Read Yucateco 1 Crónicas 15 Bible Online

1 Crónicas 15 - Yucateco bible

1 Crónicas 15

¹Davide' tu ya'alaj ca beeta'ac u yotocho'ob tu Caajil David, ca xan tu nu'ucbesaj jun p'éel cúuchil u ti'al u ba'asche' Ku ti' jun p'éel chuuybil naj tu wa'alcuntaj.

²Ca tu ya'alaj túun: Le máax ma' j levitae', ma' unaj u bisic u ba'asche' Kui', tumen leti'e' tu yéeyaj le levitaob u ti'al bisico'ob u ba'asche' Yuumtzil yéetel u ti'al ca u meyajto'ob mantadz.

³Cu dzo'ocole' tu much'quintaj tuláacal Israel tu caajil Jerusalén u ti'al u bisic u ba'asche' Yuumtzil te j cúuchil u nu'ucbesmajo'.

⁴Tu much'quintaj xan u ch'i'ibalo'ob Aarón yéetel j levitaob.

⁵Ti' u ch'i'ibalo'ob Coate' tu much'ajuba'ob ciento veinte: Uriel u j nojocho'ob yéetel u láaktzilo'ob.

⁶Ti' u ch'i'ibalo'ob Merarie', docientos veinte: Asaías u noojocho'ob, yéetel u láaktzilo'ob.

⁷ti' u ch'i'ibalo'ob Jersone' ciento treinta: Joel u noojocho'ob yéetel u láaktzilo'ob.

⁸U ch'i'ibalo'ob Elisafane', docientos: Semaías u j nojocho'ob, yéetel u láaktzilo'ob.

⁹U ch'i'ibalo'ob Hebrone', ochenta: Eliel u j nojocho'ob yéetel u láaktzilo'ob.

¹⁰U ch'i'ibalo'ob Uziele', ciento doce: Aminadab u j nojocho'ob yéetel u láaktzilo'ob.

¹¹Cu dzo'ocole' Davide' tu t'anaj Sadoc yéetel Abiatar, aj kiino'ob yéetel j levitaob Uriel, Asaías, Joel, Eliel yéetel Aminadab,

¹²ca tu ya'alaj ti'ob: Te'ex u chuun oquil u láaktzililo'ob levitaobe', utzquint a wanile'ex yéetel a láaktzile'ex, tu yo'olal u páajtal a bisique'ex u ba'asche' Yuumtzil, u Ku Israel te j cúuchil dzo'oc in nu'ucbesico';

¹³bey le yáax jun jeedzac ma' te'ex taasico', Yuumtzil c Kue' tu lukesaj u cuxtal dze'edzec ti' to'oni', tumen ma' t tucultaj bix unaj c beetiqui'.

¹⁴Le aj kiino'ob yéetel j levitaob túuno', tu yutzquintaj u yanilo'ob u ti'al u páajtal u bisico'ob u ba'asche' Yuumtzil u Ku Israel.

¹⁵Tu cúuchqueléembalto'ob tu katabche'ilo'ob je'el bix u ya'almajil Yuumtzil ti' Moisese'.

¹⁶Tu ya'alaj xan David ti' u nuuquilo'ob le j levitaob ca u caxto'ob ichil u ch'i'ibalo'ob aj kaayo'ob u ti'al j paax yéetel qui' óolal u nu'uculo'ob paax je'el bix salteriob, arpaob, yéetel platillo'ob.

¹⁷Le j levitaobo' tu dzajo'ob Hemán u paal Joel, bey xan Asaf u paal Berequías u láaktzil Hemán; ti' ichil u ch'i'ibalo'ob Merari yéetel u láaktzilo'obe', Etán u paal cusaías;

¹⁸j dzaabo'ob xan dze'edzec u láaktzilo'ob le máaxo'ob yáax a'ala'abo', u ti'al ca meyajnaco'ob ichil u ca'a jaatz aj kaayo'ob: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, yéetel xan u aj canan jool najilo'ob cu kaaba'intico'ob Obed-edón yéetel Jeiel.

¹⁹Hemán, Asaf yéetel Etane', leti'ob ca'ach paxic platillo'ob bronce u caajo'ob.

²⁰Zacarías, Aziel, Semiramot, Jehiel, Uni, Eliab, Maasías yéetel Benaíae', yaan ca'ach u salteriob u ti'al u paaxo'ob je'el bix u pa'axal tumen le j elamitaob,

²¹ca'aliquil Matatías, Elifelehu. Micnías, Obed-edom, Jeiel yéetel Azaríase', yaan ca'ach u arpaob u ti'al u paaxo'ob je'el bix u pa'axal tumen le j siminitaob, u ti'al u cáajsico'ob u kaayo'ob.

²²Quenanías u nojocho'ob le j levitaobo', leti' ilic u bisa'alo'ob, tumen sen yaan ca'ach u na'at.

²³Berequías yéetel Elcanae', leti'ob ca'ach u aj canan jool najilo'ob le ba'asche'o'.

²⁴Aj kiino'ob Sebanías, Josafat, Natanael, Amasai, Zacarías, Benaías yéetel Eliezere', leti'ob ca'ach jóopsic paaxo'ob tu táan u ba'asche' Ku. Ebed-edom yéetel Jehíase', u canan jool najilo'ob xan le ba'asche'o'.

²⁵David túun yéetel u nuuquilo'ob Israel bey xan u nuuquilo'ob le aj ba'atelo'obo', j bino'ob yéetel qui'imac óolal u ch'a'ob tu yotoch Obed-edom u ba'asche'il u nup t'aan Yuumtzil.

²⁶Bey tumen Ku táan u yáantic le j levitaob bisic le ba'asche'o', j quíimsa'ab u ti'al Yuumtzil siete Mejen wacaxo'ob yéetel siete mejen j tamano'ob

²⁷Davide' u búuquintmaj ca'ach jun p'éel buclis nook ma'alob lino u ca'aj, bey xan u búuc tuláacal le j levitaob bisic le ba'asche'o', le aj kaayo'obo', yéetel Quenías máax nu'uctic u bisa'al; Davide' u dzaamaj xan jun p'éel efod lino u ca'aj.

²⁸Tuláacal Israel ca'ach bisic u ba'asche'il u nup t'aan Yuumtzil yéetel u yawatilo'ob qui'imac óolal bey xan u juum u paaxil u baaco'ob j taman, jóopsaj paaxo'ob, platillo'ob, salteriob yéetel arpaob.

²⁹Le ca j kujsa'ab u ba'asche' Yuumtzil tu caajil Davide', x Mical u ch'upul paal Saule', ch'eenebnaj tu calom kiin; le ca tu yilaj táan u yóokot David yéetel sen qui'imac óole', sen lúub kaasil ti'.