Read Yucateco 1 Crónicas 11 Bible Online

1 Crónicas 11 - Yucateco bible

1 Crónicas 11

¹Tuláacal le j israelitaob tu much'ajuba'obe', ca j bino'ob j t'aan tu yéetel David tu caajil Hebrón. Te'elo' tu ya'alajo'ob ti': To'one' t éet ki'ikelech,

²tumen quex Saúl ca'ach c ajawe', teech nu'uctic ca'ach u aj ba'atelo'ob Israel. Cu dzo'ocol xane' Yuumtzile' tu jalach t'antaj ti' teech bíin a beet a méektáanil tu caajil Israel.

³Bey túuno' tuláacal u nuuquilo'ob Israele', j bino'ob j t'aan tu yéetel David tu caajil Hebrón, ca tu beetaj jun p'éel nup t'aan tu yéetelo'ob, ca tu dzaj Yuumtzil aj jaajcunajil. Leti'ob túune' tu jun páaycuntajo'ob David u ti'al u ajawtal Israel, je'el bix u séebch'ichtmail Junab Ku tu chi' Samuele'.

⁴David tu yéetel tuláacal le j israelitaobo' j bino'ob Jerusalén cu kaaba'intic xan Jebús. Le jebusilo'obo', u cajnáalilo'ob ca'ach le cúuchilo',

⁵ca tu ya'alajo'ob ti' David: Teche' ma' bíin páatchajac a wocol waye'. Ba'ale' Davide' tu ch'a'aj u tuulumil Sión, kaj óola'an bejela'e' bey u Caajil David.

⁶Davide' tu ya'alaj ca'achi: Le máax bíin u yáax léecs u ba'ateltic le jebuseobo', leti' bíin in dzáa u beet u náacomil. Joab u paal x Sarviae', leti' tu yáax léeques, ca j dzaab u beet náacomil.

⁷Cu dzo'ocole', j cajlaj David te j tuulumo'; let o'olal j dzaab u kaaba'int u Caajil David.

⁸Ca tu beetaj David le caaj yaan tu bakpacho', líikbal tu níixile', tac tuláacal u bakpacho'ob. Joab dzo'ocbes le caajo'.

⁹Davide', xi'ic u bin u mu'uka'antal, Yuumtzil máax ti' yaan tuláacal páajtalile', ti' yaan tu yéetele'.

¹⁰Lelo'oba' u asab xiixib máaquilo'ob u aj ba'atelo'ob David, leti'ob j mu'uka'anquint u ajawil, leti'ob pa'ate' yéetel le j israelitaobo', tu beetajo'ob u ajawtal je'el bix tu ya'alajilac Yuumtzil ti' Israele'.

¹¹Lelo'oba' u kaaba'ob u asab xiixib máaquilo'ob u aj ba'atelo'ob David: Jasobeam u paal Hacmoni, u nojochil le óox túul asab j xiixib máaco'obo', jun téene' tu quíimsaj trecientos máaco'ob yéetel u x lóomte'.

¹²Cu dzo'ocole', Eleazar u paal Dodo, ahohita, leti' u láak jun túul ti' le asab j xiixib máaco'obo'.

¹³Tu láakintaj David Pasdamim, le kiin tu much'ajuba'ob le j filisteob j ba'atelo'. Te'elo', yaan ca'ach jun p'éel u x péet paachil cebada, le ca j púudz le j israelitaob tu táan le j filisteobo',

¹⁴leti'e' j wa'alaj tu chúumuc le coolo', ca tu tocaj, tumen tu pa'aj u muuk le j filisteobo'. J dzaab ti' tumen Yuumtzil jun p'éel nojoch pa'a muuk.

¹⁵Jun tene', óox túul ti' le treinta j xiixib máaco'obo', j bino'ob j suytuun u núuptáantuba'ob tu yéetel David tu áactunil Adulam. U aj ba'atelo'ob le j filisteobo', ti' je'elecbalo'ob ca'ach tu táax lu'umil Refaime'.

¹⁶Davide' ti' yaan ca'ach ich tuulume', u aj ba'atelo'ob ca'ach le j filisteobo' ti' yano'ob ca'ach Belene'.

¹⁷Davide' tu ya'alaj ba'ax u dzíibolal: ¡Quexi'i wa máax ca u dzáa ti' teen in wuk u ja'il le ch'e'en yaan tu jool u caajil Beleno'!

¹⁸Le óox túul jach j xiixib máaco'ob túuno', j ooco'ob tu'ux jelecbal le j filisteobo', ca tu jóokeso'ob ja' ti' le ch'e'en yaan tu jool u caajil Beleno', ca tu bisajo'ob ti' David. Ba'ale' leti'e' ma' tu yóoltaj u yuki', ba'ale' tu wecaj u ti'al ti'ibil óolal ti' Yuumtzil,

¹⁹ca tu ya'alaj: ¡Ma' u yóoltic Ku ca in wuke'! ¡tumen lelo' u tojol u ki'ikel le j xiibo'ob tu nadzajuba'ob tu chi' quíimil u ti'al u taasico'ob ti' teen in wukej! Ma' tu yóoltaj u yuki'. Le nojoch ba'ala' leti' le óox túul xiixib máaco'ob j beeto'.

²⁰Abisai u sucu'un Joab u paal x Sarviae', leti' ca'ach u nojochil le treinta j xiixib máaco'obo'. Jun téenaque', tu ba'ateltaj trecientos j xiibo'ob yéetel u x lóomte', ca tu quíimsajo'ob. Bey tu náajaltilac u nojoch ba'alil ichil le treinta j xiixib máaco'obo',

²¹ca tu kamaj asab ya'ab tziiquil ti' leti'ob, u beeticubáa u noojocho'ob. Ba'ale' ma' béeychaj je'ebix le óox túulo'obo'.

²²Benaía u paal Joyada j Cabseelil, jun túul j xiixib máac tu beetaj ya'abcach ba'alo'ob ma' bíin tu'ubsaco'obi'. Leti' quíims tu ca'a túul paalal Ariel j moabil. Jun téenac táan u káaxal ye'ebe', j ooc u ta'acbesubáa tu yáanal jun p'éel sajcabe', ca tu quíimsaj jun túul león.

²³Tu quíimsaj xan jun túul j egipcio sen ca'anal u baaquel, cu p'isic ca'ach ca'a p'éel metros ca tac táancoch, u machmaj u x lóomte' bey u x cayche'il u sacalta'al nooke'. Benaíae' tu puljubáa tu yóokol yéetel jun p'éel che', ca tu tocaj u x lóomte' tu kabe', ca tu quíimsaj tu yéetel.

²⁴Le ba'ax tu beetaj Benaía u paal Joyadao', tu beetaj u náajaltic tziiquil ichil le treinta j xiixib máaco'obo';

²⁵tu kamaj tziiquil asab ti'ob, ba'ale' ma' tu quetaj le yáax óox túulo'. Davide' tu dzaj tu táan le aj ba'atelo'ob canantico'.

²⁶Ichil le treinta j xiixib máaco'obo', ti' yano'ob ca'ach: Asael u yíidzin Joab; Elhanán, u paal Dodo j Belenil;

²⁷Samot j harodil; Heles j paltita;

²⁸Ira, u paal Iques j tecoai; Abiezer, j anatotil;

²⁹Sibecai j husail; Ilai ahohitail;

³⁰Maharai j netofail; Heled u paal Baana, láili' j netofaile';

³¹Itai u paal Ribai, ti' u taalbal Gabaae', le yaan tu lu'umilo'ob Benjamine'; Benaía j piratonil;

³²Hidai le cajnáal ca'ach tu xéel ja'il Gaas; Abdiel arbatitail;

³³Azmabet, j bahurimil; Eliaba j saalbonitail;

³⁴u paalal Jasén j gisonita; Jonatán u paal Sage j aritail; Elifal u paal Ur,

³⁵Ahíam u paal Sacar, j araitail xan; Elifal u paal Ur,

³⁶Hefer j mequeratitail; Ahías j pelonitail;

³⁷Hezrail j carmelil; Naarai, u paal esbai;

³⁸Joel u sucu'un Natán; Mibhar j hagrail;

³⁹Selec j amonitail; Naharai j berotil u aj áantaj Joab u paal x Sarvia;

⁴⁰Ira jatiril; Gareb jatiril,

⁴¹Urías j hititail; Zabad u paal Ahlai;

⁴²Adina u paal Siza, j rubenita u nojoch j rubenitaob, yanchaj treinta máaxo'ob láakintic;

⁴³Hanán u paal Maaca; Josafat j mitnitail;

⁴⁴Uzías j astarotil; Sama yéetel Jehiel, u paalal Hotam, ti' u taalbal Aroere;

⁴⁵Jediael u paal Simri Joha u sucu'un le j tizitail;

⁴⁶Eliel j mahanailil; Jerebai yéetel Josabía, u paalal Elnaam; Itma, j moabil;

⁴⁷Eliel, Obed yéetel Jaasiel, j sobailo'ob.