Read Yucateco 1 Crónicas 12 Bible Online

1 Crónicas 12 - Yucateco bible

1 Crónicas 12

¹Ca'aliquil tojolch'inta'an David tu táan Saúl u paal Cise', jun múuch' xiixib aj ba'atelo'ob le bíin u beeto'ob u yéet ba'atelo'obe', j bino'ob u nupuba'ob tu yéetel tu lu'umil Siglag.

²Le aj ba'atelo'oba' u ch'a'amajo'ob ca'ach u x p'úunche'ob, cu páajtal u ch'iino'ob yéetel yúuntune', cu páajtal xan u ch'iino'ob yéetel x p'úunche', je'el bixaque' yéetel u x no'oj kabo'ob wa yéetel u x dzíic kabo'ob. Leti' lelo'ob ca'acha': ichil u láaktzilo'ob Saúl tu ch'i'ibalo'ob Benjamine':

³Ahiezer, u nojochilo'ob, yéetel Joás, u paalal Sama j gabaonitaob; Jeziel yéetel Pelet u paalal Azmavet; Beraca yéetel Jehú, u cajnáalilo'ob Anatot;

⁴Ismaías j gabaonita, jun túul ti' le treinta jach xiixib máaco'obo', leti' u noojocho'ob; Jeremías, Jahaziel, Johanán, Jozabad, j gederail,

⁵Eluzai, Jerimot, Bealías, Semarias; Sefatías, j arufita;

⁶Elcana, Isías, Azareel, Joezer yéetel Jasobeam, j coreitaob;

⁷yéetel Joela', yéetel Zebadías, u paalal Jeroham j Gedoril.

⁸U ch'i'ibalo'ob Gade', j máan xan dze'edzec u j xiibilo'ob tu tzéel David ca'aliquil ti' yaan te j tuulum yaan x tocoy lu'umo'. Leti'ob ca'ache', j xiixib máaco'ob, ca'anbesa'ano'ob u ti'al j ba'atel, u ch'a'amajo'ob xan u chimalo'ob yéetel u x lóomte'ob. Beyo'ob ca'ach leóono'ob cu yáalcabo'ob j káax tu paach quéeje'.

⁹Leti'obe' cu kaaba'intico'ob ca'ach, Ezer, yáax jun túul; Obadías u ca'a túul; Eliab u yóox túul;

¹⁰Mismana u can túul; Jeremías u cinco u túulul;

¹¹Atai u seis u túulul; Eliel u siete u túulul;

¹²Johanán u ocho u túulul; Elzabab u nueve u túulul;

¹³Jeremías u diez u túulul, yéetel Macbanai u once u túulul.

¹⁴Le u ch'i'ibalo'ob Gada' u náacomilo'ob aj ba'atelo'ob. chéen jun túul u chichanil ti'obe', cu ba'atel je'el bix u ba'atel cien máaco'obe', u nojochile', cu ba'atel bey je'el bix u ba'atel mil máaco'obe'.

¹⁵Leti'ob máaxo'ob j ch'act u áalcab ja'il Jordán, tu kiinilo'ob ja'aja'al ti' le kiino'obo' yiyibqui ca'ach yéetel ja', ca tu yáalcabansajo'ob le máaco'ob yano'ob te j táax kóom lu'um yaan j lakin yéetel j chikino'.

¹⁶Dze'edzec xan u j xiibilo'ob u múuch' cajtalilo'ob Benjamín yéetel Judae', j bino'ob u much'uba'ob tu yéetel David te j tuulumo'.

¹⁷Davide' jóok u ti'al kamico'obe' ca tu ya'alaj ti'ob: Wa táan a taale'ex yéetel utzil, ti'al a wáantiquene'exe', quin kamique'ex tu jaajil in wóol; ba'ale' wa táan a taale'ex yéetel u tuuculil a kubiquene'ex ti' in aj p'eeco'ob quex mix ba'al kaas in beetmaje', ¡ila'ac tumen u Ku c máanja'an ch'i'ibalo'ob ca u jadze'ex!

¹⁸Amasai u nojoch le treintao' tu yo'olal ch'a'an tumen pixano', tu ka'am a'alaj: ¡David u paal Isaí, xi'ic utzil ti' teech! ¡Ti' teche' Yanac jéedzel! ¡Yanac jéedzel ti' teech yéetel ti' máaxo'ob áantiquech, tumen Kue', dzo'oc u yáantiquech! J ka'amo'ob tumen Davide', ca j dzaabo'ob ichil u nuuquilo'ob le aj ba'atelo'obo'.

¹⁹Bey xan dze'edzec u ch'i'ibalo'ob Manasese', j máano'ob tu tzéel David le kiin j bin cajtal ichil le j filisteob u ti'al u ba'atel tu yéetel Saúl. Quex tumen Davide', ma' páatchaj u yáantic le j filisteobo', tumen u méektáanilo'obe', tu much'ajuba'obe', ca tu beetajo'ob u suut tu'ux cajacbal, tumen tu ya'alajo'ob: ¡Bíin u kubo'on u ti'al u máan tu tzéel Saúl u dzuulil!

²⁰U j xiibilo'ob u ch'i'ibalo'ob Manasese' tu much'ajuba'ob tu tzéel David le ca j bin Siglague', tu kaaba'intajo'ob Adnas, Jozabad, Jediael, Micael, Jozabad, Eliú yéetel Ziletai, u náacomilo'ob u aj ba'atelilo'ob Manasés.

²¹Lelo'oba', tu yáantajo'ob David tu táan u aj ba'atelo'ob, tumen jach xiixib máaco'ob u ti'al j ba'atel, j kucho'ob u beetuba'ob u nuuquilo'ob le aj ba'atelo'obo'.

²²Sáamsamal ca'ach u kuchul u láak j xiibo'ob u ti'al áantic David, j kuch u much'quintic ya'ab aj ba'atelo'ob, jach tu jaajil jun múuch' mu'uka'an aj ba'atelo'ob.

²³U pa'ate'il le aj ba'atelo'ob chuca'an u nu'ucul u ba'atelo'ob tu much'ajuba'ob tu yicnal David tu caajil Hebrón, u ti'al u kubo'ob ti' David u ajawil Saúl, je'el bix u ya'almajil Yuumtzilo'.

²⁴Ti' u ch'i'ibalo'ob Judae', Seis mil ochocientos j xiibo'ob u ch'a'amajo'ob u chimalo'ob yéetel u x lóomte'ob, chuca'an u nu'ucul u ba'atelo'ob.

²⁵Ti' u ch'i'ibalo'ob Simeone', siete mil cien aj ba'atelo'ob jach xiixib máaco'ob, chuca'an u nu'ucul u ba'atelo'ob.

²⁶Ti' u ch'i'ibalo'ob Levie', cuatro mil seiscientos,

²⁷yéetel u láak tres mil setecientos ti' u láaktzililo'ob Aarón, Joyada u noojocho'ob,

²⁸beyxan Sadoc jun túul j táanquelem aj ba'atel xiixib máac yaan veintidós u nuuquilo'ob aj ba'atelo'ob ichil u láaktzililo'ob.

²⁹Ti' u ch'i'ibalo'ob Benjamín, láili' u láaktzililo'ob Saule', tres mil j xiibo'ob, tac ti' le kiino' asab ya'ab ti'ob ma' dza'ob jun tzéelil Sauli'.

³⁰Ti' u ch'i'ibalo'ob Efraine', veinte mil ochocientos xiixib aj ba'atelo'ob nucuch ba'alo'ob ichil u múuch' láaktzililo'ob.

³¹Ti' u ch'i'ibalo'ob Manasese', dieciocho mil j xiibo'ob, j a'ala'ab ti'ob ca xi'ico'ob u culquinto'ob David u ti'al u beet u ajaw.

³²Ti' u ch'i'ibalo'ob Isacare', docientos u nuuquil aj meyajo'ob nu'ucano'ob u ti'al u yilo'ob ba'ax unaj u beeta'al Israel yéetel tuláacal le j xiibo'ob yaan u ti'al meyajtico'obe'.

³³Ti' u ch'i'ibalo'ob Zabulone', cincuenta mil aj ba'atelo'ob u nu'ucbesmajuba'ob, yaan tuláacal u jejeláasil u nu'ucul u ba'atelo'ob, chuca'an u yóolo'ob u yáanto'ob David.

³⁴Ti' u ch'i'ibalo'ob Neftalie', mil u nuuquilo'ob yéetel treinta yéetel siete mil j xiibo'ob u ch'a'amajo'ob u x lóomte'ob yéetel u chimalo'ob.

³⁵Ti' u ch'i'ibalo'ob Dane', veintiocho mil seicientos aj ba'atelo'ob.

³⁶Ti' u ch'i'ibalo'ob Asere', cuarenta mil aj ba'atelo'ob nu'ucano'ob u ti'al j ba'atel.

³⁷Cu dzo'ocole' tu táanxel tzéelil Jordane', ciento veinte mil u j xiibilo'ob u ch'i'ibalo'ob Rubén yéetel Gad, yéetel u táancoch u ch'i'ibalo'ob Manasés u ch'a'amajo'ob tuláacal u jejeláasil u nu'ucul ba'atel.

³⁸Tuláacal le aj ba'atelo'oba', tu tzolajuba'obe', ca j bino'ob Hebrón tu jaajil u yóolo'ob u ti'al u culquinto'ob David u ti'al u ajawil Israel; cu dzo'ocole', tuláacal u chuucáan le j israelitaobo' tu tucultajo'ob xan tu jaajil u yóolo'ob tu culquintajo'ob David u ti'al u beet u ajawil.

³⁹J p'áato'ob tu yicnal David buul óox p'éel kiin táan u janalo'ob yéetel táan u yukulo'ob, tumen máakanta'ab ba'al u jaanto'ob tumen u yéet caajalo'ob.

⁴⁰Cu dzo'ocole', le máaxo'ob cajnáalo'ob tu tzéelo'ob tac u láaktzililo'ob Isacar, Zabulón yéetel Neftalio', tu bisajo'ob janal tu yóokol burro'ob, camello'ob, tzíimino'ob yéetel wacaxo'ob. Tu bisajo'ob u jejeláasil janalo'ob: Juuch' waajo'ob, pasas, vino, aceite, wacaxo'ob yéetel j tamano'ob; sen ya'ab ba'ax tu bisajo'ob tumen yaan ya'abcach qui'imac óolal Israel.