Read Yucateco 2 Reyes 21 Bible Online

2 Reyes 21 - Yucateco bible

2 Reyes 21

¹Yaan ca'ach doce ja'abo'ob ti' Manasés ca tu chu'unbesaj u ajawil, méektáannaj tu caajil Jerusalén cincuenta yéetel cinco ja'abo'ob. U kaaba' u maama' ca'ache' x Hepsiba.

²Ba'ale' ba'axo'ob tu beetaje' kaastaco'ob tu táan Yuumtzil, tumen tu beetaj ba'alo'ob subtziltac je'el bix le cu beetico'ob le múuch' caajo'ob tojolch'inta'abo'ob tumen Yuumtzil tu táan le j israelitaobo';

³tu ca'a utzquintaj le manba'al kulnajo'ob xiixcunta'ab tumen Ezequías u taatae'; tu líiksaj multuunil u kulta'al Baal, tu beetaj xan jun p'éel u yoochel Asera, je'el bix tu beetaj Acabe', u ajawil Israel; u láak ba'ale' tu kultaj tuláacal u eekilo'ob ca'an tu chíin pooltajo'ob xan,

⁴tu beetaj u multuunilo'ob kultaj tu kulnaj Yuumtzil, te tu'ux u dzaamaj u cajtalil u kaaba' Yuumtzile', tu caajil Jerusalén.

⁵Tu líiksaj u láak u multuunilo'ob kultaj ti' u ca'a p'éelal u sujuy lu'umil u kulnaj Yuumtzil, ca tu kubaj ti' tuláacal u eekilo'ob ca'an.

⁶Tu beetaj xan u tóoca'al u paalal, bey quíimsbil kultaje', tu dzajubáa u t'aan u pixan quimeno'ob bey xan u meyaj ti' chuchuc na'at, tu chu'unbesaj u yúuchul u t'a'anal pixano'ob yéetel u yúuchul pulya'aj. Jach talam kaas u cuxtal tu táan Yuumtzil, ca tu beetaj u sen p'u'ujul.

⁷Tu dzaj xan jun p'éel u yoochel Asera tu kulnaj Yuumtzil, quex tumen Yuumtzile', u ya'almaj ca'ach ti' David yéetel ti' Salomón u paal: Le kulnaj yaan way Jerusalena', tin yéeyaj ichil tuláacal u múuch' cajtalilo'ob u láaktzililo'ob Israele', u ti'al u cúuchilil u cajtal in kaaba' mantadz.

⁸Ma' bin suunaquen in tojolch'int le j israelitaob ti' le lu'um tin dzaj ti' u máanja'an ch'i'ibalo'obo', wa cu dzo'ocbesico'ob yéetel cu beetico'ob tuláacal le ca'anbesajo'ob j dza'ab ti'ob tumen in j palitzil Moiseso'.

⁹Ba'ale' leti'obe' ma' tu dzaj óolanto'obi'. Jela'an ba'ax tu beetajo'ob, le ba'alo'ob talam kaastaco'ob cu beetic ca'ach Manasés, ti' le tu beetaj le múuch' caajo'ob xu'ulsa'ab tumen Yuumtzil, tu táan le j israelitaobo'.

¹⁰Le t o'olale' Yuumtzile' t'aanaj tu chi' u palitzilo'ob u aj bóobato'obe', ca tu ya'alaj:

¹¹Tu yo'olal úuchic u beetic Manasés ya'abcach ba'alo'ob subtziltaque', yéetel tumen nojoch u kasa'anil asab ti' le j amorreobo', máaxo'ob cuxlajo'ob táanil ti' leti'e', bey tu beetilac u kebanchajal Judá yéetel le beetbil kuobo',

¹²téen Yuumtzil, u Ku Israel, quin wa'alic: Bin in ca'aj in taas nojoch nuum yaj tu yóokol Jerusalén yéetel tu yóokol Judá, yaan xan ki'inam u xiquin máax bíin u'uyic.

¹³Yaan in p'isic Jerusalén láili' yéetel u x p'isibil tin p'iisilac Samariae' bey xan u ch'i'ibal Acab; bin in ca'aj in p'at ma'alob p'o'anil je'el bix jun p'éel lac cu nocquinta'al cu dzo'ocol u p'o'obole'.

¹⁴Wa tu yo'olal u yalab in caaje', yaan in xúump'ajtic yaan xan in kubic tu kabo'ob u aj p'eeco'ob, u ti'al ca láaj ocolta'aco'ob ca lukesa'ac tuláacal ba'al yaan ti'ob.

¹⁵Tumen u cuxtalo'obe' kaastaco'ob tin wich, táan u beetico'ob in chi'ichnactal líikbal ti' u kiinil jóoko'ob u máanja'an ch'i'ibalo'ob tu lu'umil Egipto tac bejela'e'.

¹⁶Manasese' ma' chéen tu beetaj le kebano'obo', ba'ale' tu beetaj u kebanchajal Judá yéetel u kaakas cuxtal tu táan Yuumtzil, sen ya'ab u ki'ikel le máaxo'ob mina'an u si'ipilo'ob tu wecaj tu caajil Jerusalén tac tu naklilo'ob.

¹⁷U yalab u tzicbalil u cuxtal Manasés yéetel tuláacal ba'ax tu beetaje', bey xan u kebano'obe', ti' dzíibta'an tu dzíibil ju'unil u ajawilo'ob Judae'.

¹⁸Le caaj quíime' j mu'uc tu cúuchil u pakal nicte'il jalach naj, tu cúuchil u pakic nicte' Uza. Cu dzo'ocole' ajawnaj tu káanche', Amón u paal.

¹⁹Veintidos ja'abo'ob yaan ti' Amón ca tu chu'unsaj u ajawil, tu méektáantaj u caajil Jerusalén ca'a p'éel ja'abo'ob. U maamae' cu kaaba'intic ca'ach Mesulemet, u x ch'upul paal ca'ach Hazur, ti' u taalbal ti' u caajil Jotba.

²⁰Ba'ale' le ba'axo'ob tu beetaje' kaastaco'ob tu yich Yuumtzil, je'el bixo'ob le tu beetaj Manasés u taatae',

²¹tumen tu quetaj u kaakas kuuxtal, láili' tu meyajtaj, tu kultaj xan le beetbil kuob tu kultaj u taatae'.

²²Bey tu xúump'atajil Yuumtzil, u Ku u máanja'an ch'i'ibalo'ob, ma' tu beetaj ba'ax tu ya'alaj Yuumtzili'.

²³U náacomo'ob Amone' x mucul t'aanajo'ob u ti'al u beetico'ob loob ti', ca tu quíimsajo'ob tu jalach naj.

²⁴Ba'ale' u cajnáalilo'ob le caajo' tu quiimsajo'ob le máaxo'ob j beet loob ti' le ajaw Amono', ca tu dzajo'ob tu káanche'e', Josías u paal.

²⁵U yalab u tzicbalil u cuxtal Amón yéetel ba'ax tu beetaje' ti' dzíibta'an tu dzíibil ju'unil u ajawilo'ob Judae'.

²⁶J mu'uc tu cúuchil u pakic ca'ach nicte' Uza. Cu dzo'ocole' ajawnaj tu káanche'e', Josías u paal.