Read Yucateco 2 Reyes 1 Bible Online

2 Reyes 1 - Yucateco bible

2 Reyes 1

¹Cu dzo'ocol u quíimil Acabe', Moabe' j líik u ba'atelt Israel.

²Wa tu yo'olal Ocoziase', j lúub ti' jun p'éel calom kiin tu ca'anal yáal u jalach naj le yaan Samariao', ca jach yaajchaj quimpajic. Ca túun tu túuxtaj aj bisaj t'aano'ob u ti'al ca u káat chi'ito'ob ti' Baal-zebub, u ku Ecrón, wa je'el u tojtal u yóole',

³ba'ale' u ángel Yuumtzile' tu ya'alaj ti' Elías, le j Tiisbee': Xeen a nactáant u aj bisaj t'aano'ob u ajawil Samaria, káat ti'obe' wa mina'an Junab Ku ichil u caajil Israel, u ti'al ca xi'ico'ob káat chi' ti' Baal-zebub, u ku Ecrón.

⁴A'al xan ti'obe' teen Yuumtzile' quin wa'alic ti' Ocozías: Ma' bíin líikiquech ta kaani', ba'ale' bin a ca'aj quíimil, Elíase' j bine' ca tu beetaj beyo'.

⁵Le ca j suunajo'ob le aj bisaj t'aano'ob tu táan le ajawo', leti' tu káat chi'itaj ti'ob: ¿Ba'axten j suunaje'ex?

⁶Leti'obe' tu núucajo'ob: Tumen jun túul j xiib jóok t beele' ca tu ya'alaj ca suunaco'on tu'ux yaan ajaw le máax tu túuxtajo'ono', u ti'al ca c a'al ti' teech xane': Bey u ya'alic Yuumtzila': ¿Mina'an wa Ku Israel, u ti'al ca a túuxt ca úuchuc t'aan yéetel Baal-zebub, u ku Ecrón? Tu yo'olal le ba'ax dzo'oc a beetico', ma' bíin líikiquech ta kaani', ba'ale' yaan a quíimil.

⁷Ajawe' tu káat chi'itaj ti'ob: ¿Bix ca'ach le j xiib tu nactáantaje'exo' le máax tu ya'alaj te'ex lela'?

⁸Leti'obe' tu núucajo'ob: Jun túul j xiib u búuquintmaj jun p'éel suuyem tzo'otz u ca'aj, yéetel jun p'éel kaxnak kéewel u ca'aj. Ajawe' tu ya'alaj: ¡Leti'e' j Elías le j tisbetail!

⁹Tu séeblaquile' tu túuxtaj jun túul náacom yéetel cincuenta aj ba'atelo'ob u ti'al ca taasa'ac. Le ca j kucho'obe', Elíase' culucbal tu jach ca'analil jun p'éel witz. Le náacom túuno' tu ya'alaj ti': ¡Aj bóobat, ajawe' cu ya'alic ca éemequech!

¹⁰Elíase' tu núucaj: Bey wa teen aj bóobateno', lúubuc u káakil ca'an ca u xu'ulsech pa'ate' yéetel a cincuenta aj ba'atelo'ob. Tu séeblaquile' j lúub u káakil ca'an ca j xu'ulsa'abo'ob.

¹¹Ajawe' tu túuxtaj u láak náacom yéetel u láak cincuenta aj ba'atelo'ob, lela' j bine' ca tu ya'alaj ti' Elías: ¡Aj bóobat, ajawe' cu ya'alic ca éemequech tu séeblaquil!

¹²Elíase' tu núucaj ti': Wa jach tu jaajil teen aj bóobatene', ca lúubuc u káakil ca'an ca u xu'ulsech pa'ate' yéetel a cincuenta aj ba'atelo'ob. Tu séeblaquile', j lúub u káakil ca'an ca j xu'ulsa'abo'ob.

¹³Cu dzo'ocole' le ajawo' tu túuxtaj tu yóox páaque' jun túul náacom yéetel u láak cincuenta aj ba'atelo'ob. Ba'ale' le u yóox túul náacomo' j na'ac tac tu'ux yaan ca'ach Elíase', ca j xolaj tu táane' ca tu káat óoltaj ti': Aj bóobat, beet utz a p'atic in cuxtal yéetel u cuxtal le cincuenta a j meeyjulo'oba';

¹⁴tumen le ca'a túul náacomo'ob j taalo'ob táanil yéetel u aj ba'atelo'ob j lúub u káakil ca'ane' ca j xu'ulsa'ajo'ob. Tene' quin káat óoltic ti' teech ca ch'a'aten óotzilil.

¹⁵U ángel Yuumtzil túune' tu ya'alaj ti' Elías: Xeen tu yéetel ma' a ch'a'ic sajaquil ti'. Elíase' j éeme' ca j bin u yil le ajawo', láakinta'an tumen le náacomo',

¹⁶ca tu ya'alaj ti': Yuumtzile' bey cu ya'alica': Bey tumen ta túuxtaj aj bisaj t'aano'ob u ti'al káat chi' ti' Baal-zebub, u ku Acrón, bey mina'an Junab Ku tu caajil Israel ti' máax je'el u páajtal u yúuchul káatchi'e', ma' bíin likiquech ta kaani', ba'ale' bin a ca'aj quíimil.

¹⁷Jach bey úuchico', Ocozíase' j quíimi, je'el bix tu ya'alajilac Yuumtzil tu chi' Elíaso'. Tu yo'olal ma' j kuch yantal u paalal Ocozíase', ajawnaj tu káanche' Joram u sucu'un. Lela' j úuch tu ca'a p'éel ja'abo'ob u ajawil Joram, u paal Josafat, tu lu'umil Judá.

¹⁸U yalab u tzicbalil Ocozías, yéetel le ba'alo'ob tu beetajo' ti' dzíibta'an tu dzíibil ju'unil u ajawilo'ob Israele'.