Read Yucateco 2 Reyes 23 Bible Online

2 Reyes 23 - Yucateco bible

2 Reyes 23

¹Ajaw túune' tu túuxtaj t'anbil tuláacal u nuuquilo'ob Judá yéetel u nuuquilo'ob Jerusalén, u ti'al ca u much'uba'ob tu yéetel.

²Cu dzo'ocole' le ajaw yéetel tuláacal u cajnáalilo'ob Judá, u cajnáalilo'ob Jerusalén, u aj kiino'ob, u aj bóobato'ob yéetel tuláacal u múuch' caajilo'ob le lu'umo', u chichnil tac u asab nojochile', j bino'ob tu kulnaj Yuumtzil. Te'elo' ajawe' tu ka'am xocaj ti'obe' tuláacal ba'ax cu ya'alic u dzíibil ju'unil nup t'aan nactáanta'ab ichil u kulnaj le Yuumtzilo'.

³Cu dzo'ocole' ajawe' j wa'alaj tu tzéel le ocomtuuno', ca tu dzaj u t'aanil tu táan Yuumtzil u dzo'ocbesic u beetic xan yéetel jaaj óolal u nu'ucbe'en t'aano'ob, u tzolbe'en t'aano'ob yéetel a'almaj t'aano'ob, yéetel u dzo'ocbesic le ba'ax u naj u beeta'al je'el bix dzíibta'anil tu ju'unil le nup t'aano'. Tuláacal le caajo' xano' tu éejemtaj u dzo'ocbesic.

⁴Ajaw túune' tu ya'alaj ti' Hilcías, nojoch aj kiin, yéetel ti' le aj kiin máax áantico', bey xan ti' le j canan jool najo'obo' ca u jóokeso'ob tu kulnaj Yuumtzil tuláacal le ba'alo'ob iquil u kulta'al Baal, bey xan Asera yéetel tuláacal u eekilo'ob le ca'ano', ca tu tóocaj tu paach u caajil Jerusalén, tu káaxilo'ob Cedrón, ca tu bisaj u ta'anilo'ob tu caajil Betel.

⁵Cu dzo'ocole' tu lukesaj le aj kiino'ob ti' u meyajo'ob tu'ux dza'ano'ob ca'ach tumen u ajawilo'ob Judá u ti'al u tóoco'ob poom ti' manba'al kulnajo'ob yaan ca'ach tu caajilo'ob Judá yéetel tu bakpach Jerusalén, bey xan ti' le aj kiino'ob cu tóoquico'ob poom ti' Baal, tac xan ti' le kiino', ti' le lunao' yéetel ti' le múuch' eeko'obo', yéetel ti' tuláacal u eekilo'ob ca'an.

⁶Tu jóokesaj náach ti' Jerusalén u yoochel Asera, le yaan ca'ach tu kulnaj Yuumtzil, ca tu tóocaj tu tzéel u yáalcab ja'il Cedrón tac ca j suunaj ta'anil, cu dzo'ocole' tu tosaj tu yóokol u mucnalo'ob u paalal le caajo'.

⁷Tu jutaj xan u najilo'ob tu'ux cu weeyanquilo'ob ichil u yéet xiibilo'ob bey jun p'éel kultaj ichil u kulnaj Yuumtzil, tu'ux ca'ach cu jit'ico'ob bóoch' le co'olelo'obo' u ti'al x ku Asera.

⁸Cu dzo'ocole' tu ya'alaj ca taalaco'ob tuláacal u aj kiinilo'ob Judá, ca tu kascuntaj tuláacal le Maanba'al kul naj tu'ux ca'ach tóoquico'ob poom le aj kiino'obo', líikbal Geba tac Berseba, ca tu pa'aj xan u multuunil kultaj le kaasiba'alo'obo', le yaan ca'ach tu jool yotoch Josué, u méektáan le caajo', le yano'ob tu x dzíic u jool le caajo'.

⁹Ba'ale' u aj kiinilo'ob le manba'al kulnajo'ob ma' tech u bino'ob ca'ach tu multuunil u kulta'al Yuumtzil yaan Jerusaleno', tumen cu jaantico'ob waaj x ma' paj sacan, yéetel u yéet aj kiinilo'obo'.

¹⁰Josíase' tu kascuntaj xan u cúuchil yúuchul tóoc yaan ca'ach tu táax lu'umil Ben-hinom, u ti'al ma' u tóoquic mix máac u j xibil paal wa u x ch'upul paal, bey quíimsbil ti'ibil óolal u ti'al Moloc.

¹¹Tu lukesaj le tzíimino'ob kuba'an tumen u ajawilo'ob Judá u ti'al u kultajil le kiino', ti' yano'ob ca'ach tu jool u kulnaj Yuumtzil, tu tzéel u yotoch Natan-melec, u aj canan le cúuchilo'obo'; tu tóocaj xan u bolanil u kulta'al le kiino'.

¹²tu jutaj xan le u multuunil kultaj beeta'ab ca'ach tumen u ajawilo'ob Judá tu ca'analil u yotoch Acaz, je'el bix le u multuunilo'ob kultaj tu beetaj Manasés tu táancabil u kulnaj Yuumtzil; tu pu'upucaje' ca tu pulaj u pakilo'ob tu yáalcab ja'il Cedrón.

¹³Ajawe' tu kascuntaj xan u manba'al kulnaj yaan ca'ach tu lakin jerusalén, te j cúuchil yaan tu noojol u pu'uquil Olivos, lelo'oba' j beeta'abo'ob ca'ach tumen Salomón, u ajawil Israel u ti'al Astarté, u p'ecbe'en x ku le j sidoniobo'; ti' Quemos u p'ecbe'en kuil le j moabitaob, yéetel u ti'al Milcom u p'ecbe'en ku le j amonitaobo'.

¹⁴Bey xan tu xiixcuntaj le tuunicho'obo', bey le chuunche'ob jun páaycunta'ano'ob, ca tu niccunsaj u baaquel wíinico'ob, tu'ux yano'ob ca'acho'.

¹⁵Wa tu yo'olal le manba'al multuunil kultaj yéetel le manba'al kul naj beeta'an ca'ach Betel tumen Jeroboam, u paal Nabat, le máax beet u kebanchajal le j israelitaobo'. Xiixcunta'ab tumen Josías ca tu p'ataj chéen u ma'ay lu'um, cu dzo'ocole' ca tu tóocaj; xan u yoochel x Asera.

¹⁶Le ca j suunaj Josías le ca tu yilaj le mucnalo'ob yaan ca'ach tu jo'ol lu'ume', tu túuxtaj ca jóokesa'ac le baaco'ob yaan ca'ach ichile' ca tu tóocaj yóokol le manba'al multuunil kultaj u ti'al u kascuntic. Bey úuchic u béeytal u t'aan Yuumtzil, le j a'ala'ab tumen le aj bóobate'.

¹⁷Cu dzo'ocole' tu káat chi'itaj: ¿Ba'ax multuunil le quin wilic te'elo'? U cajnáalilo'ob le caajo' tu núucajo'ob ti': Lelo' u mucnal le aj bóobat taalbal Judae', ca tu ya'alaj ba'ax bíin u beet a tzicbe'enil yéetel u multuunil kultaj Betele'.

¹⁸Josías túune' tu ya'alaj: P'ate'ex te'elo'. Ma' u ma'achal u baaquelo'ob tumen mix máac. Bey túuno' ma' j pu'ul u baaquelo'ob le aj bóobat j taal líikbal Samaria.

¹⁹Wa tu yo'olal tuláacal le manba'al kulnajo'ob j beeta'abo'ob tumen u ajawo'ob Israel, yaan ca'ach Samariae', le ca j p'u'uj Yuumtzil tu yo'olal beeta'abique', Josíase' tu lukesaj, ca tu beetaj láili' je'el bix tu beetilac ti' le yaan ca'ach Betele'.

²⁰Cu dzo'ocole' tu quíimsaj tu yóokol le multuuno'obo' tuláacal u aj kiinilo'ob le manba'al kulnajo'ob yaan ca'ach te'elo', yóokolo'obe' tu tóocaj u baaquel wíinico'ob. Cu dzo'ocole' ca j suunaj Jerusalén.

²¹Le ajawo' tu ya'alaj ti' tuláacal le caajo' ca u kiinbeso'ob Táadz Máanbal tu tzicbe'enil Yuumtzil u Ku, je'el bix dzíibta'anil ca'ach tu dzíibil ju'unil u nup t'aan.

²²Mix jun téen kiinbesa'ac jun p'éel Tadz Máanbal je'el bix lela', líikbal u kiinilo'ob máaxo'ob j áanto'ob, yéetel u méektáanto'ob Israel, mix ti' tuláacal u kiinilo'ob u ajawilo'ob Israel yéetel Judá.

²³Tu ja'abil dieciocho ti' u ajawil Josías ca j kiinbesa'ab Táadz Máanbal Jerusalén u ti'al u tzicbe'enil Yuumtzil.

²⁴Josíase' tu xu'ulsaj xan le j wáayo'obo', le j chuchuc na'ato'obo', yéetel le u kuob le j láaktzililo'ob, bey xan u láak kuobo', le p'ecbe'en ba'alo'ob cu kulta'alo'ob le cu yila'al ca'ach tu caajil Judá yéetel tu caajil Jerusalén. Tu beetaj beyo' u ti'al u dzo'ocbesic le ba'ax cu ya'alic le a'almaj t'aan dzíibta'an ti' le dzíibil ju'un tu nactáantaj aj kiin Hilcías tu kulnaj Yuumtzile'.

²⁵Ma' yanchaj mix jun túul ajaw mix bíin yanac cu dzo'ocol leti'i', ca sutkajac yóol ti' Yuumtzil je'el bix leti'e', yéetel tuláacal u pucsi'ikal yéetel jaaj óolal, yéetel tuláacal u muuk je'el bix u ya'alic u ya'almaj t'aan Moisés.

²⁶Quex beyo', Yuumtzile' ma' jáaw u p'u'ujuli', tumen láili' kuuxchaja'an ti' Judá tu yo'olal le pooch'il tu beetaj Manasés úuchic u p'u'ujsa'alo'.

²⁷Tu yo'olale' tu ya'alaj Yuumtzil bíin u tzel Judá tu táan, je'el bix úuchic u tzelic Israele', bíin u ca'aj u cúulpachcunt xan u noj caajil jerusalén le tu yéeyaj ca'acho', bey xan le kulnaj tu'ux ca'ach tu ya'alaj bíin cajlac u kaaba'e'.

²⁸U yalab u tzicbalil u cuxtal Josías yéetel tuláacal ba'ax tu beetaje', ti' dzíibta'an tu dzíibil Ju'unil u ajawilo'ob Judae'.

²⁹Tu kiinilo'obe', faraón Necao, u ajawil Egiptoe', j bin tu yáalcab ja'il Éufrates u ti'al u yáantic u ajawil Asiria. Jóok nuptáanbil tumen ajaw Josías; ba'ale' le ca j ila'ab tumen Necaoe', j quíimsa'abo'ob Meguido.

³⁰J dzaab u quimen wíinclil tu bolan tumen u náacomo'ob, ca tu bisajo'ob líikbal Meguido tac Jerusalén, tu'ux j mu'uc tu mucnal. U cajnáanilo'ob le caajo' tu ch'a'ajo'ob Joacaz, u paal Josías, ca tu jun páaycuntajo'ob u ti'al ajawil tu káanche' u taata.

³¹Yaan veintitrés ja'abo'ob ti' Joacaz ca tu chu'unsaj u ajawil, tu méektáantaj Jerusalén óox winalo'ob. U maamae' cu kaaba'intic Hamutal, u x ch'upul paal Jeremías, u caajal ca'ache' Libna.

³²Ba'ale' le ba'axo'ob tu beetaje' kaas tu yich Yuumtzil, je'el bix tu beetilaco'ob u máanja'an ch'i'ibalo'obe'.

³³Faraón Necaoe' tu kalaj Joacaz tu caajil Ribla, tu lu'umil Hamat, u ti'al ma' u méektáan tu caajil Jerusalén, ca tu beetaj u bo'ota'al tumen u cajnáalilo'ob le lu'umo', jun p'éel páatan trescientos kilos plataa yéetel óox p'éel kilos oroo.

³⁴Bey xan faraón Necao tu dzaj bey ajaw Eliaquim, u paal Josías, u ti'al u jeelintic u taata, ca tu kexaj u kaaba', ca tu dzaj u kaaba'int Joacim, Joacaze' tu ch'a'aje' ca tu bisaj Egipto tu'ux j quíimi'.

³⁵Joacime' tu kubaj ti' Necao le plata yéetel le oroo cu tzáayco', u ti'al u beetic lelo' yanchaj u tzáic ti' u cajnáalilo'ob le lu'umo' jun p'éel páatan. Jujun túule' tu bo'otaj yéetel plata yéetel oro le tu tuclaj yaan u bo'otique', u ti'al ca u ku'ub ti' faraón Necao.

³⁶Yaan ca'ach veinticinco ja'abo'ob ti' Joacim ca tu chu'unsaj u ajawil, tu méektáantaj u lu'umil Jerusalén once ja'abo'ob. U maamae' tu kaaba'intaj zebuda, u x ch'upul paal Pedaías, u caajal ca'ache' Ruma.

³⁷Ba'ale' ba'axo'ob tu beetaje' kaastaco'ob tu táan Yuumtzil, je'el bix tu beetilaco'ob u máanja'an ch'i'ibalo'ob.