Read Yucateco 2 Reyes 16 Bible Online

2 Reyes 16 - Yucateco bible

2 Reyes 16

¹Tu ja'abil diecisiete ti' u ajawil Peeka, u paal Remalíase', chu'unpaj u ajawil Acaz, u paal Jotam, u ajaw u lu'umil Judá.

²Yaan ca'ach ti'e' veinte ja'abo'ob ca tu chu'unsaj u ajawil, j méektáanaj tu caajil Jerusalén dieciseís ja'abo'ob; ba'ale' le ba'axo'ob tu beetaje' kaastac tu táan Yuumtzil u Ku, ma' je'el bix David u máanja'an ch'i'ibale',

³tumen láili' tu beetaj le ba'alo'ob kaastac tu beetajo'ob ajawo'ob Israele', kuch tac u tóoquic u paal, bey kultaje', je'el bix le cu beetico'ob le múuch' caajo'ob tojolch'inta'ab tumen Yuumtzil tu táan le j israelitaobo'.

⁴Tu kubaj xan quíimsbil ba'alche' yéetel tu tóocaj poom te j manba'al kulnajo'obo', tu jo'ol lu'um yéetel yáanal tuláacal búucpaja'an che'ob.

⁵Ti' le kiinaco', Rezín u ajawil Siria, yéetel Peeka, u paal Remalías u ajawil Israele', j bino'ob u ba'atelto'ob u caajil Jerusalén. Tu bakpachtajo'ob Acaz, ba'ale' ma' páatji' u yocol u ch'a'ico'ob le caajo'.

⁶U ajawil Edom túune' tu ca'a ch'a'aj u caajil Elat; le ca j kucho'ob le edomitaob cu dzo'ocol u tojolch'intico'ob le judiób tu caajil Elate', ca j p'ato'ob cajtal tac bejela'a' te'elo'.

⁷Acaz túune' tu túuxtaj dze'edzec aj bisaj t'aano'ob ti' Tiglat-pileser u ajawil Asiria, u ti'al ca a'ala'ac ti' tu kaaba'e': Le a palitzila', bey jun túul a paale', le t o'olale', co'oten a toquen ti' u ajawilo'ob Siria yéetel Israel, táan u taalo'ob u beeto'ob teen kaas.

⁸Acaze' tu ch'a'aj xan plata yéetel oro le yano'ob ca'ach tu kulnaj Yuumtzil yéetel tu cúuchil tu'ux cu ta'acbesa'al u taakinilo'ob jalach naj, ca tu túuxtaj bey siibalil ti' u ajawil Siria,

⁹Leti' túune' tu táan óoltaj u káatanquil, ca tu nu'ucbesaj jun p'éel ba'atel tu yóokol Damasco, ca tu pa'aj u muuk, cu dzo'ocole' tu tojolch'intaj u cajnáalilo'ob Kir ca tu quíimsaj Rezín.

¹⁰Le ca j bin ajaw Acaz tu caajil Damasco u ti'al u nuptáanticubáa yéetel tiglat-pileser, u ajawil Asiriae', tu yilaj le u multuunil kultaj yaan te'elo'. Tu túuxtaj ti' aj kiin Urías jun p'éel u ju'unil tu'ux dzíibta'an bix beeta'anil, jach je'el bix beeta'anil le multuunil kultajo',

¹¹Urías túune' tu beetaj jun p'éel u multuunil kultaj jach je'el bix le ju'un túuxta'ab ti' tumen ajaw Acaz líikbal Damasco, tu dzo'ocbesaj u ti'al le ca j suunaj ajaw Acaz ti' u taalbal Damascoe' dzo'oc u dzo'ocbesic.

¹²Le ca j kuch ajaw ti' u taalbal Damascoe', tu yilaj le u multuunil kultajo', tu nadzajubáe' ca tu kubaj tu yóokol jun p'éel láaj tóocbil ba'alche';

¹³ca tu tóocaj pa'ate' yéetel u ti'ibil óolalil janalbe'en neeko'ob, ca tu wecaj tu yóokol le u multuunil kultajo' u ti'ibil óolalil u kaab uva, ca tu widzaj tu yóokole', u ki'ikel le qíimsbil ba'alche'il ca'a bisajbáil.

¹⁴Tu yo'olal le u multuunil kultaj bronce u ca'aj yaan actáan ti' u kulnaj Yuumtzile', Acaze' tu lukesaje' ca tu dzaj tu tzéel j xaman le u multuunil kultajo', ca j p'áat tac bejela'e' chúumuc ti' le u túunben multuunil kultajo', yéetel ti' u kulnaj Yuumtzil.

¹⁵Cu dzo'ocole' tu ya'alaj ti' aj kiin Urías, ca u tóoc tu yóokol le u nojoch multuunil kultaj ja'atzcab kiin, le quíimsbil ba'alche'o', le u ti'ibil óolalil janalbe'en neeko'obo' ocnaj kiin, u tóocbil ba'alche' u ti'ibil óolalil janalbe'en neeko'ob le ajawo', yéetel u láaj tóocbil ba'alche'o', u ti'ibil óolal janalbe'en neeko'obo', u kaab u yo'och uvaob tuláacal le caajo'. Tu ya'alaj xan ca wi'idzic tu yóokol u multuunil le kultajo' tuláacal u ki'ikel le quíimsbil ba'alche'obo' yéetel le láaj tóocbil ba'alche'obo', ba'ale' le u multuunil kultaj bronce' u ca'ajo' chéen u ti'al u t'aan leti' yéetel Yuumtzil.

¹⁶Aj kiin Uríase' tu beetaj tuláacal ba'ax a'ala'ab ti' tumen le ajaw Acazo'.

¹⁷Cu dzo'ocole' Acaze' tu xotaj u káasabilo'ob le chuuno'obo' ca tu lukesaj le nojoch chulub ja' cucha'an tumen le wacaxo'ob bronce u ca'aje', ca tu dzaj tu yóokol jun p'éel bajpéec tuunich.

¹⁸U ti'al u lúubul utzil ti' u ajawil Asiriae' tu lukesaj tu kulnaj Yuumtzil le xe'ec ooc beeta'ab u ti'al sábadoo', yéetel le jool naj yaan paachil tu'ux cu jóokol chéen le ajawo'.

¹⁹U yalab u tzicbalil u cuxtal Acaz yéetel tuláacal ba'ax tu beetaje', dzíibta'an tu dzíibil ju'unil u ajawilo'ob Judá.

²⁰Le ca j quíime' j mu'uc yéetel u máanja'an ch'i'ibalo'ob tu caajal David. Cu dzo'ocole' ajawnaj tu káanche', Ezequías u paal.