Read Yucateco 1 Reyes 14 Bible Online

1 Reyes 14 - Yucateco bible

1 Reyes 14

¹Ti' le kiino'obo', Abías u paal Jeroboame', j koja'anchaji.

²Jeroboame' tu ya'alaj ti' u yatan: Péenen, dzáa jun p'éel tus búuc u ti'al ma' a kaj óolta'al wa in watanech, xeen Silo. Te'elo' ti' cajacbal aj bóobat Ahías le máax tu ya'alaj yaan in beetiquinbáa u ajawil le múuch' caaja'.

³Ch'a'a diez piimpim waajo'ob yéetel jun p'éel pichel caab, xeen a wilej ca u ya'al ti' teech bix bíin xi'ic ti' le chaan palo'.

⁴Bey tu beetajilac u yatan Jeroboamo'. Tu nu'ucbesajubae' ca j bin Silo, ca j kuch tu yotoch Ahías. Ahíase' dzo'oc ca'ach u jáawal u paacat tumen táan u bin u mina'anchajal u sáasilil u yich tu yo'olal u nuxibil.

⁵Ba'ale' dza'ab ca'ach u yojéelt tumen Yuumtzile', yaan u bin u yatan Jeroboam u ti'al j t'aan tu yéetel tu yo'olal koja'an u chaan pal. Tu dzaj xan u yojéelt ba'ax u najmal u núuquic ti', bey xan tu ya'alaj bíin kuchuc u dzaamaj jun p'éel tus búuc.

⁶Le ca j u'uya'ab u xíimbal tumen Ahías u ti'al u yocbal te j najo', tu ya'alaj ti': Oquen u yatan Jeroboam. ¿Ba'ax teen ca beeticabáa beyech u láak x co'olele'? Dzo'oc u ya'ala'al ti' teen ca in keyaj t'aantech,

⁷bey túuno' suunen ca a wa'al ti' Jeroboam, Yuumtzil u Ku Israele', dzo'oc u ya'alic: Teen tin jóokesajech ichil le caajo', ca tin dzajech u jo'ol póopil in caajal Israel.

⁸Teen tin lukesaj le ajawil ti' u ch'i'ilancab David, u ti'al in dzáa ti' teech. Ba'ale' teche' ma' j béeychajech je'el bix David in palitzil, máax tu dzo'ocbesaj in nu'ucbe'en t'aano'ob tu tzaypachtajen yéetel tuláacal u pucsi'ikal, tuláacal ba'ax tu beetaje' toj tin wiljilac;

⁹teche' asab kaas a máan ti' tuláacal máaxo'ob cuxlajo'ob táanil ti' teech; teche', u ti'al a beetic in p'u'ujule' ta beetaj u láak kuob, bey xan ta beetaj u yoochelo'ob yéetel yi'ibil fierro, bey xan dzo'oc a kex óoltiquen.

¹⁰Let óolale' bíin in taas kaas tu yóokol a ch'i'ibal; bíin in beet u quíimil tuláacal a j xiibil ch'i'ibalo'ob tu lu'umil Israel; mix jun túul bíin p'áatac cuxa'ani'. Yaan in míistic tuláacal a ch'i'ibal, je'el bix u míista'al ta'e'.

¹¹A láaktzilo'obe' bíin quíimico'ob way j caaje', peeko'ob bíin jaantico'ob; le bíin quíimico'ob j káaxe' bíin lu'ukuco'ob tumen j ch'úuyo'ob, tumen teen Yuumtzile', bey dzo'oc in wa'alico'.

¹²Bey túuno', co'olel líiken, xeen ta wotoch, chéen p'el a kuchul te j caajo', le chaan palo' bíin quíimic.

¹³Tuláacal túun Israele' bíin okolnac tu yo'olal le chaan palo', cu dzo'ocole' cu mu'ucul; tumen chéen leti' ti' ichil u ch'i'ibal Jeroboam bíin yanac u mucnal. Tumen ti' tuláacal u ch'i'ibal Jeroboame', chéen ti' leti' dzo'oc u yantal ba'ax u ti'al j lúubul utzil ti' Yuumtzil.

¹⁴Cu dzo'ocole' yaan u dzáic tu caajil Israel jun túul ajaw bíin u xu'uls u ch'i'ilancab Jeroboam ti' u kiinil, bejela'a' u chu'unpajale'.

¹⁵Yuumtzile' bin u ca'aj u tíit Israel je'el bix u yúunta'al le sakabo'ob tumen le áalcab ja'o'. Yaan u joquic ti' le ma'alob lu'um tu dzaj ti' u máanja'an ch'i'ibalo'ob, ca u pul náach ti' u yáalcab ja'il Éufrates, tu yo'olal úuchic u beetic u yoochelo'ob Asterté, ba'ax beet u p'u'ujul Yuumtzil.

¹⁶Yuumtzile' bíin u kub Israel tu yo'olal le kebano'ob tu beetaj Jeroboamo', yéetel tu beetajilac u kebanchajal Israel.

¹⁷U yatan túun Jeroboame' j líike' ca j bini, ca j kuch Tirsa; chéen p'elac tu pe'echa'atilac u jool u yotoche', le chaan palo', j quíimi'.

¹⁸Tuláacal u caajil Israel j bin u ti'al u muuquil, ca j okolnaj tu yo'olal, je'el bix tu ya'alajilac Yuumtzil tu chi' aj bóobat Ahías u j palitzil.

¹⁹U yalab u tzicbalil u cuxtal Jeroboam, le ba'atelo'ob tu beetaj, yéetel u chuucáan u ba'alilo'ob u ajawilile', ti' dzíibta'an tu dzíibil ju'unilo'ob u ajawilo'ob Israele'.

²⁰Jeroboame' ajawnaj veintidós ja'abo'ob, cu dzo'ocol u quíimile' ajawnaj Nadab tu jalach káanche' u taata.

²¹Roboam u paal Salomone' ajawnaj Judá. Yaan ca'ach cuarenta yéetel jun ja'ab ca tu cáajsaj u ajawil, ajawnaj diecisiete ja'abo'ob Jerusalén, le caaj tu yéeyaj Yuumtzil ichil tuláacal u caajilo'ob u ch'i'ibalo'ob Israel, bey u cúuchil u cajtal u kaaba'e'. U maama Roboame' cu kaaba'intic ca'ach Naama, x amonita ca'achi.

²²Ba'ale' Roboame', tu beetaj ba'axo'ob kaastaco'ob tu yich Yuumtzil, tu asab beetaj u p'u'ujul ti' tuláacal le kebano'ob tu beetajo'ob u máanja'an ch'i'ibalo'obo',

²³tumen leti'ob xane' tu beetajo'ob manba'al kulnajo'ob bey xan tu quili'ichcuntajo'ob tuunicho'ob yéetel chuun che'ob ti' tuláacal ca'anal múul, yéetel tu yáanal tuláacal che'ob piim u le'ob.

²⁴Bey xan le j xiibilo'ob cajnáalo'ob te j múuch' caajo'obo' cu weeyanquilo'ob ichil u kultajo'ob, cu beetico'ob ca'ach tuláacal ba'alo'ob subtzil, je'el bix cu beeta'al tumen tuláacal le j ma' ocsaj óolalo'ob múuch' caajo'obo', j tojolch'inta'abo'ob tumen Yuumtzil tu táan le j israelitaobo'.

²⁵Tu cinco ja'abilo'ob jo'op'oc u ajawil Roboame', Sisac, u ajaw Egiptoe' j bin u ba'atelt Jerusalén,

²⁶ca tu ch'a'aj u ayikalil u kulnaj Yuumtzil yéetel u ayikalil le jalach najo'. Tu láaj ch'a'aj, tu bisaj xan tuláacal le chimalo'ob oro u ca'aj u beetmaj ca'ach Salomono'.

²⁷Ajaw Roboame' tu beetaj u ti'al u jeelinto'obe' chimalo'ob bronce u ca'ajo'ob, ca tu p'ataj canantbilo'ob tumen u aj nuuquilo'ob le máaxo'ob canantico'ob u jool le jalach najo'.

²⁸Ti' je'el ba'alac súutuquil cu bin ajaw tu kulnaj Yuumtzile', cu bisa'alo'ob tumen le aj canano'ob. Cu dzo'ocole' cu sutico'ob u ti'al u dza'ob tu najil tu'ux cu yúuchul canano'.

²⁹U yalab u tzicbalil u cuxtal Roboam yéetel tuláacal ba'ax tu beetaje', ti' dzíibta'an tu dzíibil ju'unilo'ob u ajawilo'ob Judae'.

³⁰Mantadz yanji' ba'atelo'ob ichilo'ob Roboam Yéetel Jeroboam.

³¹Le ca j quíim Roboame' j mu'uc yéetel u máanja'an ch'i'ibalo'ob tu caajil David. U maamae' tu kaaba'intaj ca'ach Naama, x Amonil ca'achi. Cu dzo'ocole' ajawnaj Abiam tu káanche' u taata.