Read Yucateco 2 Reyes 4 Bible Online

2 Reyes 4 - Yucateco bible

2 Reyes 4

¹Jun túul co'olel, u yatan ca'ach jun túul ti' le aj bóobato'obo', j bin u ya'al ti' Eliseo: In wíichame' dzo'oc u quíimil, teche' a wojel bix ca'ach u tziquic Yuumtzil. Bejela'e' le j dzaa majan taakino' dzo'oc u taal, u káat u bis in paalal bey palitzilo'obe'.

²Eliseoe' tu káat chi'itaj ti': ¿Ba'ax je'el u páajtal in beetic ta wo'olale'? A'al ti' teen ba'ax ba'al a ti'al ta wotoch, x leti'e' tu núucaj: Le x meyaja' mina'an mix ba'al u ti'al, chéen jun p'éel u chan u pichelil aceite yaan teen.

³Eliseoe' tu ya'alaj ti': Xeen bejela'e' ca káat majnil ti' a wéet caajalo'obe' dze'edzec pichelo'ob, ¡tuláacal le cu páajtal u dza'abal ti' teche'!

⁴Cu dzo'ocole' ooquen ta wotoch yéetel a paalal, ca a kal le jool najo', chup yéetel aceite tuláacal le pichelo'obo', ca dzáic jun páayil le chuupo'obo'.

⁵Le co'olelo' j luk tu yicnal Eliseoe' ca j bin u kalubáa yéetel u paalal tu yotoch. Ca túun jo'op' u chupic le pichelo'ob cu taasa'al ca'ach ti' tumen u paalale'.

⁶Le ca láaj u chu'up le pichelo'obo', tu ya'alaj ti' jun túul ti'obi': Taas ti' teen u láak. Ba'ale' u paalo' tu núucaj ti': Mina'an u láak. Ti' le súutuco' le aceiteo' ch'éen u chooj.

⁷Cu dzo'ocole' leti'e' j bine' ca tu tzicbaltaj ti' le aj bóobato', leti'e' tu ya'alaj: Bejela'e', xeen a con le aceiteo', bo'ot a p'aax yéetel u tojol, u yalab le taakino' meyajnac u ti'al a tzéenticabáa yéetel a paalal.

⁸Jun p'éel kiine' j máan Eliseo tu caajil Sunem, jun túul ayikal x co'olel cajacbal ca'ach te'elo' tu sen káat óoltaj ti', ca máanac janal tu yotoch. Je'el jay téen ca máan ca'ach Eliseo te'elo' cu p'áatal janali'.

⁹X leti' túune' tu ya'alaj ti' u yíicham: Ile, tene' in wojele' le máac cu xíimbaltico'on je'el jay téen ca máanaque', leti'e' jun túul u aj bóobat Junab Ku,

¹⁰Co'ox beetic tu yóokol le naja' jun p'éel u yáal najil u ti'al le ti'. C dzáic ichile' jun p'éel u nu'ucul u wenel, jun p'éel x táasche', jun p'éel xequeb, yéetel jun p'éel x t'uchub sáas. Beyo' le quéen taalac u xíimbalto'one', je'el u páajtal u p'áatal te'elo'.

¹¹Jun téenac le ca j kuch te tu ca'anal yáal le naj beeta'abo' j p'áat weneli',

¹²ca tu ya'alaj ti' Giezi, u j palitzil: T'aan le xunáano'. Le palitzil túuno' tu t'anaj, le ca j taal tu táane, Eliseoe' tu ya'alaj ti' u j palitzil:

¹³A'al ti' le xunáano', jach utz t éetel, wa yaan ba'al je'el u páajtal c beetic tu yo'olale'; wa u káat ca t'aanaco'on tu yo'olal leti' yéetel le ajawo', wa yéetel u náacom aj ba'atelo'ob. Ca tu núucaj x leti': Ma'alob yanilen ichil in wéet caajalo'ob.

¹⁴¿Ba'ax túun je'el u páajtal beetic tu yo'olale'? Giezie' tu núucaj: Ma' in wojeli'. Ba'ale' x leti'e' mina'an u yaal, u yíichame' dzo'oc u jach ch'íijil.

¹⁵Ca tu ya'alaj Eliseo: T'ane. Le j palitzilo' j bin u t'aane', ba'ale' x leti'e' j p'áat wa'alacbal tu jool le najo'.

¹⁶Eliseo túune' tu ya'alaj ti': Ti' le ja'ab cu taalo', ti' le kiino'oba', yaan a meekic jun túul a waal. X leti'e' tu núucaj: Ma', in taaten, ma' a tusic le a x meyaja', tumen teche' jun túul j xiib cu meyajtic Ku.

¹⁷Ba'ale' je'el bix tu ya'alajilac Eliseoe' leti'e' yo'omchaji, ti' u láak ja'abe' tu síijsaj jun túul chaan pal.

¹⁸Le chaan palo' nojochchaji. Ba'ale' jun p'éel kiine' le ca j jóok u yil u taata ti' yaan ca'ach yéetel u joocho'obe',

¹⁹jo'op' u yaawtic ti' u taata: ¡Way, in pool! ¡Táan u ki'inam in pool! U taata túune' tu ya'alaj ti' jun túul u palitzil: Bis tu yicnal u maama.

²⁰Le palitzil túuno' tu machaj tu kabe' ca tu bisaj tu'ux yaan u maama, x leti'e' tu culquintaj tu píixe' tac chúumuc kiin. Ca túun j quíim le paalo'.

²¹Ba'ale' x leti'e' tu na'acsaj te tu ca'anal naj le aj bóobato' ca tu chilcuntaj tu yóokol u cúuchil u wenel cu dzo'ocole' jóoke' cu tu kalaj le jool najo'.

²²Cu dzo'ocole' tu t'anaj u yíicham ca tu ya'alaj: Túuxt téen jun túul a palitzil yéetel jun túul x burra, u ti'al ca xi'iquen in wil le aj bóobato'. Cu dzo'ocole' quin suut.

²³U yíichame' tu káat chi'itaj: ¿Ba'ax u biilal ca bin a wil bejela'e'? Ma' u kiinil ma' chichan lunai, mix sábadoi'. Leti'e' tu núucaj: Ma' a ch'i'ichnactal.

²⁴Ca tu ya'alaj ca nu'ucbesa'ac le x burrao', ca tu ya'alaj ti' u palitzil: Séeba'an, xeen táanil. Ma' a wa'atal mix tu'ux, p'is in wa'alic ti' teche'.

²⁵Bey úuchic u bin leti'o', ca j kuch tu witzil Carmelo, tu'ux cu yantal ca'ach le aj bóobato'. Náach yanil ca j ila'ab u taalbal tumen Eliseo, tu ya'alaj ti' Giezi, u j palitzil: Ile, leti' le co'olel x suumenile'.

²⁶Xeen áalcabil a kame', káat ti' wa toj u yóol, yéetel bix yanil u yíicham bix yanil xan u yaal. Le palitzilo' j bine' ca tu káat chi'itaj ti' wa toj u yóolo'ob, leti'e' tu núuca j láaj toj u yóolo'ob.

²⁷Cu dzo'ocole' j kuch te j witz tu'ux yaan ca'ach Eliseo', ca tu méekaj u yooco'ob; Giezie' tu nadzajubáa u ti'al u tzel ca'achi, ba'ale' Eliseoe' tu ya'alaj ti': P'ate, tumen jach yaj u yóol, tumen Yuumtzile' ma' u ya'al téen ba'ax cu yúuchul ti' le co'olela'.

²⁸X leti' túune' tu ya'alaj: In taata, ¿tin káataj wa teech ca yanac jun túul paal? ¿Ma' wa tin wa'alaj ti' teech ma' a tusiqueni'?

²⁹Eliseo túune' tu ya'alaj ti' Giezi: Jach táan óolte, ch'a'a in xóolte', xeen. Wa ca nactáanticabáa yéetel wa máaxe', ma' a te'escuntic; wa máax cu te'escuntiqueche' ma' a núuquic. Le quéen kuchuqueche' ca dzáaic in xóolte' tu yóokol u táan yich le paalo'.

³⁰Ba'ale' u maama le paalo' tu ya'alaj ti' Eliseo: Quin jalach t'antic tu kaaba' Yuumtzil bey xan ta wo'olale', ma' tin j bin, wa ma' ta láakintiquen. Eliseo túune' j bin tu yéetel.

³¹Ca'aliquil Giezie' j bin u táanil ti'ob, ca tu dzaj le xóolte' tu táan yich le paalo', ba'ale' le paalo' ma' chica'an wa je'el u ca'a cuxtale'; Giezi túune' j bin u nuptáant Eliseo ca tu ya'alaj ti': Le chan j xi'ipalo' ma' tu suut tu yóol.

³²Le ca j ooc Eliseo ichil le najo', le paalo' dzo'oc ca'ach u quíimil, tudzquinta'an tu yóokol le u cúuchil wenelo'.

³³J ooc túune' ca tu kalaj le jool najo', j p'áat tu juun yéetel le paalo'; ca j payalchi'inaj ti' Yuumtzil.

³⁴Cu dzo'ocol u payalchi'e' j na'ac tu yóokol le u nu'ucul wenelo' ca j noclaj tu yóokol le paalo', ca tu dzaj u chi' u yich yéetel u kabo'ob yóokol u chi' u yich yéetel u kabo'ob le paalo', ca tu méekaj u wíinclil le paalo'. C jo'op' u yocol kíinal tu wíinclil le paalo'.

³⁵Eliseo túune' j líike' ca jo'op' u xíimbalcunsicubáa ichil le najo'; cu dzo'ocole' ca j na'ac tu ca'a téen tu yóokol le u nu'ucul wenelo', ca tu ca'a takaj u wíinclil, tu wíinclil le paalo'. Tu séeblaquile' ca je'esíimnaj le paal siete u téenele', ca tu p'ilaj u yich.

³⁶Eliseoe' tu t'anaj Giezie', ca tu ya'alaj ti': T'aan le xunáano'. Giezie' tu beetaj beyo', le ca j kuch le xunáan tu'ux yaan Eliseoe', leti'e' tu ya'alaj ti': Je'el quin kubic ti' teech a waala'.

³⁷Le xunáano' tu nadzajubáe' ca tu pulajubáa tu ni' u yooc Eliseo; cu dzo'ocole' tu ch'a'aj u paale' ca jóok ti' le najo'.

³⁸Cu dzo'ocole', Eliseoe' j suunaj Gilgal. Ti' le kiino'obo' yanchaj ya'abcach wi'ij te j lu'umo'; jun p'éel kiine' le aj bóobato'obo' culucbalo'ob ca'ach tu bakpach Eliseo, leti'e' tu ya'alaj ti' u j palitzil: Dzáa le nojoch cuum te j káako', ca a máaka'ant jun p'éel janal u ti'al le aj bóobato'oba'.

³⁹Jun túul ti' le aj bóobato'obo' jóok j káax u ti'al u mol janalbe'en xíiwo'ob, tu caxantaj túun jun cúul káaxil che' ca tu t'ocaj dze'edzec u yich, u yiche' bey káaxil kúume', yéetelo'obe' tu chupaj u suyem. Le ca j suunaje', tu kupla'antaj, ca tu láalaj ichil le janalo', ba'ale' ma' tu yojéeltaj ba'axi'.

⁴⁰Cu dzo'ocole' ca tu dzaj u ti'al u jaant le aj bóobato'obo', ca j chu'unpaj u jaantico'ob le janalo' leti'obe' j awatnajo'ob, táan u ya'alico'ob: ¡Aj bóobat, ichil le janala' yaan ba'al cu quíimsaj! Beyo' ma' tu jaantajo'obi'.

⁴¹Ba'ale' Eliseoe' tu ya'alaj: Taase'ex ti' teen jun p'íit harina. Le ca tu pulaj le harina ichil le cuumo' ca tu ya'alaj: ¡Dzáa u jaant le máaco'obo'! Le máaco'ob túuno' jaano'ob, mina'an mix ba'al kaas ichil le cuumo'.

⁴²Cu dzo'ocole' j kuch jun túul j xiib ti' u taalbal Baalsalisae', tu taasaj ti' Eliseo veinte u waajilo'ob cebada táant u póoca'alo'obe', bey xan túumben trigo ichil u sáabucan. Eliseo túune' tu ya'alaj ti' u palitzil: Dzáa ti' le máaco'ob u ti'al u jaanto'ob.

⁴³Ba'ale', tu núucaj le palitzilo': ¿Bix bíin in dzáa ti' cien máaco'ob? Ca j núuca'ab ti' tumen Eliseo: Dzáa u ti'al u jaanto'ob, tumen Yuumtzile' dzo'oc u ya'alic, yaan u yantal u jaanto'obi' yaan xan u p'áatal u yalab.

⁴⁴Bey túuno' le j palitzilo' tu dzaj ti'ob, leti'ob túune' jaano'ob, ca j p'áat u yalab je'el bix tu ya'alajilac Yuumtzile'.