Read Yucateco 1 Reyes 3 Bible Online

1 Reyes 3 - Yucateco bible

1 Reyes 3

¹Salomone' tu láaktziltubáa yéetel faraón, u ajawil Egipto, tumen j dzo'oc u beel yéetel x ch'upul paal, ca tu bisaj tu caajil David ca'aliquil u dzo'ocsic u ca'anal naj, u kulnaj Yuumtzil yéetel u tuulumil u bakpach Jerusalén.

²Ba'ale' le caajo' cu kubico'ob ca'ach quíimsbil ba'alche'ob tu ca'anal cúuchilo'ob tu'ux cu kulta'al beetbil kuob, tumen ma' beeta'ac ca'ach u kulnaj Yuumtzili'.

³Salomone' u yaabiltmaj ca'ach Yuumtzil yéetel cu dzo'ocbesic le a'almaj t'aano'ob dza'an tumen David u taata, quex tumen leti' ca'ache' cu kubic quíimsbil ba'alche'ob, yéetel poom ti' le ca'anal cúuchilo'obo',

⁴cu bin xan tu caajil Gabaón u ti'al u kub quíimsbil ba'alche'ob tumen le cúuchilo' leti' asab nojochil ichil u chuca'ano'ob; te j cúuchilo' cu kubic ca'ach mil tóocbil ba'alche'ob.

⁵Jun p'éel áakabe', te tu caajil Gabaono', Yuumtzile' chíicpaj ti' Salomón ich wayak ca tu ya'alaj ti': Káat ti' teen je'el ba'alac ca wóolte', tene' bíin in dzáa ti' teech.

⁶Salomone' tu núucaj: Teche' utz ta bisajilabáa yéetel in taata David a palitzil, leti' xane' xíimbalnaj yéetel kub óolal, nu'uca'an óolal yéetel tojil cuxtal ta wéetel. Let óolale' ta beetaj nojoch utz ti', ca ta dzaj jun túul u j xibil paal u ti'al j cutal tu jalach káanche', je'el bix dzo'oc u yúuchulo'.

⁷Teche' Yuumtzil in Ku, dzo'oc a dzáiquen ajawil tu jalach káanche' David in taata, quex tumen chéen jun túulen táanquelem j xi'ipal mix ba'al in wojel.

⁸Ba'ale' ta dzajen u ti'al méektáant le caaj ta yéeyaja': jun p'éel caaj sen nojoch, tu yo'olal u ya'abile' ma' tu páajtal u xo'ocol mix u na'ata'al jay túul.

⁹Dzáa ti' teen jun p'éel pucsi'ikal ti' u yóol u méektáant a caajal yéetel u ti'al in kaj óoltic ba'ax utz yéetel ba'ax kaas; tumen ¿máax je'el u páajtal u méektáantic le a caajal sen nojocha'?

¹⁰Yuumtzile' jach utzi tu yu'ubilac le ba'ax tu káataj Salomono',

¹¹ca tu ya'alaj ti': Bey ma' ta káataj, jun p'éel chowac cuxtal, mix ayikalilo'ob, mix u quíimil a aj p'eeco'ob, ba'ale' ta káataj na'at u ti'al a canic a wu'uy u yúuchul t'aan yéetel u ti'al a méektáane'.

¹²bíin in beet le ba'ax ta káatajo': Tene' quin dzáic ti' teech kaj óolalil yéetel na'atil je'el bix mix máac yanac ma'ili' síijiqueche', mix bíin yanac pachal ti' teech.

¹³bey xan quin dzáic ti' teech ayikalil yéetel tzicbe'enil, quex ma' ta káataji', tu yo'olal lelo' ti' tuláacal a cuxtale' ma' bíin yanac u láak ajaw je'el bix teche'.

¹⁴Bey xan wa ca beetic ba'ax in káate' yéetel ca dzo'ocbesic in wa'almaj t'aano'ob, yéetel in tzolbe'en t'aano'ob je'el bix tu beetaj David a taatae', bíin in dzáa ti' teech jun p'éel chowac cuxtal.

¹⁵Le ca j aaj Salomone' tu yilaj chéen ca'ach jun p'éel wayak. Le ca j kuch Jerusalene', bin tu táan u ba'asche'il u nup t'aan Yuumtzil ca tu kubaj tóocbil ba'alche' yéetel u quíimsbil ba'alche'il ca'a bisajbáil. Cu dzo'ocole' tu dzaj jun p'éel nojoch janal ti' tuláacal u aj meyajo'ob.

¹⁶Ti' le kiino'obo' j bin u yilo'ob ajaw ca'a túul x cáacbacho'ob. Le ca j kucho'ob tu táane',

¹⁷jun túule' tu ya'alaj: ¡Ay in taataen! teen yéetel le co'olela' cajacbalo'on ti' jun p'éelili' naj; tene' síijsajnajen ca'aliquil leti'e' ti' yaan tin wéetel te j najo'.

¹⁸Tu yóox p'éel kiin síijsajnaquene', le co'olela' síijsajnaj xan leti'. T juunal yanilo'on. Mina'an mix jun túul yaanal máac t etel te j najo', chéen t juunal ca'a túulo'on.

¹⁹Ba'ale' jun p'éel áakabe' j quíim u yaal le co'olela', tumen x leti'e' j chilaj yóokol.

²⁰J líik túun chúumuc áakab, ca'aliquil táan in wenele' ca tu lukesaj in waal tin tzéel ca j chilaj tu yéetel, ca tu dzaj tin tzéel le u yaal quimeno'.

²¹Tu ja'atzcab kiine', j líiken in dzáa u chu'uch in waale', ca tin wilaj quimen, Ba'ale' tu sáasilil le kiino' tin pactaje', ca tin wilaj ma' leti' le in waal tin síijsajo'.

²²Le u láak co'olelo' tu ya'alaj: Ma', le cuxa'ano' in waal, le quimeno' a ti'al. Ba'ale' le yáaxo' tu núucaj: Ma', a waal leti' le quimeno', in waale' leti' le cuxa'ano'. Bey úuchic u ba'atel t'aano'ob tu táan ajaw.

²³Ajaw túune' jo'op u tuucul beya': Le co'olela' cu ya'alic u yaale' leti' le cuxa'ano', le quimeno' u yaal le u láak co'olelo'; Ba'ale' le u láak co'olelo' u láak ba'ax cu ya'alic.

²⁴Cu dzo'ocole' tu ya'alaj: ¡Taase'ex ti' teen jun p'éel máascab! Le ca j bisa'ab le máascab ti' le ajawo',

²⁵ca tu ya'alaj: Xote'ex ca'a búuj le paal cuxa'ano'; dza'ex jujun búuj ti' jujun túul le co'olelo'obo'.

²⁶Ba'ale' u maama le paal cuxa'ano' sen yaayaj óolnaj tu yo'olal u yaal, ca tu káat óoltaj ti' ajaw: ¡U beet utz a tzicbe'enil ma' u quiimsic le paal cuxa'ano'! ¡Asab utz ca a dzáa ti' le co'olela'! Ba'ale' le u láako' tu ya'alaj: Mix teech mix teen. ¡Bu'ujuc!

²⁷Ajaw túune' t'aanaje' ca tu ya'alaj: Kube'ex le paal cuxa'an ti' le co'olel je'elo'. Ma' a quinsique'ex, tumen leti' jach u maama.

²⁸Tuláacal u caajil Israele' j kuch u yojéelt bix úuchic u xot kiin ajaw, u ti'al u xot'ic le ba'atelo', ca tu yu'ubajo'ob nojoch tziiquil tu yo'olal, tumen tu yilajo'ob dzo'oc u dza'abal na'at ti' tumen Ku, u ti'al u beetic ba'ax tu beel.