Read Yucateco 1 Reyes 9 Bible Online

1 Reyes 9 - Yucateco bible

1 Reyes 9

¹Le ca j dzo'oc u beetic Salomón u kulnaj Yuumtzil, bey xan u jalach naj yéetel tuláacal ba'al tu yóoltaj u beete',

²chíicpaj Yuumtzil ti' tu ca'a téen, je'el bix chíicpajic ca'ach ti' Gabaone',

³ca tu ya'alaj ti': Dzo'oc in wu'uyic a payalchi' yéetel le káat óolal ta beetaj ti' teno', dzo'oc xan in jun páaycuntic le kulnaj ta beetaj u ti'al u cajtal in kaaba'. U ti'al ja'abo'ob mina'an u xuul. Yaan in canantic ma' bin tu'ubuc ti' teen.

⁴Ba'ale' wa ca ma'alob cuxtal tin táan je'el bix tu beetilac David a taata, yéetel tuláacal u tojil a pucsi'ikal, iquil a beetic tuláacal ba'ax dzo'oc in wa'alic yéetel a dzo'ocbesic in wa'almaj t'aano'ob yéetel in a'almaj xiquino'obe',

⁵tene' bíin in jedzcunt a ajawil tu lu'umil Israel, u ti'al ja'abo'ob mina'an u xuul je'el bix tin séeb chi'itilac ti' David a taata, le ca tin wa'alaj ti' mix bikin bíin u binet jun túul u ch'i'ibal u ti'al j cutal tu jalach káanche'il Israel.

⁶Ba'ale' wa te'ex yéetel a paalale'ex ca náachcunticaba'ex ti' teen yéetel ma' ta dzo'ocbesique'ex in nu'ucbe'en t'aano'ob yéetel in wa'almaj t'aano'ob in dzaamaj ti' te'exe', tumen ca meyajtique'ex yéetel ca kultique'ex u yaanal kuobe',

⁷tene' bíin in wáalcabans Israel ti' le lu'um in dzaamaj ti'o', bíin in tzel tin táan le kulnaj dzo'oc in jun páaycuntico', Israel túune' bíin p'áatac u ti'al che'ejtbil mantadz ichil tuláacal le múuch' caajo'obo'.

⁸Wa tu yo'olal le kulnaja', yaan u su'utul jun p'éel nojoch tucub ju'uju'ut najil, tuláacal le máax bíin máanac naadz ti'e' yaan u ja'akal yóol yéetel yaan u che'ejtic ca'aliquil táan u káat chi'itic ba'axten tu beetaj Yuumtzil bey ti' le múuch' caaja', bey xan ti' le kulnaja'.

⁹Bíin túun núuca'ac ti' tu yo'olal tu xúump'attajo'ob Yuumtzil u Junab Ku, le máax jóokeso'ob u máanja'an ch'i'ibalo'ob Egiptoe', yéetel tu yo'olal xan tu pechilajuba'ob u kulto'ob yéetel u meyajto'ob u láak kuob; let óolal Yuumtzile' tu beetaj u taal tu yóokolo'ob le nojoch kaaso'.

¹⁰J máan veinte ja'abo'ob dzo'ococ u beetic Salomón le ca'a p'éel najo'obo', u kulnaj Yuumtzil yéetel u jalach naj,

¹¹u ti'al lelo' u ajawil Tiroe' tu dzaj ti' Salomón u che'ilo'ob kuulche' yéetel pino, bey xan tuláacal le oro tu yóoltaje'. Tu yo'olal lelo' ajaw Salomone' tu kubaj xan ti' Hiram veinte caajo'ob tu lu'umil Galilea.

¹²Ba'ale' le ca j bin Hiram u yil le caajo'ob j dzaab ti' tumen Salomono', ma' j utzchajo'ob tu yichi',

¹³ca tu ya'alaj: ¿Ba'ax caajilo'ob dzo'oc a dzáic ti' teen beya', in láak? Let o'olale' ti' le lu'um tu'ux yaan ca'ach le caajo'obo' tu dzaj u kaaba'int Cabul,[3] le kaaba'oba' leti' yaan ti'ob tac bejela'e'.

¹⁴Le oro tu túuxtaj ca'ach Hiram ti' ajaw Salomono', tu p'isaj tres mil novecientos sesenta kilos.

¹⁵Let o'olale', le meyaj x ma' bo'olil tu dzaj ajaw Salomón u ti'al u beetic u kulnaj Yuumtzil, yéetel u jalach naj, le táax but' yéetel u tuulumilo'ob Jerusalén, yéetel u caajilo'ob Hazor, Meguido yéetel Gezere', leti' lelo'oba':

¹⁶faraón u ajawil Egiptoe', dzo'oc ca'ach kuchul dzo'oc xan u toquic ca'ach u caajil Gezer; cu dzo'ocole' tu tóocaj, ca tu quíimsaj tuláacal le j cananeob cajacbalo'ob te j caajo', cu dzo'ocole' tu kubaj bey u mu'ujul ti' u x ch'upul paal, u yatan Salomón.

¹⁷Salomón túune' tu yutzquintaj Gezer, Bet-horón u caabalil,

¹⁸Baalat yéetel Tamar, tu x tocoy lu'umil Judá.

¹⁹Tu yutzquintaj xan tuláacal le caajo'ob tu'ux cu kalic ca'ach le ba'axo'ob cu jaanta'alo'obo', bey xan u máacanilo'ob u ti'al u ka'alal bolano'ob, u yotoch j nat' tzíimino'ob yéetel tuláacal le ba'ax tu yóoltaj u beet Jerusalén, Líbano' yéetel ti' tuláacal le u lu'um yaan yáanal u méektáano'.

²⁰Le j amorreob, hititaob, ferezeob heveob yéetel jebuseob le máaxo'ob ma' j israelitaobe',

²¹u káat ya'ale' u paalalo'ob, le máaxo'ob j p'áato'ob pachal ti'ob te j lu'um, ma' páatchaj u xu'ulsa'alo'ob tumen le j israelitaobo', Salomone' tu beetaj u mukul meyajo'ob, bey p'áatico'ob tac bejela'e'.

²²Ba'ale' ma' tu beetaj u mukul meyaj mix jun túul israelita bey palitzile', tu dzajuba'ob aj ba'atelo'ob, náacomo'ob, aj dzíibo'ob u nuuquilo'ob aj ba'atelo'ob yéetel u méektáano'ob u ti'al u bolanilo'ob ba'atel yéetel aj nat' tzíimino'ob.

²³Le aj ilaj meyajo'ob, yaan ca'ach ti' Salomón u ti'al ilic ca'ach u beeta'al le meyajo'obo' quinientos cincuenta u túulul leti'ob nu'ucbesic ca'ach u meyajo'ob le máaco'obo'.

²⁴U x ch'upul paal faraone' j luk tu caajil David u ti'al u bin te jalach naj tu beetaj Salomón u ti'al leti'. Leti' túune' tu beetaj u táax bu'ut'ul.

²⁵Óox téen ti' jun ja'abe', Salomone' cu kubic tóocbil ba'alche'ob yéetel u quíimsbil ba'alche'ilo'ob ca'a bisajbáil, tu yóokol le u multuunil kultaj tu beetaj u ti'al Yuumtzilo', cu tóoquic xan poom tu táan Yuumtzil. Bey dzo'oquic u beeta'al le kulnajo'.

²⁶Ajaw Salomone' tu beetaj xan cheemo'ob te j Ezion-geber, le yaan tu tzéel Elat, tu jáal le chac ka'anabo', tu lu'umil Edom.

²⁷Hirame' tu túuxtaj cheemo'ob ti' u jo'ol póopo'ob, u yojelo'ob u meeyjul ka'anab yéetel u kaj óolalo'ob le ka'anabo', pa'ate' yéetel u jo'ol póopo'ob Salomón,

²⁸kucho'ob Ofir, tu'ux tu ch'a'ajo'ob óoli' catorce mil kilos oro ca tu bisajo'ob ti' ajaw Salomón.