Read Yucateco 1 Reyes 16 Bible Online

1 Reyes 16 - Yucateco bible

1 Reyes 16

¹Yuumtzil túune' tu t'anaj Jehú, u paal Hanani, u ti'al ca xi'ic u ya'al ti' Baasa:

²Teen tin líikesajech j lu'um ca tin dzajech nojochil tu lu'umil Israel in caajal. Ba'ale' teche' láili' beyech Jeroboame', dzo'oc a beetic u kebanchajal Israel in caajal. Dzo'oc a beetic in pu'ujul yéetel a kebano'ob.

³Le t óolale', j Baasa bin in ca j in xu'ulsech pa'ate' yéetel tuláacal a láaktzilo'ob; bin in ca'aj in beet tu yéetelo'obe' je'el bix tin beetaj yéetel u láaktzilo'ob Jeroboam u paal Nabate'.

⁴Je'el máacalmáac ti' a láaktzilo'obe' bíin quíimico'ob te j caajo', peeko'ob bíin jaantico'ob; le bíin quíimico'ob j káaxe' bíin lu'ukuco'ob tumen j ch'úuyo'ob.

⁵U yalab u tzicbalil u cuxtal Baasa, yéetel le nucuch talam ba'alo'ob tu beetajo', ti' dzíibta'an tu dzíibil ju'unilo'ob u ajawilo'ob Isaraele'.

⁶Le ca j quíim Baasae' j mu'uc tu caajil Tirsa. Cu dzo'ocole' ajawnaj Ela tu káanche' u taata.

⁷Tu chi' aj bóobat Jehú, u paal Hananie', Yuumtzile' tu ya'alaj yaan u xo'ot'ol u kiinilo'ob Baasa yéetel u láaktzilo'ob, tumen tu beetaj ba'alo'ob kaastaco'ob tu yich Yuumtzil. Baasae' tu beetaj u p'u'ujul Yuumtzil, tumen tu beetaj ba'alo'ob kaastac je'el bix tu beetaj Jeroboam yéetel u láaktzilo'ob, máaxo'ob j xu'ulsa'abo'ob tumen Yuumtzil.

⁸Tu veintiséis ja'abo'ob u méektáan Asa Judae', Ela, u paal Baasae', cáaj u méektáantic u caajilo'ob Israel tu lu'umil Tirsa, ca'a p'éel ja'abo'ob méektáanajic.

⁹Ba'ale' Zimri u nojochil le máax ilic táancoch u bolanilo'ob ba'atele', j líik u ba'atelte. Jun p'éel kiin ti' yaan ca'ach j Ela tu tu caajil Tirsa, tu yotoch Arsa, u ti'al u yila'a meyaje', ukulnaj tac ca j cáalchaji.

¹⁰téec j kuch Zimrie' ca tu quíimsaj, u ti'al ca ajawnac tu káanche'. Lela' j úuch tu ja'abil veintisiete, táan ca'ach u méektáatic Asa u caajilo'ob Judá.

¹¹Chéen p'el culajic Zimri te jalach káanche'o', ca tu cáajsaj u méektáane', tu quíimsaj tuláacal u láaktzilo'ob Baasa, ma' tu p'ataj mix jun túul j xiib cuxa'ani', wa láaktzil wa a aj bisajbáil, u ti'al ma' u su'utul u jeel ti'.

¹²Bey túuno' Zimrie', tu xu'ulsaj tuláacal u láaktzilo'ob Baasa je'el bix tu ya'alajilac Yuumtzil tu chi' aj bóobat Jehue',

¹³j úuch beyo' tu yo'olal tuláacal u kebano'ob Baasa yéetel u kebano'ob Ela u paal, tumen yéetelo'obe' tu beetajo'ob u kebanchajal le j israelitaob, ca tu sen beetaj u p'u'ujul Yuumtzil u Ku Israel, iquil tu kultilaco'ob beetbil kuob.

¹⁴U yalab u tzicbalil u cuxtal Ela, yéetel tuláacal ba'axo'ob tu beetaje', ti' dzíibta'an tu dzíibil ju'unil u ajawilo'ob Israel.

¹⁵Tu veintisiete ja'abo'ob u méektáan Asa tu caajilo'ob Judae', u aj ba'atelo'ob Israel jelecbalo'ob u ti'al u ba'atelto'ob u caajil Gibetón tu lu'umil le filisteobo', Zimri chu'unpaj u méektáantic u caajil Tirsa. Ba'ale' chéen siete kiino'ob ajawnaji

¹⁶tumen láili' ti' le kiino' le aj ba'atelo'ob táan ca'ach u je'elsicuba'obo', tu yojéeltajo'obe' Zimrie' dzo'oc u líikil u ba'atelt le ajawo' ca tu quíimsaj, tuláacal le máaxo'ob yano'ob te j nookil najo' tu dzajo'ob Omri u náacomil ba'atel bey u ajawil u lu'umil Israele'.

¹⁷Omri túun yéetel tuláacal u aj ba'atelo'ob le j israelitaob tu xúunp'attajo'ob u ba'ateltico'ob Gibetón ca j lúubo'ob tu yóokol Tirsa.

¹⁸Ca tu yilaj Zimri dzo'oc ca'ach u pa'abal u muuk le caajo', j ooc tu ta'acunaj le jalach najo' ca tu t'abaj, ti' yaan leti' ichile', bey quíimico'.

¹⁹Lela' j úuch beyo' tu yo'olal j kebanchaji, yéetel tu yo'olal u kaakas cuxtal tu yich Yuumtzil, tumen láili' je'el bix le keban tu beetaj Jeroboam, le ca tu beetaj u kebantalo'ob le j israelitaobo'.

²⁰U yalab u tzicbalil u cuxtal Zimri yéetel u mucul t'aan tu yo'olal ajaw Elao', ti' dzíibta'an tu dzíibil ju'unil u ajawilo'ob Israel.

²¹U caajil Israel túune', ca'a jáatzchaji jun jaatze' u káato'ob ca'ach ca ajawnac Tibni u paal Ginat, u láak jun jaatze' u káat ca'ach ca ajawnac Omri.

²²Tu dzoocaque' le yano'ob yéetel Omri tu much'ajuba'ob ca tu beetajo'ob ajawil Omri, Tibni, u paal Ginate' j quíimi', bey j kuchic Omri u beet u ajawilo'.

²³Omrie' j chu'unpaj u méektáantic u caajilo'ob Israel tu ja'abil treinta yéetel jun p'éel, ti' u ajawil Asa tu caajilo'ob Judá, ajawnaj doce ja'abo'ob, ti' lelo'oba' seis ja'abo'ob ajawnaj Tirsa.

²⁴Tu manaj ti' Semer u pu'uquil Samaria, ca tu bo'otaj sesenta yéetel seis kilos sac taakin, ca tu beetaj jun p'éel caaj, ca tu tuulumtaj, tu kaaba'intaj Samaria, tumen u kaaba' ca'ach u yáax taatail le pu'uco' Semer.

²⁵Tuláacal le ba'alo'ob tu beetaj Omrie' kaas tu táan yich Yuumtzil, asab kaastaco'ob ti' le máanja'an ajawo'obo',

²⁶tumen tu beetaj láili' le kebano'ob tu beetaj Jeroboam u paal Nabat, yéetel lelo'oba' tu beetaj u kebanchajal le j israelitaobo', ca tu beetaj u sen p'u'ujul Yuumtzil, u Ku Israel.

²⁷U yalab u tzicbalil u cuxtal Omri yéetel tuláacal le nucuch talam ba'alo'ob tu beetajo' ti' dzíibta'an tu dzíibil ju'unil u ajawo'ob Israele'.

²⁸Le ca j quíime' j mu'uc Samaria. Cu dzo'ocole' ajawnaj Acab tu káanche' u taata.

²⁹Tu ja'abil treinta yéetel ocho u méektáantic Asa u caajilo'ob Judae', Acab, u paal Omrie', j chu'unpaj u méektáantic u caajilo'ob Israel. Tu méektáantaj u caajilo'ob Israel veintidós ja'abo'ob, tu caajil Samaria.

³⁰Ba'ale' u cuxtale' kaastac tu táan Yuumtzil asab ya'ab ti' le tu beetajo'ob le máanja'an ajawo'obo',

³¹tumen ma' j yaajchaj yóol u kebanchajal je'el bix Jeroboam u paal Nabate', u yajile', j dzo'oc u beel yéetel x Jezabel, u x ch'upul paal Et-baal u ajawil Sidón, j kuch u kultic tac Baal,

³²tu beetaj xan jun p'éel u multuunil kultaj yéetel jun p'éel u kulnaj Baal tu caajil Samaria.

³³Tu beetaj xan u yoochel Asera, yéetel lela' tu beetaj u sen p'u'ujul Yuumtzil, u Ku u cajnáalilo'ob Israel, asab ya'ab ti' le u máanja'an ajawo'ob Israel.

³⁴Tu kiinilo'ob Acabe', Hiel le jun túul j betelile', tu beetaj u caajil Jericó. Abiram u yáax paale' tu bo'otaj u beeta'al u chuunpakilo'ob, Segub, u j t'uup paale' tu túuxtaj beetbil u jool najilo'ob, je'el bix ca'ach tu ya'alaj Yuumtzil tu chi' Josuee' u paal Nume'.