Read Yucateco 2 Reyes 24 Bible Online

2 Reyes 24 - Yucateco bible

2 Reyes 24

¹Tu kiinilo'ob u ajawil Joacime', Nabucodonosor, u ajawil Babiloniae', j ooque' ca tu ch'a'aj le lu'umo', Joacime' j palitzilta'ab tumen, óox p'éel ja'abo'ob. Cu dzo'ocole' kexpaj u tuucule' ca tu yóoltaj u ba'atelte.

²Ba'ale' Yuumtzile' tu túuxtaj jun múuch' j oocolo'ob caldeob, siriob, moabitaob, yéetel amonitaob u ti'al u beeto'ob loob ti'. Tu túuxta'abo'ob tu lu'umil Judá u ti'al u xu'ulsic, je'el bix tu ya'alajilac Yuumtzil tu chi' u palitzilo'ob le aj bóobato'obo'.

³Lela' j úuch ti' Judá tumen Yuumtzile' bey tu yóoltilaco' u ti'al u lukesic tu táan tu yo'olal tuláacal le kebano'ob tu beetaj Manaseso',

⁴yéetel xan tu yo'olal tu chupilac u noj caajil Jerusalén yéetel le ki'ik we'ec x ma' si'ipilo', le beetic Yuumtzile' ma' tu yóoltaj u sa'ats u si'ipilo'obi'.

⁵U yalab u tzicbalil u cuxtal Joacim yéetel tuláacal ba'ax tu beetaje' ti' dzíibta'an tu dzíibil ju'unil u ajawilo'ob Judae'.

⁶Le ca j quíime', ajawnaj tu káanche'e', Joaquín u paal.

⁷Líikbal ti' le kiino', u ajawil u lu'umil Egiptoe', ma' jóok ti' u lu'umili', tumen u ajawil Babiloniae' tu ch'a'aj tuláacal ba'ax yaan ti', líikbal u t'o'ol ja'il Egipto tac u yáalcab ja'il Éufrates.

⁸Yaan dieciocho ja'abo'ob ti' Joaquín ca tu chu'unsaj u ajawil, tu méektáantaj Jerusalén óox winalo'ob, u maamae' tu kaaba'intaj Nehusta, u x ch'upul paal Elnatan, u caajal ca'ache' Jerusalén.

⁹Ba'ale' le ba'axo'ob tu beetajo' kaastaco'ob tu táan Yuumtzil, je'el bixo'ob le tu beetajo'ob u taatae'.

¹⁰Ti' le kiino'obo', u aj ba'atelo'ob Nabucodonosor, u ajawil Babiloniae', bino'ob u ba'atelto'ob u caajil Jerusalén ca tu bakpachtajo'ob.

¹¹Táan u ba'ateltico'ob le caajo' ca j cuch Nabucodonosor.

¹²Joaquín u ajawil Judá túune', pa'ate' yéetel u maama, u aj dzíibo'ob, u náacomo'ob yéetel le máaco'ob utz u bisicubáe' tu kubajuba'ob ti' u ajawil Babilonia, ca j bisa'abo'ob kalbil tumen. Lela' j úuch tu ja'abil ocho ti' u ajawil Nabucodonosor.

¹³Cu dzo'ocole' Nabucodonosore' tu jóoksaj tuláacal u ayikalil u kulnaj Yuumtzil bey xan le yaan ti' le jalach najo', je'el bix tu ya'alajilac ca'ach Yuumtzile', tu pa'aj tuláacal le ba'alo'ob oro u ca'aj beeta'ab ca'ach tumen Salomón u ti'al u kulnaj Yuumtzil.

¹⁴Cu dzo'ocole' tu bisaj kala'ano'ob tuláacal u cajnáalilo'ob Jerusalén, u aj dzíibo'ob, yéetel u mu'uka'an aj ba'atelo'ob, bey xan tuláacal le máaxo'ob cu beetico'ob jadzutz ba'alo'ob, u j meen máascabo'ob, ca j kuchpaj diez mil máaco'ob kala'ano'ob. Chéen j p'áat le máaxo'ob sen óotzilo'obo'.

¹⁵Nabucodonosore' tu bisaj kala'an Joaquín yéetel u maama, u yatano'ob, u aj dzíibo'ob, yéetel le jach kabéet te j lu'umo'. Tu ch'a'ajo'ob Jerusalén ca tu bisaj u kala'ano'ob Babilonia.

¹⁶Tu pa'ate'il le máaco'ob nucuch ba'alo'ob j bisa'abo'ob kalbil tumen u ajaw Babiloniae', siete mil; yéetel mil máaxo'ob cu beetico'ob jadzutz ba'alo'ob bey xan j meen máascabo'ob, bey xan tuláacal mu'uka'an máaco'ob ma'alobo'ob u ti'al j ba'atel.

¹⁷Cu dzo'ocole' u ajawil u lu'umil Babiloniae' tu dzaj Matanías, u ti'al u jeelintic Joaquín u paal u sucu'un, ca tu kexaj u kaaba' ca tu dzaj u kaaba'int Sedequías.

¹⁸Yaan veintiun ja'abo'ob ti' Sedequías ca tu chu'unsaj u ajawil, j méektannaj once ja'abo'ob u caajil Jerusalén. U maamae' tu kaaba'intaj x Hamutal, u x ch'upul paal Jeremías, u caajal ca'ache' Libna.

¹⁹Ba'ale' ba'axo'ob tu beetaje' kaastaco'ob tu táan Yuumtzil, je'el bix tu beetilac Joacime.

²⁰Le t o'olale' Yuumtzile' j p'u'uj tu yéetel Jerusalén bey xan tu yéetel Judá, ca tu tojolch'intajo'ob tu táan. Cu dzo'ocole' Sedequíase' tu yóoltaj u pa'a u muuk u ajawil u lu'umil Babilonia.