Read Yucateco 2 Reyes 10 Bible Online

2 Reyes 10 - Yucateco bible

2 Reyes 10

¹Yaan ca'ach sesenta u paalal Acab tu caajil Samaria, Jehú túune' tu túuxtaj dzíibil ju'uno'ob ti' le máaxo'ob méektáantic le caajo', ti' u nuuquilo'ob yéetel ti' le máaxo'ob ca'anbesico'ob u paalal Acab. Tu'ux cu ya'alic ti'ob:

²Bey tumen ta wicnale'ex yano'ob u paalalo'ob a dzuulile'exo', bey xan u tzíimino'ob yéetel u bolanilo'ob ba'atele', u tuulum cúuchil yéetel u nu'uculo'ob ba'atele', le quéen kuchuc ta kabe'ex le dzíibil ju'una',

³yéeye'ex u asab ma'alobil yéetel u mu'ukanil u paalal a dzuule'ex, ca dza'ex tu jalach káanche' u taata ca ba'atelnaque'ex tu yo'olal u yotoch a dzuule'ex.

⁴Lela' tu yocsaj ya'abcach sajaquil ti'ob, ca tu ya'alajo'ob: Wa ca'a túul ajawo'ob ma' j páatchajo'ob yéetele', ¿to'one', bix túun bíin páajtaco'on yéetel?

⁵U j mayolil le jalach najo', u méektáant le caajo', u nuuquilo'ob yéetel le aj ca'anbesajo'ob, tu túuxtajo'ob a'albil ti' Jehú: To'one' way yano'on u ti'al c u'uy a t'aane', je'el c beetic tuláacal le ba'ax bíin a wa'al ti' to'one', ba'ale' ma' bíin j culquint mix jun túul ajawi'. Beet le ba'ax ca tucultic ma'alobe'.

⁶Jehue' j dzíibnaj tu ca'a téen táan u ya'alic: Wa te'ex ti' yane'ex tin wéetel yéetel a káat a beete'ex ba'ax quin wa'alique', ch'a'ex u poolo'ob u paalal a dzuulile'ex, walquil sáamala' co'otene'ex a wilene'ex tu caajil Jezreel. Le setenta u j xibil paalal le ajawo' ti' yano'ob ca'ach yéetel u nuuquilo'ob le noj caajo', le máaxo'ob tzéento'ob ca'acho',

⁷bey túuno' le ca tu kamajo'ob le dzíibil ju'uno', tu ch'a'ajo'ob le sesenta j xiibo'obo' ca tu quíimsajo'ob; cu dzo'ocole' u poolo'obe', tu dzajo'ob ti' xaaco'ob ca tu túuxtajo'ob tu caajil Jezreel.

⁸le ca j kuch le aj bisaj t'aano', tu ya'alaj ti' Jehú: Dzo'oc u taasa'al u poolo'ob u j xibil paalal le ajawo'. Jehue' tu ya'alaj: Dza'ex ti' ca'a tucub tu jool caaj, p'ate'ex te'elo' tac sáamal.

⁹Tu láak kiine' jóok Jehú, wa'alacbale' ca tu ya'alaj ti' tuláacal le caajo': Te'exe mina'an a si'ipile'ex. Teen j líik óolt in quíimsic in dzuulil; ba'ale', ¿máax quíims tuláacal le máaco'oba'?

¹⁰Ma'alob ojéelte'ex, mix ba'al ti' le ba'ax tu ya'alaj Yuumtzil tu yo'olal u láaktzilo'ob Acab bíin p'áatac ma' u yúuchul. Yuumtzile' dzo'oc u beetic le ba'ax tu ya'alaj tu chi' Elías u palitzile'.

¹¹Jehue' tu quíimsaj tu caajil Jezreel u yalab u láaktzilo'ob acab, tuláacal u nucuch máaquilo'ob, u nadza'an yéet bisajba'ob, yéetel u aj kiino'ob. Mix máac tu p'ataj cuxa'an.

¹²Cu dzo'ocole' j bin tu caajil Samaria, tu beele' j kuch Bet-equed u lu'umil le j canan tamano'obo',

¹³tu'ux tu nuptáantaj u sucu'uno'ob Ocozías, u ajawil Judá. Jehue' tu káat chi'itaj ti'ob: ¿Te'exe', Máaxe'ex? Letiobe' tu núucajo'ob ti': U suucuuno'on Ocozías, taalaja'ano'on u ti'al c te'ezcunt u j xibil paalal le ajaw yéetel u paalal le x ajawo'.

¹⁴Jehú túune' tu ya'alaj ti' máaxo'ob tzaypachtico': Mache'exo'ob bey cuxa'anilo'obo'. Ca j ma'acho'ob cuxa'ano'ob tumen u j tzaypacho'ob Jehú, ca j cúulkupta'ab u caalo'ob tu tzéel u ch'e'enil Bet-equed le u ti'al le j canan tamano'obo'. Cuarenta yéetel dos le j xiibo'obo', mix jun túul j p'áat cuxa'ani'.

¹⁵Le ca j luk Jehú te'elo', tu nuptáantajubáa yéetel Jonadab, u paal Recab, j bin ca'ach u yile, Jehue' tu te'escuntaj ca tu ya'alaj ti': ¿Ma'alob wa a tuculo'ob tin wo'olal, je'el bix le in ti'al ta wo'olale'? Jonadabe' tu núucaj: beyo'. Jehue' tu ya'alaj: Wa beye', tich'ten a kab. Jonadabe' tu tich'aj u kab ti', Jehue' tu beetaj u na'acal tu bolan,

¹⁶táan u ya'alic: Láakinten ca a wil bix in p'eequil u ke'exel Yuumtzil. Ca tuun tu bisaj tu bolan.

¹⁷Le ca j ooc tu caajil Samariae' Jehue' tu quíimsaj tuláacal u ch'i'ibal Acab, le p'áatal ca'ach cuxa'ano'obo'. Tu láaj xu'ulsajo'ob, je'el bix tu ya'alajilac Yuumtzil ti' Elíase'.

¹⁸Cu dzo'ocole' Jehue' tu much'quintaj tuláacal le caajo' ca tu ya'alaj ti'ob: Acabe' tu dzaj ti' Baal jun p'iit kultajil, ba'ale' tene' bin in dzáa ya'ab kultajil ti'.

¹⁹Let o'olale', t'ane'ex tuláacal u aj bóobato'ob, u aj kultajo'ob yéetel u aj kiino'ob Baal, ma' u bineltic mix jun túul, tumen dzo'oc in nu'ucbesic jun p'éel nojoch quíimsbil ba'alche' tu tziiquil Baal. Le máax ma' tu taale' yaan u xot kinta'al. Ba'ale' Jehue' tu jóok jo'oltaj le tuusa' u ti'al u xu'ulsic tuláacal u aj kultajo'ob Baal;

²⁰le t o'olale' tu ya'alaj ca ka'ayta'ac jun p'éel noj kiinbesajil ti' Baal, bey beeta'abic.

²¹Cu dzo'ocole' tu túuxtaj aj bisaj t'aano'ob ti' tuláacal u lu'umil Israel, tuláacal máaxo'ob kultic Baal j cucho'ob kulnaj. Mix jun túul tu binetaji', let o'olalo' le kulnajo' j yibbalnaji.

²²Jehue' tu ya'alaj túun ti' le máax canantic le x kalab nooko' ca u jóokes u nookilo'ob u meyajilo'ob kultaj, u ti'al tuláacal u kultajilo'ob Baal, le j canan nooko' tu beetaj beyo'.

²³Cu dzo'ocole', Jehú yéetel Jonadabe' j ooco'ob tu kulnaj Baal, Jehue' tu ya'alaj ti' u aj kultajo'ob Baal: Ile'ex ma' u yantal ichile'ex mix jun túul le máaxo'ob cu kultico'ob Yuumtzilo', chéen le u kultajo'ob Baal.

²⁴U aj kultajo'ob Baale' j ooco'ob te j kulnajo', u ti'al u kubico'ob quíimsbil yéetel láaj tóocbil ba'alche', ca'aliquil Jehue' tu dzaj ochenta máaco'ob táancab, ca tu ya'alaj ti'ob: Le máax bíin u cha'a' u púudzul jun túul ti' le máaco'ob dzo'oc in dzáic ta kabe'exo', bíin u bo'ot yéetel u cuxtal.

²⁵Le ca j dzo'oc Jehú u kubic le láaj tóocbil ba'alche'obo', tu ya'alaj ti' le u aj canano'ob yéetel ti' u nuuquilo'obo': ¡Oquene'ex ca a quíimse'exo'ob! ¡Ma' u púudzul mix jun túuli'! Quinsa'abo'ob yéetel u ch'aac máascab tumen u aj ba'atelo'ob Jehú, cu dzo'ocole' tu pulajo'ob j táancab. Cu dzo'ocole' ooco'ob tu kulnaj Baal,

²⁶ca tu jóokesajo'ob le chuun che'ob cu kulta'alo'ob ca'acho', ca tu tóocajo'ob.

²⁷Tu jutajo'ob u multuunil kultaj yéetel u kulnaj Baal, ca tu sutajo'ob tuláacal tu'ux cu ka'alal tzíimin, tac bejela'a' dzaca'ane'.

²⁸Bey úuchic u xu'ulsa'al u kultajil Baal, tumen Jehú tu lu'umil Israel.

²⁹Chéen ba'ale', ma' tu tzelajubáa ti' le kebano'ob iquil tu beetilac Jeroboam, u paal Nabat, iquil tu beetaj u kebantal le j israelitaobo', tumen láili' j bin u kult le mejen wacaxo'ob oro u ca'aj yaan ca'ach Dan yéetel Betelo'.

³⁰Yuumtzile' tu ya'alaj ti' Jehú: Bey tumen dzo'oc a beetic ba'alo'ob ma'alobo'ob, yéetel quin wilic toj a cuxtal, tumen dzo'oc a beetic ti' u láaktzilo'ob Acab le ba'ax tin tuclaj in beetique', a ch'i'ibale' bíin culac tu jalach káanche' Israel tac tu can p'éel ch'i'ibalil.

³¹Quex tumen beyo' Jehue' ma' tu táan óoltaj ma'alob u dzo'ocbesic u a'almaj t'aan Yuumtzil, u Ku Israel, tumen ma' tu tzelajubáa ti' le kebano'ob úuchic u beetic Jeroboam u kebantal le j israelitaobo'.

³²Ti' le kiino'obo', Yuumtzile' chu'unpaj u cóonquimsic u lu'umil Israel. Hazaele' j bin tu yóokol le israelitaob ti' tuláacal u jáal u lu'umilo'ob:

³³Líikbal tu lakin Jordane' tac tuláacal u lu'umil Galaad, Gad, Rubén yéetel Manasés, yéetel líikbal Aroer, le yaan tu jáal u t'o'olol Arnón, táacpaja'ano'ob Galaad yéetel Basán.

³⁴U yalab u tzicbalil u cuxtal Jehue' yéetel tuláacal, le nucuch talam ba'alo'ob tu beetajo' dzíibta'an tu dzíibil Ju'unil u ajawo'ob Israel.

³⁵Le ca j quíime', j mu'uc tu caajil Samaria, ajawnaj tu káanche', u Joacaz u paal.

³⁶Jehue' ajawnaj yóokol Israel Veinticinco ja'abo'ob, tu caajil Samaria.