bin Siquem u ti'al u dzáic ajawil'.

²Ba'ale' tu yojéeltaj Jeroboam, u paal Nabat, ca'aliquil ti' yaan ca'ach Egiptoe', tu'ux tu ta'acbesajubáa ca j púudz ti' ajaw Salomón ca j p'áat cajtali'.

³Le ca j túuxta'ab j t'anbile', Jeroboam yéetel tuláacal u caajil Israele' j bino'ob j t'aan yéetel Roboam, ca tu ya'alajo'ob ti':

⁴A taatae' tu sen loolob méektáanto'on bejela'e' teche' sáalcunt j cuuchi', ca c meyajtech.

⁵Roboame' tu núucaj ti'ob: Xeene'exe' suunaque'ex a wilene'ex ichil óox p'éel kiino'ob. Le caajo' j bini,

⁶ajaw Roboam túune' j bin u káat chi'it ti' u nucuch wíiniquilo'ob le caajo', le máaxo'ob meyajtic ca'ach ajaw Salomón u taata ca'aliquil cuxa'an ca'ache'. Ca tu káat chi'itaj ti'ob: ¿Ba'ax ca wa'alique'ex ti' teen u ti'al ca in núuc ba'ax cu káatico'ob le máaco'oba'?

⁷Leti'obe' tu ya'alajo'ob ti': Wa ca dzáicabáa a meeyajt le caaj bejela'a', bey xan ca núuquic ba'ax cu káatico'ob yéetel utzil t'aano'obe', leti'obe' ma' bíin lúubuc u yóolo'ob u meyajtiquecho'obi'.

⁸Ba'ale' Roboame' ma' tu dzaj óoltaj u t'aano'ob u nucuch wíiniquilo'ob le caajo', ba'ale' j bin u yil le táanquelem paalal máaxo'ob u yéet ch'íijaco', cu meyajo'ob tu yicnale',

⁹ca tu káat chi'itaj ti'ob: ¿Ba'ax ca wa'alique'ex teen u ti'al ca in núuc ti' le máaco'ob cu káatico'ob ca in sáalcunt le cuuch j dzaab ti'ob tumen in taatao'?

¹⁰Le j táanquelem paalal u yéet ch'íijaco', tu ya'alajo'ob ti': Ti' le máaco'ob dzo'oc u káatico'ob ti' teech ca a sáalcunt le cuuch j dzaab ti'ob tumen a taatae', unaj a núuquic ti'ob beya': wa in taata tu dzaj aal cuuch ti' te'exe', tene' asab aal cuuch bíin in dzáa ta wóokole'ex,

¹¹wa leti' tu dzaj jun p'éel cuuch aale' tene' bíin in beet u asab aaltal; wa leti' cu jadzique'ex ca'ach yéetel u jíijilal kéewelo'obe', tene' yaan in jadzique'ex yéetel jadzabo'ob yaan u ni'ob fierro u ca'aj.

¹²Tu yóox p'éel kiine' suunaj Jeroboam yéetel tuláacal le caaj tu táan Roboam, je'el bix tu ya'alaj ca'ach ajawo'.

¹³Ba'ale' kaas núuca'abic u t'aano'ob tumen ajaw, ma' tu beetaj le ba'ax a'ala'ab ca'ach ti' tumen u nucuch wíiniquilo'ob le caajo',

¹⁴tu ca'a ya'alaj le ba'ax a'ala'ab ti' tumen le j táanquelem paalalo', wa bin u taata tu dzaj ti'ob jun p'éel cuuch aale', leti'e' yaan u dzáic asab aal cuucho'ob, wa u taata tu jadzo'ob yéetel jíijilal kéewelo'obe', leti'e' yaan u jadzico'ob yéetel jíijilal yaan u ni'ob fierro u ca'ajo'ob.

¹⁵Ajaw túune' ma' tu yóoltaj u beet ba'ax u káat le caajo', tumen Yuumtzile' tu yóoltaj ca úuchuc beyo', u ti'al ca béeychajac le ba'ax tu séeb chi'itaj ca'ach ti' Jeroboam, tu chi' u paalal Ahías, le j Siloile'.

¹⁶Le ca tu yilaj tuláacal u caajil Israel ma' u'uya'ab ba'ax tu káataje', tu núucaj ti' ajaw beya': ¡Mix ba'al yaan c il yéetel David! ¡Mix jun p'éel ayikalil yaan u ti'al c ti'alint yéetel u paal Isaí! ¡Israelitaex suunene'ex ta wotoche'ex Davide' u canant u láaktzilo'ob! Tu' séeblaquile', le j israelitaobo' suunajo'ob tu yotocho'ob.

¹⁷Le j israelitaob cajacbalo'ob ca'ach tu caajilo'ob judao', Roboam ajawtico'ob.

¹⁸Tumen Roboame' le ca tu túuxtaj Adoram, u mayolcoolil le meyaj x ma' bo'olilo', Adorame' j quíimsa'ab yéetel ch'iin tumen tuláacal Israel. Ajaw Roboam túune' tu séeblaquil na'ac tu bolane' ca j púudz tu caajil Jerusalén.

¹⁹Bey úuchic u líikil tuláacal Israel u ba'atelt u ch'i'ilancab David tac bejela'e'.

²⁰Le ca tu yojéeltaj Israel dzo'oc u suut Jeroboame', tu túuxtajo'ob t'anbil u ti'al ca taalac tu táan le caajo' u ti'al ca dza'abac u méektáant tuláacal u cajnáalilo'ob Israel, mix máac j p'áat tu tzéel u ch'i'ilancab David, chéen u ch'i'ibalo'ob Judá.

²¹Le ca j kuch Roboam tu caajil Jerusalene', tu much'quintaj ciento ochenta mil yéeybil aj ba'atelo'ob ichil tuláacal u láaktzililo'ob Judá yéetel ti' u ch'i'ibalo'ob Benjamín u ti'al u bin u ba'atelt Israel tu yo'olal u ca'a ti'alintic le ajawilo'.

²²Ba'ale' Kue' tu t'anaj Semaías, jun túul u j palitzil Kue', ca tu ya'alaj ti':

²³A'al ti' Roboam, u paal Salomón u ajawil Judá, yéetel ti' tuláacal u láaktzililo'ob Benjamín je'el bix ti' tuláacal le caajo',

²⁴Tene' quin wa'alic ma' u bino'ob j ba'atel yéetel u sucu'uno'ob le j israelitaob, suunaco'ob tu yotocho'ob tumen bey dzo'oc in wa'alic ca úuchuco'. Le ca tu yu'ubajo'ob ba'ax cu ya'alic Yuumtzile' suunajo'ob je'el bix a'ala'ab ti'ob tumen le Yuumtzilo'.

²⁵Jeroboame' tu ca'a líiksaj u caajil Siquem, le yaan ca'ach tu pu'uquil Efraine', ca j p'áat cajtali'. Cu dzo'ocole' tu yutzquintaj xan Penuel,

²⁶Ba'ale' tu tucultaj: U ch'i'ilancab Davide' je'el u páajtal u ca'a ti'alintic le ajawila',

²⁷wa cu bino'ob le máaco'ob Jerusalén u ti'al u kubo'ob quíimsbil ba'alche'ob tu kulnaj Yuumtzile' Bíin u ca'a u'uyo'ob yaacunaj tu yo'olal Roboam, u ajawil Judá.

²⁸Cu dzo'ocol u káat chi'itic ma'alob le ba'ala', ajawe' tu beetaj ca'a túul mejen wacaxo'ob oro u ca'ajo'ob, ca tu ya'alaj ti' le caajo': Te'exe' israelitaex dzo'oc a bine'ex ya'ab u téenel tu caajil Jerusalén. Je'el a kuexo'oba', le máaxo'ob tu jóokesaje'ex tu lu'umil Egiptoo'.

²⁹Tu dzaj túun jun p'éele' Betel, u láak jun p'éele' tu dzaj Dan.

³⁰Lela' tu beetaj u kebanchajal Israel, tumen le máaco'ob cu bino'ob ca'ach Betel yéetel Dan u ti'al u kultico'ob.

³¹Tu beetaj xan chéen manba'al kulnajo'ob, ca tu ya'alaj máaxo'ob u aj kiinilo'ob le caajo', ichil le máaxo'ob ma' ti' u ch'i'ibal Leví u taalo'obi'.

³²Bey xan tu chu'unbesaj jun p'éel kiinkuj tu kiinil quince tu winalil ocho, je'el bix le kiinkuj cu beeta'al Judae', leti' xane' tu kubaj quíimsbil ba'alche'ob tu yóokol u multuunil kultaj. Lela' tu beetaj Betel, ca'aliquil táan u kubic quíimsbil ba'alche'ob ti' le wacaxo'ob tu beetajo', bey xan tu dzaj aj kiino'ob u ti'al le manba'al kulnajo'ob tu beetajo'.

³³Bey túuno' tu kiinil quince tu winalil ochoe', Jeroboame' tu kubaj quíimsbil ba'alche'ob yóokol u multuunil kultaj tu beetaj ca'ach Betelo'. Lela' u winalil u kiinbesa'al le tu tucultaj u beetic je'el bix tu yóoltilaque', ca tu ya'alaj kiinkuj u ti'al tuláacal le j israelitaob, láili' ti' le winalo' na'ac ti' u multuunil kultaj u ti'al u tóoquic poom.