Read Yucateco 1 Reyes 4 Bible Online

1 Reyes 4 - Yucateco bible

1 Reyes 4

¹Salomone' ajawnaj ti' tuláacal u lu'umil Israel.

²U nuuquilo'ob u aj meyajo'ob leti' lelo'oba'; Azarías, u paal aj kiin Sadoc;

³Elihoref yéetel Ahías, u paalal Sisa, le ti'ob dzíibtic ba'axo'ob cu yúuchul; Josafat, u paal Ahilud, u aj dzíib ajaw;

⁴Benaía u paal Joiadae', u náacom aj ba'atelo'ob; Sadoc yéetel Abiatare', aj kiino'ob;

⁵Azarías, u paal Natane', u aj ilaj meyaj; Zabud, u paal aj kiin Natane', u aj tzol xiquin Ajaw;

⁶Ahisare', u noj ilaj meyajo'ob le jalach najo'; Adoniram, u paal Abdae', leti' ilic u beeta'al le páatan meyajo'obo'.

⁷Salomone' u dzaamaj ca'ach doce jalacho'ob tu yóokol tuláacal Israel, u ti'al u kubo'ob ba'ax kabéet ti' ajaw yéetel ti' u láaktzililo'ob. Tu jujun túulilo'obe' u najmal u dzi'ico'ob ba'ax kabéet ti' jun winal yéetel ti' jun ja'ab.

⁸Le doce jalacho'oba' t'oxa'ano'ob ca'ach beya': U ti'al u cajnáalilo'ob u pu'uquilo'ob Efraine', Ben-Hur;

⁹u ti'al u cajnáalilo'ob u lu'umilo'ob Macaze', Ben-Decar, Saalbim, Bet-sewinal, Elón yéetel Bet-hanaán;

¹⁰u ti'al u cajnáalilo'ob Arubote' Ben-Hesede', tu caajil Arubot bey xan Soco yéetel tuláacal u lu'umilo'ob Hefer;

¹¹Ben Abinadabe', u ti'al tuláacal u táabal lu'umil Dor; u yatan ca'ache' x Tafat, u x ch'upul paal Salomón;

¹²u ti'al u cajnáalilo'ob t'aanaque', Baana u paal Ahilude', bey xan Meguido yéetel tuláacal Betseán, yaan tu tzéel Saretán tu caabalil Jezreel, líikbal Bet-seán tac Abel-mehola, tu xuul Jocmeam;

¹³u ti'al u cajnáalilo'ob Ramot Galaade', Ben-Geber leti' méektáantic ca'ach u x péet caajilo'ob Galaad u ti'alo'ob ca'ach Jair u paal Manasés, bey xan u lu'umil Argob, le yaan ca'ach tu lu'umil Basán, tu'ux yano'ob ca'ach sesenta nucuch múuch' caajo'ob bakpachta'ano'ob yéetel u tuulumilo'ob bey xan dza'an u kalabilo'ob Bronce u ca'ajo'ob;

¹⁴u ti'al u caajilo'ob Mahanaime', Ahinadab u paal Ido;

¹⁵u ti'al u ch'i'ibalo'ob Neftalí, Ahimaas le j dzo'oc u beel yéetel Basemat, u x ch'upul paal Salomone';

¹⁶u ti'al u caajilo'ob Aser yéetel Alote', Baana, u paal Husai;

¹⁷u ti'al u caajilo'ob Isacare', Josafat, u paal Parúa;

¹⁸u ti'al u caajilo'ob Bemjamine', Simei u paal Ela;

¹⁹u ti'al u lu'umilo'ob Gade', Geber u paal Uri, u lu'umo'ob ca'ach Sehón, u ajaw le j amorreobo', yéetel Og, u ajawil ca'ach Basán. Yaan xan ca'ach jun túul jalach u nojochil tu yóokol tuláacal le lu'umo'obo'.

²⁰U cajnáalilo'ob Judá yéetel Israele', jun p'éel caaj mina'an ca'ach u xooquil je'el bix le sa'am lu'um yaan tu jáal le ka'anabo'. Yaan ca'ach ya'abcach janal, yéetel ukul, bey xan qui'imac óolal.

²¹Salomone' chéen leti' ca'ach u nojchil tuláacal le u ajawilo'ob yano'ob líikbal tu yáalcab ja'il Éufrates tac tu lu'um le j filisteobo' bey xan tac tu jáal u lu'umil Egiptoo', tumen leti'obe' cu bo'otico'ob ca'ach páatan, u palitzilo'ob xan Salomón ca'aliquil cuxa'an ca'achi'.

²²Le janal kabéet ca'ach ti' Salomón sáamsamalo', seis mil seiscientos u wuudzul ma'alob juuch', trece mil doscientos u wuudzul u sacanil harina,

²³diez u asab poloctaquil wacaxo'ob, veinte wacaxo'ob tzéenta'ano'ob yéetel xíu, cien j tamano'ob, cu dzo'ocole' ma' tu xo'ocol jay túul u jejeláasil quéejo'ob, gacela'ob, gamo'ob yéetel poloc ch'íich'o'ob,

²⁴tumen Salomone' u palitziltmaj ca'ach tuláacal le lu'um yaan tu chikin Éufrateso', líikbal Tifsae' tac Gaza, bey xan tuláacal u ajawilo'ob le lu'umo', bey túuno' yaan xan ca'ach jéedzel ti' tuláacal u bakpachil le lu'umo'.

²⁵Ca'aliquil cuxa'an Salomone', u cajnáalilo'ob Judá, Israel, líikbal Dan tac Beersebae', jeedzel cuxlajico'ob, tu jujun túulilo'ob yáanal u parraob yéetel yáanal u higueraob.

²⁶Salomón xane' yaan ca'ach ti' cuatro mil u yotoch tzíimino'ob u ti'al u tzíiminilo'ob u bolano'ob, yéetel doce mil j xiibo'ob cu ba'atelo'ob yóok tzíimino'ob.

²⁷Le jalacho'ob ca'acho', cu dzáico'ob ba'ax ka'abéet u ti'al jun winal ti' le u najmal u dzáico'ob, ti' ajaw Salomón yéetel ti' u yu'ula'obo', cu yilico'ob ma' u bineltic mix ba'al ti'ob.

²⁸Le quéen kuchuc u kiinil u dza'abale' cu túuxtico'ob le cebada ti' le cúuchil tu'ux cu ya'ala'al ti'obe' cu dzo'ocole' cu túuxtico'ob xan le su'uc u ti'al le tzíimino'ob cu jíiltajo'obo'.

²⁹Kue' tu dzaj ti' Salomón ya'abcach kaj óolal yéetel na'at, j dza'ab xan ti' jun p'éel sen jadzutz ch'a'a nu'uctajil.

³⁰Salomone' píitmáan u yojéelajil ti' u kaj óolal le j Egipciobo' yéetel ti' le j lakinilo'obo'.

³¹Asab yanchaj u yojéelajil ti' je'el máaxaque'; asab yaan u yojéelajil ti' Etán, u ch'i'ibal Zera, Calcol yéetel Darda, u paalal Mahol, u péectzilile' u'uya'ab ti' tuláacal le múuch' caajo'ob yaan tu bakpacho'obo'.

³²Tu tze'ectaj tres mil a'almaj xiquino'ob tu beetaj cinco mil kay t'aano'ob.

³³J t'aanaj tu yo'olal le che'obo', le paakalo'obo', chu'unpaj yéetel u kuulche'il le Líbano'ob tac le xíu cu ch'íijil ti' le pako'obo', j t'aanaj xan tu yo'olal ba'alche'ob, ch'íich'o'ob ba'alche'ob le cu jíilticuba'ob yéetel le cayo'obo'.

³⁴Ti' tuláacal u múuch' caajilo'ob u ajawilo'ob yóokolcaab tu'ux u'uya'ab u péectzilil tu yo'olal u na'at Salomone', cu taal ca'ach máaco'ob u ti'al u'uyic.