Read Yucateco 1 Reyes 2 Bible Online

1 Reyes 2 - Yucateco bible

1 Reyes 2

¹U kiinil u quíimil Davide' táan ca'ach u náadzal, tu yo'olal lelo' Davide' tu ya'alaj ti' Salomón u paal:

²Bin in ca'aj j quíimil, je'el bix u yúuchul ti' tuláacal máaque'. J xiixib máacchajaquech, cuxlen xan bey jun túul xiibe'.

³Dzo'ocbes u tzolbe'en t'aano'ob Yuumtzil a Ku, beet ba'ax cu yóoltic, je'el bix u nu'uctic u ya'almaj t'aan, u ca'anbesajo'ob yéetel u túuchi' t'aano'obe', je'el bix dzíibta'anil tu ya'almaj t'aan Moisese', u ti'al ca xi'ic utzil ti' teech ti' tuláacal le ba'ax bíin a beete', ca xan xi'ic utzil ti' teech je'el tu'uxac ca xi'iqueche'.

⁴Bey xan u ti'al u t'ilcunt Yuumtzil le séeb chi' tu beetaj ti' teen, tu'ux cu ya'alic wa in paalal cu cuxtalo'ob tu beel, cu beetico'ob xan ba'ax no'oja'an yéetel tuláacal u jaajil u yóolo'ob bey xan yéetel tuláacal u pucsi'ikalo'ob tu táane', mix bikin bíin p'áatac ma' u yantal máax ichil in láaktzilo'ob, ca culac ti' u jalach káanche' Israel.

⁵Teech xane' a wojel ba'ax tu beetaj Joab u paal x Sarvia, yéetel ca'a túul u nuuquil aj ba'atelo'ob le j israelitaobo': lelo'obo' Abner, u paal Ner, yéetel Amasa, u paal Jeter, máaxo'ob tu quíimsaj tu kiinilo'ob jéedzel u ti'al u sutic u jeel we'equic le ki'ik ich ba'atelo', ca tu beetaj in cuchic u si'ipilil le quíimsajo'.

⁶Le t óolalo', meyajnen yéetel na'at, ma' a cha'ic u yantal jun p'éel jéedzel quíimil ti'.

⁷Wa tu yo'olal u paalal Barzilai, le j Galaadile' bisabáa utz tu yéetelo'ob, beet utz ti'ob, t'aano'ob janal ta wéetel, tumen leti'obe' tu canantajeno'ob le táan ca'ach in púudzul ti' a sucu'un Absalone'.

⁸U láak ba'ale', il ca yanac ta wéetel Simei, u paal Gera, le j benjaminil j Bahurimil. Leti' le máax tu sen kaakas po'opo'och'ajen le kiin táan in bin ca'ach Mahanaim, cu dzo'ocole' jóok u kamen tu yáalcab ja'il Jordán, ca j yanji' in jalach t'antic tu kaaba' Yuumtzil ma' bíin in quíimsi'.

⁹Ma' a sa'atsic ba'ax tu beetaj, teche' yaan a na'at u ti'al a tucultic ba'ax unaj a beetic tu yéetel. Ba'ale' il a wil u quíimil ich loolob óolal.

¹⁰Davide' j quíime', ca j mu'uc yéetel u máanja'an ch'i'ibalo'ob tu caajal.

¹¹Cuarenta ja'abo'ob ajawnaj tu lu'umil Israel, siete ja'abo'ob ajawnaj Hebrón, yéetel treinta yéetel tres ja'abo'ob ajawnaj Jerusalén.

¹²Cu dzo'ocole' ajawnaj Salomón tu jalach káanche' David u taata, u ajawe' j máan jach ichil jéedzelil.

¹³Adonías u paal x Haguite', j bin u yil x Betsabé, u maama Salomón. X leti'e' tu káat chi'itaj ti': ¿Yéetel utzil tuucul ca taal? Leti'e' tu núucaj: Yéetel utzil tuucul.

¹⁴Ca tu ya'alaj: Yaan ba'ax kaabéet in wa'alic ti' teech. Leti'e' tu núucaj: a'al ti' teen.

¹⁵Adoníase' tu ya'alaj: teche' a wojel, le ajawa' in ti'al ca'achi', tuláacal israele' táan u pa'atic ca'ach ca ajawnaquen. Ba'ale' u káanche'il le ajawo' dzaab ti' in sucu'un, tumen bey tu yóoltilac Yuumtzil ca u ti'alinte.

¹⁶Bejela'e' chéen in káat a ca beet ti' teen jun p'éel utz. Ma' a wa'alic ma'il. Leti'e' tu ya'alaj, t'aanen.

¹⁷Adoníase' tu ya'alaj: Quin káat óoltic ti' teech ca a káat ti' ajaw Salomón ca u dzáa in watant x Abisag le x sunamile'. Leti'e ma' bíin u ya'al ti' teech ma'ili'.

¹⁸Ca tu núucaj x Betsabé: Ma'alob teen bíin t'aanaquen yéetel ajaw ta wo'olal.

¹⁹Bey túuno', x Betsabee' bin j t'aan yéetel ajaw Salomón tu yo'olal Adonías. Le ajaw ca tu yilaj u maamae' j líik u kame' ca j chinlaj tu táan. Cu dzo'ocole' j suunaj cutal tu jalach káanche', ca tu ya'alaj ca taasa'ac jun p'éel x noj káanche' u ti'al u cutal u maama; leti' túune' j culaj tu x no'oj.

²⁰Ca tu ya'alaj ti': In káat ca a beet ti' teen jun p'éel cháan utz. Quin káat óoltic ti' teech ma' a wa'alic ti' teen ma'il. Ajaw Salomone' tu núucaj: káat ti' teen je'el ba'alac a káate' ma' bíin in wa'al ti' teech ma'ili'.

²¹Leti'e' tu ya'alaj ti': Cha' u dza'abal Abisag le x sunamita ti' a sucu'un Adonías u ti'al u yatáantej.

²²Ajawe' tu núucaj ti' u maama: ¿Ba'ax o'olal ca káatic x Abisag le x sunamita u ti'al Adonías? ¡Chéen cu bineltic a káatic ti' teen ca in kub ti' le ajawila', tumen leti'e' in sucu'un, yéetel tu tzéel yano'ob aj kiin Abiatar yéetel Joab u paal x Sarvia!

²³Cu dzo'ocol u ya'alic beya', ajaw Salomone' jalach t'aana' tu kaaba' Yuumtzil: ¡U chich jadzen Ku wa ma' tu quíimil Adonías tu yo'olal le ba'ax dzo'oc u ya'alic.

²⁴Quin Jalach t'aan tu yo'olal Yuumtzil máax tu dzajen yéetel tu jéedz culquinten tu jalach káanche' David in taata máax xan tu dzaj ti' teen jun p'éel ch'i'ibale', Adoníase' yaan u quíimil bejela'e'!

²⁵Tu séeblaquile' tu ya'alaj ti' Benaía, u paal Joiada ca u quíims Adonías, leti'e' j bine' ca tu quíimsaj.

²⁶Ti' aj kiin Abiatare', ajawe' tu ya'alaj: ¡Xeen Anatot a lu'umo'ob! ca najmatic quíimil, ba'ale' ma' tin quíimsiquech tumen ta bisaj u ba'asche' Yuumtzil tu táan David in taata, mukyajnajech xan je'el bix mukyanajique'.

²⁷Bey úuchic u lukesic Salomón ti' Abiatar u beetic u aj kiinil u ti'al Yuumtzil, beyo' dzo'ocbesa'ab le ba'ax tu ya'alaj ca'ach Yuumtzil tu caajil Silo tu yo'olal u láaktzilo'ob Elí.

²⁸Joabe' tu dzajubáa ca'ach tu tzéel Adonías, ba'ale' ma' tu dzajubáa tu tzéel Absaloni', let o'olal le ca'aj kuch le péectzilil ti' Joabo', j púudze' ca j bin tu quili'ich naj Yuumtzile' ca tu ta'acbesajubáa tu multuunil kultaj.

²⁹Ba'ale' j a'ala'ab ti' ajaw Salomón, dzo'oc ca'ach u púudzul Joab tu quili'ich najil Yuumtzil bey xan dzo'oc u ta'acbesicubáa tu multuunil kultaj. Salomón túune' tu túuxtaj Benaía, u paal Joiada, u ti'al j quíimsic,

³⁰Benaía j bin te j quili'ich najo' ca tu ya'alaj ti' Joab: Ajawe' cu ya'alic ca jóokoquech. Ba'ale' Joabe' tu núucaj: ¡Ma'! ¡Way bíin quiimquene'! Benaía j bin tu yicnal ajawe' ca tu tzi'icbaltaj ti' le ba'ax tu núucaj Joabo'.

³¹Ajaw túune' tu ya'alaj: Beet je'el bix u káate'. Quíimsej, ca a muqué, tup ichil u yotoch in taata bey xan tin wotoch, u si'ipilil le quíimsajo'ob beeta'ano'ob tumen Joabo'.

³²Yaan u beetic Yuumtzil u lúubul yóokol leti' u si'ipilil u quíimil, tumen tu balaj ti' in taata, tu yo'olal tu quíimsilac Joab ca'a túul u nuuquilo'ob u j xiixib máaco'ob asab utzo'ob ti' leti': Abner u náacom u ba'atelo'ob Israel, yéetel Amasa, u paal Jeter, u náacom u ba'atelo'ob Judá.

³³U si'ipilil u quíimile' yaan u lúubul yóokol Joab yéetel yóokol u ch'i'ibalo'ob ti' ja'abo'ob mina'an u xuul. Ba'ale' u jéedzel Yuumtzile' p'áatac yéetel David bey xan yóokol u ch'i'ibalo'ob u láaktzililo'ob yéetel ti' u jalach káanche'.

³⁴Benaía túune' j bine' ca tu quíimsaj Joab. Joabe' j mu'uc tu yotoch te x tocoy lu'umo'.

³⁵Cu dzo'ocole' Ajawe' tu dzaj Benaía náacomil ti' u aj ba'atelo'ob u jeelint Joab, aj kiin Sadoque' tu dzaj u jeelint Abiatar,

³⁶Cu dzo'ocole' tu túuxtaj t'anbil Simei, ca tu ya'alaj ti': Beet jun p'éel a wotoch tu caajil Jerusalén, u ti'al ca cajlaquech. Chéen ba'ale' ma' a jóokol u ti'al a bin mix tu'ux.

³⁷Tumen le kiin bíin jóokoquech u ti'al ca ch'act u t'o'ol ja'il Cedrone', ojéelte yaan a quíimil, teech xan bíin a cuch u si'ipilil.

³⁸Simei tu núucaj ti' ajaw: Ma'alob. Bíin in beet le ba'ax dzo'oc u ya'alic a tzicbe'enil. Cajlaj Simei ya'abcach kiino'ob tu caajil Jerusalén.

³⁹Ba'ale' cu dzo'ocol u máan óox p'éel ja'abo'obe', ca'a túul u palitzilo'obe' j púudzo'obe' ca j bino'ob cajtal tu yicnal Aquis u paal Maaca, u ajawil ca'ach Gat. Le ca'aj dza'ab u yojéelt Simei ti' yano'ob le ca'a túul u palitzilo'ob Gate',

⁴⁰j líike' ca tu nu'ucbesaj jun túul burroe' ca j bin Gat, tu'ux yaan Aquis, ca u caxt u palitzilo'ob. Le ca j luk Simei Gat táan u suut yéetel u palitzilo'obe',

⁴¹Salomone' tu yojéeltaj jóok Simei tu caajil Jerusalén j bin ca'ach Gat, dzo'oc xan u suut.

⁴²Ajaw túune' tu túuxtaj t'anbil Simei, ca tu ya'alaj ti': ¿Ma' tin beetaj a jalacht'aantic tu kaaba' Yuumtzil, yéetel tin walaj ti' teech le kiin bíin jokoquech a binbal wa tu'uxe', jach tu jaajile' yaan a quíimil? ¿Ma' wa ta núucaj ti' teen ma'alobili' yéetel ta wa'alaj xan a dzo'ocbesic in t'aani'?

⁴³¿Ba'axten ma' ta dzo'ocbesaj a jalach t'aan ti' Yuumtzil mix ta beetaj le ba'ax tin wa'alaj ti' techo'?

⁴⁴Teche' ma'alob a wojelil le kaas ta beetaj ti' David in taatao'. Let o'olal Yuumtzile' dzo'oc u beetic u suut ta wóokol le kaas ta beetajo'.

⁴⁵Ba'ale' ajaw Salomone' yaan u qui' t'anta'al, u jalach káanche' Davide' yaan u p'áatal jejedzquil tu táan Yuumtzil.

⁴⁶Cu dzo'ocole' ajawe' tu ya'alaj ti' Benaía, u paal Joiada ca u quíims Simei, leti'e' jóoke' ca tu quíimsaj. Bey úuchic u jéedzel tu kab Salomón le ajawilo'.