Read Yucateco 2 Reyes 13 Bible Online

2 Reyes 13 - Yucateco bible

2 Reyes 13

¹Tu ja'abil veintitrés ti' u ajawil Joás, u paal Ocozías tu lu'umil Judae', Joacaz, u paal Jehue', chu'unpaj u ajawiltic Israel, ajawnaj tu caajil Samaria diecisiete ja'abo'ob.

²Ba'ale' le ba'axo'ob tu beetaje' kastac tu táan yich Yuumtzil, tumen tu beetaj láili' je'el bix le keban tu beetaj Jeroboam, u paal Nabat, le ca tu beetaj u kebanchajal le j israelitaobo', ma' tzelajubáa ti'obi'.

³Le t o'olale' sen j p'u'uj Yuumtzil ti' Israel, ca tu kubajo'ob ya'abcach kiino'ob tu kab Hazael, u ajawil Siria, yéetel tu kab ben-adad u paal.

⁴Joacaz túune' payalchi'inaj ti' Yuumtzil, Yuumtzile' tu yu'ubaj u payalchi', tumen dzo'oc ca'ach u yilic bix u ye'edzel le j israelitaob tumen u ajawil Siria.

⁵Yuumtzile' tu dzaj ti' Israel jun túul aj tocsajil, bey túun úuchic u toquicubáa le j israelitaob ti' u páajtalil Siriao', ca j suunajo'ob tu yotocho'ob jejedzqui'ob je'el bix ca'ache'.

⁶Chéen ba'ale' ma' tu tzelajuba'ob ti' le kebano'ob tu beetaj u ch'i'ibalo'ob Jeroboam, le ca tu beetaj u kebanchajal Israel, ba'ale' ma' j chéen u kebantalo'obi', u yoochel x Aserae' j p'áat Samaria.

⁷Ti' Joacaze' j p'áat chéen cincuenta aj ba'atelo'ob j nat' tzíimino'ob, diez u bolanilo'ob ba'atel yéetel diez mil xíimbal aj ba'atelo'ob, mix ba'alcunta'abo'ob yéetel j xiixcunta'abo'ob tumen u ajawil Siria.

⁸U yalab u tzicbalil u cuxtal Joacaz yéetel tuláacal le nucuch talam ba'alo'ob tu beetajo', ti' dzíibta'ano'ob tu dzíibil ju'unil u ajawo'ob Israele'.

⁹Le ca j quíime' j mu'uc tu caajil Samaria. Cu dzo'ocole' ajawnaj tu káanche' u taata, Joás u paal.

¹⁰Tu ja'abil treinta yéetel siete ti' u ajawil Joás, u ajawil Judae', Joás u paal Joacaze', chu'unpaj u ajawtic Israel, ajawnaj tu caajil Samariae' dieciséis ja'abo'ob.

¹¹Ba'ale' u cuxtale' kastac tu táan yich Yuumtzil, tumen ma' tu tzelajubáa ti' tuláacal le keban tu beetaj Jeroboam, u paal Nabat le ca tu beetaj u kebanchajal Israel, leti'e' láili' j bin u beetique'.

¹²U yalab u tzicbalil u cuxtal Joás yéetel tuláacal le nucuch talam ba'alo'ob tu beetaj yéetel bix ba'atelnajic yéetel Amasías, u ajawil Judae', ti' dzíibta'an tu dzíibil ju'unil u ajawo'ob Israel.

¹³Le ca j quíim Joase' j mu'uc tu caajil Samaria, tu'ux muca'ano'ob u ajawilo'ob Israel. Cu dzo'ocole' ajawnaj tu káanche' Jeroboam.

¹⁴Eliseoe' j ma' ca'a líik ti' u koja'anili', Joás u ajawil Israele', j bin u yilej, tu méekaj ca j okolnaj táan u ya'alic: ¡In taata, in taata, teche' u ti'al Israele' beyech jun múuch' mu'uka'an aj ba'atelo'obe'!

¹⁵Eliseoe' tu ya'alaj ti': Ch'a'a' jun p'éel x p'unche' yéetel wa jay p'éel julubte'ob. Ajawe' tu ch'a'aj jun p'éel x p'úuche' yéetel wa jay p'éel julte'ob.

¹⁶Eliseoe' túune' tu ya'alaj: líiksabáa u ti'al a júul ch'iinic jun p'éel julte'. Ca'aliquil táan u beetic le ajaw le ba'ax j a'ala'ab ti'o', Eliseoe' tu dzaj u kab yóokol u kab le ajawo'

¹⁷ca tu ya'alaj ti': Je'e' le calom kiin yaan j láakiino'. Ajawe' tu je'aj, Eliseoe' tu ya'alajti': t'in a x p'úun che': ¡júul ch'iinen! Le ajawo' tu júul pulaj le julte'o. Eliseo túune' tu ya'alaj: ¡U júulte'il u tocsaj Yuumtzil! ¡U júulte'il tocsaj u ti'al u bin kaasil ti' Siria! ¡Teech bíin a pa'a u muuk le j siriobo' tu lu'umil Afec, ti' bíin a xu'ulso'obi'!

¹⁸Cu dzo'ocole' tu ya'alaj ti' le ajawo': Ch'a'a' le julte'obo'. Le ca tu ch'a'aj le ajawo', Eliseoe' tu ya'alaj ti': Bejela'e boboj kol le lu'umo'. Le ajawo' tu boboj kolaj óox téen le lu'umo', ca j ch'éen u kolic.

¹⁹Le aj bóobat túuno' kuuxilnaj tu yéetele', ca tu ya'alaj ti': Wa ca a kol ca'ach le lu'um cinco wa seis u téenelo', dzo'oc ca'ach a pa'ic u muuk le j siriobo' tac a xu'ulsico'ob; ba'ale' bejela'e' chéen óox téen yaan a pa'ic u muuko'ob.

²⁰Eliseoe' j quíimi ca j mu'uqui'. Bey ja'aben ja'ab u múuch'ul le j oocolo'ob moabitaob cu yooclo'ob te j lu'umo',

²¹jun téenaque' dze'edzec israelitaob táan ca'ach u muquico'ob jun túul máaque', ca tu yilajo'ob táan ca'ach u taal jun múuch' le j oocolo'obo', tu pulajo'ob le quimen ichil u mucnal Eliseo ca j bino'ob. Ba'ale' chéen p'elac tu cu'ultilacubáa le quimen ti' u baaquelo'ob Eliseoe', j cuxlaji', ca j wa'alaji.

²²Hazael u ajawil Siriae', tu yedzaj Israel, ca'aliquil cuxa'an Joacaz.

²³Ba'ale' Yuumtzile' tu ch'a'aj óotzilil ti'ob yéetel munmun óolal, tu yo'olal le nup t'aan u beetmaj ca'ach yéetel Abraham, Isaac, Yéetel Jacob, tu táan óoltajo'ob ma' tu yóoltaj u xu'ulso'obi' mix u tojolch'into'ob tu táan. Tac bejela'e' ma' u jóokso'obi'.

²⁴Le ca j quíim Hazael, u ajawil Siriae', ajawnaj tu káanche' u taata, Ben-adad u paal.

²⁵Joás túun u paal Joacaz, tu tocaj ti' Ben-adad u páajtalil yóokol le noj caajo'ob tu lukesaj ca'ach ich ba'atel ti' Joacaz u taata. Joase' tu pa'aj u muuk Ben-adad óox téen, ca tu ca'a ch'a'aj u noj caajilo'ob Israel.