Read Yucateco 2 Reyes 17 Bible Online

2 Reyes 17 - Yucateco bible

2 Reyes 17

¹Tu ja'abil doce ti' u ajawil Acaz, u ajaw u lu'umil Judae', Oseas u paal Elae', j chu'unpaj u méektáantic u caajilo'ob Israel, ajawnaj Samaria veinte ja'abo'ob.

²Ba'ale' le ba'axo'ob tu beetaje' kaastac tu táan Yuumtzil, quex tumen ma' jach je'el bix tu beetilac u máanja'an ajawo'ob Israele'.

³Salmanasar, u ajawil Asiriae', tu ba'ateltaj Oseas, ca tu palitziltaj ca xan j beeta'ab bo'otic páatan.

⁴Ba'ale' Salmanasere' tu chucaj táan u x mucul meyaj Oseas u ti'al u beetic kaas ti', dzo'oc ca'ach bin u túuxtic dze'edzec báacabo'ob ti' So, u ajawil Egipto, mix xan tu bo'otic le ja'aben patano'obo'. Salmanasare' tu ya'alaj ca ma'achac Oseas u ti'al ca ka'alac;

⁵cu dzo'ocole' tu ch'a'aj tuláacal le lu'umo', óox p'éel ja'abo'ob táan u ba'ateltic Samaria,

⁶cu dzo'ocole', tu ja'abil nueve ti' u ajawil Osease', u ajawil Asiriae' tu ch'a'aj Samaria, ca tu bisaj kalbil le j israelitaob tu lu'umil Asiria, ca tu beetaj u cajtalo'ob tu caajil Halah, tu lu'umil Habor, tu yáalcab ja'il Gozán, yéetel ti' u noj caajilo'ob j medo'ob.

⁷Lela' j úuche' tumen le j israelitaobo' kebanchajo'ob ca'ach ti' Yuumtzil u Ku, máax beet u jóokolo'ob Egipto, ca tu tocajo'ob ti' u páajtalil faraón, u ajawil Egipto, tumen tu kultajo'ob u láak kuob

⁸ca tu beetajo'ob le ba'ax cu beetico'ob le múuch' caajo'ob tu tojolch'intaj Yuumtzil tu táano'obo', bey xan le dza'ano'ob tumen u ajawilo'ob Israele'.

⁹U láak ba'ale', le israelitaobo' tu ya'alajo'ob ba'ax kaas ti' Yuumtzil u Ku, ca tu beetajo'ob manba'al kulnajo'ob ti' tuláacal u caajilo'ob bey xan witzil najo'ob u ti'al u yúuchul canan caaj, bey ti' le noj caajo'ob bey xan ti' u tuulumilo'obo'.

¹⁰Tu quili'ichcuntajo'ob tuunicho'ob yéetel u yoochelo'ob Asera u ti'al u kulto'ob, yóokol tuláacal jo'ol lu'um yéetel tu yáanal tuláacal búuc le' che',

¹¹je'el bix u beetilaco'ob le múuch' caajo'ob tu tojolch'inta'abo'ob tu táano'ob tumen Yuumtzil, tu tóocajo'ob poom ca tu beetajo'ob kaakas ba'alo'ob, tu yo'olal lelo' sen j p'u'uj Yuumtzil.

¹²Tu kultajo'ob beetbil kuob, ba'ax jach weta'an tumen Yuumtzil.

¹³Yéetel u aj bóobato'ob, u aj náayo'obe', Yuumtzile' tu ya'alaj ca'ach ti' le j israelitaobo', ca u p'áato'ob u kaakas cuxtalo'ob, ca u dzo'ocbeso'ob u ya'almaj t'aano'ob yéetel u nu'ucbe'en t'aano'ob ti' tuláacal le ca'anbesajo'ob tu dzaj ti' u máanja'an ch'i'ibalo'ob, tu chi' u palitzilo'ob le aj bóobato'obo'.

¹⁴Ba'ale' leti'obe' ma' tu dzo'ocbesajo'obi', láili' tu beetajo'ob je'el bix u máanaja'an ch'i'ibalo'ob, máaxo'ob ma' tu kubajo'ob u yóolo'ob ti' Yuumtzil u Junab Kuob;

¹⁵tu cúulpachcuntajo'ob u ya'almaj t'aano'ob, bey xan le nup t'aan tu beetaj ca'ach yéetel u máanja'an ch'i'ibalo'obe', tu cúulpachtajo'ob xan le tzolbe'en t'aano'ob tu dzaj ti'obe'. Tu yóokol lelo' j bino'ob tu paach kuob mix ba'al u biilalo'ob, ca j p'a'ato'ob mix ba'al u tojol u cuxtalo'ob, ca xan tu beetajo'ob tuláacal ba'ax cu beetic le múuch' caajo'ob yano'ob tu bakpacho'obo', ba'axo'ob wet'a'an ti'ob tumen Yuumtzil.

¹⁶tu p'atajo'ob tuláacal u nu'ucbe'en t'aano'ob Yuumtzil u Kuob, ca tu beetajo'ob ca'a túul mejen wacaxo'ob bronce u ca'ajo'ob tu beetajo'ob xan jun p'éel u yoochel Asera, bey xan tu kultajo'ob Baal yéetel tuláacal u eekilo'ob ca'an.

¹⁷Tu u tóocajo'on u j xibil paalal yéetel u x ch'upul paalal, tu patajuba'ob j na'at yéetel tamax chi'ob, tu kubajuba'ob xan u beeto'ob ba'alo'ob kaastac tu táan Yuumtzil, ca tu beetajo'ob u sen p'u'ujul.

¹⁸Le t o'olale' Yuumtzile' j p'u'uj ti' Israel ca tu tojolch'intaj tu táan, chéen tu p'ataj u ch'i'ibal Judá.

¹⁹Ba'ale' mix Judá tu dzo'ocbesaj u tzolbe'en t'aano'ob Yuumtzil u Kui', ba'ale' j bin tu paach le ba'axo'ob tu jedzcuntaj u beetico'ob le israelitaobo'.

²⁰Yuumtzil túune' tu cúulpachtaj tuláacal u ch'i'ibalo'ob le Israelitaob ca tu t'onquintajo'ob, ca tu kubajo'ob tu kab j oocolo'ob tac ca tu tojolch'intajo'ob tu táan.

²¹Tu tocaj u ch'i'ibal David ti' u cajnáalilo'ob Israel, le j israelitaob túuno' tu wa'acuntajo'ob ajawil Jeroboam, u paal Nabat, máax tu beetaj u tzelicuba'ob le j Israelitaob ti' Yuumtzil, ca j talam kebanchajo'ob.

²²Beyo' le j Israelitaobo' láili' tu beetajo'ob le kebano'ob tu beetaj ca'ach Jeroboame'.

²³U dzooque', Yuumtzile' tu tzelaj u caajil Israel tu táan, je'el bix tu ya'aljilac tu chi' tuláacal le aj bóobato'ob u palitzilo'obo', bey úuchic u bisa'alo'ob kalbil le j Israelitaob tac Asiria, tu'ux yano'ob tac bejela'e'.

²⁴U ajawil Asiriae' tu bisaj u cajnáalilo'ob Babilonia, Cuta, Ava, Hamat yéetel Sefarvaim, ca tu dzaj tu'ux u cajtalo'ob tu caajilo'ob Samaria, u ti'al u jeelintic le j israelitaobo'. Bey úuchic u ch'a'ico'ob Samaria ca j cajlajo'ob tu noj caajilo'ob.

²⁵Ba'ale' le máaco'obo' tu yo'olal ma' tu kultico'ob Yuumtzile', le beetic le ca jéedzo'ob ti' le cúuchil tu'ux cu bino'ob j cajtalo'obi' Yuumtzile' tu túuxtaj leóno'ob, u ti'al quíimsic wa jay túul ti'obi'.

²⁶J bino'ob túun u ya'alo'ob ti' u ajawil Asiria: Le máaco'ob ta bisajo'ob tu caajilo'ob Samaria u ti'al ca jéedz cajlaco'obe', ma' u kaj óolalo'ob u kultajil u kuil le lu'umo', tu yo'olal ma' u kaj óolalo'obe' le ti'e' dzo'oc u túuxtic leóno'ob u ti'al u quíimsico'ob.

²⁷Bey túuno', u ajawil Asiriae' tu ya'alaj: Túuxte'ex jun túul ti' le aj kiino'ob j taasa'ab kala'ano'obo', u ti'al ca xi'ic cajtal te'elo' ca u ca'anbes ti'ob u kultajil u kuil le lu'umo'.

²⁸Jun túul ti' le aj kiino'ob jóokesa'ab ca'ach tu lu'umil Samariae', j bine' ca cajlaj Betel, ca tu ca'anbesajo'ob u kulto'ob Yuumtzil.

²⁹Ba'ale' jujun múuch' caaje' tu beetaj u ku tu'ux cajacbal, ca tu dzajo'ob ti' le kulnajo'ob u beetmajo'ob ca'ach le samaritano'ob te j ca'anal cúuchilo'obo'.

³⁰Le j Babiloniobo' tu beetajo'ob jun p'éel u yoochel Sucot-benot; le j Cutitaobo', jun p'éel u yoochel Nergal, le j Hamatilo'obo', jun p'éel u yoochel Asima.

³¹Le j Availo'obo' tu beeto'ob u yoochel Nibhaz, yéetel u yoochel Tartac, le j Sefarvaimitaobo' cu tóoquico'ob ca'ach u paalal ti' Adramelec yéetel ti' Anemelec, u kuob.

³²U láak ba'ale' cu kultico'ob xan Ca'ach Yuumtzil, ba'ale' ichilo'obe' tu dzajo'ob u aj kiino'ob u ti'al ca meyajnaco'ob ti' u manba'al kulnaj.

³³Bey túuno' quex cu kultico'ob ca'ach Yuumtzile' láili' tu kultajo'ob u kuobe', je'el bix u beetico'ob le múuch' caajo'ob tu'ux tojolch'inta'abo'obe'.

³⁴Tac bejela'e', láili' cu beetico'ob le ba'ax suuc ti'ob ca'ache', tumen ma' tu kultico'ob Yuumtzil mix tu dzo'ocbesico'ob u ya'almaj t'aan mix u tzolbe'en t'aano'ob, mix u ca'anbesajil u nu'ucbe'en t'aano'ob tu ya'alaj Yuumtzil ca u dzo'ocbes u ch'i'ibalo'ob Jacob, le máax tu dzaj xan u kaaba'int Israel.

³⁵Le ca tu beetaj Yuumtzil jun p'éel nup t'aan yéetelo'obe', tu ya'alaj: Ma' a kultique'ex u láak kuob, mix a meyajtique'exo'ob yéetel quíimsbil Ba'alche'ob.

³⁶Kultene'ex chéen teen, Yuumtzil a Junab Kuex, máax jóokese'ex tu lu'umil Egipto yéetel nojoch páajtalil; chéen teen u najmal a kultiquene'ex, yéetel a meyajtiquene'ex táan u kubique'ex quíimsbil ba'alche'ob.

³⁷Yéetele' dzo'ocbese'ex yéetel chuca'an óolal le a'almaj t'aano'ob, le tzolbe'en t'aano'ob, le ca'anbesajo'ob yéetel le nu'ucbe'en t'aano'ob tin dzaj ti' te'ex, ti' dzíibil ju'une', yéetel ma' a kultique'ex u láak kuob.

³⁸Ma' a tu'ubsique'ex le nup t'aan in beetmaj ta wéetele'ex, mix a kultique'ex u láak kuob,

³⁹ba'ale', chéen teen Yuumtzil a Junab Kuex, teen túune' bíin in toque'ex ti' u páajtalil a aj p'eeque'ex.

⁴⁰Ba'ale', le múuch' caajo'obo', ma' tu táan óoltajo'obi', ba'ale' láili' cu beetico'ob je'el bix ca'ache'; láili' táan u dzáico'ob kultaj ti' Yuumtzil, táan xan u kultico'ob le beetbil kuobo'. U ch'i'ibalo'obe' láili' tu beetajo'ob je'el bix u máanja'an ch'i'ibalo'ob, tac bejela'a' bey u beetico'obo'.