Read Yucateco 2 Reyes 12 Bible Online

2 Reyes 12 - Yucateco bible

2 Reyes 12

¹lela' j úuch tu siete ja'abil u ajawil Jehú; ajawnaj tu caajil Jerusalén cuarenta ja'abo'ob. U kaaba' u maama ca'ache' Sibia ti' u caajale' Beerseba.

²Le ba'axo'ob tu beetaj Joase', tojtaco'ob tu yich Yuumtzil, tumen caanbanaj ti' aj kiin Joiada.

³Chéen ba'ale', ma' j lukesa'ab le manba'al kulnaj, tu'ux cu bin ca'ach le caaj u kub quíimsbil ba'alche' yéetel u tóoco'ob poom.

⁴Jun p'éel kiine', Joase' tu ya'alaj ti' le aj kiino'obo': Mole'ex tuláacal u taakinil le ti'ibil óolal cu taasa'al tu kulnaj Yuumtzil, le unaj u bo'otic jujun túul máaque' bey xan tuláacal le ti'ibil óolalo'ob cu taasico'ob tu juunal yóol tu jujun túulal tu kulnaj Yuumtzilo'. Káate'ex ti' le máaxo'ob canantico'ob le taakino', u ti'al ca beeta'ac tuláacal le pakbalil ka'abéet u beeta'al te j kulnajo'.

⁶Ba'ale' j kuch u ja'abil veintitrés ti' u ajawil Joase', le aj kiino'obo' ma' ca'ach u yutzquinto'ob le kulnajo'.

⁷Ajaw Joás túune' tu t'anaj aj kiin Joiada yéetel le u láak aj kiino'obo' ca tu ya'alaj ti'ob: ¿Ba'ax o'olal ma' a wutzquinte'ex le kulnajo'? Líikbal ti' le kiina' ma' bíin a kame'ex taakin ti' le máaxo'ob canantico'; le taakin yaan te'exo' unaj a kubique'ex u ti'al u yutzquinta'al le kulnajo'.

⁸Le aj kiino'obo' tu éejemtajo'ob ma' bíin u kamo'ob u láak taakin ti' le máaco'obo', ma' xan bíin u yilo'ob meeyjul u yutzquinta'al le kulnajo'.

⁹Aj kiin Joiada túune' tu ch'a'aj jun p'éel ba'asche', tu beetaj jun p'éel jool tu maaque', ca tu dzaj jun tzéel tu x no'ojil u multuunil le kultajo', je'el bix u yocol máac tu kulnaj Yuumtzilo', le aj kiino'ob cu canantico'ob u jool le kulnajo', cu dzáico'ob ichil le ba'asche'o' tuláacal le taakin cu bisa'al tu kulnaj Yuumtzilo'.

¹⁰Le quéen u yilo'ob dzo'oc u sen ya'abtal le taakin te j ba'asche'o', cu taalo'ob u aj dzíibo'ob le ajaw, yéetel le nojoch aj kiino' cu xoquico'ob le taakin yaan tu kulnaj Yuumtzilo'; cu dzo'ocole' cu dzáico'ob ich sáabucano'ob,

¹¹cu dzo'ocol u dzíibtico'ob buca'aje', cu kubico'ob ti' máaxo'ob ilico'ob u meeyjul le kulnajo' u ti'al ca u bo'oto'ob le j póol che'ob yéetel ti' máaxo'ob ilic le meyajo'ob cu beeta'alo'ob tu kulnaj Yuumtzilo',

¹²cu bo'otico'ob xan le j pakbalo'ob yéetel le j póol tuunicho'obo', u ti'al xan u manico'ob che'ob yéetel póolbil tuunicho'ob u ti'al u yutzquinta'al le kulnajo', bey xan u ti'al u bo'otico'ob u láak meyajo'ob.

¹³Ba'ale' le taakin cu bisa'al tu kulnaj Yuumtzilo' ma' tu ma'achal u ti'al u beeta'al laco'ob plata u ca'ajo'ob, nat'abo'ob, nucuch laco'ob, trompetaob wa u láak nu'uculo'ob oro wa plata u ca'ajo'ob,

¹⁴Ba'ale' yaan ca'ach u ku'ubul ti' le máaxo'ob ilico'ob le meyajo' u ti'al ca meyajnac ti' u yutzquinajil u kulnaj Yuumtzil.

¹⁵Chéen ba'ale' ma' tu káata'al ti' le máaco'ob buca'aj taakin tu xupico'ob u ti'al u bo'otico'ob le j meyajo'obo, tumen toj u meyajo'ob.

¹⁶Ba'ale' u taakinil le ti'ibil óolal tu yo'olal si'ipil yéetel tu yo'olal kebane' ma' tu bisa'al ca'ach kulnaj, tumen u ti'al ca'ach le aj kiino'obo'.

¹⁷Ti' le kiino'obo', Hazael, u ajawil Siriae', tu ba'ateltaj Gat ca tu ch'a'aj, cu dzo'ocole' ca j bin xan u ba'atelt Jerusalén.

¹⁸Ba'ale' Joás u ajawil Judae', tu ch'a'aj tuláacal le quili'ich ba'alo'ob jun páaycunta'an ca'ach u ti'al kultajil, tumen le ajawo'ob Josafat, Joram yéetel Ocozías u máanja'an ch'i'ibalo'ob ti' u ajawil Judá; tu ch'a'aj xan le ba'axo'ob tu jun páaycuntaj leti'o', bey xan tuláacal le oro tu nuptáantaj tu cúuchil u ta'aca'al u taakinilo'ob le kulnaj yéetel ti' le jalach najo', tuláacale' tu túuxtaj ti' Hazael, Hazael túune' tu p'ataj u ba'ateltic Jerusalén.

¹⁹U yalab u tzicbalil u cuxtal Joás yéetel tuláacal ba'ax tu beetaje', ti' dzíibta'an tu dzíibil ju'unil u ajawilo'ob Judae'.

²⁰U náacomo'obe' tu x mucul jok jo'oltajo'ob u beetico'ob loob ti', ca tu quíimsajo'ob tu najil le but'bil lu'um yaan tu chíincab u lu'umil Sila.

²¹Bey túuno', Josacar, u paal Simeat, yéetel Jozabad u paal Somer, u náacomo'obe', leti'obe' tu beetajo'ob loob ti' ca j quíimi, le ca j quíime' j mu'uc tu caajil David. Cu dzo'ocole' culaj tu jalach káanche' u taata, Amasías u paal.