Read Yucateco 2 Reyes 7 Bible Online

2 Reyes 7 - Yucateco bible

2 Reyes 7

¹Ca tu núucaj Eliseo: U'uy u t'aan Yuumtzil, Yuumtzile' cu ya'alic: Walquil sáamal ja'atzcabile' tu jool u caajil Samariae' bíin páatchajac u ma'anal siete litros harina chéen yéetel jun p'éel sac taakin, bey xan chéen yéetel jun p'éel sac taakine' bíin páatchajac u ma'anal quince litros cebadae'.

²U aj áantaj le ajawo' tu núucaj ti' le aj bóobato': Quex ca u je'e' Yuumtzil u jool najilo'ob le ca'ano', ma' bíin páatchajac u yúuchul le ba'ax dzo'oc a wa'alico'. Ba'ale' Eliseoe' tu núucaj: Teche' bíin a wil yéetel a wicho'ob ba'ale' ma' bíin a jaant mix jun p'íiti'.

³Ca'aliquile', can túul koja'ano'ob ti' jáawaye' ti' yano'ob tu jool le caajo' tu ya'alajo'ob tu baatzilo'ob: ¿Ba'ax chéen c beetic way culucbalo'on táan c pa'atic le quíimilo'?

⁴Wa c ocol te j caajo', c quíimile'ex tumen yaan jun p'éel nojoch wi'ijil ichil; wa c p'áatal culucbalo'on waye', yaan xan c quíimile'ex, cone'ex túun tu'ux cu je'elelo'ob le j siriobo'; wa cu p'atico'ob cuxtale', c cuxtal; wa cu quíimsico'ono'obe', je'el bixaque' yaan c quíimil.

⁵Bey túuno', le ca j áakabchaje' j líiko'ob u binbalo'ob te tu'ux cu je'elelo'ob le j siriobo'; ba'ale' le ca j náadzo'obe' mix máac tu yilajo'obi'.

⁶Tumen Yuumtzile' tu beetaj ca u'uya'ac tumen le aj ba'atelo'ob Siriae', u juumbal u bolanilo'ob ba'atel, j nat' tzíinino'ob yéetel u jumbal ya'abcach aj ba'atelo'obe'; le j siriobo' tu tucultajo'ob túune' u ajawilo'ob Israel, hititaob bey xan u ajawo'ob le egipcio dzo'oc u kax t'antico'ob u bino'ob u ba'atelto'ob.

⁷Let o'olal j púudzo'ob tu yáakabil, ca tu xúump'attajo'ob u chuybil najo'ob, u tzíimino'ob, yéetel u burro'ob je'el bix yanilo'ob, u ti'al ma' u quíimsa'alo'ob.

⁸Le ca j kucho'ob le aj jáawayo'obo' tu bakpach le tu'ux cu je'elo'obo' le siriobo', j ooco'ob ichil jun p'éel chuybil naj ca jo'op' u janalo'ob yéetel u yukulo'ob; ca tu ch'a'ajo'ob plata, oroo yéetel nook cu dzo'ocole' j bino'obe, ca tu ta'acbesajo'ob. Cu dzo'ocole' suunajo'obe' ca j ooco'ob ti' u láak chuybil naj te'elo' tu ch'a'ajo'ob xan ba'alo'ob ca j bino'ob u ta'acbeso'ob.

⁹Ba'ale' tu ya'alajo'ob tu baatzilo'ob: Ma' utz le ba'ax c beetica'. Bejela'e' u kiinil c bisic ma'alob peectzilo'ob, ba'ale', to'one' ma' táan c a'alic. Wa c p'áatic u ti'al sáamale', bíin beeta'ac si'ipiltic. Ma'alob ca xi'ico'on jalach naj u ti'al c a'alej.

¹⁰J bino'ob túune' ca tu t'anajo'ob le máaxo'ob canantic le caajo', ca tu tzicbaltajo'ob ti'ob: Dzo'oc c bin tu'ux cu jelelo'ob le j siriobo', t ilaj mix máac yani'; mix tu yu'uba'al u t'aan mix máaqui'. Chéen ti' yaan kaxa'ano'ob u tzíimino'ob yéetel u burro'ob, u chuybil najo'obe' j p'aat je'el bix tu wa'acuntilaco'obe'.

¹¹Le máaxo'ob canantic u jool le caajo' tu séeblaquile' tu t'anajo'ob le máaxo'ob cu meyajo'ob te jalach najo'.

¹²Líik xan le ajawo', quex áakabe' tu ya'alaj ti' u nuuquil u aj ba'atelo'ob: Bin in ca'aj in tzoolte'ex ba'ax u káat u beet ti' to'on le j siriobo'. Tu yo'olal u yojelo'ob táan c mukyajtic wiije', jóoko'ob tu'ux cu je'elelo'ob ca tu ta'acbesajuba'ob te j káaxo', táan u tucultico'obe' le quéen jokoco'on te j caajo' leti'obe' cu machico'on cuxa'ano'on, u ti'al u yoclo'ob te j caajo'.

¹³Ba'ale' jun túul u nojchil u aj ba'atelo'obe' tu ya'alaj: Túuxta'ac wa jay túul máaco'ob ti' le cinco tzíimino'ob p'áatalo'obo' ca c ile'ex ba'ax cu bin j úuchul. Wa cu cuxtalo'ob wa cu quíimilo'obe', ma' tu ma'alobtal c antal, mix tu binto'on kaasil c p'áatal je'el bixili'e' le u chuca'an israelitaob p'áatalo'on waya'.

¹⁴Bey túuno' tu ch'a'ajo'ob ca'a p'éel bolano'ob yéetel u tzíiminilo'obe', ca j túuxta'abo'ob tumen le ajaw tu'ux cu je'elelo'ob le j siriobo', ca j a'ala'ab ti'ob ca u yilo'ob jach bix yanil.

¹⁵Leti'obe' j bino'ob tac Jordán u yilo'ob tu'ux máano'ob le j siriobo', ca tu yilajo'obe' tuláacal le bejo' chuup yéetel nook ki'iki'it bey xan yéetel u chuca'an ba'alo'ob tu pulajo'ob le j siriob ichil u yaanyamil u púudzulo'ob. Cu dzo'ocole' suunajo'ob le máaco'ob túuxta'abo'ob tumen le ajawo' ca tu tzicbaltajo'ob tuláacal ba'ax tu yilajo'ob.

¹⁶Tu séeblaquile' le máaco'obo' j bino'ob ca tu ch'a'ajo'ob tuláacal ba'al yaan te tu'ux cu je'elo'ob le j siriobo'. Je'el bix tu ya'aljilac Yuumtzile', le harinao' j co'on siete litros tu yo'olal jun p'éel sac taakin; le cebadao' quince litros tu yo'olal jun p'éel sac taakin.

¹⁷Ajawe' tu ya'alaj ti' máax áantique' ca u canant u jool le caajo', ba'ale' jéentanta'ab tumen le máaco'ob tu jool najo' ca j quíimi' je'el bix tu ya'alajilac aj bóobat le ca j bin ilbil tumen le ajawo'.

¹⁸Bey úuchic túun, le ba'ax tu ya'alaj le aj bóobat ti' le ajaw le ca tu ya'alaj ti' yaan u ma'anal tu jool u caajil Samariae', siete litros harina wa quince litros cebada chéen yéetel jun p'éel sac taakin.

¹⁹Le nojchil le aj ba'atelo' tu núucaj ca'ach ti' le aj bóobato' quex Yuumtzil ca u je'elant u jool najilo'ob le ca'ano', ma' tu páajtal u yúuchul lelo'. Eliseoe' tu núucaj ca'ach ti' yaan u yilic yéetel u yicho'ob, ba'ale' ma' bíin u jaanti'.

²⁰Jach tu jaajile' bey úuchico', tumen jéentanta'ab tumen le máaco'ob tu jool le caajo' ca j quíimi'.