Read Yucateco 2 Reyes 8 Bible Online

2 Reyes 8 - Yucateco bible

2 Reyes 8

¹Eliseoe' t'aanaj yéetel le co'olel tu ca'a cuxquintaj u paale', ca tu ya'alaj ti' ca xi'ic yéetel u láaktzilo'ob cajtal táanxel lu'umil tumen Yuumtzile' dzo'oc u ya'alic yaan u taal te j lu'umo' jun p'éel nojoch wi'ijil, yaan u xáantal siete ja'abo'ob.

²Le co'olelo' tu nu'ucbesajubáa ca tu beetaj le ba'ax a'ala'ab ti' tumen le aj bóobato'; ca j bin yéetel u láaktzilo'ob tu lu'umil filisteob, ca j p'áat cajtal siete ja'abo'obi'.

³Cu dzo'ocol u máan le ja'abo'obo' le co'olelo' suunaj tu lu'umil, ca j bin u yil le ajawo' u ti'al u káat ti'e' ca su'utuc u yotoch yéetel u lu'umo'ob.

⁴Le ajawo' táan ca'ach u t'aan yéetel Giezi, u j palitzil aj bóobat Eliseo, tumen tu káataj ti'e' ca tzicbalta'ac ti' tuláacal le jakbe'en ba'alo'ob tu beetej ca'ach Eliseoe'.

⁵Ti' le súutuc táan ca'ach u tzicbaltic Giezi ti' le ajaw bix úuchic u ca'a cuxquintic Eliseo u paal jun túul co'olele', lela' j kuch u tzáa ti' ajaw u yotoch yéetel u lu'umilo'ob. Giezi, túune' tu ya'alaj ti' le ajawo': Tzicbe'enil, lela' leti' le co'olela', bey xan leti' le paal tu ca'a cuxquintaj Eliseo.

⁶Le ajawo' káat chi'itnaj ti' le co'olelo', leti' túune' tu tzicbaltaj u tzicbalil u cuxtal. Cu dzo'ocole' le ajawo' tu ya'alaj ti' u aj dzíibe' ca u yil ca su'utuc ti' le co'olelo' tuláacal le ba'axo'ob u ti'alo'ob bey xan tuláacal ba'ax tu dzaj u lu'umo'ob ca'aliquil bija'anile' tac ca j suunaji.

⁷Cu dzo'ocole' Eliseoe' j bin tu caajil Damasco. Ti' le kiino'obo' koja'an ca'ach Ben-adad, u ajawil u lu'umil Siria, ca j a'ala'ab ti' dzo'oc u taal le aj bóobato'.

⁸Le ajaw túuno' tu ya'alaj ti' Hazael: Ch'a'a' jun p'éel siibal ca xi'iquex a wil le aj bóobato'. A'al ti'e' ca u káat chi'itnac ti' Yuumtzil u ti'al u yojéeltic wa je'el in cuxtal ti' le koja'anila'.

⁹Hazaele' j bin u yil le aj bóobato', tu bisaj ti' u ma'alobil ba'axo'ob yaan Damasco, cucha'ano'ob tumen cuarenta camello'ob. Le ca j kuch tu táane' tu ya'alaj ti': Ben-adad, u ajawil Siriae', le máax cu pactiquech bey jun túul u taatae', cu túuxtiquen u ti'al in káat chi'itic ti' teech wa je'el u cuxtal ti' le u koja'anilo'.

¹⁰Eliseoe' tu núucaj ti': Xeen a wa'al ti' je'el u cuxtal ti' le u koja'anilo', quex tumen Yuumtzile' dzo'oc u dzáic in wojéelt, yaan u quíimil je'el bixaque'.

¹¹Eliseoe' tu séeblaquil tu ch'icaj u paacat ti' Hazael, lela' tu beetaj u nich'lactal Hazael. Cu dzo'ocole' aj bóobate' jo'op' u yokol,

¹²Hazaele' tu káat chi'itaj ti': ¿In dzuulil, ba'ax o'olal ca wokol? Eliseoe' tu núucaj: Tumen in wojel bíin a beet loob ti' le j israelitaobo', tumen bíin a tóoc u tuulumo'ob, bíin a quíims u táanquelem xi'ipalilo'ob yéetel u yej máascab, bíin a quíims xan u mejen paalalo'ob, bíin xan a je'e' u jobnel le co'olelo'ob yoomchaja'ano'obo'.

¹³Hazaele' tu núucaj: ¡Ba'ale' tene' chéen jun túulen óotzil peek! ¿Bix tun bíin in beet ba'al beyo'? Eliseoe' tu núucaj: Yuumtzile' dzo'oc u dzáic in wojelt teech bíin a beeticabaa u ajawil Siria.

¹⁴Hazaele' tu p'ataj Eliseoe', ca j bin tu táan le ajawo', ajaw túune' tu káataj ti': ¿Ba'ax tu ya'alaj ti' teech Eliseo? Hazaele' tu núucaj: Tu ya'alaj je'el bin a cuxtal ti' le koja'anila'.

¹⁵Ba'ale' tu láak kiine', j bin Hazaele' ca tu ch'a'aj jun p'éel nook, cu dzo'ocol u sulbancuntic yéetel ja'e', tu dzaj tu yóokol u yich le ajawo', le ajawo' j quíimi'. Cu dzo'ocol lela', ajawnaj Hazael tu káanche'.

¹⁶Tu ja'abil cinco táan u ajawil ca'ach Joram u paal Acab, tu lu'umil Israele', Joram u paal Josafate', chu'unpaj u ajawtic Judá.

¹⁷Yaan ca'ach treinta yéetel dos ja'abo'ob ti' ca j chu'unpaj u ajawil, ajawnaj Jerusalén ocho ja'abo'ob.

¹⁸Ba'ale' tu beetaj láili' le ba'alo'ob tu beetajo'ob u ajawilo'ob Israel, yéetel u ch'i'ibalo'ob Acabe', tumen u yatane' ti' u ch'i'ibal Acab u taal: bey túuno' le ba'axo'ob tu beetajo' kaastac tu táan u yich Yuumtzil.

¹⁹Ba'ale' Yuumtzile' ma' tu yóoltaj u xu'uls Judae', tu yo'olal u yaacuntmaj ca'ach David u palitzil, ti' máax tu séeb chi'itaj yaan u yantal tu táane' jun túul u paal cuxa'an.

²⁰Tu kiinilo'ob u ajawil Jorame', Edome' j líik u ba'atelt u lu'umilo'ob Judá ca tu dzaj u ajaw.

²¹Joram túune' j bin Zair yéetel u bolanilo'ob ba'atel, ca j líiko'ob yéetel áakab leti' yéetel le máaxo'ob nu'uctico'ob le u bolanilo'ob ba'atelo' ca j bino'ob yóokol le j edomtaob máaxo'ob bakpachtmailo'ob ca'achi, ca tu beetajo'ob u púudzulo'ob.

²²Ba'ale' Edome' tu yilaj bix u lukesicubáa ti' u páajtalil Judá tac bejela'e'. Ti' xan le kiino'obo' u caajil Libna tu jun páaycunsubáa.

²³U yalab u tzicbalil u cuxtal Joram yéetel tuláacal ba'ax tu beetaje', ti' dzíibta'an tu dzíibil ju'unil u ajawilo'ob Judae'.

²⁴Le ca j quíim Jorame', j mu'uc tu'ux muca'ano'ob u taata yéetel u maama, tu caajil David. Cu dzo'ocole' ajawnaj tu káanche'e', Ocozías u paal.

²⁵Tu ja'abil doce ti' u ajawil Joram u paal Acab tu lu'umil Israele', j chu'unpaj u ajawil Ocozías u paal Joram tu lu'umil Judá.

²⁶Yaan ca'ach veintidós ja'abo'ob ti' ca tu chu'unsaj u ajawil, ajawnaj Jerusalén jun ja'ab. U maamae cu kaaba'intic ca'ach Atalía, ti' u taalbal ca'ach ti' u ch'i'ibal Omri u ajawil Israele'.

²⁷Ocozíase' láili' tu beetaj le ba'ax tu beetaj Acab yéetel u ch'i'ibalo'obe', tu yo'olal tu bisilacubáa yéetel u láaktzilo'ob u yotoch Acab, ba'axo'ob tu beetaje' kaastac tu táan u yich Yuumtzil.

²⁸Ocozíase' tu nupajubáa yéetel Joram u paal Acab u ti'al j ba'atelt Hazael u ajawil Siria, tu caajil Ramot tu lu'umil Galaad. Ba'ale' le j siriobo' tu beetajo'ob loob ti' Joram,

²⁹leti'e' suunaj Jezreel u ti'al u dza'acal ti' le loob beeta'ab ti' tumen le j siriob ichil u caajil Ramot táan u ba'atel yéetel Hazael u ajaw Siria. Bey túuno', tu yo'olal koja'an yanil Jorame', j bin Ocozías u ti'al u xíimbaltic tu caajil Jezreel.