Read Yucateco 2 Reyes 14 Bible Online

2 Reyes 14 - Yucateco bible

2 Reyes 14

¹Tu ca'a p'éel ja'abil u ajawil Joás, u paal Joacaz, u ajaw Israele', Amasías, u paal Joase', chu'unpaj u ajawtic Judá.

²Yaan ca'ach veinticinco ja'abo'ob ti' Amasías ca tu chu'unbesaj u ajawil, ajawnaj Jerusalén veintinueve ja'abo'ob. U maamae' cu kaaba'intic ca'ach Joadán, x jerusalenil ca'achi'.

³Le ba'axo'ob tu beetaj Amasíase' tojtaco'ob tu táan u yich Yuumtzil, ba'ale' ma' jach je'el bix le tu beetaj David u j máanaja'an ch'i'ibale'. Tumen tu beetaj láili' le ba'ax tu beetaj Joás, u taata,

⁴ma' j lukesa'ab le j manba'al kulnajo'ob, tu'ux cu bin le cajnáalo'ob u kubico'ob quíimsbil ba'alche' yéetel u toquico'ob poom.

⁵Le ca j ma'alob p'áat tu ajawile', tu quíimsaj tuláacal le náacomo'ob máaxo'ob j quíims u taatao'.

⁶Ba'ale' ma' tu quíimsaj u paalal le j quíimsajo'obo', tumen, je'el bix dzíibta'anil tu ju'unil u ya'almaj t'aan Moisese', Yuumtzile' tu ya'alaj: Le taataobo' ma' tu páajtal u xotkiinta'alo'ob quíimil tu yo'olal u si'ipil u paalalo'ob, mix le paalalo'ob tu yo'olal u si'ipil u taataob, ba'ale' jujun túule' yaan u quíimil tu yo'olal u keban.

⁷Amasíase', leti' máax quíims diez mil edomitaob tu táax lu'umil ta'ab, ca tu ch'a'aj u caajil Sela, ca tu dzaj u kaaba'intaj Jocteel, u kaaba' yaan ti' tac bejela'e'.

⁸Cu dzo'ocol lela', tu túuxtaj jun p'éel péectzil ti' Joás, u paal Joacaz u yáabil Jehú, u ajawil Israel, tu'ux cu ya'alic ti': Co'oten u ti'al ca c pact u yicho'ob.

⁹Ba'ale' Joase' tu túuxtaj le núuc t'aan ti'a': Jun cúul ki'ixe' tu túuxtaj a'albil ti' u kuulche'il Líbano': Dzáa a x ch'upul paal ti' in paal, u ti'al u yatante. Ba'ale' jun túul dzíidzic ba'alche'e' j máan te'elo' ca tu bibilche'etaj le jun cúul ki'ixo'.

¹⁰Yaan in kaj óoltic ta pa'aj u muuk le j edomitaobo', le t o'olal cu ca'analtal a wich. Jach ma'alob, u'uyicabáa ca'anal a wich; ba'ale' asab ma'alob ca'a p'áataquech ta wotoch. ¿Ba'ax o'olal a káat ca taalac loob ta wóokol yéetel tu yóokol xan Judá?

¹¹Chéen ba'ale', Amasíase' ma' tu dzaj óoltaj ba'ax a'ala'ab ti'i'. Joás túune' tu dzajubáa j bin Bet-semes tu lu'umil Judá u ti'al j ba'atel yéetel Amasías.

¹²Judae' j pa'ab u muuk tumen Israel, ca j púudz tu jujun túulil tu yotoch.

¹³Joás u ajawil Israele', tu kalaj Amasías u ajawil Judá tu caajil Bet-semes, cu dzo'ocole' j bin Jerusalén, tu'ux tu je'aj jun p'éel jool ti' u tuulumil, ciento ochenta metros u chowaquil, cu cáajbal tu Jool caajil Efraín tac tu Jool Caajil u Ti'itz.

¹⁴Tu yóokol lelo' tu ch'a'aj tuláacal le oroo', plata yéetel tuláacal u nu'uculo'ob u kulnaj Yuumtzil, yéetel u ayikalo'ob jalach naj. Cu dzo'ocol u ch'a'ic wa jay túul máaco'ob u ti'al páay ooquile', suunaj tu caajil Samaria.

¹⁵U yalab u tzicbalil u cuxtal Joás yéetel le nucuch talam ba'alo'ob tu beetaje', bey xan ba'atelnajic yéetel Amasías u ajawil Judae', ti' dzíibta'an tu dzíibil ju'unil u ajawilo'ob Israele'.

¹⁶Le ca j quíime' j mu'uc tu caajil Samaria yéetel u ajawo'ob Israel. Cu dzo'ocole' j culaj tu káanche' u taata, Jeroboam u paal.

¹⁷Amasías u paal Joás u ajawil Judae', cuxlaj quince ja'abo'ob cu dzo'ocol u quíimil Joás, u paal Joacaz u ajawil Israel.

¹⁸U yalab u tzicbalil u cuxtal Amasíase' dzíibta'an tu dzíibil ju'unil u ajawilo'ob Judá.

¹⁹Jerusalene' úuch x mucul jok jo'olal u ti'al u quíisico'ob Amasías, leti'e' j púudze' ca j bin tu caajil Laquis; ba'ale' tzaypachta'ab tac te j noj caajo', ca j quíimssa'ab te'elo'.

²⁰Cu dzo'ocole' tu bisajo'ob tu yóokol jun túul tzíimin ca j mu'uc tu caajil Jerusalén tu tzéel u ch'i'ibalo'ob, tu caajil David.

²¹Tuláacal u caajil Judae' tu ch'a'aj Azarías, ca tu beetajo'ob ajaw u ti'al u jeelintic Amasías u taata. Yaan túun dieciseís ja'abo'ob ca'ach ti' Azarías,

²²leti'e' cu dzo'ocol u quíimil u taatae' tu yutzquintaj u noj caajil Elat, ca tu ch'a'aj u ti'al Judá.

²³Tu ja'abil quince ti' u ajawil Amasías, u paal Joás u ajaw Judae', Jeroboam, u paal Joás u ajaw u lu'umil Israele', chu'unpaj u ajawtic Israel, ajawnaj Samaria cuarenta yéetel jun p'éel ja'abo'ob.

²⁴Ba'ale' le ba'axo'ob tu beetaje' kaastac tu táan yich Yuumtzil, tumen ma' tu tzelajubáa ti' mix jun p'éel le kebano'ob tu beetaj Jeroboam, u paal Nabat, úuchic u beetic u kebanchajal Israele'.

²⁵Jeroboame' tu ca dzaj u chíiculal u jáal u lu'umil Israel, líikbal tu jool Hamat tac tu ka'anabil Arabá, je'el bix tu ya'aljilac Yuumtzil u Ku Israel tu chi' Jonás u j palitzil, u paal Amitai, u aj bóobatil Gat-hefer.

²⁶Tumen Yuumtzile' tu yilaj u yaayaj mukyaj u caajil Israel, ti' ba'ax mix máac páatac u toquicubáa, Israel xane' mina'an mix jun p'éel áantaj ti'.

²⁷Ca tu tocajo'ob yéetel Jeroboam, u paal Joás, tumen ma' u tucult ca'ach u tupic u kaaba' Israel ti' le yóokolcaaba'.

²⁸U yalab u tzicbalil u cuxtal Jeroboam yéetel tuláacal ba'ax tu beetaje' bey xan le nucuch talam ba'alo'ob yéetel le ba'atelo'ob tu beetaje' bey xan tu ch'a'ajilac Damasco, yéetel Hamat u ca'a ti'alint Israele', ti' dzíibta'an tu dzíibil ju'unil u ajawilo'ob Israele'.

²⁹Le ca j quíim Jeroboame', j mu'uc yéetel u ajawilo'ob Israel. Cu dzo'ocole' ajawnaj tu káanche' u taata, Zacarías u paal.