Read Yucateco 1 Reyes 8 Bible Online

1 Reyes 8 - Yucateco bible

1 Reyes 8

¹Salomón túune' tu much'quintaj tu caajil Jerusalén u nuuquilo'ob Israel, yéetel u nuuquilo'ob u ch'i'ibalo'ob le j israelitaob, u ti'al u bisico'ob u ba'asche'il u nup t'aan Yuumtzil líikbal Sión,[2] tac tu caajal David.

²Tu kiinil le x qui' óotzil kinbesajil tu winalil Etanim, u siete winalil le ja'abo', tu much'quintuba'ob yéetel ajaw Salomón tuláacal le j israelitaobo'.

³J kucho'ob tuláacal u nuuquilo'ob Israel, le aj kiino'obo' tu ch'a'ajo'ob le ba'asche'o'

⁴ca tu bisajo'ob pa'ate' yéetel u noj Paselil Much'tal yéetel Ku, bey xan tuláacal le quili'ich nu'uculo'ob yano'ob ichil ca'acho', ca j bisa'ab tumen aj kiino'ob yéetel j levitaob.

⁵Ajaw Salomón yéetel tuláacal u caajil le israelitaobo' tu much'ajuba'ob ca'ach tu yéetel, ti' yano'ob ca'ach tu táan le ba'asche' ca'aliquil táan u kubico'ob quíimsbil j tamano'ob, yéetel wacaxo'ob mina'an u xooquil.

⁶Cu dzo'ocole' le aj kiino'obo' tu bisajo'ob u ba'asche'il u nup t'aan Yuumtzil ichil le kulnajo' ca tu dzajo'ob ti' le Sen Quili'ich Cúuchilo', tu yáanal u xiiko'ob a xiknalo'ob,

⁷lelo'oba' u xit'maj u xiiko'ob tu yóokol u cúuchil tu'ux yaan ca'ach le ba'asche'ob, tac u pixico'obe' tu yóokol le ba'asche'o' bey xan u x katáabilo'ob.

⁸Ba'ale' u x katabo'obo' sen chowactaco'ob u ni'ob cu yila'al tac ti' le Quili'ich Cúuchilo', actáan ti' le Sen Quili'ich Cúuchilo', ba'ale' ma' tu yila'al táancab; bey p'áatalil tac bejela'e'.

⁹Ichil le ba'asche'o' chéen le ca'a p'éel jay tuunich tu dzaj Moisés tu pu'uquil Horeb, yaan xan ichil u jay tuunichililo'ob le nup t'aan tu beetaj Yuumtzil yéetel le j israelitaob le ca jóoko'ob Egiptoe'.

¹⁰P'elac jóokico'ob le aj kiino'ob te j Quili'ich Cúuchilo', le múuyalo' tu chupaj u kulnaj Yuumtzil,

¹¹tu yo'olal le múuyalo' le aj kiino'obo' ma' j páatji' u p'áatalo'ob u ti'al u kiinbesico'ob le kultajo', tumen u nojbe'enil Yuumtzile' tu chupaj le kulnajo'.

¹²Salomón túune' tu ya'alaj: Teche', Yuumtzil, a wa'almaj: ichil éekjoche'enil cajacbalech

¹³Ba'ale' tene' dzo'oc in beetic ti' teech jun p'éel kulnaj u ti'al a cajtal, ca cajlaquech u ti'al ja'abo'ob mina'an u xuul.

¹⁴Cu dzo'ocole' ajawe' tu sutajubáa actáan ti' tuláacal le j israelitaob, wa'alacbalo'obo', ca tu qui' t'antajo'ob

¹⁵táan u ya'alic: Qui'iqui' t'antbil Yuumtzil, u Ku Israel, tumen dzo'oc u béeycuntic le ba'ax tu séeb chi'itaj ti' David in taata, le ca tu ya'alaj:

¹⁶Líikbal le kiin ca tin jóokesaj tu lu'umil Egipto in caajal Israel, ma' tin yéeyaj mix jun p'éel caaj ichil u ch'i'ibalo'ob Israel u ti'al ca beeta'ac jun p'éel kulnaj tu'ux u cajtal in kaaba'e'. Ba'ale' tin yéeyaj David u ti'al u méektáantic in caajal Israel.

¹⁷David in taatae', tu dzíiboltaj u beet jun p'éel kulnaj u ti'al u tzicbe'enil Yuumtzil, u Ku Israel.

¹⁸Chéen ba'ale' Yuumtzile' tu ya'alaj ti': Ma'alob a tuucul iquil a káat a beet in ti'alint jun p'éel kulnaj;

¹⁹ba'ale' ma' teech máax bíin beetiqui', ba'ale' le paal cun yantal techo', leti' bíin u beet jun p'éel kulnaj in ti'alinte.

²⁰Bey túuno', Yuumtzile' dzo'oc u béeycuntic u séeb chi'. Je'el bix tu ya'alaje', tene' dzo'oc in jeelintic David in taata, dzo'oc in cutal tu jalach káanche'il Israel, dzo'oc xan in beetic jun p'éel kulnaj u ti'al Yuumtzil, u Ku Israel.

²¹Dzo'oc xan in jun páaycuntic ichile' jun p'éel cúuchil u ti'al le ba'asche' tu'ux yaan le nup t'aan tu beetaj Yuumtzil yéetel c máanja'an ch'i'ibalo'ob le ca tu jo'okesajo'ob tu lu'umil Egiptoo'.

²²Cu dzo'ocole' tu sutajubáa Salomón actáan ti' u multuunil u kulta'al Yuumtzile', tu táan tuláacal u múuch'cabil le j israelitaob, ca tu tich'aj u kabo'ob ca'an,

²³ca tu ya'alaj: Yuumtzil, u Ku Israel: mix te j ca'ano', mix te j lu'uma' yaan jun túul Junab Ku je'el bix teche', ca béeycuntic a nup t'aan yéetel ca we'esic a wutzil ti' le máaxo'ob cu meyajtiquecho'ob yéetel tuláacal pucsi'ikalo';

²⁴dzo'oc a béeycuntic le ba'ax ta séeb chi'itaj ti' a palitzil David in taata, beyo' ti' le kiina' ta jun p'éelcuntaj le ba'ax a wa'almaj yéetel le ba'ax ta beetaja'.

²⁵Let óolale', Yuumtzil u Junab Kuech Israel, béeycunt xan le ba'ax ta séeb chi'itaj ti' a palitzil David in taatae'; ma' a cha'ic u p'áatal ma' u yantal ichil u ch'i'ilancab máax u ti'al ca culac tu jalach káanche'il Israel, wa u paalal cu máano'ob toj yéetel cu cuxtalo'ob ta táan je'el bix cuxlajic leti'e'.

²⁶Bey túuno', u Kuech Israel, beet ca béeychajac le séeb chi' ta beetaj ti' a palitzil David in taata.

²⁷Ba'ale' ¿Jach tu jaajil je'el u páajtal u cajtal Junab Ku tu yóokol le lu'uma'? wa le ca'an yéetel tuláacal u nojochil ma' tu páajtal u kaliqueche', ¿bix je'el u páajtal u kaliquech le kulnaj dzo'oc in beetic a ti'ala'?

²⁸Quex beyo' Yuumtzil in Ku, táan óolt in káat óolal bey xan in káatanquilo'ob; u'uy u ka'am awat yéetel u payalchi' a palitzil bejela'e'.

²⁹Ma' u jáawal a pactic, mix yéetel kiin mix yéetel áakab, ti' le kulnaj a wa'almaj a wantala'. U'uy le payalchi' cu beetic ti' teech le a palitzila'.

³⁰U'uy le ba'ax quin káatica' yéetel le ba'ax cu káatic a caajal Israel, le quéen payalchi'inaco'on te j cúuchila'. U'uy te j ca'ano', ti' le cúuchil tu'ux yanecho', yéetel dzáa ti' to'on a sa'atsajil.

³¹Le quéen yanac máax si'ipil tu yo'olal cu beetic wa ba'ax ti' u láak, cu beeta'al u jalach t'aan tu táan u multuunil kultaj te j kulnaja',

³²teche' u'uy te j ca'ano', ca a núuque; beet ba'ax toj ti' a palitzilo'ob. Xotkint le máax yaan u si'ipile', ca a beet u lúubul tu yóokol u jaadzil u kasa'anilo'ob, beet ba'ax toj ti' le máax mina'an u si'ipil, je'el bix unaje'.

³³Le quéen pa'abac u muuk Israel tumen u aj p'eeco'ob úuchic u kebanchajalo'ob ti' teche', wa cu dzo'ocol u pa'abal u muuk cu suut ti' teech u qui'iqui' t'ant a kaaba'e', bey xan ichil u payalchi' cu káat óolal ti' teech te j kulnaja',

³⁴U'uy te j ca'ano' ca a sa'ats u keban, beet u suut te j lu'um ta dzaj ti' u máanja'an ch'i'ibalo'obo'.

³⁵Wa yaan yáax kiin yéetel ma' tu káaxal ja' tumen j kebanchaj le caaja', wa cu dzo'ocole' cu payalchi' te ta cúuchila', bey xan cu qui'iqui' t'antic a kaaba', yéetel cu cáantic u keban tu yo'olal le ja'adz tu bisajo',

³⁶teche' u'uy te ta ca'anilo', yéetel sa'ats u keban a palitzilo'ob, a caajal Israel, e'es ti'ob le ma'alob bej tu'ux u najmal u bino'obo'. Túuxt túun ja' ti' le lu'um, le ta dzaj u ti'alint a caajala'.

³⁷Le quéen yanac te j lu'uma', wi'ij wa báan quíimil, wa cu tijil le paakalo'ob tu yo'olal yáaxkiin, wa cu taal báan cuuxumilo'ob, wa sáak, wa pokol; le quéen bakpachta'ac a caajal u ti'al u ba'atelta'al tumen le aj p'eeco', wa le quéen taalac je'el ba'axac kaasil wa koja'anile',

³⁸u'uy túun tuláacal payalchi' wa káat óolal cu beeta'al tumen je'el máaxac, wa tumen tuláacal a caajal Israel, wa quéen u tich' u kabo'ob ich payalchi' tu tojil le kulnaja', le quéen u yilo'ob u numyajo'ob yéetel u yaayaj óolalo'obe'. U'uy ta ca'anil tu'ux cajacbalecho', ca a dzáa a sa'atsajil, ta'acbesabáa u ti'al ca a dzáa ti' jujun túule' je'el bix cu najmatic ba'ax tu beetaje', tumen chéen teech a wojel ba'ax cu tuclic u pucsi'ikal máac.

³⁹

⁴⁰Beyo' bíin u tziquecho'ob ca'aliquil cuxa'ano'ob te j lu'um ta dzaj ti' u máanja'an ch'i'ibalo'oba'.

⁴¹Quex wa jun túul j táanxel lu'umil, tu yo'olal a kaaba' cu taal náachil

⁴²u ti'al j payalchi' ta kulnaj (tumen yaan u yu'uba'al u ya'ala'al a nojoch kaaba' yéetel u nojochil a páajtalilo'),

⁴³teche' u'uy te j ca'an, tu'ux caja'anecho', ca a dzáa ti' tuláacal le ba'ax cu káatic ti' teech, u ti'al ca kaj óolta'ac tumen tuláacal u cajnáalilo'ob le lu'uma', u ti'al ca u tziquecho'ob je'el bix cu beetic a caajal Israele', ca u yojéelto'obe' a kaaba'e' cu ch'a'a chi'ita'al ti' le kulnaj tin beetaj a ti'alta.

⁴⁴Le quéen jóokoc a caajal u ba'atelt u aj p'eeco'ob, je'el tu'ux ca a túuxto'obe', wa cu payalchi' tu tojil le noj caaj ta yéeyaj, yéetel tu tojil le kulnaj tin beetaj a ti'alinta',

⁴⁵teche' u'uy te j ca'ano' u payalchi' yéetel u káat óolal, u ti'al ca a wáant yéetel ba'ax cu beetic.

⁴⁶Le quéen kebanchajaco'ob, tumen mix máac ca p'áatac ma' u kebantal, teech túune' ca p'u'ujul tu yéetelo'ob ca kubico'ob tu kab u aj p'eeco'ob u ti'al u bisa'alo'ob cuxa'ano'ob tu lu'umo'ob, náach wa naadze',

⁴⁷wa te j lu'um tu'ux bisa'abo'ob, cu suuticuba'ob ti' teech, cu káat óolalo'ob yéetel cu kaj óoltico'ob dzo'oc u kebanchajlo'ob bey xan tu beetajo'ob ba'al kaase',

⁴⁸wa cu suuto'ob ti' teech yéetel tuláacal u pucsi'ikalo'ob bey xan yéetel tuláacal u yóolo'ob te tu lu'um u aj p'eeco'ob tu'ux j bisa'abo'ob palitziltbilo'ob, wa cu payalchi'ob tu tojil le lu'um ta dzaj ti' u máanja'an ch'i'ibalo'ob, yéetel ti' xan le caaj ta yéeyajo' bey xan tu tojil le kulnaj tin beetaj ti' techo',

⁴⁹teche' u'uy u payalchi'ob yéetel u káat óolalo'ob te j ca'an u cúuchil tu'ux yanecho', ca a wáanto'ob ti' u ba'aluba'ob.

⁵⁰Sa'ats u keban a caajal, sa'ats u j ma' u'uyaj t'aano'ob ti' teech. Beet u ch'a'abal óotzil ti'ob tumen máaxo'ob j bise.

⁵¹Tumen a caajale' ba'al a ti'al; teech ta jóokesaj tu lu'umil Egipto, bey ca'ach jun p'éel u chujcabil tu'ux cu yi'ibil máascabe'.

⁵²Táan óolt túun u payalchi' a palitzil yéetel u káat óolal a caajal Israel. ¡Ku, ch'e'en xiquinto'on le quéen káat óolnaco'on ti' teech!

⁵³Tumen teche' Yuumtzilech, ta jun páaycunsajo'ob bey ba'al a ti'alo'ob ichil tuláacal u caajilo'ob yóokolcaab, je'el bix ta wa'aljilac tu chi' a palitzil Moisés, le ca ta jóokesaj tu lu'umil Egipto c úuchben ch'i'ibalo'ob.

⁵⁴Le ca'aj tu dzo'ocsaj u payalchi' Salomón yéetel u káat óolal ti' Yuumtzile', lela' tu beetaj xolocbal tu táan u multuunil kultaj u tich'maj u kabo'ob tac ca'an,

⁵⁵j wa'alaj ca tu qui' t'antaj tuláacal le j israelitaob, táan u ya'alic yéetel ka'amcach t'aan:

⁵⁶¡qui'iqui' t'antbil Yuumtzil tumen tu dzáa jéedzel ti' u caajal Israel, je'el bix tu séeb chi'itaje'! tumen ma' jáawac u béeycuntic mix jun p'éel le ma'alob séeb chi' tu beetaj tu chi' Moisés u palitzil.

⁵⁷Bejela'e' ti' ca yanac Yuumtzil Ku ichilo'on je'el bix úuchic u yantal tu yéetel c máanja'an ch'i'ibalo'obe'. Ma' u p'atico'on mix u tu'ubsico'on,

⁵⁸ba'ale' u chin c pucsi'ikal ti' leti' u ti'al ca c beet tuláacal ba'ax u káat yéetel u ti'al ca c dzo'ocbes u nu'ucbe'en t'aano'ob, u ya'almaj t'aan yéetel u ya'almaj xiquino'ob tu túuxtaj ca dzo'ocbesa'ac tumen c máanja'an ch'i'ibalo'ob.

⁵⁹Le ba'alo'ob dzo'oc in káatic ti' Yuumtzil c Kue' ka'ajac ti', bulkiin yéetel buul áakab, u ti'al u beetic ba'ax toj ti' u palitzil yéetel ti' Israel u caajal, je'el bix ka'abéetile',

⁶⁰u ti'al xan ca kaj óolta'ac tumen tuláacal u múuch' caajilo'ob yóokolcaabe', Yuumtzile' leti' Junab Ku, mina'an u láak.

⁶¹Let o'olale', te'exe' jaajchajac a wóolale'ex ti' Yuumtzil c Ku, dzo'ocbese'ex u ya'almaj t'aano'ob beete'ex u nu'ucbe'en t'aano'ob je'el bix ti' le kiina'.

⁶²Cu dzo'ocol lela' ajaw yéetel tuláacal Israele' tu kubajo'ob quíimsbil ba'alche'ob ti' Yuumtzil.

⁶³Salomone' tu kubaj ti' Yuumtzil veintidós mil wacaxo'ob yéetel ciento veinte mil j tamano'ob, u ti'al u quíimsbil ba'alche'il ca bisajbáil. Bey úuchic u jun páaycunta'al tumen ajaw yéetel tuláacal le israelitaob u kulnaj Yuumtzil.

⁶⁴Láili' ti' le kiino' ajawe' tu jun páaycuntaj u chúumuc le táancab yaan actáan ti' u kulnaj Yuumtzilo', ti' tu kubaj le tóocbil ba'alche'ob, ti'ibil óolal jejeláas janalbe'en neeko'ob yéetel u tzaatzel u quíimsbil ba'alche'il ca bisajbáil, tumen u multuunil kultaj bronce u ca'aj yaan ca'ach tu táan Yuumtzilo', chichan u ti'al tuláacal le tóocbil ba'alche'ob, u ti'ibil óolalil jejeláas janalbe'en neeko'ob yéetel u tzaatzel le u quíimsbil ba'alche'ilo'ob ca bisajbáilo'.

⁶⁵Ti' le kiinaco' Salomón bey xan sen ya'ab máaco'ob j taalo'ob ca'ach líikbal tu jool Hamat tac tu t'o'ol ja'il Egiptoe', tu kiinbesajo'ob u qui'imac óolalil máacano'ob ti' u nojbe'enil Yuumtzil c Ku, yéetel u láak siete kiino'ob; tu pa'te'ile' catorce kiino'ob le cha'ano'.

⁶⁶Tu láak kiine' tu ya'alaj ti' le caajo' ca suunaco'ob tu yotocho'ob, leti'obe' tu qui' t'antajo'ob ajawe', ca j suunajo'ob tu yotocho'ob qui'imac u yóolo'ob tu yo'olal tuláacal le utz tu beetaj Yuumtzil ca'ach ti' David, u palitzil yéetel ti' u caajil Israel.