Read Yucateco 1 Reyes 7 Bible Online

1 Reyes 7 - Yucateco bible

1 Reyes 7

¹Salomone' tu beetaj u jalach naj, tu láaj dzo'ocbesaj trece ja'abo'ob.

²Tu beetaj xan le jalach naj tu kaaba'intaj U káaxil Líbano cu p'isic cuarenta yéetel cinco metro'ob u chowaquil, veintidós ca'a tac táancoch u cóochil, yéetel trece ca'a tac táancoch u ca'analil, cucha'an tumen can p'éel u tzoolol ocomo'ob, u che'il kuulche', tu'ux cu t'áalalo'ob u cuch che'ilo'obe' kuulche'.

³Le cuch che'oba' cuarenta yéetel cinco u p'éelel, tzola'ano'ob óox t'o'olil, quince ti' u jujun t'o'oli', cu t'áalal tu yóokol le ocomo'obo'. Tu yóokole' yaan jujun p'éel jadzutz póolbil kuulche'.

⁴Yaan ca'ach óox tzoolol calom kiino'ob beeta'ano'ob óox t'o'olil, j dzaabo'ob actáan ti' u láako'ob.

⁵Tuláacal le jool najo'ob yéetel le calom kiino'obo' can ti'itzo'ob ca'achi' cu dzo'ocole' j dzaabo'ob actáan ti' u láako'ob tu yóox tzoolilo'ob.

⁶Tu beetaj xan u noj máacan pakil yéetel u yocomilo'ob, u p'iisile' veintidós metro'ob ca'a tac táancoch u chowaquil, trece metro'ob ca'a tac táancoch u cóochil. Actáan ti'e' tu beetaj u láak u noj máacan pakil yéetel u yocomilo'ob, tu beetaj xan u yóokol.

⁷Tu beetaj xan u noj máacan pakil p'is óolal wa máacanil ti'ibilil, u ti'al u ka'amal tacpoolo'ob, ca tu balaj u pakilo'ob ca'anal tac caabal yéetel u che'il kuulche'.

⁸Le jalach naj tu'ux cajacbal Salomón ca'acho', yaan ca'ach u táancabil paachil, yéetel jun p'éel noj máacan pak je'el bix le yáaxo'obo'. Le jalach naj tu beetaj u ti'al u x ch'upul paal faraón u yatane', yaan jun p'éel u noj máacan pakil láili' je'el bix le ya'axo'obo'.

⁹Tuláacal le meyajo'oba', líikbal tu chuum pakilo'ob tac tu yóok pakilo'obe', bey xan tu táan najil tac tu noj táancabile', beeta'an yéetel co'ocoj tuunicho'ob, póola'antaco'ob yéetel xota'ano'ob yéetel x kup che'ob je'el bix kabéete', paachil bey ichil.

¹⁰U chuun pakilo'ob xane' beeta'an ca'ach yéetel co'oco'oj nucuch tuunicho'ob, yane' cuatro metro'ob ca'a tac táancoch ti', u láako'obe' óox p'éel metro'ob yéetel sesenta centímetros.

¹¹U ca'analile' beeta'an xan ca'ach yéetel co'ocoj tuunicho'ob, póola'antaco'ob jach tu p'is, yéetel u che'il kuulche'.

¹²Tu bakpach le noj táancabo', yaan ca'ach óox t'o'ol tuunicho'ob yéetel jun t'o'ol u che'ilo'ob kuulche', bey beeta'anil xan ichil u súut paach yéetel tu máacan pakil u kulnaj Yuumtzil.

¹³Ajaw Salomone' tu túuxtaj ch'a'abil Hiram tu lu'umil Tiro,

¹⁴leti'e' u yaal ca'ach jun túul x quimen íicham, sijnal tu ch'i'ibalo'ob Neftalí, atanta'an ca'ach tumen jun túul j Tiroil sen ma'alob u meyajtic ca'ach bronce'. Hirame' yaan ca'ach ti'e' u kaj óolalil yéetel u na'atil u ti'al u beetic je'el ba'axac meeyjul bronce u ca'aje'. Bey túuno' j bin tu táan ajaw Salomone' ca tu beetaj tuláacal le meyajo'obo'.

¹⁵Tu beetaj ca'a p'éel yibbil ocomo'ob bronce u caajo'ob, cu p'isic ocho metro'ob u ca'analil yéetel cinco metro'ob ca'a tac táancoch u bakpach.

¹⁶Tu beetaj xan ca'a p'éel p'iicho'ob bronce u ca'ajo'ob u ti'al j dza'abal tu ca'analil tu jo'ol le ocomo'obo'. U ca'analil jujun p'éelil le u p'iicho'obo' ca'a p'éel metro'ob yéetel veinticinco centímetros.

¹⁷Tu beetaj xan ca'a p'éel tzaatzalo'ob u ch'otmajuba'ob beyo'ob jookenjooke', u ti'al le p'iicho'ob yano'ob ca'anal tu jo'ol le ocomo'obo'; jun p'éel tzaatzal u ti'al tu jujun p'éelil p'iich jo'olo'obo'.

¹⁸Tu beetaj xan ca'a t'o'ol granadaob tu bakpach ti' jujun p'éel le tzaatzalo' u ti'al u balic u p'iich jo'olo'ob le ocomo'obo', bey tu beetaj ti' tu ca'a p'éelal le p'iicho'obo'

¹⁹Le p'iich jo'olo'ob yaan tu yóokol u yocomilo'ob le máacano' cu p'isico'ob ca'ach óoli' ca'a p'éel metro'ob, chica'ano'ob ca'ach ti' nicte'ob.

²⁰Tu bakpach yéetel tu ca'analil tu jujun p'éelil le pich jo'olo'ob tu'ux asab cóoche' chica'ano'ob ca'ach ti' chúuj, tu tzéel le tzaatzalo' yaan ca'ach doscientos granadaob joka'an ca'a tzoolol ti'ob.

²¹Hirame' tu dzaj le ocomo'ob tu máacanil le kulnajo'. Le ca tu dzaj tu cúuchile', le x no'oj ocomo' tu dzáa u kaaba'int Jaquín, le x dzíic ocomo' tu dzáa u kaaba'int Boaz.[1]

²²U ca'analil le ocomo'obo' cu yila'al bey x dzuula'e'. Bey dzo'oquic u meeyjul tuláacal le ocomo'obo'.

²³Hirame' tu beetaj jun p'éel nojoch chulub u ti'al ja' bronce u ca'aj. Wóolis ca'achi', cu p'isic can p'éel metro'ob ca'a tac táancoch cóochil, u ca'analil ca'ache' ca'a p'éel metro'ob yéetel veinticinco centímetros, u bakpache' trece metro'ob ca'a tac táancoch.

²⁴Tu yáanal u chi' u bakpach le chulub ja'o', tu beetaj ca'a cúul aako'ob yéetel u yicho'ob, diez ti' amal cuarenta yéetel cinco centímetros, jun tacáalil p'áatico'ob yéetel le chulub ja'o'.

²⁵Le chulub ja'o' edzecbal tu yóokol doce wacaxo'ob bronce u ca'ajo'ob, óox túul ti'obe' cu paacato'ob j xaman, u láak óox túule' j noojol, u láak óox túule' j lakin yéetel óox túule' j chikin, u paachil ooco'obe' j p'a'ato'ob tu yáanal le chulub ja'ob tumen leti'ob cuchmajil.

²⁶U piimil le chulub ja'o' yaan ca'ach ocho centímetros ti'; u chi'e' chica'an ti' to'il u lool dzuula'e', cu bisic ca'ach cuarenta y cuatro mil litros ja'.

²⁷Bey xan tu beetaj diez chuuno'ob bronce u ca'aj, yaan ti'ob tu jujun p'éelil jun p'éel metro' yéetel ochenta centímetros u chowaquil, bey xan u cóochil, yéetel jun p'éel metro treinta centímetros u ca'analil.

²⁸Bey beeta'anil le chuuno'oba': yaan ca'ach u ca'a p'éel u calapilo'ob taakalo'ob ti' jun p'éel u calapil,

²⁹tu yóokol le calapo'ob yaan ca'ach u yoochelob leóno'ob, u yoochelo'ob wacaxo'ob yéetel u yoochelo'ob aj xiknalo'ob. Tu yóokol yéetel tu yáanal le wacaxo'ob yéetel le leóno'obo', yaan ca'ach nicte' péet jo'olo'ob jadzudzquintic.

³⁰Tu jujun p'éelil le chuuno'obo' yaan ca'ach can p'éel u x sutubilo'ob yéetel u yóolo'ob bronce u ca'ajo'ob. Ti' u can ti'itzilo'ob le chuuno' tu yáanal le chulub ja'o' yaan ca'ach xa'ayo'ob bronce u ca'ajo'ob dzáan ca'ach u nicte'il péet jo'olo'ob tu jujun tzéelil.

³¹U chi' le chulub ja'o' ti' yaan ca'ach ichil jun p'éel u káasab cu píit máansic, u ca'analil cuarenta yéetel cinco centímetros. U chi'e' wóolis ca'achi', le ba'ax cuchmaile' yaan sesenta yéetel ocho centímetros u ca'anlil. Yaan xan x t'e'el dzíibo'ob póola'ano'ob yóokol u chi', u pacabilo'obe' ma' wóolistaco'obi', ba'ale' yaan can ti'itz ti'ob.

³²Le can p'éel x sutubilo'obo' ti' yano'ob ca'ach tu cáapo'obe', u yóolo'ob le x sutubo'obo' kalalo'ob tu chuu. U ca'analil jujun p'éel x suutu'ube' sesent y ocho centímetros,

³³je'el bix u sutubilo'ob bey u bolano'ob. U yóolo'ob, u x máascab dzipitilo'ob u katáabilo'ob yéetel u chúucho'ob le j sutubo'obo' tuláacalo'ob bronce u ca'aj.

³⁴le can p'éel xa'ayo'ob yaan tu can ti'itzil u chuune', jun táacalili'.

³⁵U xuul u ca'analile' cu núup'ul yéetel jun p'éel súut paach chi' yaan veintidós centímetros ca'a tac táancoch u ca'analil; u cáapo'ob yéetel le u jadzutzilo'ob yaan tu ca'analil le chuuno', jun tacáalili'ob.

³⁶Hirame' tu dzaj yoochelo'ob aj xiknáalilo'ob, leóno'ob yéetel xa'ano'ob tu yóokol le cáapo'ob yéetel yóokol ba'ax jadzutzo'obo' cu páajtal u bisico'ob tu dzaj u nicte'il péet jo'olo'ob tu bakpach.

³⁷Bey túun úuchic u beetic le diez chuuno'ob, tuláacal láajquet u yi'ibilo'ob yéetel láajquet u p'iisilo'ob.

³⁸Tu beetaj xan diez chulub ja' bronce u ca'ajo'ob. Cu p'isic jujun p'éelo'obe' jun p'éel metro' ochenta centímetros, cu bisic xan ochocientos ochenta litros tu jujun p'éelilo'obe' j dza'ab tu yóokol jun p'éel le diez chuuno'obo',

³⁹cinco chuuno'ob j dzaab tu x no'ojil le kulnajo' yéetel cinco tu x dzíiquil. Le nojoch chulub dza'ab tu lakin j noojol tu'ux no'oj le najo'.

⁴⁰Hirame' tu beetaj xan cuumo'ob, jo'opo'obo'ob, nucuch laco'ob, bey úuchic u dzo'ocsic tuláacal le meyaj kubenta'ab ti' tumen Salomón u ti'al u kulnaj Yuumtzil,

⁴¹je'el tuláacal ba'ax tu beetaja', ca'a p'éel ocomo'ob, u wóolis p'iichilo'ob tu yóokolo'ob le ocomo'obo', le tzaatzalo'ob úuchic u pixic le p'iicho'obo',

⁴²le cuatrocientos granadaob u ti'al le ca'a p'éel tzaatzalo'obo', tzola'an ca'a t'o'ol tu jujun p'éelil le tzaatzalo'ob iquil pixa'anil le ca'a p'éel wóolis p'iicho'ob yano'ob tu ca'analil le ocomo'obo';

⁴³diez chuuno'ob, diez chulubo'ob dza'ab ca'ach yóokolo'ob le chuuno'obo',

⁴⁴le nojoch chulub u ti'al ja', yéetel le doce wacaxo'ob cuchmailo',

⁴⁵cu dzo'ocole' tu beetaj xan le cuumo'ob, le jo'opo'ob yéetel le nucuch laco'obo'. Tuláacal le nu'uculo'obo' tu beetaj Hiram ti' Salomón u ti'al u kulnaj Yuumtzil, beeta'ab ca'ach yéetel yúultbil bronce.

⁴⁶Ajawe' tu yibaje' tu jóochquintaj ti' u patabilo'ob sa'am lu'um tu lu'umilo'ob Jordán, chúumuc bejil ti' Suucot yéetel Saretán.

⁴⁷Sen ya'ab le nu'uculo'ob bronce u ca'ajo', Salomone' ma' tu chi'ichnacuntajubáa u beet u p'i'isili'.

⁴⁸Bey xan tu túuxtaj Salomón ca beeta'ac tuláacal u chuca'an nu'uculo'ob yaan ca'ach tu kulnaj Yuumtzil: u multuunil kultaj oro u ca'aj, le táas che' oro u ca'aj tu'ux ca'ach cu dza'abal le waaj jun páaycunsa'ano'ob u ti'al Yuumtzil,

⁴⁹le x t'uchub sáasilo'ob chéen oro u ca'ajo'ob le yano'ob ca'ach actáan ti' le Sen Quili'ich Cúuchilo', cinco tu x no'oji' yéetel cinco tu x dzíiquili', yéetel u nicte'ob, le sáasilo'obo', yéetel le x nat'abo'ob oro u ca'ajo'obo',

⁵⁰u chúujilo'ob ukul, u nu'ucul u ke'exel u kuuchilo'obo, le nucuch laco'obo', le u x jo'opobilo'ob, le x p'uuluto'obo, tuláacal beeta'an yéetel chéen oro. Oro xan ca'ach u jool najilo'ob le Sen Quili'ich Cúuchil, yaan ichil le kulnajo' bey xan u jool najilo'ob le kulnajo'.

⁵¹Le ca j dzo'oc tuláacal le meyajo'ob tu túuxtaj beetbil ajaw Salomón tu kulnaj Yuumtzile', tu bisaj Salomón le nu'uculo'ob beeta'an yéetel le oro yéetel le plata' jun páaycunta'an tumen David u taata, u ti'al Yuumtzil, ca tu dzaj tu cúuchil tu'ux ta'acbesa'al u taakinil u kulnaj Yuumtzil.