Read Yucateco 1 Reyes 5 Bible Online

1 Reyes 5 - Yucateco bible

1 Reyes 5

¹Le ca tu yojéeltaj Hiram u ajawil Tiro, Dzo'oc u jun páaycunta'al Salomón bey ajaw u ti'al u jeelint David u taatae', tu túuxtaj u aj túuchi'ob u ti'al j t'aan tu yo'olal, tumen Hirame' ma' j xu'ul u yaacuntic ca'ach Davidi'.

²Salomón túune' tu túuxtaj a'albil ti' Hiram:

³Teche' a wojel David in taatae' ma' j páatchaj u beetic jun p'éel kulnaj u ti'al Yuumtzil u Kui', tu yo'olal táacpajic ba'atelo'ob, tac ca j t'onquinta'ab u aj p'eeco'ob tumen Yuumtzil.

⁴Ba'ale' bejela'e' Yuumtzil in Junab Kue' dzo'oc u dzáic ti' to'on jéedzelil tuláacal tu'ux, tumen mina'an ti' to'on aj p'eeco'ob, mix noj yaatzilo'ob.

⁵let óolale' dzo'oc in tucultic in beetic jun p'éel kulnaj u ti'al Yuumtzil in Ku, je'el bix le séeb chi' tu beetaj ti' David in taata, le ca tu ya'alaj ti'e', u paal bíin ajawchajac tu yo'olal leti', máax bíin beetic jun p'éel kulnaj u ti'al u tzicbe'enil.

⁶A'al túun ca ch'a'acac u kuulche'ilo'ob Líbano. In aj meyajo'ob bíin u yáanto'ob a aj meyajo'ob, teen quin in bo'ot ti' teech le buca'aj a káat ti' teen tu yo'olal u tojol u meyaj a aj meyajo'obe', teche' a wojel mix jun túul ti' to'on u yojel ch'ac che' je'el bix le j sidonilo'obo'.

⁷Le ca tu yu'ubaj Hiram le péectzil tu túuchi'itaj Salomone', sen qui'imacchaj u yóol ca tu ya'alaj: ¡Bejela'e' qui'iqui' t'aanta'ac Yuumtzil, tumen tu dzaj ti' David jun túul paal sen yaan u kaj óolal u ti'al ca u méektáant le nucuch múuch' caajo'obo'!

⁸Cu dzo'ocole' Hirame' tu túuxtaj a'albil ti' Salomón: Dzo'oc in kamic le péectzil ta túuxtaj ti' teno', bíin in túuxt ti' teech u che'il kuulche' yéetel le u che'il pino ta káatajo'.

⁹In aj meyajo'ob bíin u yéemso'ob te j Líbanoo' tac te j ka'anabo', te'elo' bíin jíilta'ac yóok ja' bey cheeme', tac tu'ux bíin a wa'al ti' tene'. Te'elo' ti' bíin wa'ach'ac le che'obo', u ti'al ca a ch'a'ob. Teche' le ba'ax yaan a beetique', chéen ca beet utz a dzáic ba'al u ti'al jaantbil tin jalach najil; leti' quin dzíiboltic.

¹⁰Let óolale', Hirame' tu dzaj ti' Salomón tuláacal u che'il kuulche', yéetel u che'il pino le buca'aj tu yóoltaje',

¹¹Salomone' tu dzáa ti' Hiram janal u ti'al u jalach naj: cuatro millones cuatrocientos mil u wuudzulo'ob trigo yéetel cuatro mil cuatrocientos litros chéen u aceiteil oliva. Lela' cu kubic ca'ach Salomón ti' Hiram, ja'aben ja'ab.

¹²Bey túuno' Yuumtzile' tu dzaj kaj óolal ti' Salomón je'el bix tu séeb chi'itaje'. Tu beetajo'ob xan Salomón yéetel Hiram jun p'éel nup t'aan, yanji jéedzel tu baatzilo'ob.

¹³Ajaw Salomone' túuchi' t'antaj ca mo'oloc máaco'ob u ti'al j meyaj x ma' bo'olil, ti' tuláacal u lu'umil Israel, ti' le buca'aj máaco'ob j mo'olo'obo' tu chucaj treinta mil xiibo'ob,

¹⁴Ichil tuláacalo'obe' jóokesa'ab óox jaatzi', ca j túuxta'abo'ob j Líbano, jun jaatze' diez mil xiibo'ob, lelo'oba' yaan u meyajo'ob buul jun winal, cu dzo'ocole' cu bin u láak jun jatz; beya' le j xiibo'oba' cu meyajo'ob jun winal j Líbano', ca'a p'éel winale' tu yotocho'ob. Le máax ilic ca úuchuc le meyaj x ma' bo'olila' Adoniram ca'achi'.

¹⁵Yaan xan ca'ach ti' Salomón, setenta mil aj cucho'ob yéetel ochenta mil j póol tuunicho'ob te j pu'uco',

¹⁶ti' le buca'aja', ma' táacpaja'ano'ob trecientos máaco'ob nu'uctic le meyajo'obo'.

¹⁷Ajawe' tu túuxtaj jóokesbil nucuch tuunicho'ob co'ojtaco'ob u ti'al u chuunpakilo'ob le kulnajo', bey xan póolbil tuunicho'ob.

¹⁸U aj meyajo'ob Salomón, Hiram yéetel u cajnáalilo'ob Gebal tu máakantajo'ob le che'ob bey xan tu póolajo'ob le tuunicho'ob u ti'al u beeta'al le kulnajo'.