Read Yucateco 2 Reyes 3 Bible Online

2 Reyes 3 - Yucateco bible

2 Reyes 3

¹Tu ja'abil dieciocho ti' u ajawil Josafat tu lu'umil Judae', Joram u paal Acabe', jo'op' u méektáantic Israel, ajawnaj Samaria doce ja'abo'ob.

²Tuláacal ba'axo'ob tu beetaje' kaastac tu táan u yich Yuumtzil, ba'ale' ma' jach talam kaastaco'ob je'el bix le tu beetaj u taata yéetel u maamae', leti'e' tu lukesaj u kultbil tuunich Baal beeta'ab ca'ach tumen u taatae'.

³Ba'ale' láili' je'el bix le keban tu beetaj Jeroboam u paal Nabat, le ca tu beetaj ca'ach u kebanchajal Israel.

⁴Mesa, u ajawil Moabe', u kubmajubáa ca'ach u tzéent j tamano'ob, yaan ca'ach u kubic bey páatan ti' u ajawil Israele' cien mil mejen j tamano'ob yéetel cien mil nucuch j tamano'ob pa'ate' yéetel u tzo'otzelo'ob.

⁵Ba'ale' le ca j quíim Acabe', u ajawil Moabe' j líik u ba'atelt u ajawil Israel.

⁶Ajaw Joram túune' jóok tu caajil Samariae' ca tu xocaj tuláacal u aj ba'atelo'ob Israel.

⁷Cu dzo'ocole' tu túuxtaj a'albil ti' u ajawil Judá: U ajawil Moabe' dzo'oc u líikil u ba'atelten. ¿A káat a láakinten u ti'al c bin c ba'atelte? U ajawil Judae' tu núucaj: Je'el in láakintiqueche', teen, bey xan in aj ba'atelo'ob yéetel in j nat' tzíimino'ob, ta wéetel yano'on bey xan tu yéetel a caajal.

⁸Ba'ale', ¿Ti' ba'ax bejil bin a ba'atelto'ob? Jorame' tu núucaj: Tu bejil u x tocoy lu'umil Edom.

⁹Bey túuno', u ajawo'ob Israel, Judá Yéetel Edome' j bino'ob ba'atel. Ba'ale' yanchaj u xíimbalo'ob siete kiino'ob u ti'al u bakpachtico'ob. Le ja' cu bisico'ob ca'ach u ti'al le aj ba'atelo'ob yéetel u ti'al u ba'alche'obe' j xu'upi'.

¹⁰Ca túun tu ya'alaj u ajawil Israel: ¡Je'elo'! Je'elajqui bey tu taasilaco'on Yuumtzil tu yóox túulalo'on, le ajawo'on, u ti'al u kubico'on tu kab le j moabitaobo'.

¹¹Josafate' tu káat chi'itaj: ¿Mina'an wa mix jun túul u aj bóobat Yuumtzil, máax je'el u páajtal c káat chi' ti'e'? Jun túul u nuuquil u aj meyajo'ob u ajawil Israele' tu ya'alaj: Way yaan Eliseoe', u paal Safat u j áantaj ca'ach Elías.

¹²Josafate' tu núucaj: Yaan wal ba'ax t'aanil u káat u ya'al cu taal ti' Yuumtzile'. Tu séeblaquile' Josafat u ajawil Israel yéetel u ajawil Edome' j bino'ob u yilo'ob Eliseo;

¹³ba'ale' Eliseoe' tu ya'alaj ti' u ajawil Israel: ¿Ba'ax yaan in wil ta wéetel? Xeen j t'aan yéetel u aj bóobato'ob a taataob. U ajawil Israele', tu ca a'alaj: Ma', tumen Yuumtzile' tu taasajo'on tu yóox túulilo'on ajawo'on tu taasajo'on u ti'al c lúubul tu kab j moabo'obitaob.

¹⁴Eliseo túune' tu ya'alaj ti': Quin jalach t'antic tu kaaba' Yuumtzil ti' máax yaan tuláacal páajtalil, le máax táan u yiliquene', wa ma' chéen tu yo'olal in tziiquil ti' Josafat, u ajaw Judae', ma' tin wu'uyic a t'aan mix táan in pactiqueche'.

¹⁵¡Co'ox, taasa'ac ti' teen jun túul j paxnáal! Le ca jo'op' u paax le j paaxo', Yuumtzile' j ch'íic tu tuucul Eliseo;

¹⁶Eliseo túune' tu ya'alaj: Yuumtzile' dzo'oc u ya'alic: Bete'ex ya'abcach káastbil Ja'ob way te j táax kóom lu'uma',

¹⁷quex tumen ma' táan u yantal iik mix bíin a wile'ex u káaxal ja'e', le kóom táax lu'uma' yaan u chu'upul yéetel ja', tuláacal te'exe' bíin a wuke'ex, bey xan a wacaxe'ex yéetel a walak ba'alche'ob.

¹⁸Lela' chéen jun p'éel u chan chíiculal le ba'ax je'el u páajtal u beetic Yuumtzilo', tumen yaan xan u kubic ta kabe'ex le j moabitaobo'.

¹⁹Te'exe' bíin a pa'ex tuláacal le caajo'ob tuulumta'ano'ob, je'el bix le táan caajo'obo', yaan a ch'aquique'ex tuláacal le che'ob cu jaanta'al u yicho'obo', yaan a tzutzique'ex tuláacal le sayabo'obo' yaan xan a but'ique'ex yéetel tuunich tuláacal u lu'umilo'ob paakal.

²⁰Jach bey úuchico', tu ja'atzcab u láak kiine', ti' le súutuc táan u ku'ubul le ti'ibil óolalo', tu tojil u caajil Edom j taal le ja'o', ca tu bulaj le lu'umo'.

²¹Ca'aliquile', le j moabitaobo' dzo'oc u yojéeltico'obe' le ajawo'obo' táan u taalo'ob u ti'al u ba'atelto'ob, le t o'olale' tu t'anajo'ob tu tzoololilo'ob tuláacal u j táanquelemo'ob bey xan le máaco'ob yaan u ja'abil aj ba'atelo'ob ti'obo', ca tu tzolajuba'ob tu'ux cu chúunul u lu'umo'ob.

²²Tu ja'atzcabil kiin le ca j líiko'obe', le kiino' táan ca'ach u juul tu yóokol le ja'o', le j moabitaob tu yilajo'ob actáan ti'obe' chac bey ki'ike'.

²³Ca túun tu ya'alajo'ob: Lelo' ki'ik, ba'ax dzo'oc u yúuchule' le ajawo'obo' ba'atelnajo'ob tu baatzilo'ob ca tu paaclan quíimsajuba'ob. ¡J moabe'ex, co'one'ex bejela'e' c ch'a'ex le ba'alo'ob tu p'atajo'obo'!

²⁴Ba'ale' le ca j ooco'ob le j moabitaob tu chuybil naj le j israelitaobo', le j israelitaobo' j bino'ob tu yóokolo'obe' ca tu beetajo'ob u púudzulo'ob. Bey xan tu chucpachtajo'ob ca tu quíimsajo'ob.

²⁵Cu dzo'ocole' tu pa'ajo'ob le caajo'obo', ca tu mucajo'ob yéetel tuunicho'ob u cúuchil u paakalo'ob, tu tzutzajo'ob tuláacal u sayabo'ob ca tu ch'acajo'ob tuláacal le che'ob cu jaanta'al u yich. Chéen j p'áat wa'alacbal u caajil Kir-hareset. ba'ale' le máaxo'ob yaan u yúuntuno'obo' tu bakpachtajo'ob ca tu ch'a'ajo'ob.

²⁶Le ca tu yilaj u ajawil Moab asab nojoch u muuk le máaxo'ob cu bino'ob yóokole', tu ch'a'aj setecientos aj ba'atelo'ob cu xíimbalo'ob u ti'al u je'ic jun p'éel bej cu bin tu'ux yaan u ajawil Edom. Ba'ale' ma' j páatji' u beetico'obi'.

²⁷Ca túun tu ch'a'aj u yáax paal, le máax unaj u cutal tu jalach káanche', ca tu kubaj tóocbil tu yóokol le tuulumo'. Lela' tu beetaj u sen p'ecta'al le j israelitaobo', le t óolal leti'obe' tu líiksajo'ob u nookil naje' ca j suunajo'ob tu lu'umo'ob.