Read Yucateco 1 Reyes 20 Bible Online

1 Reyes 20 - Yucateco bible

1 Reyes 20

¹Ben-adad, u ajawil Siriae', tu much'quintaj tuláacal u aj ba'atelo'ob, bey xan treinta y dos ajawo'ob u yéet j kax t'aano'ob, yaan u j nat' tzíinino'ob pa'ate' yéetel u bolanilo'ob ba'atel, ca j bin tu caajil Samaria tu bakpachtaje' ca tu ba'ateltaj.

²Tu túuchi'itaj xan aj bisaj t'aano'ob ti' le caaja' u ti'al u ya'alo'ob ti' Acab, u ajawil Israel: Ben-adade' cu ya'alic: a ayikalilo'ob in ti'alo'ob, bey xan le co'olelo'ob yaan ti' teech, je'el bix u ma'alobilo'ob a j xibil paalale'.

⁴U ajawil Israele' tu núucaj: Je'el bix dzo'oc u ya'alic a tzicbe'enilo', teen yéetel tuláacal ba'ax yaan ti' tene' a ti'al.

⁵Le aj bisaj t'aano'obo' j bino'ob tu ca'a téen u yilo'ob Acab, ca tu ya'alajo'ob ti': Ben-adade' cu ya'alic: Dzo'oc in túuxtic a'albil ti' teech yaan a dzáic ti' teen a ayikalilo'ob, a watano'ob yéetel a j xibil paalal.

⁶Tu yóokol lelo' walquil sáamala' bíin in túuxt in j náacomo'ob u ti'al u xakaltico'ob a jalach najil yéetel u yotocho'ob a aj meyajo'ob, tuláacal ba'ax cu bíin utzac tu yicho'obe' yaan u ch'a'ico'ob.

⁷U ajawil Israel túune' tu túuxtaj t'anbil tuláacal u nuuquilo'ob le caajo', ca tu ya'alaj ti'ob: Je'el bix dzo'oc a wu'uyique'exo', le máaca' táan u caxantic kaas u beetic ti' teen, quex tumen tene' ma' in wa'al ma'il in kubic ti' leti' in watano'ob, in j xibil paalal yéetel in ayikalilo'obi'.

⁸U núuquilo'ob yéetel tuláacal le caajo', tu ya'alajo'ob ti': Ma' a wu'uyic mix a beetic le ba'ax cu ya'alico'.

⁹Acab túune' tu ya'alaj ti' u aj bisaj t'aano'ob Ben-adad: A'ale'ex ti' u tzicbe'enil je'el in beetic tuláacal le ba'ax tu yáax a'alajo', ba'ale' tene' ma' tu páajtal in beetic le ba'ax cu tzáic ti' teen bejelao'. Le aj bisaj t'aano'obo' tu bisajo'ob ti' Ben-adad le núuc t'aano',

¹⁰Ben-adade' tu túuxtaj a'albil ti' Acab: ¡Ca u chichich jadzen le kuob, wa cu p'áatal dze'edzec wa ba'ax tu lu'umil Samaria u ti'al in dzáa jun p'íit ti' jujun túul le máaxo'ob cu bino'ob tin wéetelo'!

¹¹Ba'ale' u ajawil Israele' tu túuxtaj a'albil ti' Ben-adad: Ma' a ka'aytic pa'a muuk ma'ili' kuchuc u kiinili'.

¹²Le ca tu kamaj Ben-adad le núuc t'aana', táan ca'ach u cáaltal yéetel le u chucáan ajawo'ob te j máacan u jomoch beetmajo'ob ca'acho'. Ca túun tu ya'alaj ti' u aj ba'atelo'ob: ¡Co'one'ex ba'atelto'ob! Tuláacalo'obe' j líiko'ob u ti'al u ba'atelto'ob le caajo'.

¹³Ca'aliquile', jun túul aj bóobate' j bin tu táan Acab, u ajaw Israel ca tu ya'alaj ti': Yuumtzile' dzo'oc u ya'alic: Quex ca wil ya'ab u múuch' a aj p'eeco'obe', tene' bin in ca'aj in kub ta kab bejela'e', u ti'al ca a wojéelt tene' Yuumtzilen.

¹⁴Ca tu káat chi'itaj Acab: ¿Yéetel máax bíin u kub ti' teen? Tu núucaj le aj bóobato': Yuumtzile' dzo'oc u ya'alic, yéetel le táanquelemo'ob cu meyajtico'ob u j méektáano'ob le caajo'obo'. Acabe' tu babal káat chi'itaj. ¿Máax bin j ba'atelnac táanil? Le j bóobato' tu núucaj: Teech.

¹⁵Acab túune' tu xocaj jay túul le j táanquelemo'ob máaxo'ob áantico'ob u méekt'aano'ob le lu'umo', yaan ca'ach doscientos treinta y dos, yéetel tuláacal le aj ba'atelo'ob j israelitaob siete mil j xiibo'ob.

¹⁶Jóoko'ob chúumuc kiin, ca'aliquil Ben-adad yéetel le treinta y dos ajawo'ob u yéet j kax t'aano'ob táan u bin u cáaltalo'ob te j máacano'ob tu jóomoch beetajo'obo'.

¹⁷Máaxo'ob yáax j bino'obe', u j áantajo'ob le méektáano'obo'. Le ca tu kamaj Ben-adad u péectzilil dzo'oc u jóokolo'ob wa jay túul máaco'ob tu caajil Samariae',

¹⁸tu ya'alaj: ¡Quex wa jóoko'ob u ti'al jéedzel wa u ti'al j ba'atele', tene' in káato'ob cuxa'ano'ob!

¹⁹U j áantajo'ob le j méektáano'obo' jóoko'ob te j caajo', tzaypachta'ano'ob tumen aj ba'atelo'ob.

²⁰Jujun túule' tu quíimsaj jun túul aj p'eec, le j Siriobo' j púudzo'ob. Le j israelitaob tu chucpachtajo'ob ba'ale' Ben-adad, u ajawil le j Siriobo', tu nat'aj u tziimine' ca j púudz yéetel dze'edzec u aj ba'atelo'ob j nat' tzíimino'ob.

²¹U ajawil Israel túune' j bine' ca tu ch'a'aj u tziimino'ob yéetel u bolanilo'ob ba'atele', ca tu pa'aj u muuk le j siriobo'.

²²Cu dzo'ocole' le aj bóobate' j bin tu táan u ajawil Israele' ca tu ya'alaj: Xeen ca tac muukt a aj ba'atelo'ob, tucult ma'alob ba'ax bíin beetej: tumen ichil jun p'éel ja'abe', u ajawil siriae' bíin suunac u ba'ateltech.

²³U aj náacomo'ob u ajawil siriae' tu ya'alajo'ob ti': U kuob le j israelitaobo' u kuilo'ob le pu'uco'obo'; let o'olale' tu pa'ajo'ob c muuk. Ba'ale' wa c ba'ateltico'ob te j táax lu'umo', je'el c dzáanche'etico'obe'.

²⁴Ba'ax u najmal u beetic a tzicbe'enil bejela'e', a lukesic le ajawo'obo', u ti'al a dzáic aj náacomo'ob u ti'al u jeelintico'ob,

²⁵cu dzo'ocole' ca nu'ucbesic aj ba'atelo'ob je'el bix le pa'ab u muuko'obo', tzíimin tu yo'olal tzíimin, bolan tu yo'olal bolan. Bey túuno' c ba'ateltico'ob te j táax lu'umo', jach tu jaajile' yaan c pa'ic u muuko'ob. Ben-adade' tu dzaj xiquintaj le a'almaj xiquino'oba' ca tu beetaj.

²⁶Cu máan jun ja'abe', tu xocaj Ben-adad le siriaob ca j bin Afec u ti'al j ba'atel yéetel Israel.

²⁷Bey xan le j israelitaobo' tu xocajo'ob u aj ba'atelo'obe', ca tu dzaj ba'al u jaanto'ob, ca jóoko'ob u nactáanto'ob le j siriob. Jelecbalo'ob actáan le j siriobo', beyo'ob chéen ca'a múuch' j yuuco'obe', tumen le j siriaobo' u ch'a'amajo'ob tuláacal le lu'umo'.

²⁸Ti' lela' j taal jun túul aj bóobat tu táan u ajawil Israel ca tu ya'alaj ti': Bey cu ya'alic Yuumtzila': Bey tumen le j siriaob dzo'oc u ya'alico'ob teen jun túulen u kuil le pu'uco'obo' ma' u kuilen bin le táax lu'umo', bin in ca'aj in kub ta kab tuláacal le nojoch múuch'ulo'. Beyo bíin a wojéelt teen Yuumtzilen.

²⁹Siete kiino'ob jelecbalo'ob, le j siriaobo' actáan le j israelitaobo', tu siete kiine' j ba'atelnajo'ob. Ti' le kiinaco' le j israelitaobo' tu quíimsajo'ob cien mil aj ba'atelo'ob xíimbal u ba'atelo'ob.

³⁰U yalab le aj ba'atelo'obo' j púudzo'ob ca j bino'ob tu caajil Afec, ba'ale' u tuulumil le caajo' j lúub tu yóokol le veintisiete mil j xiibo'ob páatchaj ca'ach u púudzulo'obo'. Ben-adade' j púudz xan, ca j kuch te j caajo', ca tu ta'acbesubáa jooltaquil naj.

³¹Ca j a'ala'ab ti' tumen u aj náacomo'ob: Dzo'oc ojéeltique' le ajawo'ob israelitaob cu dzo'ocbesico'ob le nup t'aan cu beetico'obo', bey túuno' co'one'ex búuquintic to'otoch nooko'ob yéetel jun p'éel suum t caal, ca xi'ico'on tu táan u ajawil Israel u ti'al c ilic wa je'el u sa'atsic c cuxtale'exe'.

³²Ca túun tu búuquintajo'ob to'otoch nooko'ob yéetel jun p'éel suum tu caalo'ob, ca j bino'ob tu táan u ajawil Israel ca tu ya'alajo'ob ti': Cu káat óoltic Ben-adad ti' a tzicbe'enil ca sa'ats u si'ipil. Acabe' tu núucaj: ¿Laili' cuxa'ane'? ¡In ti'al tene' bey jun túul in sucu'une'!

³³Le máaco'obo' tu tucultajo'obe' lela' jun p'éel ma'alob chíiculal, le ca tu yu'ubajo'ob le t'aana' tu núucajo'ob tu séeblaquil: ¡Ben-adade' u sucu'un a tzicbe'enil! Acabe' tu núucaj ¡Xeene'ex ca a tase'ex! Ben-adad túune' j bin tu táan Acab, Acabe' tu beetaj u na'acal tu bolan.

³⁴Cu dzo'ocole' ca j a'ala'ab ti' tumen Ben-adad: Je'el in sutic ti' teech le caajo'ob tu lukesaj in taata ti' a taatao', teche' je'el u páajtal u yantal wa ba'ax a beet Damasco, je'el bix yaan ca'ach ti' in taata Samariae'. Acabe' tu núucaj: Tene' je'el u páajtal in chaic a bine'. Bey úuchic u beetic Acab jun p'éel kax t an yéetel Ben-adado' ca tu cha'aj u bin.

³⁵Chéen ba'ale', jun túul j xiib cu taal ti' u múuch'ul le aj bóobato'obo' tu dzo'ocbesaj u t'aan Yuumtzile', ca tu ya'alaj ti' jun túul u yéet xiibil: ¡Bet utz a quíimsiquen! Ba'ale' le u láako' ma' tu yooltaj u quíimsi'.

³⁶Le aj bóobat túuno' tu ya'alaj ti': Bey ma' ta wóoltaj a beet ba'ax tu ya'alaj Yuumtzilo', le quéen lukuquech tin wicnale' jun túul león bíin u quiimsech. Bey úuchico', chéen p'eelac u lukul tu yicnal le aj bóobato', nactáanta'ab tumen jun túul león ca j quíimsa'abi'.

³⁷Cu dzo'ocole' le aj bóobato' tu nactáantaj u láak máac, ca tu káataj xan ca beeta'ac loob ti', le máaco' tu nóocjadztaj, ca tu beetaj loob ti'.

³⁸Le aj bóobat túune' j bin u pa'at le ajaw te j bejo' u muclaj u yich yéetel jun p'éel nook tu yóokol u yicho'ob.

³⁹Le táan ca'ach u máan ajawe' j ka'am a'ala'ab ti' tumen le aj bóobato': Le u aj meyaj a tzicbe'enila' j bin tu'ux cu yúuchul le ba'atelo', ichil u tzoolilo'ob le aj ba'atelo'ob jóok jun túul aj ba'atel ca tu taasaj ti' teen jun túul máac kaxa'an. Ca tu ya'alaj ca in canante, bey xan tu ya'alaj ti' teen wa cu púudzule', yaan in quíimil tu yo'olal, wa quin bo'otic tres mil sac taakino'ob.

⁴⁰Ba'ale' u aj meyaj a tzicbe'enila' táan u beetic yaanal ba'alo'obe' ca j púudz ti' teen le máaco'. U ajawil Israele' tu núucaj ti': Teech ta juunal dzo'oc a wa'alic si'ipilnaja'anech, yéetel dzo'oc a xot kiinticabáa.

⁴¹Ba'ale' le aj bóobato' tu séeblaquil tu lukesaj le nook u kaxmajil u yicho'obo', le ajaw túuno' tu kaj óoltaj jun túul aj bóobat ca'achi'.

⁴²Ca túun j a'ala'ab ti' tumen le aj bóobato': Yuumtzile' bey cu ya'alica': Bey tumen ta cha'aj u púudzul le máac ca'ach ta xotkintaj u ti'al quíimilo' yéetel a cuxtal bíin a bo'ot u cuxtal, a caajale' yéetel le a ti'alo'.

⁴³U ajawil túun Israel j bin Samaria, yéetel okom u yóol yéetel p'uja'an, ca j ooc tu jalach naj.