Read Yucateco 2 Reyes 25 Bible Online

2 Reyes 25 - Yucateco bible

2 Reyes 25

¹Ti' u kiinil diez ti' u winalil diez u ja'abil nueve u ajawil Sedequíase', ajaw Nabucodonosore' j bin yéetel tuláacal u aj ba'atelo'ob tu caajil Jerusalén ca je'el actáan ti' ca tu bakpachtaj, ca tu beetaj tu bakpache' níix lu'um u ti'al u ba'ateltic.

²Le caajo' bakpachta'ab tac tu ja'abil once ti' u ajawil Sedequías.

³Tu kiinil nueve ti' u can p'éel winal ti' le ja'abo' yanchaj wi'ij ichil le caajo'; u cajnáalilo'obe' j p'áat mina'an ba'al u jaanto'ob.

⁴Ca túun tu beetajo'ob jun p'éel nojoch jool ti' u tuulumil le caajo', beyo' quex bakpachta'ano'ob tumen le j caldeobo', le ajaw yéetel tuláacal u aj ba'atelo'obe' te j caajo', ca j púudzo'ob tu yáakabil ti' le jool naj yaan tu chúumuc le ca'a p'éel tuulumil, tu bejil u nicte'ilo'ob jalach naj ca tu ch'a'ajo'ob u bejil u táax lu'umil Jordán.

⁵Ba'ale' u aj ba'atelo'ob le j caldeobo', tu tzaypachtajo'ob ajaw Sedequías, ca tu chucpachtajo'ob tu táax lu'umil Jerico'. Tuláacal u aj ba'atelo'obe', j ki'itpajo'obe' ca tu Xump'ajta'abi'.

⁶Le j caldeobo' tu machajo'ob le ajawo' ca tu bisajo'ob tu táan u ajawil Babilonia, ti' yaan ca'ach tu caajil Ribla, tu lu'umil Hamat. Te'elo' Nabucodonosore' tu ya'alaj bix cu j bin beetbil u mukyaj Sedequías,

⁷tu táane' tu beetaj u xo'otol u caal u paalal. Ti' Sedequíase' tu beetaj u jóokesa'al u yicho'ob, ca j ka'ax yéetel cadenaob u ti'al ca bisa'ac Babilonia.

⁸Tu kiinil siete ti' u winalil cinco ti' u ja'abil diecinueve ti' u ajawil Nabucodonosor ajaw u lu'umil Babiloniae', Nabuzaradán u náacom ajaw yéetel máax nu'uctic le máaxo'ob canantic le ajawo', j kuch Jerusalén

⁹ca tu tóocaj le kulnaj, le jalach naj yéetel tuláacal u najilo'ob le caajo', tu táaniltaj u yotocho'ob tuláacal u nuuquilo'ob le caajo',

¹⁰u aj ba'atelo'ob le j caldeob láakintique' tu jutajo'ob le tuulumil bakpachtic Jerusaleno'.

¹¹Cu dzo'ocole' Nabuzaradane' tu bisaj kala'ano'ob tu caajil Babilonia le máaxo'ob p'aatalo'ob te j caajo' bey xan le yano'ob tu tzéel u ajawil Babiloniao', bey xan u yalab le máaxo'ob beetic jadzutz ba'alo'obo'.

¹²Chéen tu p'ataj wa jay túul ichil le máaco'ob nakan óotzilo'obo', u ti'al u meyajto'ob le lu'umo' yéetel u cúuchil u pakalilo'ob uva.

¹³Le j caldeobo' tu xiixcuntajo'ob le ba'alo'ob bronce u ca'ajo'obo', yaan ca'ach ichil le kulnajo': le ocomo'obo', u chuuno'ob yéetel le nojoch chulub u ti'al ja', ca tu bisajo'ob tuláacal le bronce tac tu caajil Babilonia.

¹⁴Bey xan tu bisajo'ob le ba'alo'ob tu'ux cu dza'abal ta'an, le x jo'opobo', le x nat'ab máascabo'obe', le nucuch jo'opobo'obo' yéetel tuláacal le nu'uculo'ob bronce u ca'ajo'obo', u ti'al le kultajo'.

¹⁵Bey xan le aj canano', tu bisaj tuláacal le nu'uculo'ob oroo yéetel plata: le u nu'ucul u dza'abal t'aba'an chúuc, yéetel le nucuch laco'obo'.

¹⁶Wa tu yo'olal le ca'a p'éel ocomo'obo', le nojoch chulub u ti'al ja' yéetel u chuuno'obe', le tu túuxtaj beetbil ajaw Salomón u ti'al le kulnajo', u aalile' ma' tu páajtal u na'atal.

¹⁷Jujun p'éel ocome' yaan ca'ach ti'e' ocho metros u ca'analil, tu xuul u ca'analile' yaan ca'ach jun p'éel p'iich bronce u ca'aj, maanal dos metros u ca'analil, tu bakpache' yaan ca'ach jun p'éel u kalakal tuláacal bronce u ca'aj, jadzutzquinta'ano'ob yéetel granadaob. Lajquet yéetel le ca'a p'éel ocomo'obo'.

¹⁸U j noojoch le j canano'obo' tu kalaj xan Seraías, nojoch kiin, bey xan Sofonías aj kiin, leti'e' nojoch aj xan cu dzo'ocol Serasías, j bisa'abo'ob xan le óox túul máaxo'ob canantic le kulnajo'.

¹⁹Ti' u cajnáalilo'ob le caajo' tu machaj le náacom u j noojoch aj ba'atelo'ob, yéetel cinco máaco'ob cu meyajtico'ob ajawo', lelo'oba' ti' yano'ob ca'ach te j caajo', bey xan le máax dza'an u ti'al u caxantic túunben aj ba'atelo'ob yéetel sesenta u asab nuuctaquilo'ob le caajo'.

²⁰Nabuzaradane' tu bisaj tuláacal le máaco'oba' tu táan u ajawil Babilonia, máax ti' yaan ca'ach tu caajil Ribla, tu lu'umil Hamat. Te'elo' u ajaw Babiloniae' tu túuxtaj quíimsbilo'ob. Bey úuchic u jóokesa'al tu lu'umo'ob u caajnáalilo'ob Judao'.

²²Nabucodonosor u ajawil Babiloniae' tu dzaj Gedalías, u paal Ahicam u yáabil Safán, u ti'al u méektáant le máaco'ob tu p'ataj tu lu'umil Judao'.

²³Le ca tu yojéeltajo'ob u náacomilo'ob u aj ba'atelo'ob Judae' j bino'ob Mizpa u ti'al j t'aan yéetel Gedalías. Lelo'oba': Ismael, u paal Netanías; Johanán, u paal Carea; Seraías, u paal Tanhumet, netofita; yéetel Jaazanías, u paal jun túul máac caja'an ca'ach Maaca. J bino'ob u láakintano'ob tumen u aj ba'atelo'ob.

²⁴Gedalíase' tu beetaj jun p'éel séeb chi' ti'ob yéetel ti' u máaxo'ob cu méektáantic, ca tu ya'alaj ma' u ch'a'ico'ob sajaquil ti' u nuuquilo'ob le j caldeob, j p'ato'ob cajtal te j lu'umo' yéetele' ca u meyajto'ob u ajawil Babilonia, beyo' je'el u bin ma'alobil ti'obe'.

²⁵Ba'ale' ti' u siete winalile', Ismael, u paal Netanías yéetel u yáabil Elisama, máax ti' u taalbal ti' u ch'i'ibal u ajawilo'ob Judae', j kuch láakinta'an tumen diez máaco'ob, ichil tuláacalo'obe' tu quíimsajo'ob Gedalías pa'ate' yéetel le judióbo' bey xan le j caldeob yano'ob ca'ach Mizpa tu yéetele'.

²⁶Tuláacal túun u cajnáalilo'obe' tu yo'olal u sajaquilo'ob ti' le caldeobo' j líiko'obe' ca j bino'ob Egipto, pa'ate' yéetel u nojchilo'ob, yéetel u asab chichnilo'ob, bey xan u náacomilo'ob aj ba'atelo'ob.

²⁷Ti' le kiin veintisiete ti' u winalil doce ti' u ja'abil treinta yéetel siete, bisa'ac táanxel lu'umil Joaquín u ajawil Judá, tu chu'unsaj u ajawil Babiloniae', ajaw Evil-merodac, leti'e' tu ye'esaj u yutzil ti' Joaquín ca tu jáalkabtaj,

²⁸tu beetaj utz ti' ca tu táaniltaj tu yóokol le u láak ajawo'ob yano'ob ca'ach tu yéetel tu lu'umil Babilonia.

²⁹Bey túuno' Joaquine' páatji' u lukesic le nook u búuquintmaj ca'ach te j kalabo', u ti'al ca janac yéetel ajaw ti' u yalab u kiinilo'ob u cuxtal.

³⁰Joaquine', j dzaab xan taakin ti' tumen u ajawil Babilonia, u ti'al u yáanticubáa sáamsamal.