Read Yucateco 1 Reyes 21 Bible Online

1 Reyes 21 - Yucateco bible

1 Reyes 21

¹Cu dzo'ocol u máan dze'edzec kiino'obe', tu caajil Jezreel jun túul j xiib cu kaaba'intic Nabot yaan ca'ach ti'e' jun p'éel u x péetpaachil u pakal uvaob, tu tzéel u jalach naj Acab, u ajawil u lu'umil Samaria.

²Jun p'éel u kiinile' Acabe' tu ya'alaj ti' Nabot: Bey tumen ti' yaan tu tzéel in jalach naj u x péetpaachil a paakalo', co'ox kexic, teche' ca dzáic ti' teen u ti'al ca in dzáa pakalbil che'obi', tene' quin dzáic ti' teech jun p'éel u ma'alob cúuchil u paakal uva, ba'ale' wa a káatee quin bo'oltic ti' teech le bajux cu tojoltique'.

³Ba'ale' Nabote' tu núucaj ti' Acab: Ma' u yóoltic Ku ca in dzáa ti' teech le ba'ax tin kamaj ti' in taata yéetel ti' in maamae'.

⁴Acabe' j bin tu yotoch chi'ichnac yéetel xan okom u yóol tu yo'olal le ba'ax tu núucaj Nabot ti'o', le ca j a'ala'ab ti' ma' bíin dza'abac ti' le ba'ax tu kamaj Nabot ti' u taata yéetel ti' u maamao'. J kuche' ca j chilaj ti' u tu táan le pako', ma' tu yóoltaj u jaant mix ba'ali'.

⁵X Jezabel u yatane', tu nadzajubáa ti'e' ca tu káat chi'itaj ti': ¿Ba'ax o'olal sen okom a wóol yéetel ma' a káat janali'?

⁶Acabe' tu núucaj: T'aanajen yéetel j Nabot, le j Jezreelilo', ca tin káataj ti' ca u con ti' teen u x péetpaachil u pakal uva. Ba'ale' wa xan u káate' quin kexic ti' yéetel u láak x péetpaachil uvaob. Ba'ale' leti'e' ma' tu yóoltaji'.

⁷X Jezabel u yatane' tu núucaj túun ti': ¡Teech máax cu dzo'ocbesa'al u t'aan tu lu'umil Israel! Co'oten, jaanen, jóomes a wóol. ¡Tene' yaan in wilic bix je'el u páajtal ati'alintic u x péetpaachil u pakal uva Nabote'!.

⁸Tu séeblaquile' tu dzíibtaj ju'uno'ob tu kaaba' Acab, ca xan tu chíicultaj yéetel u dzalabil u ajawil; cu dzo'ocole' tu túuxtaj ti' u nuuquilo'ob le caajo', máaxo'ob caja'ano'ob láili' tu caajal Nabot.

⁹Le dzíibil ju'uno' cu ya'alic ti'ob beya': Ka'ayte'ex su'ukin yéetel ca a dza'ex Nabot tu táan le caajo'.

¹⁰Cu dzo'ocole' ca a dza'ex ca'a túul j tuutus wíinico'ob tu táan u ti'al ca u ya'alo'ob: Nabote' tu poch'aj Ku, tu poch'aj xan ajaw. Cu dzo'ocole' ca jóokesique'ex, u ti'al a quíimsique'ex yéetel ch'iin.

¹¹U cajnáalilo'ob u caajal Nabot, pa'ate' yéetel u nuuquilo'ob le caajo' tu beetajo'ob le ba'ax tu ya'alaj x Jezabel te j dzíibil ju'uno'obo':

¹²Tu ka'aytajo'ob su'ukin ca tu culquintajo'ob Nabot tu táan le caajo'.

¹³Cu dzo'ocole' ca j kucho'ob ca'a túul j tuutus wíinico'obe' ca j t'aanajo'ob táan u ya'alico'ob tu táan tuláacal le caajo': Nabote' dzo'oc u poch'ic Ku, tu poch'aj xan ajaw. Bey túuno' tu jóokesajo'ob tu paach caaj ca tu quíimsajo'ob yéetel ch'iin.

¹⁴Cu dzo'ocole' tu túuxtajo'ob a'albil ti' x Jezabel, Nabote' dzo'oc u quíimsa'al yéetel ch'iin.

¹⁵Le ca tu yojéeltaj x Jezabele', tu ya'alaj ti' Acab: Xeen ca a ch'a'a' ati'alint' u x péetpach Nabot, le j jezreelile', le ma' u káat u contech ca'ache'. Nabote' ma' cuxa'ani' dzo'oc u quíimil.

¹⁶Le ca tu yojéeltaj Acab dzo'oc u quíimil Nabote', j bine' ca tu ch'a'aj u x péetpaachil u pakal uva.

¹⁷Yuumtzil túune' tu t'anaj Elías le j Tisbeile', ca tu ya'alaj ti':

¹⁸Xeen tu séeblaquil a wil Acab, u ajawil Israel ti' cajacbal Samariae'. Ti' le súutuca' ti' yaan tu x péetpach Nabote', dzo'oc u bin u ch'a'a' u ti'alinte.

¹⁹A'al ti' beya': Yuumtzile' bey cu ya'alica': Bey tumen ta quíimsaj Nabot yéetel ta tocaj le ba'ax u ti'ale', láili' ti' le cúuchil tu'ux j léedza'ab u ki'ikel tumen le peeko'obo', bey xan ti' bíin léedza'ac a ti'ali'.

²⁰Acabe' tu ya'alaj ti' Elías: ¿Bey túuno' teech in aj p'eeque' dzo'oc a nuptáantiquen? Elíase' tu núucaj: Bey, dzo'oc in nuptáantiquech, bey tumen chéen loolob ba'alo'ob ca beetic tu táan u yich Yuumtzil.

²¹Let o'olale', Yuumtzile' dzo'oc u ya'alic: Bin in ca'aj in taas yaayaj óolal ta wóokol, bíin xan in xu'uls tuláacal a ch'i'ibalo'ob; yaan xan in xu'ulsic tuláacal a j xibil paalal yaan tu lu'umil Israel.

²²Yaan xan in beetic yéetel a láatzililo'obe' le ba'ax tin beetaj yéetel u láaktzililo'ob Jeroboam, u paal Nabat, yéetel xan ti' u láaktzililo'ob Baasa u paal Ahíase', tu yo'olal tu beetaj in sen p'u'ujul yéetel tu beetaj u kebanchajal Israel.

²³Wa tu yo'olal x Jezabele' Yuumtzile' tu ya'alaj: X Jezabele' bíin jaanta'ac tumen peeko'ob tu lu'umil Jezreel.

²⁴Le a láaktzil bíin quíimic ich caaje', bíin jaanta'ac tumen peeko'ob; le bíin quíimic j káaxe' bíin lu'ukuc tumen j ch'úuyo'ob.

²⁵(Ma' yanji' mix máac je'el bix Acabe', máax tac t'anta'ab tumen x Jezabel u yatane', tu yo'olal lelo' chéen tu beetaj ba'alo'ob kaastaco'ob tu táan u yich Yuumtzil.

²⁶Tu beetaj ba'ax talam subtzil iquil tu kultilac beetbil kuob je'el bix tu beetajo'ob le j amorreobo', le máaxo'ob tojolchinta'abo'ob tumen Yuumtzil tu táan le j israelitaobo'.)

²⁷Le ca tu yu'ubaj Acab tuláacal lela', tu jataj u nook ca tu búuquintaj totochquil nooko'ob su'ukinaj xan. Cu wenel ca'ach yéetel u búuquintmaj xan le nooko'obo', cu máan xan ca'ach okom u yóol.

²⁸Yuumtzil Túune' tu ca'a a'alaj ti' Elías:

²⁹¿Dzo'oc wa a wilic bix úuchic u cabalcuntic u yóol Acab tin táan? Tu yo'olal tu cabalcuntilac u yóol tin táane', ma' bíin in beet u taal le kaas tu yokol u láaktzilo'ob ca'aliquil cuxa'ane', Ba'ale' ti' u kiinilo'ob u cuxtal u paale' bíin in taas le kaaso'.