Read Yucateco 1 Reyes 6 Bible Online

1 Reyes 6 - Yucateco bible

1 Reyes 6

¹Salomone' tu chu'unbesaj u beetic u kulnaj Yuumtzil tu can p'éel ja'abil u méektáantic Israel, tu winalil ziv, u ca'a p'éel winalil le ja'abo', dzo'oc ca'ach u máan cuatrocientos ochenta ja'abo'ob jóokic le j israelitaob tu lu'umil Egiptoo'.

²Le kulnaj tu beetaj ajaw Salomón u ti'al Yuumtzile' yaan ca'ach ti'e' veintisiete metro'ob u chowaquil, nueve metro'ob u cóochil, trece metro'ob ca'a tac táancoch u ca'analil.

³Le máacan yaan actáan kulnajo' cu p'isic nueve metro'ob u chowaquil, láajquet ti' u cóochil le kulnajo', yéetel can p'éel metro'ob ca'a tac táancoch u táan.

⁴Salomone' tu beetaj ti' le kulnajo' calom kiino'ob yéetel tzáatzalche'ilo'ob.

⁵Tu beetaj xan jun p'éel u núup naj taakal ca'ach ti' le pakilnajo' cu cuchtáantic ca'ach u pakilo'ob súutpachtic le kulnajo', bey je'el bix u bakpach le chúumuc najo', tu beetaj mejen káasab najo'ob tu bakpach.

⁶Le yáax jun yáal u núup najilo' cu p'isic ca'ach ca'a p'éel metro'ob yéetel veinticinco centímetros u cóochil; u ca'a yáale' ca'a p'éel metro'ob yéetel sesenta centímetros u cóochil; u yóox yáale' óox p'éel metro'ob yéetel quince centímetros u cóochil; tumen paachile' tu nu'ut'quintaj u p'iisilo'ob le kulnajo', u ti'al ma' u pakic le póolbil che'ob yóokol u pakilo'ob le kulnajo'.

⁷Le kulnajo' j beeta'ab yéetel tuunicho'ob láaj póola'ano'ob táanxel tu'ux, let o'olale' tu cúuchil tu'ux beeta'ab le kulnajo' ma' j u'uya'ab u póolal tuunich mix xan u'uya'ab u láak u nu'ucul meyajo'ob beeta'an yéetel hierro.

⁸U jool najil u káasab le yáax jun yáalo' ti' yaan tu x no'ojil le kulnajo'; u ti'al u na'acal máac ti' le ca'a yáal tac u kuchbal tu óox yáalo' beeta'an ca'ach u ebtuunil ch'o'otmanch'o'ot.

⁹Le ca j dzo'oc u beetic Salomón le kulnajo', tu pixaj u pakilo'ob yéetel u che'il kuulche' jadzutz póola'anil.

¹⁰Tu beetaj xan u láak u núup naj yaan ca'ach tu bakpach tuláacal le kulnajo', u ca'anlil ca'ache' ca'a p'éel metro'ob yéetel veinticinco centímetros, cu machicubáa ti' u pakil le kulnajo' yéetel u póolbil kuulche'.

¹¹Yuumtzil túune' tu ya'alaj ti' Salomón:

¹²Tu yo'olal le kulnaj táan a beetico', in káat in wa'al ti' teech, wa ca cuxtal je'el bix u ya'alic in a'almaj t'aano'ob yéetel in a'almaj xiquino'ob, bey xan wa ca dzo'ocbesic tuláacal in nu'ucbe'en t'aano'ob u ti'al ca a beet je'el bix cu ya'alique', tene' je'el in dzo'ocbesic le séeb chi' tin beetaj ti' David a taata ta wo'olal;

¹³Bíin cajlaquen ichil le j israelitaobo', ma' bíin in xúump'at Israel in caajali'.

¹⁴Salomone' tu dzo'ocsaj le kulnajo'

¹⁵Tu pixaj u pakilo'ob ichil le kulnajo', ca'anal tac caabal yéetel u bujbil che'il kuulche', bey xan tu pixaj u lu'umil yéetel u che'il pino.

¹⁶Tu pixaj xan yéetel bujbil kuulche' jun yaan nueve metro'ob ca'anal tac caabal tu taamile' ca tu nu'ucbesaj u ti'al ca meyajnac Sen Quili'ich Cúuchilil.

¹⁷Cu dzo'ocole' le cu p'áatal líikbal ti' le Sen Quili'ich Cúuchilo', tac tu joole' cu p'isic dieciocho metro'ob u chowaquil.

¹⁸Tu tuláacal u pixib che'il ichil le kulnajo' beeta'an yéetel u che'il kuulche', póolbil nicte'ob yéetel póolbil yich che'ob tuláacal beeta'an yéetel kuulche'. Ma' táan u yila'al mix jun p'éel tuunich.

¹⁹Salomone' tu nu'ucbesaj le Sen Quili'ich Cúuchil te j kulnajo' u ti'al u t'alcunta'al u ba'asche'il u nup t'aan Yuumtzil.

²⁰Le Sen Quili'ich Cúuchil ca'acho' cu p'isic nueve metro'ob u chowaquil nueve metro'ob u cóochil nueve metro'ob u ca'analil. Actáan ti' le Quili'ich Cúuchilo', Salomone' tu beetaj jun p'éel u multuunil kultaj yéetel u che'il kuulche' ca tu beetaj u pi'ixil yéetel oro.

²¹Tu pixaj xan yéetel oro ichil le kulnajo' bey xan le Sen Quili'ich Cúuchilo', táanil ti' le Sen Quili'ich Cúuchilo' tu dzaj jookenjo'ok oro u ca'aj.

²²Bey túuno' tuláacal le kulnajo' tu pixaj yéetel oro, láili' je'el bix u multuunil kultaj yaan ca'ach actáan ti' le Sen Quili'ich Cúuchilo'.

²³Tu beetaj xan u yoochel ca'a túul aj cuxa'an xiknáalo'ob yéetel u che'il olivo, u ti'al le Sen Quili'ich Cúuchilo'. U jujun p'éelile' yaan ca'ach can p'éel metro'ob ca'a tac táancoch u ca'analil,

²⁴u jujun dzíit u xiiko'obe' cu p'isic ca'a p'éel metro'ob yéetel veinticinco centímetros. Beyo' ti' jun p'éel u ni' tac u láak u ni' u xiiko'ob tu jujun túulile' cu p'isic can p'éel metro'ob ca'a tac táancoch.

²⁵Le ca'a p'éel u yoochel le aj xiknáalo'obo' jun tacáalili' nuuquilo'ob tu ca'a p'éelalo'obe' cu p'isico'ob can p'éel metro'ob ca'a tac táancoch, je'el bix beeta'ab jun p'éele' bey beeta'abic u láako'.

²⁶U ca'analilo'obe' láili' can p'éel metro'ob ca'a tac táancoch.

²⁷Salomone' tu dzáalantaj ichil le Sen Quili'ich Cúuchilo'. U yoochel le aj xiknáalo'obo' u xit'majo'ob u xiiko'ob, u xiik jun túule' cu táakal ti' jun tzéel le pako', le u láako' tu láak jun tzéel, le u láak u xiiko'obo' tu baatzilo'ob cu nupicuba'ob chúumuc ti' le Sen Quili'ich Cúuchilo'.

²⁸Cu dzo'ocole' Salomone' tu bonaj yéetel oro u yoochel le aj xiknalo'obo',

²⁹ti' tuláacal u pakilo'ob le kulnaj bey xan paachil yéetel ichile' tu póolaj u yoochelo'ob aj xiknalo'ob, bey xan tu póolaj xa'ano'ob yéetel nicte'ob.

³⁰Tu pixaj yéetel oro yóokol u lu'umil le kulnajo', ichil yéetel táancab.

³¹U ti'al u jool le Sen Quili'ich Cúuchilo', tu beetaj jool najo'ob yéetel u che'il olivo, u pacabil yéetel u yocomilo'obe' j p'áat cinco u tzéelelo'ob.

³²U ca'a p'éel jool najilo'obo' beeta'an ca'ach yéetel u che'il olivo, tu yóokolo'obe' tu póolaj u yoochelo'ob aj xiknalo'ob, bey xan tu beetaj xa'ano'ob yéetel nicte'ob; cu dzo'ocole' tuláacal tu pixaj yéetel oro.

³³U ti'al u noj máacanil pak le kulnajo', tu beetaj u yocmailo'ob yéetel u che'il olivo, can ti'itz tu beetilac.

³⁴Le ca'a p'éel jool najo'obo' beeta'ab ca'ach yéetel u che'il pino tu ca'a p'éelalo'ob cu pilin suuto'ob,

³⁵tu póolaj yóokolo'ob u yoochel aj xiknalo'obo', bey xan tu póolaj xa'ano'ob yéetel nicte'ob, cu dzo'ocole' tu pixaj yéetel oro.

³⁶Tu beetaj xan u ich táancabil, yéetel óox tzool póolbil tuunicho'ob bey xan jun tzool ocomo'ob che'il kuulche'.

³⁷Tu can p'éel ja'abil u ajawil Salomone', tu winalil zive', líiksa'ab u chuunpakilo'ob u kulnaj Yuumtzil;

³⁸tu ja'abil once u ajawil, tu winalil Buul, u ocho winalil le ja'abo', dzo'ocbesa'ab le kulnaj yéetel tuláacal ba'ax yaan beetbile', je'el bix tuculta'ab u beeta'ale'. Siete ja'abo'ob táan u beeta'al tumen Salomón.