Read Yucateco 1 Reyes 22 Bible Online

1 Reyes 22 - Yucateco bible

1 Reyes 22

¹J maan óox p'éel ja'abo'ob yaan jéedzel ichil siriob yéetel Israelitaob.

²Ba'ale' tu yóox p'éel ja'abe', Josafat u ajawil u lu'umil Judae' j bin u xíimbalt u ajawil Israel.

³U ajawil Israele' tu ya'alaj ti' u nuuquilo'ob u aj meyajo'ob: Te'exe' a wojele'exe', Ramot le yaan tu lu'umil Galaado' c ti'ale'ex. ¿Ba'ax o'olal ma' táan c beetic wa ba'ax u ti'al c luksic yáanal u méektáan ajawil Siria?

⁴Ti' Josafate' tu káat chi'itaj ti': ¿A káat a láakinten u ti'al c bin c ba'atelt Ramot tu lu'umil Galaad? Josafate' tu núucaj ti': Teen, in aj ba'atelo'ob yéetel in j nat' tzíimino'obe', ta wéetel yano'on bey xan yéetel a caajal.

⁵Ba'ale', táanile' káat chi'it wa u yóolal Yuumtzil.

⁶U ajawil Israele' tu much'quintaj u aj bóobato'ob, yaan ca'ach naklic cuatrocientos ca tu káat chi'itaj ti'ob: ¿U najmal wa in bin in ba'atelt Ramot tu lu'umil Galaad, wa ma'? Leti'obe' tu núucajo'ob: Ba'ateltej, tumen Yuumtzile' bíin u ca'aj u kub ti' teech.

⁷Ba'ale' Josafate' tu káat chi'itaj: ¿Míina'an wa u láak u aj bóobat Yuumtzil ti' máax je'el u páajtal c káat chi'e'?

⁸U ajawil Israele' tu núucaj ti' Josafat: Yaan jun túul, yéetel máax je'el u páajtal c káat chi' ti' Yuumtzile'. Micaías u paal Imla, chéen ba'ale' in p'ectmaj, tumen ma'atech u ya'alic ti' teen ba'alo'ob utztac, wa ma' chéen ba'alo'ob ma' utzi'. Josafate' tu ya'alaj ti': Lelo' ma' unaj a wa'aliqui'.

⁹Tu séeblaquile' u ajawil Israele' tu t'anaj jun túul u nojoch aj meyaje', ca tu ya'alaj ti': ¡Tu séeblaquil, taasa'ac Micaías, u paal Imla!

¹⁰U ajawil Israel, bey xan Josafat u ajawil Judae' u dzaamajo'ob u búuquil ba'atel, culucbalo'ob tu jalach káanche'ob tu táax buut'il tu jool u caajil Samaria, tuláacal le aj bóobato'obo' táan u t'ant'an bóobato'ob tu táan leti'ob.

¹¹Sedequías, u paal Quenaana, u beetmaj u baaco'ob fierro u ca'aj, táan u yawat a'alic: ¡Bey dzo'oc u ya'alic Yuumtzila': Yéetel le baaco'oba' bíin a ba'atelt le j siriaobo', tac a láaj xu'ulsico'ob!

¹²Tuláacal le aj bóobato'obo' bey u ya'alico'ob ti' ajawo': Ba'atelt Ramot le yaan tu lu'umil Galaad tumen yaan a dzáanche'etic, tumen Yuumtzile' bíin u dzáa ti' teech le caajo'.

¹³Le aj túuchi' j bin ca'ach u taas Micaías, tu ya'alaj ti': Tuláacal le aj bóobato'ob dzo'oc u dzáaico'ob jun p'éel ma'alob núucaajil ti' ajaw. Bey túuno' quin káatic ti' teech ca a wa'al ba'al ma'alob je'el bix le cu ya'alico'obo'.

¹⁴Micaíase' tu núucaj ti': ¡Quin jalach t'antic tu kaaba' Yuumtzile', chéen bíin in wa'al le ba'ax bíin u ya'al ti' teen Yuumtzil ca in wa'ale'!

¹⁵Cu dzo'ocole' j bin tu táan ajaw, ajawe' tu káat chi'itaj ti': Micaías, ¿U najmal wa c bin c ba'atelt Ramot tu lu'umil Galaad, wa ma'? Micaíase' tu ya'alaj: Ba'ete'eltej, tumen yaan a dzáanche'etic, tumen Yuumtzile' bin u ca'aj u kub ti' teech.

¹⁶Ba'ale' ajawe' tu núucaj ti': ¿jay téen bíin in wa'al ti' teech, yéetel jalacht'aane' ca a wa'al ti' teen tu kaaba' Yuumtzil chéen le ba'ax jaaje'?

¹⁷Micaías túune' tu ya'alaj: Dzo'oc in wilic tuláacal le j israelitaob ki'itpaja'ano'ob te j káaxo'obo', beyo'ob j tamano'ob mina'an u aj canano'obe'. Yuumtzile' dzo'oc u ya'alic: Lelo'oba' mina'an u taatailo'ob; Jujun túulile' suunac jedzecnac tu yotoch.

¹⁸U ajawil Israele' tu ya'alaj ti' Josafat: ¿Ma' wa tin tzicbaltaj ti' teche', le máaca mix jun téen cu ya'alic ti' teen ba'al ma'alob, chéen ba'alo'ob kaastaco'obi'?

¹⁹Micaíase' tu ya'alaj xan: Tu yo'olal le ba'ax dzo'oc a wa'alico', u'uy ba'ax cu ya'alic Yuumtzil: Tin wilaj Yuumtzil culucbal tu jalach káanche', tuláacal u ya'abcach u cajnáalilo'ob le ca'ano' ti' wa'alacbalo'ob tu yicnale', tu x no'oj kabil yéetel tu x dzíic kabil.

²⁰Yuumtzil túune' tu káat chi'itaj máax bíin xi'ic u ti'al líiksaj óoltic Acab u ti'al ca xi'ic u ba'atelt Ramot tu lu'umil Galaad, u ti'al ca lúubuc te'elo'. Jun jaatze' cu ya'alic ca'ach jun p'éel ba'al, u láak jun jaatze' yaanal ba'al.

²¹Ba'ale' jun túul pixane' j wa'alaj tu táan Yuumtzil ca tu ya'alaj leti' bíin xi'ic u beete. Yuumtzile' tu káat chi'itaj ti' bix u tucultic u beetic,

²²Le pixano' tu ya'alaj bin u ca'aj u dzáa tuusil tuuculo'ob ti' tuláacal u aj bóobato'ob le ajawo'. Yuumtzil túune' tu ya'alaj ti' jach tu jaajil beyo', je'el u kuchul u tuse', ca tu ya'alaj ti' ca xi'ic u beete.

²³Bejela'a' túune' dzo'oc a wojéeltique' Yuumtzile' tu dzaj jun túul j tuutus pixan tu chi' tuláacal a aj bóobato'ob, máaxo'ob dzo'oc u ya'alico'ob bix bíin xu'ulsa'aquech.

²⁴Bey túuno' Sedequías u paal Quenaana, tu nadzajubáa ti' Micaías ca tu dzaj jun puul láaj ti', ca tu ya'alaj: ¿Bix máanic tin tzéel u pixan Yuumtzil u ti'al ca u t'aanech teech?

²⁵Micaías tu núucaj ti': Bíin a wojéelt le kiin quéen manaquech jool taquil naj u ti'al a ta'acbesicabáa.

²⁶U ajawil Israel túune' tu ya'alaj: ¡Mache'ex j Micaías, bise'ex kalbil tu táan Amón, u méekt'aan le caaja', yéetel tu táan Joas, in paal!

²⁷A'ale'ex ti'obe' teen a'alique' ca ocsa'ac ti' kalab naj, ca dza'abac ti'e' chéen dze'edzec waaj yéetel ja', tac quéen suunaquen toj in wóol yéetel utz in wanil.

²⁸Micaíase' tu ya'alaj xan: Wa ca suut toj a wóol yéetel utze', Yuumtzile' ma' j t'aanaj yéetel in chi'i'.

²⁹Bey túuno' u ajawil Israel yéetel Josafat, u ajawil Judae', j bino'ob u ba'atelto'ob Ramot tu lu'umil Galaad.

³⁰U ajawil Israele' tu ya'alaj ti' Josafat: Tene' bin in ca'aj ocol ti' le ba'atelo' yéetel tuusil búuc, teche' ca dzic in búuc. Beyo' u ajawil Israele' tu dzaj tuutus búuc ma' u ti'ali' ca j bin j ba'atel.

³¹Ba'ale' u ajawil Siriae' dzo'oc ca'ach u ya'alic ti' treinta y dos le máaxo'ob cu nu'uctico'ob u bolanilo'ob ba'atel, ma' u ba'ateltico'ob mix máac, chéen u ajawil u caajil Israel.

³²Ca j ila'ab Josafat tumen le máaxo'ob cu nu'uctico'ob u bolanilo'ob le ba'atelo', ca tu tucultajo'obe' u ajawil Israel ca tu bakpachtajo'ob u ti'al u ba'ateltico'ob. Josafat túune' awatnaj táan u káatic áantaj.

³³Le ca tu kaj óoltajo'ob ma' u ajawil Israele' jáaw u tzaypachtico'ob.

³⁴Ba'ale' jun túul aj ba'atele' tu t'íin pulaj u x julub chéen mina'an u jaajile', ca j tza'ay tu'ux cu núup'ul u búuquil u ba'atel u ajawil Israel, ca tu beetaj loob ti' u ti'al quíimil. Leti' túune' tu ya'alaj ti' le máax bisic le bolano': Co'ox suut, jóokesen ti' le u cúuchil le ba'atela' tumen táan in quíimil.

³⁵Ti' le kiino' talamchaj le ba'atelo', le ajawo', j p'a'at wa'alacbal ichil le bolan táan u ba'ateltic le j siriobo'. Ba'ale' tu yocnaj kiine' j quíimi', tumen le tu'ux beeta'ab loob ti'o', u ki'ikele' ma' jáaw u chooji', táan ca'ach u yáalcab tu táas che'il le bolano'.

³⁶Le ca j jo'op' u t'úubul kiine', j áalcabnaj u t'aanil ichil u tzoolol le aj ba'atelo'obo': ¡Xi'ic jujun túuli' tu caajal yéetel tu lu'umil,

³⁷tumen ajawe' dzo'oc u quíimil. Ca túun j bisa'ab ajaw tu caajil Samariae' ca j mu'uc te'elo'.

³⁸Cu dzo'ocole' j p'o'ob u bolan tu noj jaltuunil Samaria, tu'ux cu yichquilo'ob ca'ach le x cáacbacho'obo', le peeko'ob túuno' tu léedzajo'ob u ki'ikel Acab, Je'el bix a'ala'anil ca'ach tumen Yuumtzile'.

³⁹U yalab u tzicbalil u cuxtal Acab, yéetel tuláacal ba'ax tu beetaje', u jalach naj marfil u ca'aje', bey xan le caajo'ob tu beetajo' ti' dzíibta'an tu dzíibil ju'unil u ajawilo'ob Israele'.

⁴⁰J quíim Acab, cu dzo'ocole' ajawnaj tu káanche' u taatae', Ocozías u paal.

⁴¹Tu can ja'abo'ob, u ajawtic Acab Israele', Josafat u paal Asae', jo'op u ajawtic Judá.

⁴²Yaan ca'ach ti'e' treinta yéetel cinco ja'abo'ob, veinticinco ja'abo'ob ajawnaj Jerusalén. U maamae' cu kaaba'intic ca'ach, Azuba, u x ch'upul paal ca'ach Silhi.

⁴³Josafate' xíimbalnaj toj ti' tuláacal ba'ax tu beetaj je'el bix Asa u taatae', le ba'alo'ob tu beetaje' toj tu yich Yuumtzil quex ma' tu lukesaj le manba'al kulnajo'ob tu'ux cu kubic ca'ach le caaj, quíimsbil ba'alche'ob yéetel tóocbil poom ti' le beetbil kuobo'.

⁴⁴Josafate' tu beetaj jun p'éel jéedzel kax t'aan yéetel u ajawil Israel.

⁴⁵U yalab u tzicbalil u cuxtal, le talam ba'alo'ob, yéetel le ba'atelo'ob tu'ux táacpaje', ti' dzíibta'an tu dzíibil ju'unil u ajawilo'ob Judae'.

⁴⁶Josafate' leti' máax tojolch'int te j lu'um le máaxo'ob cu weeyanquilo'ob ichil u kultajo'obe', le máaxo'ob j p'ato'ob tu kiinilo'ob Asa u taatae'.

⁴⁷(U cajnáalilo'ob Edome' mina'an ca'ach u ajawil, chéen yaan ca'ach ti'ob jun túul j canan caaj.)

⁴⁸Josafate' tu beetaj cheemo'ob je'el bix u cheemilo'ob Tarsise', u ti'al u taasic oro líikbal tu lu'umil Ofir; ba'ale' ma' j páatchaj u bino'obi' tumen xe'exet'pajo'ob Ezion-Geber.

⁴⁹Ocozías u paal Acabe', tu ya'alaj túun ti' Josafat ca u cha'ob u bino'ob le máaxo'ob cu meyajo'ob u cheemo'ob u ti'al u láakintico'ob le u aj meyajo'ob ti' le cheemo'obo', ba'ale' Josafate' ma' tu yóoltaji'.

⁵⁰Josafate' j quíimi' ca j mu'uc tu caajil David, u máanja'an ch'i'ibal. Cu dzo'ocole' ajawnaj tu káanche' u taatae', Joram u paal.

⁵¹Ti' u diecisiete ja'abo'ob, u ajawtic Josafat Judae', Ocozías, u paal Acabe' cáaj u ajawtic Israel tu caajil Samaria, Ajawnaj ca'a p'éel ja'abo'ob.

⁵²Ba'ale' le ba'alo'ob tu beetajo' kaastaco'ob tu yich Yuumtzil, tumen j bin tu paach le kaakas bej tu bisaj u taata yéetel u maama, je'el bix le tu bisaj Jeroboam, u paal Nabat, le máax tu beetaj u kebanchajal Israele'.

⁵³Tu yóokol lelo' tu kultaj Baal, je'el bix tu beetaj ca'ach u taata, le ca tu beetaj u sen p'u'ujul Yuumtzil, u Junab Ku Israele'.