Read Yucateco 1 Reyes 17 Bible Online

1 Reyes 17 - Yucateco bible

1 Reyes 17

¹Aj bóobat Elíase' sijnal ca'ach tu caajil Tisbe, tu lu'umil Galaade', tu ya'alaj ti' Acab: ¡Quin jalach t'antic tu kaaba' Yuumtzil u Ku u cajnáalilo'ob Israel, máax quin meyajtique', ti' le ja'abo'oba' ma' bíin káaxac ja'i', mix ye'eb tac quéen in wa'ale'!

²Le t óolale' Yuumtzile' tu ya'alaj ti' Elías:

³Lukesabáa waye', xeen j lakin ca a ta'acbesabáa tu t'o'ol ja'il Querit, le yaan tu lakin Jordano'.

⁴Te'elo' je'el u páajtal a wukic u ja'il le t'o'ol ja'o', dzo'oc in wa'alic ti' le j ch'úuyo'obo' ca u biso'ob a janal.

⁵Elíase' tu beetaj ba'ax j a'ala'ab ti' tumen Yuumtzil, j bine' ca j p'áat cajtal tu jáal u t'o'ol ja'il Querit, tu lakin u yáalcab ja'il Jordán.

⁶ja'atzcab kiin yéetel ocnac kiine' le j ch'úuyo'obo' cu bisico'ob ca'ach waaj yéetel bak ti' Elías, cu yukic ja' te j t'o'ol ja'o'.

⁷Ba'ale' cu dzo'ocol u máan kiino'obe' le t'o'ol ja'o' j tiji, tumen ma' táan ca'ach u káaxal ja' te j lu'umo'obo'.

⁸Yuumtzil túune' tu ya'alaj ti' j Elías:

⁹líiken, xeen tu caajil Sarepta, tu lu'umil Sidón, p'áaten cajtal te'elo'. Dzo'oc in wa'alic ti' jun túul x quimen íicham cajacbal te'elo' ca u dzáa ba'al a jaante.

¹⁰J líik Elíase' ca j bin Sarepta. Táan ca'ach u kuchul tu jool le caajo' ca tu yilaj jun túul x quimen íicham táan u molo'och, tu t'anaje' ca tu ya'alaj ti': Beet utz a taasic ti' teen jun luch ja' u ti'al in wukej.

¹¹Táan ca'ach u bin u cha'e', ca j t'a'an tu ca'a téen tumen Elíase', ca j a'ala'ab ti': Beet utz xan a taasic ti' teen jun xéet' waaj.

¹²X leti'e' tu núucaj ti': Quin jalach t'antic tu kaaba' Yuumtzil a Junab Kue', mina'an ti' teen mix jun xéet' póocbil waaj. Chéen yaan ti' teen jun láap' harina ti' jun p'éel cáat, yéetel jun p'íit aceite ti' jun p'éel x t'ojob, táan ca'ach in molic jun p'íit si' u ti'al ca xi'iquen in póoc jun p'éel waaj u ti'al in paal yéetel in ti'al. C janale', cu dzo'ocole' c quíimil yéetel wi'ij.

¹³Elíase' tu núucaj ti': Ma' a ch'a'ic sajaquil. Xeen a máaka'ant le ba'ax ta wa'alajo'. Ba'ale' táanile' yéetel le harina yaan techo', beet ti' teen jun p'éel chan piimpiim waaj ca a taas ti' teen, cu dzo'ocole' ca beetic u láako'ob u ti'al ca a jaant teech yéetel a paal.

¹⁴Tumen Yuumtzil u Ku u cajnáalilo'ob Israele' dzo'oc u ya'alic, ma' bíin xu'upuc le harina yaan te j cáato', mix le aceite yaan te x t'ojob tac le kiin bíin u beet Yuumtzil u káaxal ja' yóokol le lu'uma'.

¹⁵Le x quimen íichamo' j bine' ca tu beetaj le ba'ax a'ala'ab ti' tumen Elíaso'. Leti', u paal yéetel Elíase' yanji' ba'al u jaanto'ob ya'abcach kiino'ob.

¹⁶Ma' j xu'up le harina ti' le cáato', mix j xu'up le aceite yaan ca'ach ti' le x t'ojo'ob, je'el bix tu ya'alaj Yuumtzil tu chi' Elíase'.

¹⁷Cu dzo'ocol u máan kiine' j lúub koja'anil u paal le x quimen íichamo', ti' u koja'anile' jach chakéetchaji, tac ca j quíimi.

¹⁸Le x quimen íichamo' tu ya'alaj ti' Elías: ¿Ba'ax yaan in wil ta wéetel, u paalil Ku? ¿J taalech wa a ka'ajes ti' teen in kebano'ob yéetel ca a beet u quíimil in waal?

¹⁹Elíase' tu ya'alaj ti': Dzáa ti' teen a waalo'. Ca tu méekaj Elías u yaal le x quimen íichamo' ca j na'ac yéetel ti' u káasabil le naj tu'ux cu je'elel ca'acho', ca tu chilcuntaj tu táas che'il u wenel.

²⁰Cu dzo'ocole' tu ka'amkam t'aanaj Yuumtzil: Yuumtzil in Ku, ¿Yaan xan wa a dzáic yajil ti' le x quimen íicham tu'ux in kubentminbáa, ca a beet u quíimil u yaal?

²¹Tu séeblaquile' ca j túudz chilaj óox téen yóokol le paalo' ca tu ka'am t'antaj Yuumtzil: Yuumtzil in Ku, ¡Quin káat óoltic ti' teech ca a sut u cuxtal le paala'!

²²Yuumtzile' tu núucaj u káat óolal Elías ca tu beetaj u ca'a cuxtal le paalo'.

²³Tu séeblaquile' Elíase' tu méekaj le paalo' ca j éem yéetel, ca tu kubaj ti' u maama táan u ya'alic ti': ¡Ile', a waale' cuxa'an!

²⁴Le co'olelo' tu núucaj ti': Bejela'e' jach tu jaajil in wojel teche' jun túul u paalech Ku, le ba'ax ca wa'alico' jun p'éel jaaj ti' Yuumtzil u taal.