Read Yucateco 2 Reyes 9 Bible Online

2 Reyes 9 - Yucateco bible

2 Reyes 9

¹Aj bóobat Eliseoe' tu t'anaj jun túul ti' u múuch'ul le aj bóobato'obo', ca tu ya'alaj ti': Nu'ucbesabáa u ti'al jóokol. Ch'a'a u chúujil le aceiteo' u ti'al ca xíiquech Ramot tu lu'umil Galaad;

²le quéen kuchuquech te'elo' caxant Jehú, u paal Josafat u yáabil Nimsi. Ooquen tu'ux yane' jun páaycunt ti' máaxo'ob láakintic, ca bisic ti' u láak káasab;

³ch'a'a túun u chúujil le aceiteo', le quéen a wec tu poole' ca wa'alic beya': Bey cu ya'alic Yuumtzila': Tene' quin jun páaycuntiquech u ti'al u ajawil Israel. Cu dzo'ocole' ca je'ic le jool najo' u ti'al u jóokol a wáalcab x ma' je'elelil.

⁴Le j táanquelem aj bóobato' j bin Ramot tu lu'umil Galaad,

⁵le ca j kuch te'elo' tu yilaj much'ucbalo'ob u náacomilo'ob le aj ba'atelo'obo'. Ca túun tu ya'alaj: Yaan ba'ax kabéet in wa'alic ti' in náacom. Jehue' tu núucaj: ¿Máax ichil tuláacalo'on? Le aj bóobato' tu núucaj: Teech in náacom.

⁶Tu séeblaquile' j líik Jehú ca j ooc te j káasabo'. Le aj bóobat túuno' tu wecaj le aceite tu yóokol u pool, ca tu ya'alaj ti': Yuumtzil, u Ku Israele', cu ya'alic: Tene' quin jun páaycuntiquech u ti'al a ajawil Israel, in caajal.

⁷Teech bíin a xu'uls u ch'i'ibal Acab, a dzuulil, bey túuno' ca sutic u jeel we'equic u ki'ikel in aj bóobato'ob yéetel tuláacal in palitzilo'ob, le j we'ec tumen x Jezabele'.

⁸tuláacal u láaktzilo'ob Acabe' bíin u xu'ulsa'aco'ob; bíin in láaj quíims u j xiibilo'ob u caajil Israel, mix jun túul bíin p'áatac cuxa'ani'.

⁹Bin in ca'aj in beet yéetel u ch'i'ibal Acab, le ba'ax tin beetaj yéetel u ch'i'ibal Jeroboam, u paal Nabate', bey xan yéetel u ti'al baasa, u paal Ahías.

¹⁰Wa tu yo'olal x Jezabele', peeko'ob bíin jaantic tu káaxil Jezreel, mix máac cu bin j yantal u ti'al j muquic. Cu dzo'ocol u ya'alique' tu je'aj le jool najo' ca j púudzi.

¹¹Le ca j suunaj Jehú u ti'al u much'quintubáa yéetel u náacomo'ob u dzuule', lelo'oba' tu káat chi'itajo'ob ti': ¿Ba'ax cu yúuchul? ¿ba'ax u biilal taalic u yilech le j choco poolo'? Jehue' tu ya'alaj: Te'exe' a kaj óole'ex, a wojele'ex xan bix u t'aan.

¹²Leti'obe' tu núucajo'ob: Ma' a tusico'on ¡Tzicbalt to'on tuláacal! Jehú túune' tu núucaj: Tu ya'alaj ti' teen lela': Bey cu ya'alic Yuumtzila': Tene' quin jun páaycuntiquech u ti'al a ajawtic Israel.

¹³Tu séeblaquile' jujun túulil ti'obe' tu ch'a'aj u suyeme' ca tu jayajo'ob tu ni' u yooco'ob, tu yóokol le ebtuuno'obo'. Cu dzo'ocole' tu yustajo'ob u baac j taman ca tu yaawtajo'ob: ¡Jehue' leti' ajaw!

¹⁴Jehú, u paal Josafat u yáabil Nimsie', x mucul t'aanaj kaas tu yo'olal Joram. Joram máax j ba'atelnaj ca'ach Ramot tu lu'umil Galaad, u ti'al u toquic tuláacal le j Israelitaob, ti' u aj ba'atelo'ob Hazael u ajawil Siria,

¹⁵dzo'oc ca'ach u suut Jezreel u ti'al u dzaquicubáa ti' le loob beeta'ab ti' tumen le j siriobo' le ca tu ba'ateltaj Hazaele'. Jehue' tu ya'alaj ti' le máaxo'ob láakintique', wa tu jaajil u káato'ob ca u beetubáa ajawe', ma' u cha'ico'ob u jóokol mix máac ti' le caajo', u ti'al ca xi'ic u bis u péectzilil ti' u cajnáalilo'ob Jezreel.

¹⁶Cu dzo'ocole' j na'ac tu bolanil u ba'atele' ca j bin Jezreel, tu'ux yaan ca'ach Joram chilicbal koja'an. Bey xan Ocozías u ajawil Judae', ti' yaan ca'ach u ti'al u xíimbalt Jorami'.

¹⁷Le ca j ila'ab tumen le máax canantic le caaj, wa'alacbal ca'ach yóokol u p'ich tuulumil Jezreel táan u náadzal u múuch'ul u yéet máan Jehue', tu yaawtaj: ¡Je'el cu taal máaco'obo'! Joram túune' tu ya'alaj: Túuxte'ex jun túul máac tu yóokol utzíimin u ti'al u káat chi'itic ti'ob wa táan u taalo'ob u caxto'ob jéedzel.

¹⁸Le j nat' tzíimino' j bin u nactáant Jehú, ca tu ya'alaj ti': Le ajawo' u káat u yojéelt wa táan a caxantic jéedzel. Jehue' tu núucaj ti': Lelo' ma' ba'al a ti'ali', ba'al in ti'al. ¡Dzáaba tin paach! Le máax canantic le caajo' tu ca'a a'alaj: Le aj bisaj t'aano' dzo'oc u kuchul tu yicnalo'ob, ba'ale' ma' tin wilic u suut.

¹⁹Tu séeblaquile' le ajawo' tu túuxtaj u láak máac tu yóokol u tziimin, j kuch tu yicnalo'ob ca tu ya'alaj: Le ajawo' u káat u yojéelt wa táan a taale'ex a caxante'ex jéedzel. Jehue' tu núucaj: Lelo' ma' ba'al a ti'ali', ba'al in ti'al. ¡Dzaabáa tin paach!

²⁰Le máax cu canan caajo' tu ya'alaj tu ca'a téen: Le u láako' dzo'oc u kuchul xan tu yicnalo'ob, ba'ale' ma' táan in wilic u suut. Le máax taasic le bolano' chica'an ti' Jehú, u yabil Nimsi, tumen táan u taasic le bolano' bey jun túul j choco poole', tumen bey le ti'o'.

²¹Joram túune' tu ya'alaj: ¡Nu'ucbese'ex u bolanil in ba'atel! Nuucbesa'ab u bolanil u ba'atel, Joram u ajawil Israel, Yéetel Ocozías u ajawil Judae', jóoko'ob tu jujun túulil yóokol u bolanil ba'atel u nuptanto'ob Jehú. Ca tu nactáanto'ob tu lu'umil Nabot le j Jezreeli'.

²²Jorame' ca tu yilaj Jehue' tu ya'alaj ti': ¿Táan wa a taal a caxant jéedzel, Jehú? Jehue' tu núucaj: ¿Ba'ax jéedzel je'el u yantal ca'aliquil a maama x Jezabel táan u x cáacbachil, cu beetic xan u ya'abcach pulya'ajo'ob?

²³Tu séeblaquile' tu sutajubáa Joram ca j púudzi, ca'aliquil táan u yaawtic ti' Ocozías: ¡Tu'uso'on, Ocozías!

²⁴Ba'ale' Jehue' tu t'inaj u p'unche' ca tu tulaj u julub tu tojil wíinclil Joram, lela' j ooc tu pu'uch ca tu ch'actaj u pucsi'ikal, ca j lúub Joram yóokol u bolan ca j quíimi.

²⁵Jehú túune' tu ya'alaj ti' Bidcar, u j áantaj: Jóokes teelo' ca a pul tu lu'um Nabot le Jezreele', tumen kaja'an ti' tene', teche' ti' yanech ca'ach tin wéetel táan c bisic u bolanil u ba'atel Acab u taata, Yuumtzile' tu xotkiintaj u quíimil beya':

²⁶Je'el bix tin wilaj jo'oljeac u ki'ikel Nabot yéetel u paalalo'obe', bey xan bíin in dzáa ti' teech ba'ax ca najmaltic láili' te j cúuchila'. Teen Yuumtzil, máax a'alic. Bey túuno' j ma'ache' ca j pu'ul ichil u lu'um Nabot, je'el bix tu ya'alajilac Yuumtzile'.

²⁷Le ca tu yilaj Ocozías u ajawil Judá ba'ax cu yúuchule', j púudz tac Bet-hagan. Ba'ale' Jehue' tu ch'a'apachtaj, ca tu ya'alaj: ¡Bey xan leti' quíimse'ex! Ca j beeta'ab loob ti' yóokol u bolan tu jo'ol lu'umil Gur, tu tzéel Ibleam, ba'ale' j puudz tac Meguido. Ti' j quíimi'.

²⁸Cu dzo'ocole' j bisa'ab tumen u palitzilo'ob tac Jerusalén, ti' jun p'éel bolan, ca j mu'uc tu mucnal u láaktzilo'ob tu caajal David.

²⁹Ocoziase' chu'unpaj u ajawil yóokol Judá tu ja'abil once ti' u ajawil Joram, u paal Acab.

³⁰Jehue', le ca tu yojéeltaje' j bin túun tac Jezreel. Jezabele' tu samal bonaj u yoot'el u yicho'ob, ca tu jadzutzquintaj u tzo'otzel u pool; cu dzo'ocole' ca j ch'eenebnaj ti' le calom kiino'.

³¹Le ca j kuch Jehú tu jool le caajo', leti'e' tu ya'alaj ti': ¿Bix a wanil Zimri, u j quíimsaj wíinic a dzuulil?

³²Jehue' tu pactaj tu tojil le calom kiino' ca tu ya'alaj: ¿Máax yaan tin wéetel? Ca'a túul wa óox túul u náacomilo'ob jalach najo' ch'e'enebnajo'ob u ti'al u yilico'ob,

³³ca j a'ala'ab ti'ob tumen Jehú: ¡pule'ex caabal! Leti'obe' tu pulajo'ob caabal, jun jaatz u ki'ikele' tu wi'iwi'idzaj le pako' bey xan le tzíimino'obo', dzandzancha'ata'ab x Jezabel tumen le tzíimino'obo'.

³⁴Cu dzo'ocole' Jehue' j bin janal yéetel ukul. Le ca j suunaje' tu ya'alaj: Ch'a'ex le x loolob co'olelo' ca a muque'ex; tumen je'el bixaque' u x ch'upul paal jun túul ajaw.

³⁵Ba'ale' le ca j bino'ob u muco'obe', chéen ba'ax tu yilajo'ob ti'e' u baaquel u pool, u yooco'ob yéetel u táan u kabo'ob.

³⁶Ca túun j suunajo'ob u ya'alo'ob ti' Jehú, Jehue' tu ya'alaj: Yuumtzile' dzo'oc ca'ach u ya'alic tu chi' u j palitzil Elías le j tisbitail, peeko'ob bíin jaantic u wíinclil x Jezabel tu lu'umil Jezreel,

³⁷u x quimen wíinclile' yaan u p'áatal ki'iki'it bey ta'e', tu yóokol u lu'umil u káaxil Jezreel, mix máac bíin kuchuc kaj óoltic u x quimen wíinclil.