Read Yucateco 1 Reyes 19 Bible Online

1 Reyes 19 - Yucateco bible

1 Reyes 19

¹Acabe' tu tzicbaltaj ti' x Jezabel tuláacal le ba'ax ca'ach tu beetaj Elías yéetel bix úuchic u xotic u caal tuláacal u aj bóobato'ob Baal.

²Jezabel túune' tu túuxtaj jun túul aj bisaj t'aan ca u ya'al ti' Elías: ¡Wa teech Elíase', tene' x Jezabelen! Ca u chichich jadzeno'ob le kuob wa sáamal walquila' ma' in beet ti' teech le ba'ax ta beetaj ti' le aj bóobato'obo'.

³Elíase' tu yilaj tu táan quíimil yaan u cuxtal, u ti'al túun u jechic le quíimilo' j bin tu caajil Beerseba tu lu'umil Judá, te tu p'ataj u j palitzilo'.

⁴Cu dzo'ocole' leti'e' j bin te x tocoy lu'umo', xíimbalnaj buul kiin tu dzooque' j culaj tu bo'oy jun cúul che'. Tu sen dzíiboltaj quíimile', ca tu ya'alaj: ¡Yuumtzil, way cu xu'ulule'! ¡Lukes in cuxtal, tumen tene' ma' asab ma'aloben ti' in taataobi'!

⁵Ca j chilaj tu bo'oy le che'o' ca j weeni'. Ba'ale' jun túul ángele' j kuche' ca tu pedzkabtaj Elíase' ca tu ya'alaj ti': Líiken, jaanen.

⁶Elíase' súut paacatnaje' ca tu yilaj naadz ti' u káamjo'ole' ti' yaan ca'ach jun p'éel but'bil waaj pocchúucta'an, yéetel yaan xan jun p'éel chúuj ja'i'. J líik túune', jaani' ca j ukulnaji; cu dzo'ocole' ca j chilaji'.

⁷Ba'ale' u ángel Yuumtzile' j taal tu ca'a téen, ca tu machaje', ca tu ya'alaj ti': Líiken, jaanen, tumen ya'ab cu bineltic a xíimbal.

⁸Elíase' j líike', jaani ca j ukulnaji. Le janalo' tu dzaj muuk ti' u ti'al u xíimbal cuarenta kiino'ob yéetel cuarenta áakabo'ob tac ca j kuch Horeb, u witz Ku.

⁹Le ca j kuche', j ooc ti' jun p'éel áactun, ti' tu máansaj áakabi'. Ba'ale' Yuumtzile' tu t'anaj ca tu ya'alaj ti': ¿Elías, ba'ax ca beetic waye'?

¹⁰Leti'e' tu núucaj: Jach in p'eec ba'ax cu beeta'al ti' teech Yuumtzil, Ku ti' máax yaan tuláacal páajtalil, tumen le j israelitaob dzo'oc u xúump'attico'ob a nup t'aan yéetel dzo'oc u ju'uju'utico'ob u multuunil a kulta'al, dzo'oc u quíimsico'ob ch'a'ach'acbil a aj bóobato'ob. Chéen teen p'aatalen, táan xan u caxtiqueno'ob u ti'al u quíimsiqueno'ob.

¹¹Yuumtzile' tu ya'alaj ti': Jóoken ca p'áataquech wa'alacbal tin táan, tu yóokol le witzo'. Ti' le súutuco' j ch'aakatnaj Yuumtzil, jun p'éel ka'amcach iik sen yaan u muuke' tu ca'acachaj le nucuch che'obo' tu bu'ubuja xan le nucuch tuunicho'ob tu táan Yuumtzil; ba'ale' Yuumtzile' mina'an ca'ach ichil le iiko'. Cu dzo'ocol u máan le iiko', yanchaj jun p'éel u quíilbal lu'um; ba'ale' Yuumtzile' mina'an xan ca'ach te j quíilbal lu'umo'.

¹²Cu dzo'ocol le quíilbal lu'umo' yanchaj jun p'éel káak; ba'ale' Yuumtzile' mina'an ca'ach te j káako'. Ba'ale' cu dzo'ocol u máan le káako', ca j u'uya'ab jun p'éel juum bey cabal t'aane'.

¹³Elíase', le ca tu yu'ubaje', tu pixaj u yich yéetel u teep', jóoke' ca j p'áat tu jool le áactuno'. Ti' lelo' tu yu'ubaj u yúuchul t'aan tu'ux a'ala'ab ti': ¿Ba'ax ca beetic waye' Elías?

¹⁴Leti'e' tu núucaj: In sen p'eec a ke'exel Yuumtzil, Junab Ku ti' máax yaan tuláacal páajtalil, tumen le j israelitaob dzo'oc u xúump'attico'ob a nup t'aan yéetel dzo'oc u ju'uju'utico'ob u multuunil a kulta'al, dzo'oc u quíimsico'ob ch'a'ach'acbil a aj bóobato'ob. Chéen teen p'aatalen, táan xan u caxtiqueno'ob u ti'al u quíimseno'ob.

¹⁵Yuumtzil túune' tu ya'alaj ti': Séeba'an, suunen tu'ux taalech tu x tocoy lu'umil Damasco. Xeen ca jun páaycuns Hazael u ti'al ca ajawchajac tu lu'umil Siria,

¹⁶Jehú, u yáabil Nimsie' ca ajawchajac tu caajil Israel, ti' Eliseo, u paal Safat, le máax cajacbal Abel-mehola, jun páaycuns u ti'al u jeelintiquech bey aj bóobate'.

¹⁷Bey túuna' le máax bíin púudzuc ti' u máascab Hazaele', yaan u quíimsa'al tumen Jehú, le máax bíin púudzuc ti' u máascab Jehue' yaan u quíimsa'al tumen Eliseo.

¹⁸Ba'ale' quex beyo', yaan in p'atic tu caajil Israel siete mil máaco'ob mix jun téen xolaco'ob tu táan Baal, mix xan u dzu'udzo'obi'.

¹⁹Elíase' j luk te'elo' ca tu nup táantajubáa yéetel Eliseo, táan ca'ach u potic lu'um u ti'al u paakal. Tu táan Eliseoe' táan ca'ach u bino'ob doce u ca'aca' núuch wacaxo'ob, leti' xane' táan u bisic u dzooc ca'a núuch. Elíase' j bin tu yicnal Eliseoe' ca tu pulaj u suyem yóokol.

²⁰Tu séeblaquile' Eliseoe' tu p'ataj le wacaxo'obo' ca j áalcabnaj tu paach Elías ca tu ya'alaj ti': Cha'a in dzáic ti' in taata yéetel ti' in maama jun p'éel dzu'udz iquil quin in p'atico'ob, cu dzo'ocole' quin taal ta paach. Elíase' tu ya'alaj ti': Je'el u páajtal a bine', ba'ale' ka'ajac ti' teech le ba'ax dzo'oc in beetic ti' taecho'.

²¹Eliseoe' tu p'ataj Elíase' ca j bini, tu ch'a'aj ca'a túul xiibil wacaxo'ob ca tu xo'oxo'otaj, yéetel u che'il u pot lu'um, tu pocchúuctaj le bako' ca tu dzaj jaantbil tumen le máaco'obo'. Cu dzo'ocole' ca j bin tu paach Elías, ca j p'áat u ti'al u meyajte.