Read Yucateco 1 Crónicas 14 Bible Online

1 Crónicas 14 - Yucateco bible

1 Crónicas 14

¹Iram u ajawil Tiroe', tu túuchi'itaj aj bisaj t'aano'ob ti' David, tu túuxtaj j men pako'ob yéetel j póol che'ob, tu bisajo'ob kuulche'ob u ti'al u beetico'ob u jalach naj.

²David túune' tu na'ataj dzo'oc u jedzcunta'al u méektáan tu lu'umil Israel, tumen dzo'oc u beeta'al u bin utzil ti' u ajawil tu caajil Israel.

³Davide' j yanchaj u láak u yatano'ob Jerusalene', ca j síij u láak u j xibil paalal yéetel u x ch'upul paalal.

⁴Le paalal j síijo'ob tu caajil Jerusaleno' tu kaaba'intajo'ob: Samúa, Sobab, Natán, Salomón,

⁵Ibhar, Elisúa, Elpelet,

⁶Noga, Nefeg, Jafía,

⁷Elisama, Eliada yéetel Elifelet.

⁸Le ca tu yojéeltajo'ob le j filisteob dzo'oc u culquinta'al David u ti'al u ajawint Israele', tu dzajuba'ob u caxto'ob; ba'ale' Davide' tu yojéeltaj, ca jóok u núuptáanto'ob.

⁹Le j filisteobo', ca j ooco'ob tu táax lu'umilo'ob Refaim.

¹⁰Le t o'olale', Davide' j t'aanaj yéetel Yuumtzile' ca tu káat chi'itaj ti': ¿Je'el wa u páajtal in ba'ateltic le j filisteobo'? ¿Je'el a beetic in pa'ic u muuko'obe'? Yuumtzile' tu núucaj ti': Beet loob ti'ob, tumen je'el in beetic a pa'ic u muuko'obe'.

¹¹Davide' j na'ac Baal-Perazim, ca tu pa'aj u muuko'ob. Le t o'olal tu ya'alaj: Bey je'el bix u níiquil ya'abcach ja'e', bey úuchic u je'ic teen bej Ku ichil in aj p'eeco'ob. Ca j dzaab u kaaba'int le cúuchilo' Baal-perazim.

¹²Le j filisteobo' tu p'atajo'ob xan jayacbal u kuobe', ca j túuxta'ab tóocbil tumen David.

¹³Ba'ale' le j filisteobo', j ooco'ob tu ca'a téen tu táax lu'umil Refaim,

¹⁴Bey túuno' Davide' j t'aanaj tu ca'a téen yéetel Kue', ca núuca'ab ti' tumen Ku: Ma' a beetic loob ti'ob actáan, súut pachto'ob, le quéen kuchuquech tu yicnaal u che'ilo'ob le balsamo', ca loobiltico'ob cúulpachil.

¹⁵Le quéen a wu'uy u yúuchul xíimbal tu yóokol u ku'uk le che'obo', pulabáa j ba'atel, tumen lelo', u chíicul ti' yanen actáan ti' teech u ti'al in loobiltic u aj ba'atelo'ob le j filisteobo'.

¹⁶Davide' tu beetaj je'el bix a'ala'abic ti'o' ca tu pa'aj u muuk le j filisteob líikbal Gabaón tac Gezer,

¹⁷bey túuno', j ojéelta'ab tuláacal le caajo'obo', ca j beeta'ab tumen Yuumtzil u ch'a'abal sajaquil ti' tumen tuláacal u múuch'ul le caajo'obo'.