Read Yucateco 2 Reyes 5 Bible Online

2 Reyes 5 - Yucateco bible

2 Reyes 5

¹Yanchaj jun túul máac cu kaaba'intic ca'ach Naamán, u náacomil u aj ba'atelo'ob u ajawil u lu'umil Siria, jach utz u yila'al, utz xan yáanta'al tumen le ajawo', tumen Yuumtzile' dzo'oc ca'ach u dzáic u tocsajil ti' lu'umil Siria tu yo'olal Naamán. Ba'ale' le máaca' koja'an ca'ach ti' jáaway.

²Ti' jun p'éel u kiinile' jóok le j siriob u ba'atelto'ob le j israelitaobo', tu ch'a'ajo'ob u ti'al x palitzilto'ob jun túul chan x lo'obayan x ch'úupal, x lela' j p'áat u meyajt u yatan Naamán.

³Le x ch'úupala' tu ya'alaj ti' u xunáan: Wa ca xi'ic in dzuulil u yil le aj bóobat yaan tu caajil Samariao', je'el u yutzchajal ti' le u jáawayo'.

⁴Naamane' j bine' ca tu tzicbaltaj ti' ajaw le ba'ax tu ya'alaj le x ch'úupalo'.

⁵U ajawil Siriae' tu ya'alaj ti': Ma'alob túun, xeen, tene' je'el in túuxtic jun p'éel dzíibil ju'un ti' u ajawil Israel. Naamán túune' j bine' ca tu ch'a'aj treinta mil u sac taakin, yéetel seis mil kaan taakin, yéetel diez u dzáamal búuco'obe',

⁶ca tu bisaj le dzíibil ju'un ti' u ajawil Israel, cu ya'alic beya': Le quéen a kam le dzíibil ju'una' ca wojéeltique' táan in túuxtic Naamán, jun túul u náacom in aj ba'atelo'ob, u ti'al ca dzac u jáaway.

⁷U ajawil Israele' le ca j dzo'oc u xo'oquic le ju'uno', tu jataj u nook, u chíiculal u yaj óolal ca tu ya'alaj: ¿Kuen wa, u ti'al ca in dzáa cuxtal, wa u ti'al ca in lukes cuxtal, u ti'al ca u túuxt ti' téen jun túul máac ca in dzac u jaway? ¡Qui' ile'ex wa ma' chéen táan u caxtic ba'al u ti'al u ba'ateltiquen!

⁸Le ca tu yojéeltaj, aj bóobat Eliseo dzo'oc u jatic u nook ajaw tu yo'olal le dzíibil ju'uno', tu túuxtaj a'albil ti': ¿Ba'ax téen ta jataj a nook? túuxt le máac u ti'al u yileno' beyo' je'el u yojéeltique' yaan jun túul aj bóobat tu lu'umil Israele'.

⁹Naamane' j bin tu u bolan yéetel xan u tzíimino'ob, ca j wa'alaj tu jool u yotoch Eliseo.

¹⁰Ba'ale' Eliseoe' tu túuxtaj jun túul aj bisaj t'aan u ti'al u ya'alic ti': Xeene' ca a p'o'aba' siete u téenel tu yáalcab ja'il Jordán, beyo' a wíinclile' cu yutztal ti' le jáawayo'.

¹¹Naamane' j p'u'uji, ca j bin táan u tutucchi' táan u ya'alic: Tene' tin tucultaje' yaan u jóokol u kamen, cu wa'atale', cu t'aanic u kaaba' Yuumtzil u Ku, cu dzo'ocole' cu jíikabtic le tu'ux yaan le koja'anilo', beyo' cu lukesic le jáawayo'.

¹²¿Ma' wa asab ma'alob u yáalcab ja'ilo'ob Damasco, Abana yéetel Farfar, ti' tuláacal u yáalcab ja'ilo'ob u lu'umil Israel? ¿Ma' wa dzo'oc ca'ach in bin u ti'al in p'o'iquinbáa te'elo' u ti'al ca utzchajqueni'? Sen p'uja'an túune', ca j luk te'elo'.

¹³Ba'ale' u j palitzilo'obe' tu nadzajuba'ob ti'e' ca tu ya'alajo'ob: In dzuulil wa aj bóobat ca u káat ti' teech ca a beet wa ba'ax talame', ¿Teche' ma' wa je'el a beetique'? wa chéen tu ya'alaj ti' teech, ca a p'o'abáa u ti'al ca utzchajqueche'. ¿Dzo'oc ca'ach a beetique'?

¹⁴Naamane' j bine' ca tu t'ubajubáa siete u téenel tu yáalcab ja'il Jordán, je'el bix a'ala'abic ti' tumen le aj bóobato', u bakel túune' j sutchaj bey u bakel jun túul táanquelem paale', ca j p'áat ma'alobil.

¹⁵Leti' yéetel tuláacal máaxo'ob j bino'ob yéetele' j bino'ob u yilo'ob Eliseo. Le ca j kucho'ob tu táane', Naamane' tu ya'alaj ti': ¡Bejela'e' jach in wo'ojele' ti' tuláacal le lu'uma' mina'an u láak Ku, chen tu lu'umil Israel! Let óolale', quin káat óoltic ti' teche' ca a kam jun p'éel siibal ti' le a palitzila'.

¹⁶Ba'ale' Eliseoe' tu núucaj: Quin jalach t'antic tu kaaba' Yuumtzil, le máax táan u yiliquene' ma' bíin in kami'. Quex tumen Naamán tu sen a'alaj ti'e', Eliseoe' ma' tu yóoltaji'.

¹⁷Naamán túune' tu ya'alaj: Wa bey túuno' cha'a in bisic ca'a túul mulaob u cuchmajo'ob u lu'umil Israel; tumen le a palitzila' ma' bíin suunac u kub tóocbil ba'alche'ob mix quíimsbil ba'alche'ob ti' u láak kuob, wa ma' chéen ti' Yuumtzil.

¹⁸Chéen quin káatic ti' Yuumtzile' ca u sa'ats ti' teen jun p'éel ba'al: le quéen xi'ic in ajaw u ti'al kultaj tu jalach naj Rimone' le quéen u machubáa tin kab wa kabéet in xoltal te j kulnajo', ca u sa'atsen Yuumtzil tu yo'olal lelo'.

¹⁹Eliseoe' tu núucaj: Xeen, x ma' u péec a wóol Naamane' ca j luk te'elo'. Dzo'oc ca'ach u chan náachtale',

²⁰Giezi, u j koos aj bóobat Eliseoe' tu tucultaj: In dzuulile' tu cha'aj u bin Naamán le j sirioo', cu dzo'ocole' ma' tu yóoltaj u kam mix ba'al ti' le ba'ax tu taasajo'. Quin jalach t'antic tu kaaba' Yuumtzile', tene' bin in ca'aj in chucpacht tu séeblaquil, u ti'al in wilic ba'ax je'el u páajtal in káatic ti'e'.

²¹Ca j bin Giezi tu paach Naamán; leti'e' ca tu yilaj táan u taal Giezi tu paache', ca j éem tu bolan u ti'al u kame, ca tu káat chi'itaj ti': ¿Yaan wa ba'ax kaas cu yúuchul?

²²Giezie' tu núucaj: Ma', mix ba'al. Ba'ale' in dzuule' tu túuxtajen in wa'al ti' teche' táant u cóojol ca'a túul táanquelem aj bóobato'ob, ti' u taalo'ob tu witzilo'ob Efraine', let óolale' cu káat óoltic ti' teche' ca a dzáa ti'obe' tres mil sac taakin yéetel ca'a dzáam búuco'ob.

²³Naamane' tu núucaj: Bet utz a kamic seis mil sac taakino'ob. Naamane' tu sen káat óolnaj ti' ca u kame, Giezi tu kamaje', ca tu but'aj ichil ca'a p'éel sabucano'ob pa'ate' yéetel le ca'a dzáam búuco'obo', ca tu jáaj kubaj ti' ca'a túul u palitzilo'ob, u ti'al ca biso'ob táanil ti' Giezi.

²⁴Le ca j kucho'ob ti' jun p'éel jo'ol lu'ume', Giezie' tu ch'a'aj le taakin cu bisico'ob le j palitzilo'obo', ca tu ta'acaj tu yotoch, cu dzo'ocole' tu ya'alaj ti'ob ca xi'ico'ob.

²⁵Cu dzo'ocole' ca j bin tu táan u dzuulil, Eliseoe' tu káat chi'itaj ti': ¿Giezi, tu'ux a taal beya'? Giezie' tu núucaj: Tene' mix tu'ux xi'iquen.

²⁶Ba'ale' Eliseoe' tu ca'a a'alaj: Le ca j éem tu bolan jun túul j xiib u ti'al u kamiqueche', ichil in tuucule' tene' ti' yanen ca'ach ta wéetele'. Ba'ale' lela' ma' u súutuquil u ka'amal taakin yéetel nooki', mix a manic u cúuchilo'ob paakali' mix x péetpach uvai', mix j tamano'ob, mix wacaxo'ob, mix j palitzilo'ob mix x palitzilo'ob.

²⁷Le o'olale', u jáaway Naamane' cu páakal ti' teech yéetel ti' tuláacal a ch'i'ibal u ti'al ja'abo'ob mina'an u xuul. Le ca tu tzelajubáa Giezi ti' Eliseoe' tu yo'olal jach piim u jáawaye' sac yila'al ca'achi, bey u yóom ja'e'.