Read Yucateco 2 Reyes 15 Bible Online

2 Reyes 15 - Yucateco bible

2 Reyes 15

¹Tu ja'abil veintisiete ti' u ajawil Peka, u ajawil u lu'umil Israele', chu'unpaj u ajawil Azarías u paal Amasías, u ajawil Judá.

²Yaan ca'ach ti'e' dieciseís ja'abo'ob ca tu chu'unsaj u ajawil, méektáannaj tu caajil Jerusalén cincuenta yéetel dos ja'abo'ob, u maamae' tu kaaba'intaj Jecolías, u caajal ca'ache' Jerusalén.

³Le ba'axo'ob tu beetaj Azariase', tojtaco'ob tu táan Yuumtzil, je'el bix tu le beetajo'ob Amasías, u taatae'.

⁴Chéen ba'ale' ma' lukesa'ab u manba'al kul najo'ob, te tu'ux láili' cu bin u kubic ca'ach quíimsbil ba'alche' yéetel cu tóoquico'ob poom.

⁵Yuumtzile' tu beetaj u mukyaj le ajawo' yéetel jáaway tac le kiinac ca j quíimi, bey túuno' le ajawo' cuxlaj u kalmajubáa tu jalach naj tzelmajubáa ti' u meyajo'ob, Jotam, u paale', tu méektáantaj le múuch' caajo'obo'.

⁶U yalab u tzicbalil u cuxtal Azarías yéetel tuláacal ba'ax tu beetaje' ti' dzíibta'an tu dzíibil ju'unil u ajawo'ob Judae'.

⁷Ca j quíim Azaríase', j mu'uc yéetel u máanja'an ch'i'ibalo'ob tu caajal David. Cu dzo'ocole' culaj tu káanche' u taatae', Jotam u paal.

⁸Tu ja'abil treinta yéetel ocho u méektáan Azarías, u ajawil u lu'umil Judae', Zacarías u paal Jeroboame' chu'unpaj u ajawil Israel, méektáantaj Samaria seis meses.

⁹Ba'ale' le ba'axo'ob tu beetaje' kaastac tu táan Yuumtzil je'el bix le tu beetajo'ob u máanja'an ch'i'ibalo'obe', tumen ma' tu tzelajubáa ti' le kebano'ob úuchic u beetic Jeroboam u paal Nabat, u kebanchajal Israele'.

¹⁰Ba'ax úuche', Salum, u paal Jabese', j bin u ba'atelt u caajil Ibleam ca tu quíimsaj, cu dzo'ocole' ajawnaj tu jalach káanche'.

¹¹U yalab u tzicbalil u cuxtal Zacariase', ti' dzíibta'an tu dzíibil ju'unil u ajawo'ob Israele'.

¹²Bey úuchic béeytal le ba'axo'ob tu ya'alaj Yuumtzil ti' Jehú, le ca tu ya'alaj, u paalale' bíin culaco'ob tu jalach káanche' Israel tac tu can yáal ch'i'ibalo'ob.

¹³Salum u paal Jabese', chu'unpaj u méektáan tu ja'abil treinta yéetel nueve ti' u ajawil Uzías, u ajaw u lu'umil Judá. Ba'ale' chéen ajawnaj jun winal tu lu'umil Samaria,

¹⁴tumen Manahem u paal Gadie', j luk tu caajil Tirsa ca j bin tu lu'umil Samaria ca tu ba'ateltaj Salum, cu dzo'ocol u quíimsique' Ajawnaj tu jalach káanche'.

¹⁵U yalab u tzicbalil u cuxtal Salum pa'ate' yéetel u x mucul jok t'aan u ti'al u beetic loob ti' Zacariase', ti' dzíibta'an tu dzíibil ju'unil u ajawo'ob Israele'.

¹⁶Manahem túune' tu xiixcuntaj u caajil Tifsa, ca tu láaj ch'a'aj ba'axo'ob yaan ca'ach te'elo' yéetel tu lu'umil, líikbal Tirsa, tu je'aj xan u nak tuláacal le co'olelo'ob x yo'omo'obo'. Tu beetaje' tumen ma' je'ekabta'ab ti'e' u jool najilo'ob le noj caajo'.

¹⁷Tu ja'abil treinta yéetel nueve ti' u ajawil Azarías, tu lu'umil Judae', Manahem u paal Gadie', chu'unpaj u méektáantic u cajnáalilo'ob Israel, ajawnaj diez ja'abo'ob Samaria.

¹⁸Ba'ale' ba'axo'ob tu beetaje' kaastaco'ob tu táan Yuumtzil, tumen ma' tu tzelajubáa ti' le kebano'ob tu beetaj Jeroboam u paal Nabat, le ca tu beetaj kebanchajal Israele'. Tu kiinilo'ob

¹⁹Pul, u ajawil Siriae', j ooc u ch'a'a le caajo'obo', Manaheme' tu kubaj ti' treinta yéetel tres mil kilos plata u ti'al u ch'a'ic muuk u ajawil.

²⁰U ti'al u bo'otic le buca'aj taakin ti' u ajawil Asiriao', Manaheme' tu ya'alaj ca bo'ota'ac tumen tuláacal u ayikalilo'ob Israel jun p'éel patan, maanal ti' táancoch kilo plata. Bey túuno' u ajawil Asiriae', suunaj tu lu'um, ma' j t'íil te j lu'umo'.

²¹U yalab u tzicbalil u cuxtal Manahem yéetel tuláacal ba'ax tu beetaje', ti' dzíibta'an tu dzíibil ju'unil u ajawo'ob Israele'.

²²Cu dzo'ocol u quíimile' ajawnaj tu káanche', Peekaía u paal.

²³Ti' u ja'abil quince ti' u ajawil Azarías, u ajaw u lu'umil Judae', Peekaía, u paal Manaheme', ajawnaj Samaria ca'a p'éel ja'abo'ob.

²⁴Ba'ale' ba'axo'ob tu beetaje' kaastaco'ob tu táan Yuumtzil, tumen ma' tu tzelajubáa ti' le kebano'ob tu beetaj Jeroboam, u paal Nabat le ca tu beetaj u kebanchajal Israele'.

²⁵Ba'ale' jun túul aj dzíib cu kaaba'intic Peeka, u paal Remalíase' x mucul jok jo'olnaj u ti'al u beetic loob ti', yéetel u yáantaj cincuenta u cajnáalilo'ob Galaade', j bin u beet loob ti', ca tu quíimsaj tu tuulumil le jalach najo', cu dzo'ocol lelo' ajawnaj tu jalach káanche'.

²⁶U yalab u tzicbalil u cuxtal Peekaía yéetel tuláacal ba'ax tu beetaje' ti' dzíibta'an tu dzíibil ju'unil u ajawo'ob Israele'.

²⁷Tu ja'abil cincuenta yéetel dos ti' u ajawil Azarías, u ajaw u lu'umil Judae', chu'unpaj u ajawil Peeka, u paal Remalías tu lu'umil Israel, ajawnaj Samaria veinte ja'abo'ob.

²⁸Ba'ale' ba'ax tu beetaje' kaastaco'ob tu táan Yuumtzil, tumen ma' tu tzelajubáa ti' le kebano'ob tu beetaj Jeroboam, u paal Nabat le ca tu beetaj tu betaj u kebanchajal Israele'.

²⁹Tu kiinilo'ob u ajawil Peeka Israele' j kuch Tiglat-pileser, u ajaw u lu'umil Siria, ca j ooc u ch'a'a' u caajilo'ob Ijón, Abel-betmaaca, Janoa, Cedes, Hazor, Galaad, Galilea yéetel tuláacal u lu'umil Neftalí, ca tu bisaj kalbil u cajnáalilo'ob Asiria.

³⁰Oseas túun u paal Elae', x mucul meyajnaj u ti'al u beetic loob ti' Peeka, u paal Remalías, tu ba'ateltaje' ca tu quíimsaj. Bey úuchic u cutal tu jalach káanche'o', tu ja'abil veinte ti' u ajawil Jotam, u paal Uzías.

³¹U yalab u tzicbalil u cuxtal yéetel tuláacal ba'ax tu beetaje', ti' dzíibta'an tu dzíibil ju'unil u ajawo'ob Israele'.

³²Tu ca'a p'éel ja'abil u ajawil Peeka, u paal Remalíase', Jotam, u paal Uzíase', chu'unpaj u méektáan tu lu'umil Judá.

³³Yaan ca'ach veinticinco ja'abo'ob ti' ca tu chu'unsaj u ajawil, tu méektáantaj Jerusalén dieciseís Ja'abo'ob, u maamae' cu kaaba'intic ca'ache' x Jerusa, u x ch'upul paal Sadoc.

³⁴Le ba'axo'ob tu beetaj Jotame' tojtaco'ob tu táan Yuumtzil, je'el bix le ba'axo'ob tu beetaj Uzías, u taatae',

³⁵tumen tu beetaj u nojoch jool najil u kulnaj Yuumtzil. Chéen ba'ale', ma' tu lukesaj le manba'al kul najo'ob tu'ux u kubo'ob quíimsbil ba'alche', yéetel u tóoquico'ob ca'ach poom le caajo'.

³⁶U yalab u tzicbalil u cuxtal Jotam yéetel tuláacal ba'ax tu beetaje', ti' dzíibta'an tu dzíibil ju'unil u ajawo'ob Judae'.

³⁷Ti' le kiino'obo', Yuumtzile' cáaj u túuxtic beetbil loob ti' Judá, tumen j Rezín, u ajawil Siria, bey xan Peeka, u paal Remalías.

³⁸Le ca j quíim Jotame', j mu'uc yéetel u máanja'an ch'i'ibalo'ob tu caajil David, u máanja'an ch'i'ibal. Cu dzo'ocole' j méektáanaj tu káanche'e', Acaz u paal.