Read Yucateco 1 Reyes 15 Bible Online

1 Reyes 15 - Yucateco bible

1 Reyes 15

¹Abiame' ajawnaj tu lu'umil Judá, j chu'unpaj tu ja'abil dieciocho, ti' u ajawil Jeroboam, u paal Nabat.

²Ajawnaj Jerusalén óox p'éel ja'abo'ob. U kaaba' ca'ach u maamae' Maaca, u x ch'upul paal Absalón.

³Abiame' tu beetaj láili' le kebano'ob tu beetaj u taatao', ma' tu kubaj u pucsi'ikal ti' Yuumtzil u Ku, je'el bix tu kubilac u pucsi'ikal David u máanja'an ch'i'ibale'.

⁴Ba'ale' tu yo'olal u yaacunaj ti' Davide', Yuumtzile' tu beetaj ma' u xu'ulul u ch'i'ilancabil tu caajil Jerusalén, le ca tu dzaj u paal tu jalach káanche' cu dzo'ocol leti'e', ca tu p'ataj xan jedzenac Jerusalén;

⁵tumen Davide' tu bisajubáa ma'alob tu táan Yuumtzil, tuláacal u kiinilo'ob u cuxtal, mix jun téen tu tzelajubáa ti' le ba'ax a'ala'ab ti'o', wa ma' chéen tu yo'olal le ba'ax úuch ti' yéetel Urías le j hititae'.

⁶Mantadz ba'atelnaj Roboam yéetel Jeroboam ca'aliquil cuxa'an Roboam. bey xan ba'atelnaj Abiam yéetel Jeroboam. U yalab u tzicbalil u cuxtal Abiam yéetel tuláacal le ba'ax tu beetaje', ti' dzíibta'an tu dzíibil ju'unil u ajawilo'ob Judae'.

⁸Le ca j quíim Abiame', j mu'uc tu caajal David. Cu dzo'ocole' ajawnaj tu káanche' u taata, Asa u paal.

⁹Tu cáasaj Asa u ajawtic Judá ti' u ja'abil veinte ti' u ajawil Jeroboam tu lu'umil Israel.

¹⁰Ajawnaj Jerusalén cuarenta ja'abo'ob. U chiiche' tu kaaba'intaj Maaca, u ch'upul paal ca'ach Absalón,

¹¹Le ba'axo'ob tu beetaj Asae' utzchajo'ob tu táan Yuumtzil, je'el bix le ba'axo'ob tu beetaj David u máanaja'an ch'i'ibale'.

¹²Tu tojolch'intaj te j lu'umo' le máaco'ob cu weeyanquil ichil u kultajo'obe', tu lukesaj tuláacal le patbil kuob beeta'ano'ob ca'ach tumen u máanja'an ch'i'ibalo'ob.

¹³Tu lukesaj ti' x Maaca u chiich u kaaba'intic x maama ajaw, tumen tu túuxtaj beetbil ca'ach jun p'éel u yoochel Asera. Asae' tu pa'aj ca tu tóocaj tu t'o'ol ja'il Cedrón.

¹⁴Quex tumen ma' lukesa'ab le j manba'al kulnajo'obo', Asae' ma' tu kex óoltaj Yuumtzili',

¹⁵5a tu dzaj tu kulnaj Yuumtzil tuláacal le oro yéetel le plata tu jun páaycuntajo'ob ti' Yuumtzil, u taata yéetel leti'.

¹⁶Mantadz ba'atelnaj tu baatzilo'ob Asa yéetel Baasa u ajaw u lu'umil Israel.

¹⁷Le ca j bin Baasa u ba'atelt Judae', tu tuulumtaj Ramá u ti'al u kalic u beel u ajawil u lu'umil Judá.

¹⁸Asa túune' tu ch'a'aj tuláacal le oro yéetel le plata yaan ca'ach tu ayikalilo'ob u kulnaj Yuumtzil yéetel le yaan xan tu jalach najo', ca tu túuxtaj yéetel u aj meyajo'ob ti' Ben-adad, u ajawil Siria, u paal ca'ach Tabrimón u yáabil Hezión, cajacbal ca'ach tu noj caajil Damasco, bey xan tu túuchi'itaj le péectzila':

¹⁹Co'ox beetic jun p'éel nup t'aan, je'el bix tu beetajo'ob c taata'obe'. Táan in túuxtic ti' teech oro yéetel plata bey jun p'éel siibale', xot' pa'a' le nup t'aan ta beetaj yéetel Baasa u ajawil u lu'umil Israele', beyo' je'el u jáawal u chi'ichnaccunsiquene'.

²⁰Ben-adade' tu éejemtaj le ba'ax tu ya'alaj ajaw Asao', ca tu túuxtaj u náacomo'ob u ti'al u ba'atelto'ob u caajilo'ob Israel. Ca tu pa'aj u muuk Ijón, Dan, Abel-bet-Maaca, tuláacal Cineret yéetel tuláacal u lu'umil Neftalí.

²¹Le ca tu yojéeltaj Baasae', tu p'ataj u tuulumtic Ramá ca j suunaj Tirsa.

²²Ajaw Asa túune' tu túuxtaj t'anbil tuláacal Judá, ca láaj taalaco'ob, ca tu lukesaj Ramá le tuunicho'ob yéetel le che' j meyajnaj ca'ach ti' Baasa u ti'al u tuulumtico', yéetelo'obe' ajaw Asae' tu tuulumtaj u caajil Geba u ti'al Benjamín yéetel Mizpa.

²³U yalab u chuca'an tzicbalil Asa yéetel le talam nucuch ba'alo'ob tu beetajo', bey xan le caajo'ob tu beetajo', ti' dzíibta'an tu dzíibil ju'unil u ajawilo'ob Judae'. Tu ch'ija'anile' koja'anchaj Asa ti' u yooc;

²⁴le ca j quíime' j mu'uc yéetel u máanja'an ch'i'ibalo'ob tu caajil David. Cu dzo'ocole' ajawnaj tu káanche' Josafat u paal.

²⁵Tu ca'a p'éel ja'abil méektáanac Asa Judae', Nadab, u paal Jeroboame', cáaj u méektáantic Israel, u ajawe' xáanchaj ca'a p'éel ja'abo'ob.

²⁶Ba'ale' tu beetaj ba'alo'ob kaastaco'ob tu táan Yuumtzil; je'el bix le kebano'ob tu beetaj u taatae', yéetel lelo'oba' tu beetaj u kebanchajal le j israelitaobo'.

²⁷Ba'ale' Baasa u paal Ahías, máax ti' u taalbal ti' u múuch' u ch'i'ibalo'ob Isacare', j líik u ba'atelte, ca tu quíimsaj tu caajil Gibetón, jun p'éel u caajal le filisteob, Nadabe' táan ca'ach u bakpachtic yéetel tuláacal u aj ba'atelo'ob le j israelitaob.

²⁸J Nadabe' quíimsa'ab tumen j Baasa tu yóox p'éel ja'ab u méektáan j Asa tu lu'umil Judá, ca xan j ajawnaj tu káanche'.

²⁹Chéen p'elac u chu'unsic u méektáane' tu quíimsaj tuláacal u láaktzilo'ob Jeroboam. Je'el bix tu ya'alajilac Yuumtzil tu chi' Ahías le j siloile'. Baasae' tu láaj xu'ulsaj u láaktzilo'ob Jeroboam. Ma' tu p'ataj mix jun túul cuxa'ani'.

³⁰Lela' j úuch beyo' tu yo'olal u kebano'ob Jeroboame', tu beetaj u kebanchajal le j israelitaob, ca tu sen beetaj u p'u'ujul Yuumtzil, u Ku Israel.

³¹U yalab u tzicbalil u cuxtal Nadab yéetel tuláacal le ba'alo'ob tu beetaje', dzíibta'an tu dzíibil ju'unil u ajawilo'ob Israel.

³²Mantadz ba'atelnaj Asa yéetel Baasa u ajawil Israel.

³³Tu yóox p'éel ja'abo'ob táan u méektáantic Asa u lu'umil Judae', Baasa u paal Ahíase' jo'op u méektáantic u lu'umil Tirsa yéetel tuláacal u lu'umil Israel, méektáanaj veinticuatro ja'abo'ob.

³⁴Ba'ale' tuláacal ba'axo'ob tu beetaj Baasa láaj kaastac tu táan Yuumtzil láili' je'el bix le keban tu beetaj Jeroboam, le ca tu beetaj u kebanchajalo'ob le j israelitaobo'.