Read Yucateco 2 Reyes 19 Bible Online

2 Reyes 19 - Yucateco bible

2 Reyes 19

¹Le ca tu yu'ubaj ajaw Ezequías lela', tu jataj u nook ca tu búuquintaj to'oto'och nooko'ob u chíiculal yajil ca j bin tu kulnaj Yuumtzil.

²Ca tu túuxtaj Eliaquim u j ilaj meyajajilo'ob jalach naj, Sebnaj le máax dzíibtic ba'axo'ob cu yúuchul Yéetel le aj kiino'ob asab nuxibo'ob u búuco'obe' to'oto'och u chíiculal yajil, u ti'al ca u yilo'ob aj bóobat Isaías u paal Amoz,

³u ti'al ca u ya'alo'ob ti' tu kaaba' le ajawo': Bejela'e' juupulo'on ti' jun p'éel nojoch luubul óolalil, jaadzil yéetel caabal óolalil, je'el bix jun túul co'olel ta'itac u síijsaj, cu lúubul u muuke'.

⁴Quexi' wa tu yu'ubaj Yuumtzil a Kue' u t'aan le náacom túuxta'ab tumen u dzuulil, u ajawil Asiria, u ti'al u poch'ic cuxa'an Kuo', quexi' ca ja'adzac tu yo'olal le ba'ax tu yu'ubaj Yuumtzil, Kuo'. Beet jun p'éel Payalchi' tu yo'olal le cuxa'ano'obo'.

⁵U j meyajo'ob ajaw Ezequiase' j bino'ob u yilo'ob Isaías,

⁶Isaíase' tu kubentaj ti'obe' ca u ya'alo'ob ti' u dzuulil: Yuumtzile' cu ya'alic: Ma' a ch'a'ic sajaquil tu yo'olal le pooch'ilo'ob tu beetaj teen u palitzilo'ob u ajawil Asiriao'.

⁷Ile, tene' bíin in beet u yu'ubic u juum u yáalcab t'aan, ba'ax bíin u beet u suut tu lu'um, te'elo' ti' bíin in beet u quíimsa'ali'.

⁸Le náacom asirioe', tu yojéeltaje' dzo'oc ca'ach u bin u ajawil Asiria tu caajil Laquis. Ca túun j luk Jerusalén, ca tu nuptáantaj u ajawil Asiria táan u ba'ateltic Libna.

⁹Te'elo' u ajawil Asiriae' tu yu'ubaj u ya'alale' Tirhaca u ajawil Etiopíae' dzo'oc u líiksaj óoltic caaj u ti'al ca ba'atelta'ac. Tu ca'a téen u ajawil Asiriae' tu túuxtaj aj bisaj t'aano'ob ti' Ezequías u ajawil Judá,

¹⁰u ti'al u ya'alic ti': A Ku ti' máax a kubmaj a wóole', cu ya'alic ma' bíin lúubuc Jerusalén yáanal in páajtalil, Ba'ale' ma' a cha'ic u tusiquech.

¹¹Teche' a wu'uymaj ba'ax u beetmajo'ob u ajawo'ob Asiria ti' tuláacal le lu'umo'ob tu yóoltajo'ob u xiixcunto'obo', ¿Teche' binel ca'aj wa túun a tocabáa?

¹²¿Le kuobo' tu tocajo'ob wa le u láak caajo'ob xiixcunta'abo'ob tumen in máanja'an ch'i'ibalo'ob: Gozán, Harán, Resef, yéetel u cajnáalilo'ob Bet-edén le caja'ano'ob ca'ach Telasare'?

¹³¿Tu'ux yaan u ajawo'ob Hamat, Arfad, Sefarvaim, Hena yéetel Iva?

¹⁴Ezequiase' tu ch'a'aj le dzíibil ju'un j ku'ub ti' tumen le aj bisaj t'aano'obo', ca tu xocaj. Cu dzo'ocole' j bin tu kulnaj Yuumtzil ca tu xit'aj tu táan,

¹⁵ca j payalchi'inaj beya': Yuumtzil u Ku Israel teech yaan a jala'ach káanche' tu yóokol le j querubino'ob; chéen teech u Ku tuláacal u ajawo'ob le lu'umo'; teech j beet le ca'ano' bey xan le lu'umo'.

¹⁶Yuumtzil u'uyeni', ch'e'en xiquinteni'. P'il a wich Yuumtzil, yéetel paacatnen. U'uy le t'aano'ob tu túuxtaj Senaqueribo', tuláacal chéen pooch'ilo'ob ta wo'olal cuxa'an Junab Ku.

¹⁷Tu jaajile' Yuumtzil, u ajawo'ob Asiriae' tu xiixcunto'ob le múuch' caajo'ob pa'ate' yéetel u lu'umilo'ob,

¹⁸dzo'oc xan u pulajo'ob u kuob ich káak, tumen tu jaajile' ma' kuobi', chéen ba'alo'ob beeta'ano'ob yéetel che' wa tuunich u ca'ajo'ob, póola'ano'ob tumen wíinic, le t o'olal tu pa'ala'antajo'ob.

¹⁹Bejela'a' túune', Yuumtzil c Ku, toco'on ti' u páajtalil, u ti'al ca ojéelta'ac tumen tuláacal u múuch' caajilo'ob le lu'umo', chéen teech Yuumtzilech, chéen teech Junab Kuech.

²⁰Isaías túune' tu túuxtaj a'albil ti' Ezequías: Leti' le t'aan cu ya'alic Yuumtzil, u Ku Israel: Tene' dzo'oc in wu'uyic le payalchi' ta beetaj tu yo'olal Senaquerib, u ajawil u lu'umil Asiriao'.

²¹Lela' leti' le t'aano'ob tu ya'alaj Yuumtzil tu yo'olal u ajawil Asiriaa': U caajil Sión, bey jun túul x ch'úupale', cu che'ejtiquech, j Senaquerib. Le quéen xi'iqueche', Jerusalene' cu p'a'as yúuntic u pool

²²¿Máax ti' ta wa'alaj ba'al, yéetel ta poch'aj? ¿Máax ta ka'amcach keyaj yéetel xan ta léekpactaj? ¡ma' wa máaxi', u quili'ich Ku Israel!

²³Yéetel a aj túuchi' t'aano'obe' ta poch'aj Yuumtzil. Ta wa'alaj: Yéetel in ya'abcach u bolanilo'ob ba'atele' j na'aquen tu xuul u ca'analil le pu'uco'obo', tu p'íich ca'analil Líbano. Tin ch'acaj u nucuch kuulche'ilo'ob, tin ch'acaj u qui'ichquelem pino'ob. J kuchen tu p'íich ca'analil u witzilo'ob, j kuchen tu káaxilo'ob beyo'ob u cúuchil u pa'akal nicte'obe'.

²⁴Ti' táanxel lu'umilo'obe' tin páanaj ch'e'eno'ob ca tin wukaj u ja'il, yéetelo'ob u táan in wooque' tin tiquincuntaj tuláacal u yáalcab ja'il Egipto.

²⁵¿Ba'ale' teche' ma' a wojel wa téen, Yuumtzileni', máax nu'uctic tuláacal ba'alo'obi'? dzo'oc u yúuchtal in nu'ucte, bejela'e' dzo'oc in láaj beetic; le t o'olale' teche' ca xiixcuntic caajo'ob tuulumta'ano'ob ca sutic u caajilo'ob chéen u túucul x lab najo'ob.

²⁶U j ma' óol cajnáalilo'obe', chuupo'ob yéetel sajaquil bey xan yéetel sublaquile', beyo'ob u xíiwil káaxe' beyo'ob xan ya'ax su'uque', bey xíiw cu ch'íijil yóokol najo'obe' cu tóoca'al tumen j lakin iik.

²⁷Tene' in láaj ojel tu'ux ca máan in láaj oojel xan, ba'axo'ob ca beetic; tene' in wojel jach dzíiquech ti' teen.

²⁸Tu yo'olal in kaj óoltmaj a dzíiquil in kaj óoltmaj a nonojbáile', bin in ca'aj in dzáa jun p'éel máascab tuup ta ni', jun p'éel jokni' máascab ta chi', yaan in cóolic a ni' u ti'al ca suunaquech tu'ux lukbalech. ti' le bej tu'ux taalecho'.

²⁹Isaías túune' tu ya'alaj ti' Ezequías: Lela' jun p'éel u chíiculal ba'ax cu bin j úuchul: ti' le ja'aba' yéetel le cu taalo' yaan a jaantique'ex chéen jóokolbil trigo, ba'ale' tu yoox p'éel ja'abe' je'el u páajtal a paakale'ex yéetel a joche'ex, a pakique'ex uvaob yéetel a jaantique'ex u yicho'ob.

³⁰Le máaxo'ob ma' j quíimo'obo' j p'áato'ob Judae' bíin béeyaco'ob cuxa'an che'obe' bíin u xab u mootzo'ob, yaan xan u yichanquilo'ob.

³¹Tumen dze'edzeque' yaan u p'áatal Jerusalén; tu pu'uquil Sióne' bíin p'áatac le máaco'ob bíin u jecho'ob le quíimilo'. Lela' bíin úuchuc tu yo'olal u sen yaacunaj u Yuumtzilil tuláacal páajtalil.

³²Tu yo'olal u ajawil Siriae' Yuumtzile' cu ya'alic: Ma' bíin ococ Jerusaleni', mix bíin u júul pult ti'e' mix jun p'éel julub, ma' bíin u ba'atelt yéetel chimalo'obi' mix bíin u beet jun p'éel níix lu'um tu bakpachi'.

³³Láili' ti' le bej tu'ux taalo' ti' bíin suunaqui'; ma' bíin ococ te j caajo'. Teen, Yuumtzil, quin kax t'antic.

³⁴Teen bíin in canant le caaja' teen xan bíin in toque', tu yo'olal máax David in palitzil yéetel tin wo'olal.

³⁵Láili' ti' le áakabo' u ángel Yuumtzile' j bine' ca tu quíimsaj ciento ochenta yéetel cinco mil máaco'ob tu'ux cu je'elelo'ob le j asiriobo', tu láak kiine' sáaschaj láaj quimeno'ob.

³⁶Senaquerib túune', u ajawil Asiriae', tu líikesaj u chuybil najo'obe' caaj suunaj Nínive.

³⁷Jun p'éel kiine' táan ca'ach u kultaj, tu kulnaj Nisroc, u kue', Adramelec yéetel Sarezer u paalale' j taalo'obe' ca tu cúulpach quíimsajo'ob, ca j púudzo'ob tu lu'umil Arat. Cu dzo'ocole' ajawnaj tu káanche', Esarhadón u paal.