Read Yucateco 1 Crónicas 13 Bible Online

1 Crónicas 13 - Yucateco bible

1 Crónicas 13

¹Davide' j t'aanaj yéetel tuláacal u nuuquil u aj ba'atelo'ob,

²cu dzo'ocole' ca tu ya'alaj ti' tuláacal u caajil Israel: Wa ca tucultique'ex ma'alobil yéetel wa cu yóoltic Yuumtzile', co'one'ex túuxtic a'albil ti' c éet lu'umilo'ob p'aatalo'ob tac bejela'a' táanxel cúuchilo'ob tu lu'umil Israel bey xan ti' tuláacal aj kiino'ob yéetel j leviob le yano'ob tu caajalo'ob yéetel tu lu'umil tu'ux cu tzéentico'ob u wacaxo'obe', ca c a'al ti'ob ca u much'uba'ob t éetel,

³u ti'al ca c taase'ex u ba'asche' c Ku, tumen líikbal tu kiinilo'ob Saule', tuba'an ti' to'one'ex.

⁴Tuláacal le caajo' tu éejemtaj ca beeta'ac beyo', tumen tu tucultajo'ob ma'alob le ba'ax j a'ala'abo'.

⁵Davide' tu much'quintaj Israel líikbal Sijor tu jáal u xuul Egipto tac u yocbal Hamat, u ti'al u lukesic u ba'asche' Ku Quiriat-jearim.

⁶Cu dzo'ocole', láakinta'an tumen tuláacal Israele', j na'ac Quiriat-jearim, cu kaaba'intic xan Baala le yaan tu lu'umil Judao', u ti'al u lukesic te j cúuchilo' u ba'asche' Ku, u cúuchil tu'ux cu ch'a'a chi'ita'al u kaaba' Yuumtzil, le yaan u jalach káanche', yóokol le Querubino'obo'.

⁷J dzaab le ba'asche' tu yóokol jun p'éel túunben bolano', ca j lukesa'ab tu yotoch Abinadab. Uza yéetel Ahío u ti'al u canantic ca'ach u bin le bolano'.

⁸Ca'aliquile', David yéetel tuláacal Israele', táan ca'ach u bin u kaayo'ob yéetel u yóokoto'ob tu jaajil u yóolo'ob tu táan le ba'asche' je'el bix u bin u yúuchul u paaxil le arpaobo', salteriob, pandero'ob, platillo'ob yéetel trompetaob.

⁹Le ca j kucho'ob ti' le cúuchil kaj óola'an bey u Era Quidone', Uzae' tu tich'aj u kab u ti'al u machic le ba'asche'o' tumen j t'óochpaj le wacaxo'obo'.

¹⁰Ba'ale' Yuumtzile', j p'u'uj tumen tu tich'aj u kab Uza u ti'al u machic le ba'asche'o', ca tu lukesaj u cuxtal tu táan, jach te j cúuchilo'.

¹¹Davide' j p'u'uj úuchic u lukesa'al u cuxtal Uza, let o'olal tu dzaj u kaaba'int Perez-uza le cúuchilo', lelo' leti' u kaaba' tac bejela'e'.

¹²Ti' le kiino' Davide' tu sen ch'a'aj sajaquil tu táan Kue', ca tu ka'am a'alaj: Mix in tucultic in bisic u ba'asche' Ku.

¹³Ma' tu bisaj u ba'asche' Ku tu Caajil Davidi', ba'ale' tu ya'alaj ca bisa'ac tu yotoch Obed-edom, jun túul u j xiib sijnal Gat.

¹⁴U ba'asche' Kue', j p'áat óox p'éel winalo'ob tu yotoch Obed-edom, Yuumtzile', tu qui' t'antaj u láaktzilil Obed-edom yéetel tuláacal ba'ax yaan ti'.