Read Yucateco 2 Reyes 2 Bible Online

2 Reyes 2 - Yucateco bible

2 Reyes 2

¹Le ca j kuch u kiinil u bisa'al Elías j ca'an tumen Yuumtzil ti' jun p'éel mosone', Elías yéetel Eliseoe' joko'ob tu caajil Gilgal.

²Elíase' tu ya'alaj ti' Eliseo: P'áaten waye' tumen Yuumtzile', dzo'oc u túuxtiquen Betel. ba'ale' Eliseoe' tu núucaj: Quin jalach t'antic tu kaaba' Yuumtzil yéetel ta kaaba'e' ma' bíin in p'atech ta juunali'. Bey túuno' tu láakintaj tac Betel.

³Ba'ale' le aj bóobato'ob caja'ano'ob ca'ach Betelo' jóoko'ob u nactáanto'ob Eliseo ca tu ya'alajo'ob ti': ¿A wojel wa Yuumtzile' bíin u lukes ti' teech a j ca'anbesaj bejela'e'? Eliseoe' tu núucaj: Bey, dzo'oc in wojéeltic, ba'ale' te'exe ma' a wa'alique'ex mix ba'al.

⁴Cu dzo'ocole' Elíase' tu ya'alaj ti' Eliseo: P'áaten waye', tumen Yuumtzile' dzo'oc u túuxtiquen Jericó. Ba'ale' Eliseoe' tu núucaj: Quin jalach t'antic tu kaaba' Yuumtzil yéetel ta kaaba'e', ma' bíin in p'atech ta juunali'. Bey túuno' tu láakintaj tac Jericó.

⁵Ba'ale' le aj bóobato'ob caja'ano'ob Jericoe', jóoko'ob u nactáanto'ob Eliseoe' ca tu ya'alajo'ob ti': ¿A wojel wa Yuumtzile' bíin u lukes a j ca'anbesaj bejela'e'? Eliseoe' tu núucaj: Bey, dzo'oc in wojéeltic, Ba'ale' te'exe ma' a wa'alique'ex mix ba'al.

⁶Cu dzo'ocole' Elíase' tu ya'alaj ti': P'aaten waye', tumen Yuumtzile' dzo'oc u túuxtiquen Jordán. Ba'ale' Eliseoe' tu núucaj: Quin jalach t'antic tu kaaba' Yuumtzil, yéetel ta kaaba'e' ma' bíin in p'atech ta juunali'. Ca túun j bino'ob tu ca'a túulalo'ob.

⁷Ba'ale' cincuenta aj bóobato'obe' j kucho'obe' ca j wa'alajo'ob ma' sen náachi', actáan ti'ob; Elías yéetel Eliseoe', j wa'alajo'ob tu jáal u yáalcab ja'il Jordán.

⁸Elías túune' tu ch'a'aj u x suyem tu codzaje' ca tu p'uchaj le ja'o'; le ja' túuno' búuj ca'a tzéelil, tu ca'a túulalo'ob túune' tu ch'actajo'ob le áalcab ja'o' bey ti' tiquin lu'ume'.

⁹Chéen p'elac tu ch'actilaco'obe' Elíase' tu ya'alaj ti' Eliseo: A'al ti' teen ba'ax a káat ca in beet ta wo'olal ma'ili' lukesa'aquen ta tzéele'. Eliseoe' tu núucaj: In káat in kam u ca'a jaatz a pixan.

¹⁰Elíase' tu ya'alaj: Taalam ba'ax ca káatic. Ba'ale' wa ca páatac a wiliquen le quéen lukesa'aquen ta tzéele', je'el u dza'abal ti' teche'. Wa ma' páatchaj a wiliquene', ma' bíin dza'abac ti' techi'.

¹¹Ca'aliquil táan u bin u xíimbalo'ob yéetel táan u tzicbalo'obe', ca j téec chíicpaj jun p'éel bolan káak yéetel xan u tzíimin káako'ob, ca ja'atzo'ob. Elíase' j bin ca'an ti' jun p'éel moson.

¹²Le ca tu yilaj Eliseoe' awatnaji: ¡In taata in taata, teche' u ti'al Israele' beyech jun túul mu'uka'an aj ba'atelo'obe'! Cu dzo'ocol lela' ma' suunaj u yil Elíasi'.

¹³Cu dzo'ocole' tu líiksaj u suyem Elías j lúub ti' táan ca'ach u bisa'alo', ca j suunaj Jordán ca j wa'alaj tu jáal.

¹⁴Tu séeblaquile' tu p'uchaj le áalcab ja' yéetel le suyemo', ca tu ya'alaj: ¿Tu'ux yaan Yuumtzil u Junab Ku Elías? Chéen p'elac tu p'uchilac le ja'o' ca tu jatzajubáa, Eliseoe' tu ca'a ch'actaj le áalcab ja'o'.

¹⁵U aj bóobatilo'ob Jericoe', wa'alacbalo'ob ca'ach actáan, le ca tu yilajo'obe' tu ya'alajo'ob: ¡U pixan Elíase' j p'áat ti' Eliseo! J bino'ob túun u nactáanto'ob, ca j chinlajo'ob tu táan

¹⁶ca tu ya'alajo'ob ti': Ile, ichil to'on a j meeyjulo'one', yaan cincuenta j xiixib máaco'ob. Cha'a u bino'ob u caxanto'ob a aj ca'anbesaj, ma' xan wa líikesa'ab tumen u pixan Kue' ca j púul tu yóokol wa ba'ax pu'uquil wa ti' jun péel kóom táax lu'um. Ba'ale' leti'e' tu ya'alaj: Ma', ma' a tuxtique'ex mix máac.

¹⁷Ba'ale' leti'obe' tu sen a'alajo'obe', ca túun tu cha'aj u túuxta'al le cincuenta máaco'obo', lelo'oba' tu caxtajo'ob Elías óox p'éel kiin, ba'ale' ma' tu nuptáantajo'obi'.

¹⁸Ca túun suunajo'ob Jericó, tu'ux ca'ach j p'áat Eliseo, leti'e' tu ya'alaj ti'ob: Tene' tin wa'alaj ti' te'exe' ma' a bine'ex.

¹⁹U cajnáalilo'ob le caajo' tu ya'alajo'ob túun ti' Eliseo': Ile le caaja' ma'alob yanil, je'el bix cu páajtal a wilico', ba'ale' u ja'ile' ma' ma'alobi', u lu'umil xane' ma' tu dzáic ich.

²⁰Eliseoe' tu núucaj: Taase'ex ti' teen jun p'éel túunben lac yéetel ta'ab. P'elac bisa'abic le lac ti'o',

²¹Eliseoe' j bin te j sayabo' ca tu pulaj le ta'ab ichil le ja'o', táan u ya'alic: Bey cu ya'alic Yuumtzila': Tene' dzo'oc in lukesic u kaasil le ja'a', mix bikin bíin u ca'a quíims mix máac mix bíin u beet ma' u yantal u yich le lu'umo'.

²²Ti' le kiino' j p'áat ma'alob le ja'o', je'el bix tu ya'alajilac Eliseoe'.

²³Cu dzo'ocole' Eliseoe' j bin Betel. Táan ca'ach u bin te j bejo' ca j nactáanta'ab tumen jun múuch' u táanquelem xi'ipalilo'ob le caajo', ca jo'op' u p'a'astico'ob táan u yawatico'ob: ¡na'aquen, j kolis pool! ¡na'aquen, j kolis pool!

²⁴Eliseoe' tu suutubáa tu tojilo'ob le ca tu pactajo'obe', tu loolob t'antajo'ob tu kaaba' Yuumtzil. Tu séeblaquil jóoko'ob ca'a túul oso'ob te j káaxo' ca j xe'exe'et'abo'ob cuarenta yéetel y dos ti' leti'obi'.

²⁵Cu dzo'ocole' Eliseoe' j bin tu pu'uquil Carmelo, lukbal te'elo' suunaj tu caajil Samaria.