Read Yucateco 1 Reyes 13 Bible Online

1 Reyes 13 - Yucateco bible

1 Reyes 13

¹Jeroboame', táan ca'ach u tóoquic poom tu yóokol u multuunil kultaj ca j kuch Betel jun túul u aj bóobatil Judá túuxta'an tumen Yuumtzil.

²Tu yo'olal u j túuchi' t'aan Yuumtzile', j ka'am t'aanaj yo'olal le u multuunil kultajo', ca tu ya'alaj: U multuunil kultaj; Yuumtzile' dzo'oc u ya'alic: ti' u ch'i'ilancabil Davide' bíin síijic jun túul chaan pal, bíin u kaaba'int Josías, leti' bíin u quíimbes ta wokol u aj kiinilo'ob le manba'al kultnajo'obo' máaxo'ob cu tóoquico'ob poom; ta wokolo', ta wóokol bíin u toco'ob u baaquelo'ob máaco'ob.

³Ti' le kiino', le aj bóobato' tu dzaj jun p'éel máactzil u ti'al chíiculalil. Tu ya'alaj: Lela' leti' u nojoch máactzil Yuumtzil cu dzáic ti' teech le péectzila': Le u multuunil kultajo' yaan u xiixcunta'al, u ta'anile' bíin ki'itpajac xaan.

⁴Le ca tu yu'ubaj ajaw Jeroboam le xot kiin tu ka'am a'alaj le aj bóobat tu yo'olal u multuunil kultaj yaan Betelo', tu tich'aj u kab ca tu ya'alaj: ¡Mache'ex! Ba'ale' le kab tu tich'aj u ti'al u ye'esico', túuch' p'áatic ma' j páatji' u péecsiqui'.

⁵Ti' le súutuco' le u multuunil kultajo' j xiixchaji', u ta'anil le káako' ki'itpajo'ob je'el bix le chíiculal tu túuchi'itaj Yuumtzil ca a'ala'ac tumen le aj bóobato'.

⁶Ajaw túune' tu t'anaj le aj bóobato' ca tu ya'alaj ti': Quin káat óoltic ti' teech ca payalchi'inaquech tin wo'olal ti' Yuumtzil a Ku, u ti'al ca utzchajac in kab. Le aj bóobato' káat olnaj ti' Yuumtzil, u kab le ajawo' utzchají j p'áat je'el bix ca'ache'.

⁷Cu dzo'ocole' le ajawo' tu ya'alaj ti' le aj bóobato': Co'oten tin wéetel tin wotoch, u ti'al ca a jaant wa ba'ax, bin in ca'aj in dzáa ti' teech jun p'éel siibal.

⁸Ba'ale' le aj bóobato' tu núucaj ti' le ajawo': Quex ca a dzáa ti' teen táancoch ti' le a jalach naje', ma' bíin xi'iquen ta wéeteli', mix bíin in jaant waaj, mix bíin in wuk ja' te j cúuchila',

⁹tumen bey tu ya'alajilac ti' teen Yuumtzil. Bey tu ya'alajilaca': Ma' bíin a jaant waaj, mix a wukic ja', mix a suut te j bej tu'ux taalecho'.

¹⁰Le aj bóobato' j bin ti' yaanal bej, u ti'al ma' u suut te j bej tu'ux j bin ca'ach Betelo'.

¹¹Ti' le kiino'obo' cajacbal ca'ach Betel jun túul aj bóobat nuxib, u paalale' j taalo'ob ca tu tzicbaltajo'ob tuláacal le ba'ax tu beetaj Betel ti' le kiinac le aj bóobato', u aj bóobatil Judá, bey xan tu tzicbaltajo'ob ti' u taata ba'ax xan tu ya'alaj ca'ach le ajawo'.

¹²Ca j káat chi'ita'ab ti'ob tumen u taata: ¿Tu'ux bejil j bini? ca j éesa'ab ti' tumen u paalal le bej tu'ux suunaj ca'ach u aj bóobatil Judá.

¹³Ca túun tu ya'alaj ti' u paalal: Nu'ucbese'ex teen le burroo' Leti'obe' tu beetajo'ob beyo', le aj bóobato' tu nat'aj,

¹⁴ca j bin tu paach u aj bóobatil Judá. Ca tu nup táantaj culucbal yáanal jun cul béec, ca tu káat chi'itaj ti': ¿Teech wa le aj bóobat j taalech tac tu lu'umil Judá? Leti'e' tu núucaj: teen

¹⁵Le aj bóobat nuxibo' tu ya'alaj: Co'oten tin wotoch u ti'al a jaant waaj tin wéetel.

¹⁶Ba'ale' u aj bóobat Judae' tu núucaj ti': Ma' tu páajtal in láakintiquech, mix in wocol ta wotoch, mix in jaantic waaj mix in wukic ja' ta wéetel te j cúuchila':

¹⁷Tumen Yuumtzile' jach tu ya'alaj ti' teen: Ma' a jaantic waaj mix a wukic ja' waye', mix bíin suunaquech láili' te j bej tu'ux j binecho'.

¹⁸Ba'ale' le j nuxibo' tu babal a'alaj: Teen xane' aj bóobaten, je'el bixecho', jun túul u aj túuchi' Yuumtzile' tu ya'alaj ti' teen ca in bisech tin wotoch ca in dzáa ti' teech ba'al a jaant yéetel a wuke. Quex tumen táan ca'ach u tu'usul tumen le nuxibo',

¹⁹u aj bóobatil Judae' j bin tu yéetel, jaani yéetel j ukunaj tu yotoch.

²⁰Culucbalo'ob te j táas che'o', Yuumtzile' tu t'anaj le j nuxib aj bóobat máax tu beetaj u suut u aj bóobatil Judao',

²¹le aj bóobat nuxibo' tu ka'am a'alaj ti' le aj bóobato': Yuumtzile' dzo'oc u ya'alic, tu yo'olal ta x ma' u'uyaj t'antaj le ba'ax tu ya'alaj ti' teche',

²²tumen j suunajech janal yéetel ukul tu'ux tu ya'alaj Yuumtzil ma' a suute', a wíinclile' ma' bíin je'elec tu mucnal a máanja'an ch'i'ibalo'obi'.

²³Ca j dzo'oc u janal yéetel u yukul u aj bóobatil Judae', le nuxibo' tu nu'ucbesaj le burroo'.

²⁴U aj bóobatil Judae' j bini, ba'ale' te j bejo' nactáanta'ab tumen jun túul león ca j quíimsa'abi, u wíinclile' j p'áat pectal te j bejo'. Chéen ba'ale' le burroo' yéetel le leóno' j p'áato'ob tu yicnal le quimeno'.

²⁵Ti' lelo' j máan dze'edzec máaco'obe', ca tu yilajo'ob le quimen pequecbal te j bejo', le leóno' láili' ti' yaan tu yicnale'. Le ca j kucho'ob te j caaj tu'ux caja'an le aj bóobat nuxibo' tu tzicbaltajo'ob ti', le ba'ax tu yilajo'obo'.

²⁶Ca tu yojéeltaj le aj bóobat nuxibo' le máax tu beetaj u suut le u láako', tu ya'alaj: Lela' leti' le aj bóobat ma' tu beetaj ba'ax a'ala'ab ti' tumen Yuumtzilo'. Let óolale' j ku'ub tumen Yuumtzil ti' jun túul león, u ti'al ca xe'exet'a'ac yéetel ca quíimsa'ac, je'el bix úuchic u ya'alic Yuumtzile'.

²⁷Tu séeblaquile' tu ya'alaj ti' u paalal ca nu'ucbesa'ac jun túul burro ti', leti'obe' tu beetajo'ob beyo'.

²⁸Le j nuxib túuno' j bine' ca tu nup táantaj le quimen tudzucbal te j bejo', tu tzéele' ti' yano'ob le j burroo' yéetel le leóno'. le leóno' ma' tu jaantaj le quimeno' mix tu xe'exet'aj le burroo'.

²⁹Le aj bóobat nuxib túuno' tu líikesaj u wíinclil u aj bóobatil Judao', tu dzaj tu yóokol le burroo' ca j suunaj te j caajo', u ti'al u yaj óoltic quíimic yéetel u muquic.

³⁰Tu mucaj tu mucnal leti', ca tu yokoltaj, táan u ya'alic: ¡Ay, in láaktzil!

³¹Cu dzo'ocol u muquique', tu ya'alaj ti' u paalal: Le quéen quíimiquene', muquene'ex te j mucnal tu'ux dzo'oc in muquic u j palitzil Kuo'. Dza'ex in baaquelo'ob pa'ate' yéetel u baaquelo'ob,

³²Tumen ma' bíin p'áatac ma' dzo'ocpajal le ba'ax tu ya'alaj tu kaaba' Yuumtzil tu yo'olal le multuunil kultaj yaan Betelo', yéetel tu yo'olal u manba'al kulnajo'ob yaan tu caajilo'ob Samaria.

³³Quex beyo', Jeroboame' ma' tu p'ataj u kaakas cuxtali', ca tu dzaj aj kiino'ob ichil u cajnáalilo'ob le caajo' u ti'al meyajo'ob ti' manba'al u multuunilo'ob kultaj. Je'el máaxac u káate', Jeroboame' tu sutaj aj kiinil u ti'al le multuunil kultajo'obo'.

³⁴Lela' leti' j beet u kebanchajal u ch'i'ibal Jeroboam, láili' tumen le lelo' láaj xu'ulsabo'ob jun puli'.