Read Yucateco 1 Reyes 18 Bible Online

1 Reyes 18 - Yucateco bible

1 Reyes 18

¹Cu dzo'ocol u máan óox p'éel ja'abo'obe' Yuumtzile' tu t'anaj Elíase' ca tu ya'alaj ti': Xeen tu táan Acab, tumen bíin in beet u káaxal ja' yóokol le lu'uma'.

²Elíase' j bine' ca j wa'alaj tu táan Acab. Le wi'ij yaan ca'ach tu lu'umil Samariao' jach nojoch.

³Acabe' tu t'anaj Abdías u aj ilaj meyaj, leti'e' cu kultic ca'ach Yuumtzil yéetel nojoch tziiquil

⁴tumem le kiin ca jo'op u quíimsa'al ca'ach u aj bóobato'ob Yuumtzil tumen x Jezabele', leti'e' tu ch'a'aj cien aj bóobato'ob, cu dzo'ocol u jóokesic ca'a jaatze', tu ta'acbesajo'ob ichil ca'a p'éel áactuno'ob, ca tu dzaj xan le janal kabéet ti'ob ca'ache'.

⁵Acabe' tu ya'alaj ti' Abdías: Co'oten, co'ox xíimbaltic le lu'uma' yéetel tuláacal u sayabilo'ob bey xan le áalcab ja'obo', u ti'al c ilic wa je'el u páajtal c nactáantic su'uc u ti'al u jaant le tzíimino'ob yéetel le mula'obo'. Wa ma'e' bíin p'áataco'on x ma ba'alche'ob.

⁶Bey túuno' tu t'oxla'antajuba'ob le lu'um u najmal u xíimbaltic tu jujun túulilo'obe', Acabe' j bin ti' jun p'éel bej, Abdías tu láak bej.

⁷Táan ca'ach u xíimbal Abdías, ca jóok nactáantbil tumen Elías, Abdías le ca tu kaj óoltaje' chinlaj tu táan ca tu ya'alaj: ¡Elías, in dzuulil baacáan!

⁸Elíase' tu núucaj: teeni'ixtaco'. Ca tu ya'alaj: Xeen a wa'al ti' a dzuulile' wayanene'.

⁹Abdíase' tu núucaj: ¿Ba'ax in si'ipil u ti'al ca a kuben ti' Acab u ti'al u quiimsiquen?

¹⁰Quin jalach t'antic tu kaaba' Yuumtzil a Ku, tuláacal tu'ux ca máan caxantbil tumen in dzuulil ti' caajo'ob yéetel ti' cajtalilo'ob; le quéen a'ala'ac ma' ila'aqueche', in dzuulile' cu beetic u jalach t'antico'ob wa jach jaaj ma' u nup táantecho'obi'.

¹¹¡Bejela'a' túune' ca káatic ti' teen ca xi'iquen in wa'al ti' in dzuulil wayaneche'!

¹²Ba'ax cu j bin úuchule', le quéen in p'ateche' u pixan Yuumtzile', cu bisiquech tu'ux ma' in wojeli'. Le quéen xi'iquen in dzáa u péectzilil ti' Acab wayaneche', wa leti' ma' tu nup táantiqueche', cu quiimsiquen. Le a palitzila' líikbal tu táanquelemile' ma' xu'uluc u tziquic Yuumtzili'.

¹³¿Ma' wa tzicbalta'ac ti' teech le ba'ax tin beetaj, le táan ca'ach u quíimsa'al u aj bóobato'ob Yuumtzil tumen Jezabele'? Tin ta'acbesaj cien aj bóobato'ob cu dzo'ocol in jóokesic ca'a a jaatze', tin wocsajo'ob ti' ca'a p'éel áactuno'ob yéetel tin dzaj le janal kabéet u jaantico'obo'.

¹⁴¿Bejela'a' túune' ca káatic ti' teen ca xi'iquen in wa'al ti' in dzuulil wayaneche'? ¡Je'el u quíimsiquen!

¹⁵Elíase' tu núucaj ti': Quin jalach t'antic tu kaaba' Yuumtzil le máax yaan tuláacal páajtalil ti'e', le máax xan quin meyajtico', bejela'e' bíin xi'iquen tu táan Acab.

¹⁶Abdíase' j bin u caxant Acab u ti'al u dzáa u péectzilil dzo'oc u yilic Elías, Acab túune' j bin u nactáantubáa yéetel Elías.

¹⁷Le ca tu yilaje' tu ya'alaj ti': ¿Teech wa túun le máax cu xa'aktic u tuucul u cajnáalilo'ob Israele'?

¹⁸Elíase' tu núucaj: tene' ma' táan in xa'aktic u tuucul u cajnáalilo'ob Israel, Ba'ale' teech yéetel a láaktzilo'ob, úuchic a p'atique'ex u tzolbe'en t'aano'ob Yuumtzil u ti'al a kultique'ex u jejeláas yoochelo'ob Baal.

¹⁹Bejela'e' túuxt máaco'ob u ti'al u much'quint tuláacal le j israelitaob tu witzil Carmelo, yéetel xan le cuatrocientos cincuenta u aj bóobato'ob Baal yéetel xan u cuatrocientos aj bóobato'ob Asera, le máaxo'ob táan u tzéenta'alo'ob tumen x Jezabelo'.

²⁰Acabe' tu túuxtaj t'anbil tuláacal le j israelitaob, ca xan tu much'quintaj le u aj bóobato'ob tu witzil Carmelo.

²¹Elías túune', tu nadzajubáa ti' tuláacal le caajo', ca tu ya'alaj: ¿Tac ba'ax kiin bíin a xu'ulse'ex le ca'a p'éel tuucula'? Wa Yuumtzil leti' u jaajil Kue', meeyajte'ex, wa Baale' leti' unaj a meeyajtique'ex. Le caajo' mix ba'al tu núucaj.

²²Elíase' j bin u ya'alic: Chéen teen u aj bóobat Yuumtzil p'atalen cuxa'an, ba'ale' u aj bóobato'ob Baale' yaan cuatrocientos cincuenta.

²³Bejela'a' túune', dza'abac ti' to'on ca'a túul mejen wacaxo'ob, leti'obe' u yéeyo'ob jun túuli', u xotláanto'ob, ca u dza'ob tu yóokol le si'o', ba'ale' ma' u t'abico'ob. Tene' bíin in máaka'ant le u láak jun túul chan wacaxo', u ti'al ca in dzáa tu yóokol le si'o', ba'ale' ma' bíin in t'abe.

²⁴Cu dzo'ocole', te'exe' bíin a payalchi'ite'ex a kuex, teen xane' bíin in payalchi'inaquen ti' Yuumtzil, ¡le ku bíin u núuque' leti' bíin u túuxt káak, leti' jach u jaajil Ku! Tuláacal le caajo' tu núucaj: ¡Ma'alob ba'ax ca wa'alic ca beeta'ac!.

²⁵Elías túune' tu ya'alaj ti' u aj bóobato'ob Baal: Bey tumen te'ex ya'abe'exe', yéeye'ex jun túul ti' le mejen wacaxo'obo', máakante'ex táanil. Cu dzo'ocole' payalchi'ine'ex ti' a kuex, ba'ale' ma' a tabique'ex káak.

²⁶Bey túuno' tu ch'a'ajo'ob le chan wacax j ku'ub ti'obe' ca tu máaka'antajo'ob, buul ja'atzcab tac chúumuc kiin j payalchi'inajo'ob ti' Baal, táan ya'alico'ob: ¡Núuconi' Baal! táan ca'ach u líit' síit'o'ob tu bakpach le u multuunil kultaj tu beetajo'obo', ba'ale' mix máac núuc ti'ob u káat óolalo'ob.

²⁷Tu chúumuc kiine' Elíase' táan ca'ach u p'a'astico'ob yéetel le t'aano'oba: Awtnane'ex ka'am, ma' xan wa táan u meyaji', wa t áan u beetic wa ba'axi', wa bija'an j xíimbal. ¡Wa táan u wenele' kabet u yajsa'al!

²⁸Leti'obe' táan u bin u yawato'ob táan u xoticuba'ob yéetel xotobo'ob bey xan yéetel aacho'ob, je'el bix suuquil u beetico'obe' tac u yichintico'ob u ki'ikelo'ob.

²⁹Ba'ale' j máan chúumuc kiin, leti'obe' láili' táan u yawato'ob yéetel táan u síit'o'ob bey choco u poolo'obe', tac le ca tu kubajo'ob le quíimsbil ba'alche'obe' ma' j u'uya'ab u yawato'obi'. ¡Mix máac núucaji' mix u'uya'ajnaji'!.

³⁰Elías túune' tu ya'alaj ti' tuláacal le caajo': Naadzaba'ex tin wicnal. Tuláacal le caajo' tu naadzajuba'ob, leti' túune' jo'op' u yutzquintic le u multuunil u kulta'al Yuumtzile', tumen ju'uju'ut ca'achi'.

³¹Tu ch'a'aj doce tuunicho'ob je'el bix jay p'éel u ch'i'ibalo'ob u paalal Jacob, ti' le máax tu ya'alaj bíin u kaaba'int ca'ach Israele',

³²ca tu beetaj yéetel le tuunicho'obo' jun p'éel u multuunil kultaj u ti'al Yuumtzil, ca tu páanaj tu bakpach le u multuunil kultajo', tu'ux je'el u páajtal u yantal veinte u wuudzul janalbe'en neeko'obe',

³³cu dzo'ocol u tzolic ma'alob le si'o', tu xot'la'antaj le chan wacaxo' ca tu dzáa tu yóokol.

³⁴Ca tu ya'alaj: Chupe'ex can p'úul ja', láale'ex tu yóokol le ba'alche' cu bin láaj tóocbilo', bey xan tu yóokol le si'o'. Cu dzo'ocole' tu túuxtaj ca beeta'ac tu ca'a te'en, bey tu yóox te'en, bey tu betajilaco'obo'.

³⁵Le ja'o' áalcabnaj tu bakpach le u multuunil kultajo', ca tu chupaj xan le u jool le lu'um páana'ano'.

³⁶Le ca j kuch u súutuquil u beetic u meyaj Elíase', u ti'al u kubic le tóocbil ba'alche'obo', tu nadzajubáe' ca tu ya'alaj: ¡Yuumtzil, u Junab Kuech Abraham, Isaac yéetel Israel: beet ca ojéelta'ac bejela'e' teech u Kuech Israel, tene' chéen a j palitzilen, quin beetic tuláacal le ba'ala' tumen teech ta túuxtajen ca in beete!

³⁷¡Núuc in payalchi' Yuumtzil; núuque, u ti'al ca u yojéelt le caaja' teche' Junab Kuech, yéetel táan a káat óoltic ti'obe' ca suunaco'ob ti' teech tu ca'a téen!

³⁸Ti' le súutuco' u káak Yuumtzile' j éeme' ca tu tóocaj le ba'alche'o', le si'o', tac xan le tuunicho'ob yéetel le ma'ay lu'umo', ca tu tiquincuntaj xan le ja' yaan ca'ach ichil u jool le páanbil lu'umo'.

³⁹Le ca j ila'abe', tuláacal le caajo' noclajo'ob j lu'um, ca tu ya'alajo'ob: ¡Yuumtzile' Ku, Yuumtzile' leti' Junab Ku!

⁴⁰Ca túun j a'ala'ab ti'ob tumen j Elías: ¡Mache'ex u aj bóobato'ob Baal! ¡Ma' a cha'ique'ex u púudzul mix jun túuli'! Ca j ma'acho'ob tumen le caajo', bisajo'ob túun tumen Elías tac tu t'o'ol ja'il Cisón, ca tu xotaj u caalo'ob te'elo'.

⁴¹Cu dzo'ocole' Elíase' tu ya'alaj ti' Acab: Xeen janal yéetel j ukul, tumen táan u yu'uba'al u quíilbal le ka'amcach ja'o'.

⁴²Ca j bin Acab janal yéetel j ukul. Ba'ale' Elíase' j na'ac tu ca'analil u witzil Carmelo, ca j noclaj lu'um tac u dzáic u pool ichil u píixo'obe',

⁴³ca tu ya'alaj ti' u palitzil: Xeene' ca paacatnaquech tu tojil le ka'anabo'. Leti'e' j bine' paacatnaje' ca tu ya'alaj: Mix ba'al quin wilic. Ba'ale' Elíase' tu ca'a a'alaj: suunen siete u téenel.

⁴⁴Tu siete u téenel u taal le j palitzilo' ca tu ya'alaj: ¡Te tu yóokol le ka'anabo' cu yila'al u na'acal jun p'éel chan múuyal buca'aj u nojochil u táan kab jun túul máaque'! Elías túune' tu ya'alaj ti': Xeen ca wa'al ti' Acab ca u nu'ucbes u bolan ca xi'ic tumen wa ma'e' cu ka'alal u beel tumen le ja'o'.

⁴⁵J na'ac Acab tu bolane' ca j bin Jezreel. Ca'aliquil le ca'ano' éekjoch'e'enchaj yéetel múuyalo'ob yéetel iik, ca j chu'unpaj jun p'éel ka'amcach ja'.

⁴⁶Wa tu yo'olal Elíase', Yuumtzile' tu dzaj muuk ti'; cu dzo'ocol u nu'ucbesic u nooke', j bin áalcabil tac Jezreel ca j kuch táanil ti' Acab.