Read Yucateco 2 Reyes 18 Bible Online

2 Reyes 18 - Yucateco bible

2 Reyes 18

¹Tu yóox p'éel ja'abil u ajawil Oseas, u paal Ela, u ajaw u lu'umil Israele', Ezequías u paal Acaz, u ajawil Judae' chu'unpaj u ajawil.

²Veinticinco ja'abo'ob yaan ca'ach ti', ajawnaj tu caajil Jerusalén veintinueve ja'abo'ob. U maamae' tu kaaba'intaj Abi, u x ch'upul paal Zacarías.

³Ba'axo'ob tu beetaj Ezequiase' tojtaco'ob tu táan Yuumtzil, je'el bix tuláacal le ba'axo'ob tu beetajo'ob David u máanja'an ch'i'ibale'.

⁴Le ti' máax lukes le manba'al kulnajo'ob, ca tu xiixcuntaj le u tuunichilo'ob u kultajo'obe', ca tu xe'exet'aj u yoochelo'ob Asera, bey xan tu ca'acachaj le can bronce u ca'aj tu beetaj ca'ach Moisés, tumen tac ti' le kiino'oba' cu tóoca'al ca'ach poom ti' tumen le j israelitaobo'; cu t'anico'ob ca'ach u kaaba' nehustán.

⁵Ezequíase' tu yocsaj óoltaj Yuumtzil u Ku Israel. Ichil tu tuláacal u ajawilo'ob Judae', mix táanil ti', mix pachal ti'e' j yanchaj jun túul je'el bix Ezequiase'.

⁶Tu yocsaj u yóol ti' Yuumtzil, mix jun téen tu tzelajubáa ti', ba'ale' tu dzo'ocbesaj le a'almaj t'aano'ob tu dzaj Yuumtzil ti' Moisese'.

⁷Le t o'olale' Yuumtzile' tu yantaj, ca tu beetaj u bin utzil ti' tuláacal ba'ax cu beetic ca'achi. Ezequiase' tu dzu'uyquintaj u yool ti' u ajawil Asiria, ma' tu yóoltaj ca palitzilta'ac tumeni'.

⁸Tu pa'aj xan u muuk le j filisteob tac tu lu'umil Gaza, tu jáal u lu'umilo'ob, líikbal tu witzil najilo'ob ch'úuc tac tu no'oj tuulum caajo'ob.

⁹Tu can p'éel u ja'abil ajawnac Ezequíase', ti' u siete u ja'abilo'ob ajawnac ca'ach Oseas, u paal Ela u ajawil u lu'umil Israele', Salmanasar, u ajawil u lu'umil Asiriae', tu bakpachtaj u caajil Samaria, ca tu ba'ateltaj.

¹⁰J máan óox p'éel ja'abo'obe' ca tu ch'a'aj, tu ja'abil seis ti' u ajawil Ezequías, yéetel u ja'abil nueve ti' u ajawil Oseas tu lu'umil Israel, le ca j ch'a'ab Samaria tumen u ajawil Asiria.

¹¹U ajawil Asiriae' tu bisaj le israelitaob tu lu'umil Asiriae', ca tu beetaj u cajtalo'ob Halah, tu lu'umilo'ob Habor tu yáalcab ja'il Gosán, tu cajtalilo'ob medo'ob.

¹²Úuch lela' tumen ma' tu yu'ubaj t'anto'ob Yuumtzil u Kuobi', mix tu dzo'ocbesajo'ob u nup t'aani', mix tu beetajo'ob tuláacal ba'ax j a'ala'ab ti'ob ca u beeto'ob tumen Moisés u palitzil Yuumtzil.

¹³Tu ja'abil catorce ti' u ajawil Ezequíase', Senaquerib u ajawil u lu'umil Asiriae' tu ba'ateltaj tuláacal le caajo'ob tuulumta'ano'ob yaan tu lu'umil Judae' ca tu ch'a'aj.

¹⁴Ezequías túun u ajawil Judae', tu túuxtaj jun p'éel péectzil ti' u ajawil Asiria, ti' yaan ca'ach Laquis, tu'ux cu ya'alic ti': Dzo'oc in beetic jun p'éel ba'al ma' tu beeli'. Jóoken tin lu'um, tene' quin bo'otic ti' teech le páatan bíin a wa'al ti' tene'. Le o'olal u ajawil Asiriae' tu ya'alaj ti' Ezequías, u ajawil Judá, ca u bo'ot jun p'éel páatan nueve mil novecientos kilos plata yéetel novecientos noventa kilos oro.

¹⁵Beyo' Ezequiase' tu kubaj ti', tuláacal le plata tu nuptáantaj tu kulnaj Yuumtzil yéetel tu'ux cu cananta'al u ayikalil jalach naj.

¹⁶Láili' le kiinaco' Ezequiase' tu lukesaj tu kulnaj Yuumtzil u jool najilo'ob yéetel u pacabilo'ob, ba'axo'ob leti' j beet u piixil yéetel oro u ca'aje' ca tu dzaj ti' u ajawil u lu'umil Asiria.

¹⁷Cu dzo'ocole' u ajawil Asiriae', tu túuxtaj ti' ajaw Ezequiase' jun túul nojoch aj dzíib jun túul nojoch aj meyaj, yéetel jun túul nojoch náacom, tu táan jun p'éel u nojoch múuch'ul aj ba'atelo'ob, lelo'oba' j bino'ob Laquis tac Jerusalén u ti'al u ba'atelto'ob. Le ca j kucho'ob Jerusalene', je'elo'ob tu jáal u becanil le ca'anal chultuun yaan ti' le bej cu bin tu kaax le j P'o' Nooko'.

¹⁸Cu dzo'ocole' tu t'anajo'ob le Ajawo', Eliaquim, u paal Hilcías máax ilic u meyajilo'ob jalach naj, Sebna, aj dzíib, yéetel Joa u paal Asafat, u yáantaj le ajawo', jóoko'ob u nuptáantuba'ob yéetelo'ob.

¹⁹Te'elo' le aj dzíibo' tu ya'alaj ti'ob: A'ale'ex ti' Ezequías u péectzil le nojoch ajawo', u ajawil Asiria: ¿Ti' ba'ax ca wu'uyicabáa jach ma'alob yanilech?

²⁰¿Ca tucultique' le jadzutz t'aano'obo' láajquet u tojol yéetel le ma'alob nu'ucbesaj bey xan yéetel le muuk u ti'al le ba'atelo'? ¿Ti' máax yaan a wocsaj óolal u ti'al ca taalaquech ba'atelten?

²¹Quin wilique' a woquesmaj a wóol ti' u yáantaj le j Egipciobo'. Ma'alob túun, Egiptoe' chéen jun p'éel sakab tza'atzaj, wa máax cu machicubáa ti'e' cu ju'up'ul, cu tadzmáansa'al xan u kab tumen. Bey le faraón u ajawil Egipto, u ti'al tuláacal le máaxo'ob cu yocsic u yóolo'ob ti'o'.

²²Wa te'ex ca wa'alique'ex: To'one' c ocsic c óol ti' Yuumtzil c Ku, ¿ma' wa tu lukesaj Ezequías u cúuchilo'ob kulnaj yéetel u multuunil u kultaj Ku, le ca tu ya'alaj ti' u cajnáalilo'ob Judá yéetel u cajnáalo'ob Jerusalén ca kultajnaco'ob chéen tu multuunil kultaj Jerusalén?

²³Beet jun p'éel kax t'aan yéetel in dzuulil, u ajawil Asiria: tene' quin dzáic ti' teech dos mil tzíimino'ob, wa ca caxantic j nat' tzíimino'ob.

²⁴Teche' ma' tu páajtal a beetic u púudzul mix u jach p'eexil u aj ba'atelo'ob le j Asiriobo', ¿ca tuclic a caxantic j nat' tzíimino'ob yéetel tzíimino'ob tu lu'umil Egipto?

²⁵¿Ca tuclic xan taalaja'anen u ti'al in ba'atelt yéetel in xu'uls le lu'uma', wa ma' táan in xooc yéetel Yuumtzil? ¡Leti' máax tu ya'alaj ti' teen ca a in ba'atelte yéetel ca in xu'ulsej!

²⁶Eliaquim, Sebna yéetel Joae' tu núucajo'ob ti' le náacom asirioo': Bet utz a t'aanico'on ich arameo, tumen to'one' c na'atic. Ma' a t'aanico'on ich hebreo tumen tuláacal le máaco'ob yaan te j tuulumo' táan u yu'ubico'ono'ob.

²⁷Ba'ale' le j náacomo' tu ya'alaj: Ma' ti' a dzuulil mix ti' te'ex tu túuxtajen u ajawil Asiria in wa'al lela'; ti' le máaco'ob yano'ob tu yóokol le tuulumo', tumen le ti'ob yéetel te'exe', yaan a makique'ex a ta'ex yéetel a wukique'ex a wixe'ex.

²⁸Wa'alacbal le náacomo' ca tu ka'amcach aawtaj, ich hebreo: U'uye'ex ba'ax cu ya'alic ti' te'ex u nojoch ajawil Asiria:

²⁹Ma' a cha'ique'ex u tusique'ex Ezequías; le ti'e' ma' tu páajtal u toquique'ex tin kab.

³⁰Wa Ezequías u káat u yoques ta wóole'ex ca a alab óolte'ex Yuumtzile', ca u ya'al ti' te'ex: Jach tu jaajil Yuumtzile' yaan u toquico'on; leti'e' ma' bíin u cha'a' u lúubul le caaj tu kab u ajawil Asiriai,

³¹ma' a wu'uyique'ex ba'ax cu ya'alic. U ajawil Asiriae' cu túuxtiquen in wa'al ti' te'ex ca a bisaba'ex yéetel, ca a kubaba'ex, beyo' jujun túule' je'el u páajtal u jaantic u yich u pakal uvae' yéetel u yich u pakal higo yéetel ca u yuk u ja'il u chultuun.

³²Cu dzo'ocole' bíin u bise'ex ti' jun p'éel lu'um chica'an ti' a lu'ume'ex, jun p'éel u lu'umil trigoob yéetel uvaob, u ti'al u beeta'al waaj, u ti'al xan a beetique'ex vino, jun p'éel u lu'umil u aceiteil oliva yéetel u lu'umil caab. Bey túuno' je'el u páajtal a cuxtale'ex ma'alob ma' xan táan a quíimile'ex. Ba'ale' ma' a wu'uyique'ex Ezequías tumen táan u tusique'ex iquil u ya'alic Yuumtzil bíin u toque'ex.

³³¿Páatchaj wa jun p'éel le u beetbil kuob le caajo'ob u toquico'ob u lu'umo'ob ti' u páajtalil u ajawil Asiriae'?

³⁴¿Tu'ux yaan u kuob Hamat yéetel Arfad? ¿Tu'ux yaan u kuob Sefarvaim, Hena yéetel Iva? ¿Páatchaj wa u toquico'ob ti' u páajtalil Asiria u caajil Samaria?

³⁵¿Máacalmáac ti' u kuilo'ob le lu'umo' páatchaj u toquic u múuch' caajo'ob ti' u páajtalil u ajawil Asiria? ¿Ba'ax téen ca tucultique'ex je'el u páajtal u to'ocol u caajil Jerusalén tumen Yuumtzile'?

³⁶Le máaco'obo' ma' tu núucajo'ob mix ba'ali', tumen ajawe' tu ya'alaj ma' u núuquico'ob u t'aan.

³⁷Eliaquim, u aj ilaj meyaj le jalach najo', Sebna, le máax dzíibtic tuláacal ba'ax cu yúuchul, yéetel Joa u aj dzíib ajawe', ichil u okom óolalo'obe' tu ja'aja'atajo'ob u nooko'ob ca j bino'ob u yilo'ob Ezequías u ti'al u tzicbaltico'ob ti' le ba'ax tu ya'alaj le nojoch náacom Asirioo'.