Read Yucateco 2 Reyes 22 Bible Online

2 Reyes 22 - Yucateco bible

2 Reyes 22

¹Yaan ca'ach ocho ja'abo'ob ti' Josías ca tu chu'unsaj u ajawil, tu méektáantaj u caajil Jerusalén treinta yéetel jun ja'abo'ob. U maamae' tu kaaba'intaj x Jedida, u x ch'upul paal Adaía, u caajal ca'ache' Boscat.

²Le ba'axo'ob tu beetaj Josíase' tojtaco'ob tu táan Yuumtzil, tumen u cuxtale' láili' je'el bix cuxlajic David u máanaja'an ch'i'ibale', ma' j kéech ti' mix ba'ali'.

³Tu ja'abil dieciocho ti' u ajawil Josíase', le ajawo' tu túuxtaj tu kulnaj Yuumtzil u aj dzíib Safán, u paal Azalía, u yáabil Mesulam. Ca tu ya'alaj ti':

⁴Xeen a wil Hilcías, le nojoch aj kiino', ca wa'al ti' ca u much'quint le taakin bisa'ab ca'ach tu kulnaj Yuumtzil, le j mo'ol tumen le j canan jool najo'ob ichil le máaco'obo',

⁵ca u kubo'ob ti' le máaxo'ob ilic le meyaj cu beeta'al tu kulnaj Yuumtzil, u ti'al ca u bo'oto'ob le máaxo'ob cu yutzquintico'ob le kulnajo'.

⁶U káat ya'ale' le j póol che'obo', le máaxo'ob nu'uctic le meyajo'obo', le j pakbalo'obo', u ti'al xan u manico'ob che' yéetel póolbil tuunicho'ob u ti'al u yutzquinta'al le kulnajo'.

⁷A'al xan ti'e' ma' u káatic ti'ob bix cu bin u xupo'ob le taakin cu ku'ubul ti'obo', tumen ma' tu táabal u ch'a'ob.

⁸Hilcías, le nojoch aj kiino' tu tzicbaltaj ti' Safán le aj dzíibo', dzo'oc u nactáantic tu kulnaj Yuumtzil u dzíibil ju'unil u ya'almaj t'aan; ca tu kubaj ti', Safane' tu xocaj.

⁹Cu dzo'ocole' Safane' j bin u dzáa u yojéelt ajaw, ca tu ya'alaj ti': U palitzilo'ob a tzicbe'enile' dzo'oc u yibico'ob le plata yaan ca'ach te j kulnajo', dzo'oc xan u kubico'ob ti' le máaxo'ob yutzquintic u kulnaj Yuumtzil.

¹⁰Safane' tu dzaj u yojéelt ti' le ajawo': Hilcías nojoch aj kiine', tu kubaj ti' teen jun p'éel dzíibil ju'un, ca tu xocaj Safán ti' le ajawo'.

¹¹Le ca tu yu'ubaj le ajaw ba'ax cu ya'alic u dzíibil ju'unil le a'almaj t'aano', tu jataj u nook,

¹²tu séeblaquile' tu ya'alaj ti' Hilcías, ti' Ahicam, u paal Safán, ti' Acbor, u paal Micaías, ti' Safán, aj dzíibe', yéetel ti' Asaías, u náacom ajawe':

¹³Xeene'ex a káat chi'inene'ex ti' Yuumtzil tin wo'olal yéetel tu yo'olal tuláacal u caajil Judá, ca u ya'al ti' to'on ba'ax cu ya'alic le dzíibil ju'unil dzo'oc u nuptáanta'alo'; tumen nojoch u p'uja'anil Yuumtzil t éetel, bey tumen le c máanja'an ch'i'ibalo'obo', ma' tu táan óolto'ob ba'ax cu ya'alic le dzíibil ju'una' mix tu beetajo'ob tuláacal ba'ax dzíibta'ani'.

¹⁴Hilcías, Ahicam, Acbor, Safán Yéetel Asíase' j bino'ob u yilo'ob x bóobat Hulda u yatan Salum, u paal Ticva, u yáabil Harhas, máax canantic u cúuchil tu'ux cu líiksa'al u nookil kulnaj. Huldae' cajacbal ca'ach tu Paach u caajil Jerusalén; le ca'aj t'aane',

¹⁵leti'e' tu núucaj: Je'el le ba'ax cu núuquic Yuumtzil u Ku Israel: A'ale'ex ti' le máax túuxte'ex j t'aan tin wéetele',

¹⁶teen Yuumtzil quin wa'alic: bin in ca'aj in beet u taal jun p'éel nojoch loob tu yóokol le cúuchila' yéetel tu yóokol u cajnáalilo'ob, je'el bix a'ala'anil ti' le dzíibil ju'un xo'oc tumen u ajawil Judá.

¹⁷Tumen tu xump'ajtajeno'ob ca tu tóocajo'ob poom ti' u láak kuob, táan u beetico'ob in chi'ichnactal yéetel tuláacal ba'ax cu beetico'obo'; let o'olale' dzo'oc u léequel in p'u'ujul tu yóokol le cúuchila', ma' bíin jáawaqui'.

¹⁸A'ale'ex ti' u ajawil Judae', le máax túuxte'ex u ti'al ca káat chi'inaqu'ex ti' Yuumtzilo', Yuumtzil, u Ku Israele', cu ya'alic xan: tumen ta ch'en xiquintaj le ba'ax ta wu'uyajo',

¹⁹tu yo'olal péecnaj a wóol yéetel tumen dzo'oc xan a cabalcuntic a wóol, iquil ta wu'uyjilac in t'aan tu yo'olal le cúuchila' yéetel tu yo'olal u cajnáalilo'ob, máaxo'ob yaan u xu'ulsa'alo'ob yéetel u loolob t'anta'alo'obe', tumen ta jataj a nook yéetel okolnajech tin táane', teen xane' dzo'oc in wu'uyiquech. Teen, Yuumtzil quin wa'alic ti' teech.

²⁰Le t o'olale' yaan in cha'ic a quíimil yéetel jéedzel yaan xan in much'quintiquech yéetel a máanja'an ch'i'ibalo'ob, u ti'al ma' a wilic le xu'ulsaj bíin in taas tu yóokol le cúuchila'. U aj bisaj t'aano'ob ajawe' suunajo'ob u ti'al u ya'alo'ob núuca'ab ti'ob.