Read Yucateco 1 Crónicas 10 Bible Online

1 Crónicas 10 - Yucateco bible

1 Crónicas 10

¹Le j filisteobo' j líiko'ob u ba'atelto'ob Israel, le j israelitaobo' j áalcabnajo'ob tu táano'ob, tumen ya'ab ti'obe' j quíimo'ob tu pu'uquil Gilboa.

²Le j filisteobo', j bino'ob u ch'a'apachto'ob Saúl yéetel u paalal, ca tu quíimsajo'ob Jonatán, Abinadab yéetel Malquisúa.

³Cu dzo'ocole', tuláacalo'ob j bino'ob u ba'atelto'ob Saúl; ca j chucpachta'ab tumen le aj ba'atelo'obo', ca j dzo'ono'ob yéetel x julte', ca j beeta'ab loob ti'ob.

⁴Bey túuno', tu ya'alaj ti' u palitzil máax canantic u nu'uculo'ob u ba'atel: Jóokes a máascabe', ca a póot lomten tu yéetel, tu yo'olal ma' u taal le ma' ocsaj óolo'ob u quíimseno'ob u ti'al ca u che'ejteno'ob. Ba'ale' u palitzile' ma' tu yóoltaj u póot lomti', tumen sen sajachaji. Saúl túune', tu ch'a'aj u máascabe', ca tu nóocch'intajubáa tu yóokol.

⁵Le ca tu yilaj le palitzil dzo'oc u quíimil Saule', tu nóocch'intajubáa xan tu yóokol u máascabe', ca j quíimi.

⁶Ti' le kiino', bey úuchic u quíimil Saúl yéetel tu yóox túulal u paalal, yéetel tuláacal u láaktzililo'ob.

⁷Le ca tu yilaj le j israelitaob cajnáalo'ob te j táax kóom dzo'oc u púudzul le aj ba'atelo'ob bey xan dzo'oc u quíimil Saúl yéetel u paalale', tu p'atajo'ob u caajalo'obe', ca j púudzo'ob xan. Le j filisteob túuno', j kucho'obe', ca j p'áato'ob cajtali'.

⁸Tu láak kiin le ca j bin le j filisteob u ch'a'ob le ba'ax yaan ti' le quimeno'obo', tu nactáantajo'ob Saúl yéetel u yóox túul paalal jayacbalo'ob tu pu'uquil Gilboa.

⁹Tu pitajo'ob túun u nooke', ca tu bisajo'ob u pool yéetel nu'uculo'ob u ba'atel, ca tu túuchi'itajo'ob aj bisaj t'aano'ob u ti'al bisic u péectzilil ti' tuláacal u lu'umilo'ob filistea bey xan ti' u caajilo'ob yéetel ti' u kuob.

¹⁰Cu dzo'ocole', j dzaab u nu'uculo'ob u ba'atel Saúl tu kulnaj u kuobe', ca j ch'uyquinta'ab u pool tu kulnaj Dagón.

¹¹Le ca tu yojéeltajo'ob u cajnáalilo'ob Jabes tu lu'umil Galaad ba'ax tu beetaj le j filisteob yéetel Saulo',

¹²tu jun p'éelcuntajo'ob u tuuculo'ob le j xiixib máaco'obo', ca tu ch'a'ajo'ob u wíinclilo'ob Saúl yéetel u paalale', ca tu bisajo'ob Jabes. Tu mucajo'ob yáanal jun cúul béec. Cu dzo'ocole', j su'ukinajo'ob siete kiino'ob.

¹³Bey úuchic u quíimil Saúl tu yo'olal u kasa'anilo', tumen j kebanchaj úuchic u x ma' u'uyaj t'antic ba'axo'ob u ya'almaj Yuumtzil, bey xan tumen j bin káat chi' ti' jun túul x wáay

¹⁴iquil tu dzáajilac Yuumtzil jun tzéelil. Bey túuno' Yuumtzile' tu lukesaj u cuxtale', ca tu kubaj u ajawil ti' David u paal Isaí.