Read Yucateco 2 Reyes 6 Bible Online

2 Reyes 6 - Yucateco bible

2 Reyes 6

¹Jun p'éel kiine' le aj bóobato'obo' tu ya'alajo'ob ti' Eliseo: Ile le cúuchil tu'ux cajacbalo'on ta wéetelo' sen nu'ut' c ti'alte'ex.

²Cha'a' c bin tu yáalcab ja'il Jordán u ti'al ca c ch'a'a jujun túul ti' to'one' jun p'éel ocom, u ti'al ca c beet te'elo' jun p'éel cúuchil tu'ux cajtal. Eliseoe' tu núucaj: Xeene'ex túun.

³Ca tu ya'alaj jun túul ti'obe'. Beet utz a láakintico'on. Ca tu núucaj leti': Ma'alob, je'el in láakintique'exe'.

⁴Eliseoe' j bin yéetelo'ob tac Jordán, ca tu dzáajuba'ob u ch'aco'ob le che'obo'.

⁵Ba'ale' ba'ax úuche', jun túul ti'obe' u ti'al u ch'aquic jun cúul che', le báato' j lúub ichil le ja'o'. Ca túun awatnaji: ¡Ay, aj cambesaj! ¡Le báato', majantbil báat ca'achi'!

⁶Ca j káat chi'ita'ab ti' tumen le aj bóobato': ¿Tu'ux j lúubi'? Le u láak aj bóobato' tu ye'esaj tu'ux j lúubi'. Eliseo túune' tu ch'acaj jun p'éel che'e', tu pulaj ichil le ja'o' ca tu beetaj u jóokol yóokol le ja'o'.

⁷Eliseoe' tu ya'alaj: Mache. Le u láako' tu tich'aj u kabe' ca tu machaj le báato'.

⁸U ajawil u lu'umil Siriae' táan ca'ach u ba'atel yéetel Israele', j much'laj yéetel u j nu'ucsaj ba'atelo'ob, ca tu ya'alaj tu'ux u tucultmaj u je'elelo'ob.

⁹Eliseo túune' tu túuxtaj a'albil ti' u ajawil u lu'umil Israele', ca u canant ma' u máan te j cúuchilo', tumen le j siriobo' táan u bino'ob te'elo'.

¹⁰Bey túuno' u ajawil u lu'umil Israele', tu túuxtaj u aj ba'atelo'ob te j cúuchil tu'ux ca'ach tu ya'alaj le aj bóobato', bey úuchic u toquicubáa ya'abcach u téenelo'obo'.

¹¹U ajawil siriae' sen xa'aka'an ca'ach yanil u tuucul tu yo'olal lelo', bey túuno' tu túuxtaj t'anbil u aj nu'ucsaj ba'atelo'obo' ca tu ya'alaj ti'ob: ¡A'ale'ex ti' teen máax ichil le c ti'alo'ob ti' yaan tu tzéel u ajawil Israel!

¹²Jun túul ti'obe' tu núucaj: Tzicbe'enil mix máac. Ba'ale' Eliseo, le aj bóobat yaan tu lu'umil Israele', cu ya'alic ti' u ajawil Israele', tuláacal le ba'ax cu ya'alic a tzicbe'enil, tac le ba'ax ca x mucul a'alic ichil u káasabil a wenelo'.

¹³U ajawil Siriae' tu ya'alaj: Káat p'eectzilte'ex tu'ux yaan, u ti'al ca in túuxt wa jay túul máaco'ob u ti'al ca chu'ucuc. Le ca j a'ala'ab ti', ti' yaan ca'ach Dotane',

¹⁴tu túuxtaj jun múuch' u aj ba'atelo'ob cu nat' tzíimino'ob, u bolanilo'ob ba'atel, yéetel ya'abcach u aj ba'atelo'ob cu xíimbalo'ob, j kucho'ob yéetel áakab Dotane' ca tu bakpachtajo'ob le caajo'.

¹⁵U sáasajbal u láak kiine' j líik u palitzil Eliseo, le ca jóoke' tu yilaj bakpachta'an le caaj tumen aj ba'atelo'ob j nat' tzíimino'ob yéetel xan u bolanilo'ob ba'atel; ca j bin túun u ya'al ti' Eliseo: Aj ca'ambesaj bejela'a' túune', ¿Ba'ax c bin j beete'?

¹⁶Eliseoe' tu núucaj: Ma' a ch'a'ic sajaquil, tumen asab ya'ab le yano'ob t éetelo', ti' le yano'ob tu yéetelo'obo'.

¹⁷Eliseoe' j payalchi'inaj ti' Yuumtzil, ca tu ya'alaj: Yuumtzil quin káat óoltic ti' teech, ca a sáasilcunt u yich u ti'al ca paacatnac. Yuumtzil túune' tu sáasilcuntaj u yich u palitzil, leti'e' tu yilaj le pu'uco'obo' chuup yéetel j nat' tzíimino'ob bey yéetel u bolanilo'ob káak tu bakpach Eliseo.

¹⁸Le ca tu yóoltajo'ob j bin le j siriob u léecso'ob le ba'atelo', Eliseoe' payalchi'inaj ti' Yuumtzil: Quin káat óoltic ti' teech ca a ch'óopquint le máaco'oba'. Yuumtzile', tu ch'óopquintajo'ob je'el bix tu káat óoltilac Eliseoo'.

¹⁹Eliseo túune' tu ya'alaj ti'ob: Lela' ma' leti' le beejo', mix le caaj ca caxtique'exo'. Co'otene'ex tin paach teen bíin in bise'ex tu yicnal le máac ca caxtique'exo'. Ca tu bisajo'ob Samaria.

²⁰Le ca j kucho'ob te'elo', Eliseoe' tu beetaj le payalchi'a': Yuumtzil ti' le súutuca' p'il u yicho'ob u ti'al ca páatac u paacato'ob. Leti'ob túune' tu yilajo'ob ti' yano'ob Samariae'.

²¹U ajawil Israel le ca tu yilajo'obe' tu káat chi'itaj ti' Eliseo: ¿In taata, in quíimso'ob wáa?

²²Ba'ale' Eliseoe' tu núucaj: Ma', ma' a quíimsico'ob. ¿Suuc wa ti' teech a quíimsic yéetel a máascab bey xan yéetel a x julub le máaxo'ob ca machico'? Dzáa ba'al u jaanto'ob yéetel u yuko'ob, cu dzo'ocole' suuto'ob ti' u dzuulilo'ob.

²³Ca j beeta'ab túun ti'obe' jun p'éel nojoch kiinbesaj, jaano'ob yéetel j ukulnajo'ob. Cu dzo'ocole' ajawe' tu túuxtajo'ob, ca túun suunajo'ob ti' u dzuulilo'ob. Líikbal le kiin túuno' le j siriobo' ma' j suunajo'ob u ba'atelto'ob le j israelitaobo'.

²⁴Cu dzo'ocol lela', Ben-adad u ajawil u lu'umil Siriae', tu much'quintaj tuláacal u aj ba'atelo'obe' ca j bin u bakpacht Samaria u ti'al u ba'atelte.

²⁵Yanchaj túun jun p'éel nojoch wi'ij tu lu'umil Samaria, tu yo'olal ma'alob kala'anil u paache', jun p'éel u pool burroe' cu tojoltic ca'ach ochenta sac taakino'ob, táancoch wuudz u ta' palomae' cinco sac taakino'ob.

²⁶Jun p'éel kiine' u ajawil u lu'umil Israele' táan ca'ach u máan tu yóokol le tuulumo', jun túul co'olele' tu yaawtaj ti': ¡A tzicbe'enil, áanteni'!

²⁷Le ajawe' tu núucaj ti': Wa Yuumtzil ma' tu yáantiqueche', ¿bix a káat ca in wáantech? ¿Tene' je'el wa u páajtal in dzáic ti' teech trigo, wa vinoe'?

²⁸¿Ba'ax cu yúuchul ti' teech? Leti'e' tu núucaj: Le co'olela' tu ya'alaj ti' teen ca in kub in waal ti' u ti'al c jaant bejela'e', sáamal bine' c jaantic le u ti'alo'.

²⁹Ca túun t beetaj u janlil in waal, ca t jaantaj. Tu láak kiine' tin wa'alaj ti' ca u kub u yaal u ti'al c jaante', ba'ale' leti'e' dzo'oc u ta'acbesic.

³⁰Le ca tu yu'ubaj le ajaw le ba'ax tu ya'alaj le co'olelo', u chíiculal p'uja'ane', tu jataj u nooko'ob. Tu yo'olal ti' yaan tu yóokol le tuulumo', le caajo' tu yilaj u búuquitmaj tu yóokol u yoot'ele' to'oto'och nooko'ob.

³¹Le ajawo' tu ya'alaj: ¡ca u yaayaj jadzen Ku wa ti' le kiina' ma' tin xotic u pool Eliseo, u paal Safat!

³²Eliseoe' ti' yaan ca'ach tu yotoche' culucbal yéetel u nuuquilo'ob le caajo'. Ca'aliquil le ajawo' dzo'oc u túuxtic jun túul ti' u aj ba'atelo'ob. Ba'ale' ma'ili' kuchuc le máax j túuxta'ab tumen le ajawo', Eliseoe' tu ya'alaj ti' u nuuquilo'ob le caajo': Ile'ex bix le j quíimsaj máaca' dzo'oc u túuxtic máax u ti'al u culkupt in caal. Ba'ale' u'uye'ex ma'alob, le quéen kuchuc u aj tuchi'o' kale'ex le jool najo', táac che'ete'ex u ti'al ma' u yocol, tumen tu paache' cu yu'ubal u xíimbal u dzuulil.

³³Láili' táan u t'aan yéetelo'obe', ca j kuch le aj bisaj t'aano', ca j kuch tu táan Eliseo ca tu ya'alaj: Bey tumen Yuumtzil dzo'oc u túuxtic ti' to'on le yaayaj looba', ¿Ba'ax je'el u páajtal in pa'atic ti' leti'e'?