Read Yucateco 2 Reyes 11 Bible Online

2 Reyes 11 - Yucateco bible

2 Reyes 11

¹Le ca tu yojéeltaj Atalía, u maama Ocozías, dzo'oc u quíimil u yaale', j bine' ca tu xu'ulsaj tuláacal u ch'i'ibal le ajawo'.

²Ba'ale' x Josaba u x ch'upul paal le ajaw Joram, u quiic Ocozíase', tu jun páaycuntaj Joás, u paal Ocozías, ti' u láak u paalal le ajawo', máaxo'ob táan ca'ach u quíimsa'alo'ob, ca tu ta'acaj ti' x Atalía, pa'ate' yéetel x chiiw ti' jun p'éel u cúuchil wenel. Bey túuno' ma' j quíimsa'abi',

³Joase' j ta'aca'ab ca'ach yéetel u x chiiw seis ja'abo'ob tu kulnaj Yuumtzil. Ca'aliquil x Atalíae' táan u méektáantic le lu'umo'.

⁴Tu siete ja'abe' Joiadae' tu túuxtaj t'anbil le náacomo'obo', le j cereteob yéetel le aj canano'obo', ca tu beetaj u yooclo'ob tu kulnaj Yuumtzil, tu'ux yaan ca'ach leti'. Te'elo' tu beetaj yéetelo'ob jun p'éel nup t'aan tu yáanal jalach t'aan, ca tu ye'esaj Joás le chan ajawo'.

⁵Cu dzo'ocole' tu ya'alaj ti'ob: Lela' leti' le ba'ax bíin a beete'exa': jun jaatz ti' te'exe' yaan u canantic le jalach naj sábadoo';

⁶u láak jun jaatze' yaan u p'áatal tu jool caajil Shur; u dzooc jun jaatze' ti' te'exe', cu j bin cananto'ob u paach jool najil le cúuchil ya'abo'ob le aj canano'obo'. Bey bíin a nup'e'ex a canantique'ex le jalach najo'.

⁷Ma'alob túun, le ca jatz cu jóokol ti' le j canano'ob sábadoo', yaan u canantico'ob u kulnaj Yuumtzil tu tzéel le ajawo'.

⁸Te'exe' yaan a súutpachtique'ex le ajawo', jujun túule' yéetel u nu'uculo'ob u ba'atel tu kab, le máax cu táabal j ocol ichille'exe' bíin quíimic. Te'exe' yaan a láakintique'ex le ajaw je'el tu'uxac ca xi'ique'.

⁹Le náacomo'obo' tu beetajo'ob tuláacal ba'ax a'ala'ab ti'ob tumen aj kiin Joiada. Jujun túule' tu ch'a'aj u méektanil u aj ba'atelo'ob, je'el bix le cu yoclo'ob u canant u kiinilo'ob sábado'ob bey le cu jóokolo'obo', cu bino'ob tu táan aj kiin Joiada.

¹⁰Le aj kiin túuno' tu kubaj ti' le náacomobo' le julte'ob yéetel le chimalo'ob u ti'al ca'ach ajaw David, le yano'ob ca'ach tu kulnaj Yuumtzilo'.

¹¹Le aj canano'obo' tu ch'a'ajo'ob u cúuchilo'ob, u cáajbal tu x no'oj tac tu x dzi'ic le kulnajo', yéetel tu bakpach u multuunil kultaj, jujun túule' yéetel u nu'ucul u ba'atel tu kab u ti'al u canantico'ob le ajawo'.

¹²Joiada túune' tu jóokesaj u paal le ajawo' ca tu dzaj u péet jo'ol yéetel u chíiculalo'ob jun túul ajaw, cu dzo'ocol u wequic aceite tu yóokole' ca tu ya'alaj ajawil. Cu dzo'ocole' tuláacalo'ob papaxkabnajo'ob yéetel awatnajo'ob: ¡Cuxlac le ajawo'!

¹³Le ca tu yu'ubaj x Atalía u ka'aytajo'ob le j canano'ob yéetel le máaco'obo' j bin tu kulnaj Yuumtzil, tu'ux yano'ob tuláacalo'ob.

¹⁴Ca j paacatnaje' tu yilaj le ajaw te'elo', wa'alacbal tu chuun jun p'éel ocom, je'el bix suuquile'. Tu tzéele' ti' yano'ob u nuuquilo'ob yéetel u múuch'ul le j paxo'obo', sen qui'imac u yóolo'ob le máaco'ob táan u paxico'ob trompetaob. X Atalía túune' tu jataj nook ca tu yaawtaj: ¡Chéen tuus! ¡Chéen tuus!

¹⁵Ba'ale' aj kiin Joiada tu ya'alaj ti' u náacomo'ob máaxo'ob yano'ob tu táan u aj ba'atelo'obe': ¡Jóokese'ex, quíimse'ex le máax bíin xi'ic tu paacho'! Tumen tu ya'alaj aj kiine', ma' u quíimsa'al ichil u kulnaj Yuumtzil,

¹⁶j ma'ache' ca jóokesa'ab tu jool tu'ux cu yocol le tzíimino'obo' tac jalach naj, ti' j quíimsa'abi'.

¹⁷Cu dzo'ocole' Joiadae' tu beetaj jun p'éel nup t'aan yéetel Yuumtzil, yéetel le ajawo' bey xan yéetel le caajo', u káat ya'ale' leti'obe' u caajal Yuumtzil, bey xan ichil le ajaw yéetel le caajo'.

¹⁸Cu dzo'ocole' j bino'ob tuláacalo'ob tu kulnaj Baal ca tu ju'uju'utajo'ob ca xan tu xe'exe'et'ajo'ob u multuunil kultaj yéetel u beetbil kuob. Wa tu yo'olal Matán u aj kiin Baale', tu cúulkuptajo'ob u caal tu táan u multuunil u kultajo'ob. Cu dzo'ocole', aj kiine' tu dzaj jun múuch' aj canano'ob tu kulnaj Yuumtzil;

¹⁹cu dzo'ocole' tu ch'a'aj le náacomo'obo', le j cereteobo', le j canano'ob yéetel tuláacal le máacobo', pa'ate'ob tu láakintajo'ob le ajaw, líikbal tu kulnaj Yuumtzile' tac jalach naj, ca j ooco'ob tu jool najil le j canano'obo'. Joase' j culaj te jalach káanche'o',

²⁰Tuláacal le caajo' j qui'imacchaj u yóol. Tu yo'olal dzo'oc ca'ach u quíimil x Atalía ch'acbil yéetel máascab tu jalach naje', le caajo' j p'áat jejedzquil.

²¹Siete ja'abo'ob yaan ti' Joás ca chu'unpaj u ajawil,